Vachpeam Thaun Prosn

Jezun Somiachem Sanjechem Jevonn stapon kelʼlem tednam tannem adim porgottnni korunk dhaddlole 70 xis khoim asle? Te taka soddun gelʼle kai?

Somiachea Sanjechea Jevnna vellar Jezuche 70 xis asonk nant hacho orth, Jezun tankam nakarlole vo te Jezuk sanddun gelʼle oxem nhoi. Punn tea khas kariavollichea vellar, Jezu aplea apostlam sangata vell sarunk sodhtalo.

Te 12 zann zaum vo 70 zann, sogle Jezuche xis asle. Jezun aplea zaitea xisam modlea 12 zannank poilim vinchun kaddle ani tankam apostl mhunn nanv dilem. (Luk. 6:12-16) Tannem “tea Bara zannank apoile” ani “tankam Devachem Raj porgottunk ani duent lokank bore korunk dhaddle” tednam to Galilient aslo. (Luk. 9:1-6) Uprant Judeiant astana Jezun “anik 70 zannank aple xis mhunn vinchun kaddle ani . . . dog-dog zannanchi zoddi korun” dhaddle. (Luk. 9:51; 10:1) Tor hantuntlean, Jezu vixim porgottʼttale te tache xis veg-vegllea vattaramnim asle mhunn amkam kolltta.

Jezuche xis zalʼle Judev lok dor vorsak Paskachi porob chodd korun aplea famili sangata monoitale. (Sutt. 12:6-11, 17-20) Punn Jezu morchea thoddea vella poilim to ani tache apostl Jeruzalemant gele. Tea vellar tannem Judeia, Galili ani Perea-nt aslolea aplea soglea xisank Paskachi porob monounk apounk na. Tor hantuntlean amkam spoxtt kollon ieta ki Jezuk ti porob aplea apostlam sangata monounk zai asli. Tea pasot tannem mhunnttlem: “Hanv koxtt soschea adim hem Paskachem jevonn tumchea borabor jevunk mhaka khub itsa asli.”—Luk. 22:15.

Ani oxem korunk Jezuk ek borem karonn aslem. Karonn to rokddoch “Devacho Menddro” koso ‘sonvsarachim patkam kaddun uddounk’ morcho aslo. (Ju. 1:29) Hem Jeruzalemant zaunchem aslem, zoim Jehovak adim thaunuch bolidanam bhettoitalim. Jehovan Izraelitkarank Ejipttantlean soddoilʼlim mhunn Paskachi porob tanchea ugddasak haddttali. Punn Jezu aplea bolidana vorvim, soglea munxakullak patok ani mornna thaun soddouncho aslo. Tor hem bolidan Paskache porbe poros khub vortem aslem! (1 Kor. 5:7, 8) Jezuchea bolidanak lagon, tache Bara apostl fuddarak Kristi sobhechea buniadiche bhag zaunk pavtole asle. (Ef. 2:20-22) Ani povitr xar Jeruzalema vixim Bible-ant sanglam ki “buniad 12 fatrancher ubi asli, ani tea fatrancher Menddreachea 12 apostlanchim 12 nanvam boroilʼlim aslim.” (Prok. 21:10-14) Hantuntlean, Devacho udʼdhex purnn korunk visvaxi apostlancho ek khas bhag aslo mhunn amkam kolltta. Ani heach pasot Jezu tanchea sangata ho nimanno Pask monounk sodhtalo mhunn ami mhunnonk zata. Uprant rokddench, tannem Somiachem Sanjechem Jevonn stapon kelem.

Jezu sangata tea jevnnak tache 70 ani her xis nasle tem khorem. Punn je xis taka visvaxi ravtole asle tankam sogleank Somiachea Sanjechea Jevnna udexim faido mellcho aslo. Fuddem vochon jea Kristanvank povitr xokte udexim makhlim, tankam sogleank Rajeachea korarant bhitor soronk sondhi mellʼlli, jea vixim Jezun tea rati aplea apostlank sanglolem.—Luk. 22:29, 30.