Sonchalon Monddolla Thaun Chitt

Mogal Bhav-bhoinnimno:

Ami Jehovachi bhokti kortat dekhun ami tachem utor Bible-acho khub valor kortat. Amkam khatri asa ki Bible amkam itihasa vixim sarki mahiti dita, amkam bore margdorxon dita ani Jehova khorench amcho khub mog korta mhunn dakhoun dita. (Stotr 119:105; Lukas 1:3; 1 Juanv 4:19) Bible-antlim moladik sota dusreank xikounk ami anvddetat ani hea pasot “Bible-antlean Xikonk Mellttat Tim Lisanvam” hem pustok bhair kaddunk amkam khuxi bhogta. Hea pustoka vixim thoddi mahiti ami tumkam sangonk sodhtat.

Hem pustok khas korun bhurgeam pasot toiar kelʼlem asa. Punn herankui hem pustok faideache zaun asa jim Bible-a vixim zannam zaunk sodhtat. Bible sogleam pasot asa dekhun tantunt dilʼlea lisanvancher dhean dilolean amkam sogleank faido zata ani amkam khuxalkai melltta.

Munxache survate thaun kitem ghoddlem tem hea pustokant sanglolem asa. Bible-antleo heo ghoddnneo spoxtt ani sompea ritin sangpacho proitn kela. Toxench, eka fattlean ek khoincheo ghoddnneo ghoddleo tem-ui sangpacho proitn kela.

Hea pustokant, fokot kitem ghoddlem tench sangonk na, punn hea pustokant utram ani chitram oxe toren uzar keleant ki Bible-antleo ghoddnneo amchea dolleam mukhar ghoddttat oxem dista. Ani tea ghoddnneant aslolea munxank koxem bhoglem tem-ui ami onnbhovunk xoktat.

Bible-ant amkam don torechea lokam vixim sanglam, zannim Jehovachi adnea pallʼlli ani zannim pallunk na. Ani tanchea thaun amkam kitem xikonk melltta tem pasun hea pustokant sanglam. (Romkarank 15:4; 1 Korintkarank 10:6) Hea pustokant, 14 bhag asat. Dor bhagachea survatek tantunt kitem xikonk mellttolem tem thoddea utramnim sanglolem asa.

Tumkam bhurgim asat zalear, tantunt dilʼle odheai tankam vachun dakhoiat ani thoim dilʼlea chitrancher tanchea sangata bhasabhas korat. Toxench, hantunt dilʼlem dor ek lisanv Bible-a thaun asa hem tankam somzaiat. Hich vatt ami vaddloleank xikoitana uzar korunk zata.

Hea pustoka udexim sot xikonk sodhtat tea sogleank, zaum tim zannttim vo bhurgim Devachea utrantlean lisanvam xikonk ani tim aplea jivitant apnnaunk modot zatoli mhunn amkam khatri asa. Oxem kelʼlean soglim ek famil koxi Jehovachi bhokti korunk pavtolim.