Tumchea Bible Videartheank Xikounk Viddeo Uzar Korat

Pollounchim sadhonam uzar kelolean lokank xikoitat tacher dhean diunk, somzonk ani xikleant tem ugddasak dovrunk modot zata. Amcho Vhodd Xikounnar Jehovan, amkam gorjechim lisanvam xikounk, ami pollounk xoktat tosleo vostu uzar keleo. (Ut. 15:5; Jer. 18:1-6) Vhodd Guruji Jezun pasun toxench kelem. (Mt. 18:2-6; 22:19-21) Halinchea vorsamnim ekdom faideak poddlam toslem, pollounchea sadhonam modlem ek sadhon mhunnttlear, viddeo. Tumchea Bible videartheank xikoitana tumi he viddeo uzar kortat kai?

Devan Dilʼli Bori Khobor! he pustikentlean xikoitana modot zaunk dha viddeo toiar kelole asat. Chodd korun, dor eka viddeo-cho vixoi pustikent mottea okxorant dilolea prosna sombondit asa. Tumi jw.org website-icher hea pustikechem digital version uzar kortat zalear he viddeo kednam dakhounche tem ugddas korunk tea-tea zagear link dilolem asa. Hachea bhair, amchea Seve Pasot Mukhel Prokaxonam, hantunt aslolim veg-vegllim obheasachim prokaxonam uzar kortana anik mahiti diunk her viddeo pasun asat.

Tumchea Bible videarthea sangata tumi bhasabhas kortat to vixoi taka somzonk kotthin zata kai? Vo tumchea videartheak koslea-i oddchonnek tondd diunk poddlam kai? Tumchean jw.org® ani JW Broadcasting® hancher taka faideak poddonk xokta tosle viddeo sodhunk zatat. Tumi ani tumchea videarthean ghoddie tantuntlo ek viddeo sangata mellon pollounk zata, ani uprant tacher bhasabhas korunk zata.

Dor mhoineak, amkam nove viddeo mellot astat. Te polloitat tednam, tumi dusreank xikoitana te koxe uzar korunk zatat tem chintat.