AMCHEM KRISTI JIVIT
PORGOTTNNECHEA KAMANT AMCHI KOLA VADDOUM-IA—Sakx Diunk Ulovop Suru Korun
Jezun eke Samariekar baile lagim ulovop suru kelem dekhun to tika sakx diunk pavlo. Vollkhonant tea lokam lagim ulovop suru korunk, ami amchi kola koxi vaddounk zata?
Lokam lagim bore bhaxen uloiat. Jezu thoklolo, tori astana tannem Samariekar baile lagim udok magon ulovop suru kelem. Tor ami pasun ulovop suru korunk, hastea tonddan zap korunk zata ani magir vatavoronna vixim vo halinchea eke ghoddnne vixim ulounk zata. Ugddas dovrat, tumcho dhei survatek fokot ulovop suru korcho. Taka lagon, aiknnaro umed dakhoita toslea vixoi-acher uloiat. To vo tem ulounk umed dakhoina zalear kaim nozo, tumi anik konnam lagim ulouncho proitn korunk zata. Dhiran ulounk Jehova lagim magat.—Ne. 2:4; D.I. 4:29.
Sondhi melltta thoim bori khobor sangonk toiar ravat. Punn, uloitana goddbodd korinakat, susegad uloiat. Tumi sangtat tem aikonk, aiknnaracher dobhav ghatlear to ghoddie ulovop bond korunk xokta. Tumi sakx diunche poilinch tumchem ulovop bond zalem zalear, nirax zainakat. Bori khobor sangonk tumkam bhirant dista zalear, sakx diuncho dheai dovor nastana, bexttinch eka vixoi-acher ulovop suru korcho proitn korat. [Viddeo 1 dakhoi ani tacher bhasabhas kor.]
Tumi kallzant thaun tumchea bhavartha vixim kitem tori sangat. Tem aikon aiknnaro tea vixim anik prosn vicharunk lagot. Oxe toren, sakx diunk tumkam ek sondhi mellttoli. Jezu osle vixoi uloilo jem aikon ti bail ekan-ek prosn vicharit ravli. Ani to tika bori khobor sangonk laglo tednam to fokot tichea prosnache zobab dilʼlea sarkem aslem. [Viddeo 2 dakhoi ani tacher bhasabhas kor, uprant viddeo 3 dakhoi ani tacher bhasabhas kor.]