Paulu Ani Timot

Listrache sobhent, Timot nanvacho ek tornnatto bhav aslo. Tacho bapui Grik aslo, ani tachi avoi Judev asli. Tache avoichem nanv Eunis, ani tachea xemaichem nanv Lois aslem. Tannim dogaimnim Timotak lhanponna thaun Jehova vixim xikoilʼlo.

Paulu porgottnnechea dusrea bhonvddent, Listra voita tednam to thoim Timotak polloita. Timot bhavancho khub mog korta ani sodanch tankam modot korunk toiar asa mhunn Paulu polloita. Tor aplea borabor bhonvddek ieo mhunn Paulu Timotak sangta. Te sangata bhonvddi kortana, Paulu taka hollu-hollu korun bori khobor anik bore toren porgottunk ani dusreank xikounk modot korta.

Paulu ani Timot voitale title-i kodden, povitr xokti tankam vatt dakhoitali. Eke ratik, Paulun ek dorxon polloilem. Tea dorxonant ek munis tankam Masedoniant ieun apnnank modot kor mhunn sangta. Dekhun Paulu, Timot, Silas ani Lukas thoim porgottnni korunk ani noveo sobha suru korunk voitat.

Masedoniachea Tesalonika xarant, zaite lok Kristanv zatat. Hem polloun thoddea Judevank, Paulu ani tachea sangateanchi nattkai zata. Te ek zomo toiar korun bhavank voddit xarachea odhikarea lagim vhortat ani bob marun oxem mhunnttat: ‘He munis Romi sorkarache dusman zaun asat!’ Aplo jiv dhokeant asa mhunn polloun, Paulu ani Timot teach ratik Bereiant pollon voitat.

Bereiantle lok bori khobor aikonk khub urba dakhoitat ani zaite Grik toxench Judev lok Kristanv zatat. Punn Tesalonikentlean thodde Judev ieun, lokank Pauluchea add vochonk uksaitat. Dekhun Paulu Athenant voita, punn Timot ani Silas Bereiantlea bhav-bhoinnank ghottai diunk thoinch ravtat. Tesalonikent Kristanv zalʼlea bhav-bhoinnank lok khub tras ditale. Dekhun, Paulu Timotak tankam modot korunk Tesalonikent dhaddtta. Uprant Paulu, Timotak anikui zaitea sobhamnim urba diunk dhaddtta.

Paulu Timotak sangta: ‘Jehovachi seva kortat tankam tras ietolech.’ Timotak pasun aplea bhavarthak lagon tras sosche poddtta ani jailint voichem poddtta. Punn Jehovak visvaxi ravonk apleak sondhi mellʼlli mhunn chintun to khuxal zata.

Paulu Filipintlea Kristanvank sangta: ‘Hanv Timotak tumchea lagim dhaddttam. Sotant koxem cholchem ani porgottnni koxi korchi tem to tumkam xikoitolo.’ Pauluk Timotacher purnn visvas aslo. Te dogui bore ixtt asle ani tannim sangata mellon zaitim vorsam seva keli.