ODHEAI 02

Dev Amkam Koslo Bhorvonso Dita?

Chhaplolem Polloi

Aiz amkam sogleank oddchonneo asat ani taka lagon amkam dukh, khont ani usko zata. Tumkam oxem kednam-i bhoglam kai? Ghoddie tumi duent asat astolim vo tumcho konnui mogacho mela astolo. Oslea vellar tumi chintunk puro, ‘Amche tras kednam-i tori kabar zatole kai?’ Bible amkam hachi zap dita ani tacher ami khatri dovrunk zata.

1. Bible amkam koslo bhorvonso dita?

Aiz sonvsarant itlem dukh-tras kiteak asa tem Bible amkam sangta. Punn titlench nhoi, Dev sogle tras kaddun uddoitolo mhunn Bible-ant boroun dovorlam. Bible sangta, Dev amkam “bhorvanxean bhorlolo boro fuddar” ditolo. (Jeremias 29:11, 12 vachat.) Bible-antle he bhasaunnek lagon amchea mukhar ailolea koslea-i oddchonneancho fuddo korunk ani khuxal ravonk amkam modot zata. Toxench, ami sodankal khuxal astolim mhunn amkam bhorvonso melltta.

2. Fuddarak kitem zatolem mhunn Bible sangta?

Fuddarak, “moronn anik aschem na, dukh anik korchimnant vo roddnnem anik aschem na, ani koslech tras aschenant” mhunn Bible bhasaita. (Prokasovnni 21:4 vachat.) Aiz goribi, onʼneai, duens ani moronn asa, taka lagon lok niraxi zata. Punn fuddarak oslem kainch aschem na. Beginuch hi prithum sobit zatoli ani tacher munxam sasnak jietolim mhunn Bible bhasaita.

3. Bible-ant kelʼleo bhasaunneo purnn zatoleo mhunn ami koxi khatri dovrunk zata?

Zaito lok hea sonvsarant boreponn ietolem mhunn axa dovortat, punn oxem khorench zatolem vo na tem tankam khobor na. Punn, Bible-ant kelʼleo bhasaunneo purnn zatoleoch mhunn ami khatri dovrunk zata. ‘Devachem Utor bariksannen tospaslem’ zalear tantunt kelʼlea bhasaunneancher amcho bhorvonso ghott zaunk pavtolo. (Itihas 17:11) Bible obheas kelʼlean fuddarachea bhasaunneancher tumi bhorvonso dovrunk zata vo na tem tumi tharaunk pavtolim.

KHOLAIEN XIKAT

Bible-ant fuddara pasot kitem bhasailolem asa tem zannam zaiat. Ani Bible-antlea bhorvonxeacher visvas dovorlolean lokank aiz koso faido zala tem polloiat.

Sangata dovorlole fottu: Aichi poristhiti ani fuddarak Bible bhasaita tea poristhiti modem chitrant ontor dakhoila. Him chitram sokol-ui dakhoilʼlim asat.

4. Hea prithumer koslench dukh-tras nastana ami sasnak jietolim mhunn Bible bhasaita

Sokol dilʼleo Bible-antleo bhasaunneo polloiat. Hantuntli khoinchi bhasaunni tumkam avoddli? Ani kiteak?

Tea bhasaunnechea kuxik dilʼlim Bible versam vachun hea prosnam vixim chintat:

Him Bible versam vachun tuka bhorvonso mellʼllo kai? Him versam tujea familik ani ixttank pasun bhorvonso ditolim kai?

Tumi oslea vellar jietat mhunn chintat zoim

KONNUCH . . .	SOGLEANK . . .
dukh bhogcho na, tras soscho na, zanntto zauncho na vo morcho na.—Izaias 25:8.	kuddʼddo, bhero, opong vo duent ascho na.—Izaias 33:24; 35:5, 6.
onʼneai bhogcho na.—Izaias 32:16, 17.	zhuzak lagon tras soscho na vo bhieuncho na.—Stotr 46:9.
adleo vaitt ghoddnneo ugddas korun dukhi zauncho na.—Izaias 65:17.	ap-aplea mogachea meloleank hea prithumer jivont zata tem pollounk mellttolem.—Juanv 5:28, 29.
bori bholaiki astoli ani tornatteam bhaxen xokti astoli.—Job 33:25.	bhorpur jevonn-khann, ap-aplem ghor ani khuxalkai haddtta toslem kam astolem.—Stotr 72:16; Izaias 65:21, 22.
xantin jieunk mellttolem.—Stotr 37:11.	khub borea poristhitint sasnachea-sasnak jieunk mellttolem.—Stotr 37:29.

Ek bhurgo duent aslo punn to bore bolaiken asa ani aple avoi-k veng marta.

Ek dadlo zantto aslo punn atam tornnatto zala ani hat-ghaddient bhaji bhorun gheun voita.

5. Devan kelʼlea bhasaunneam vixim zannam zaun amkam khuxalkai melltta

Aiz sonvsarantle tras polloun zaito lok niraxi zata ani tankam rag ieta. Thoddo lok hi poristhiti sudharunk zhogddim-zhuzam pasun kortat. Bible-antlea bhasaunneam vixim zannam zaun aiz lokank koso faido zala tem polloiat. VIDEO polloun hea prosnanche zobab zannam zaum-ia.

VIDEO: Hanv Onʼneai-a Add Zhuzonk Sodhtalem (4:07)

Sangata Dovorlole Fottu: ‘Hanv Onʼneai-a Add Zhuzonk Soddtalem’ hea viddeo-ntlem chitr. 1. Rafika lhan aslem tednam aplea zatichea lokam sangata kapus kaddtta. 2. Rafika Jehovachea Sakxeanchea odhivexonak poilech pavtti hajir zalam ani veg-vegllea zatiche lok sangata asat tem polloun khub khuxal asam.

Rafika-k koslea oddchonneancho fuddo korcho poddlo?
Lokam sangata aiz pasun bhed-bhav zata hem khorem, punn Bible xiklolean Rafika-k kosli khatri mellʼlli?

Fuddara pasot Bible-ant dilʼlo bhorvonso niraxiponnacho fuddo korunk ani oddchonneo suttaveo korunk amkam adar dita. Mhonnʼnneo 17:22 ani Romkarank 12:12 vachun hea prosnancho zobab zannam zaum-ia:

Bible-antlea bhorvonxea vixim zannam zalolean tumkam koxem dislem? Ani kiteak?

THODDO LOK MHUNNTTA: “Hem soglem fokot aikonk borem dista, punn oxem khoreponnim kednanch zaunchem na.”

Hem soglem zatolem vo na hea vixim tumi khatri korun ghevop kiteak gorjechem?

KITEM XIKLIM

Fuddarak ami khuxalkaien jietolim mhunn Bible sangta. Hem zannam zalʼlean oddchonneancho fuddo korunk amkam adar zata.

Porot Ugddas Korum-ia

Lokank bhorvonso kiteak zai?
Bible fuddara vixim kitem bhasaita?
Fuddarak kitem zatolem tem zannam zalʼlean aiz tumkam koxi modot zatoli?

Odheai somplo ti tarik:

Tumi Kitem Korunk Zata

Hea odheai-ant dilʼlim versam vachun Bible-antlea bhasaunnea vixim anik zannam zaiat.

Anik kitem korunk zata:

Your other goal

ANIK SODHAT

Bhorvonso amkam oddchonneancho fuddo korunk koso modot korta tem zannam zaiat.

“Bhorvonso—Tumkam Khoim Mellttolo?” (Awake!, April 22, 2004)

Zaitea tempa thaun duent asat tankam Bible-antlea bhorvonxea udexim koso adar zaunk xokta tem polloiat.

“Duensachea Vellar Bible Koso Modot Korunk Xokta?” (Web article)

Ho video polloitana, Bible-ant bhasailole sobit bagent, tumi ani tumcho kuttumb khuxalkaien asat mhunn chintat.

Fuddarachea Jivitacher Niallttam (3:37)

Ek munis dusreanchea hokʼka pasot zhuztalo. Punn Bible xikon tachem jivit koxem bodolʼlem tem zannam zaiat.

“Mhojean Sonvsar Bodlunk Zaina” (The Watchtower, July 1, 2013)