Jezu Udkacher Cholta

Jezu duentank boro korunk ani meloleank jivont korunk xoktalo. Punn tachea bhair to vadollak ani pavsak pasun thambounk xoktalo. Dongrar magnnem kelea uprant, Jezu Galilichea doriant ek vadoll zata tem polloita. Tache apostl tanchea bottir asle, ani vadollak lagon ti bott fuddem vhoronk tankam khub tras zatale. Jezu dongra thaun denvon ani udkacher cholon tea botti lagim voita. Konn tori udkacher cholon ieta mhunn tache apostl polloitat tednam te bhietat. Punn Jezu tankam sangta: ‘Bhienakat! Hanvuch to.’

Tednam Pedru mhunntta: ‘Somia, khorench tunch zalear, mhaka-i udkacher cholonk hukum di.’ Tednam Jezu Pedruk mhunntta: ‘Mhoje-xim ieo.’ Tor vadoll aslear pasun Pedru botti voilo denvta ani udkacher cholon Jezu lagim vochonk lagta. Punn to Jezu lagim pavot ieta toso, to vadollak polloun bhieta ani buddonk lagta. To mottʼttean bob marunk lagta: ‘Somia, mhaka salvar kor!’ Tednam rokddoch Jezu tachea hatak dhorta ani mhunntta: ‘Tum kiteak dubhavunk laglo? Tuzo bhavarth khoim asa?’

Uprant, Jezu ani Pedru bottir choddttat ani rokddench vadoll thambta. Hem soglem polloun apostlank koxem dislem tem tum zannam? Te mhunnttat: “Tum khorench Devacho Put.”

Jezun oslem vadoll ekuch pavtt thambounk na. Anik eka vellar, Jezu ani tache apostl bottir boson Galili doriechea polttoddi voitale. Jezu bottir fattlea vatten nhidlolo aslo tednam, okosmat ek vhoddlem vadoll suttʼtta. Lharam botticher marunk lagtat ani bott udkan bhorta. Tednam, apostl bhietat ani bob marun Jezuk utthoitat: ‘Guruji, ami morpache asat! Amkam salvar kor!’ Jezu uttʼtta ani doriak mhunntta: “Shhh! Vogi rav.” Tednam rokddench vadoll thambta ani doria xant zata. Tache apostl bhieleat tem polloun, Jezu tankam vicharta: ‘Tumcho bhavarth khoim asa?’ Te eka-mekak mhunnttat: “Vadoll ani doria pasun tachem aikota.” Te ek mhotvachem lisanv xiktat ki tannim Jezucher visvas dovorlear, tankam koslich bhirant aschina.