Borea Udharonnantlean Xiklolean Mhaka Zaitim Besanvam Favo Zalim

Hanv Quebec xarant French uloitolea Canada prantant zolmolo. Mhojea avoi-bapain Louis ani Zélian mhaka mogan vaddoilo. Mhozo bapui chodd uloinaslo, punn taka vachunk avoddttalem. Mhaka borounk avoddttalem ani mhaka ek potrkar zaunchi khuxi asli.

Hanv 12 vorsancho aslo tednam mhojea paichea sangata kam korpi, Rodolphe Soucy, aplea ixtta sangata amchea ghora ailo. Te Jehovache Sakxi asle. Jehovachea Sakxea vixim mhaka titli khobor nasli ani tanchea dhorma vixim chodd zannam zaunk mhaka umed nasli. Punn tim jea ritin Bible uzar korun prosnanche zobab ditalim tem mhaka avoddttalem. Mhojea avoi-bapaik pasun tem avoddlem. Taka lagon ami Bible obheas gheunk suru kelo.

Tea vellar hanv Catholic iskolant voitalo. Thodde pavtti mhojea borabor xiktat tea bhurgeam lagim hanv Bible-ant kitem xikla tea vixim bhasabhas kortalo. He amche xikxok je padri asle tannim aikolem ani Bible-antlean hanv kortam tem chukichem mhunn dakhounchea bodlek tanchea modlea eklean akʼkhe klasi mukhar hanv tanchea add voitam mhunnttlem. Tea poristhiticho fuddo korunk sompem naslem punn tacho ek boro porinnam zalo. Karonn iskolant xikoitat teo dhormik xikounneo, Bible kitem sangta tachea pormonnem nasleo mhunn hea bhasabhasa udexim mhaka kollon ailem. Hanvem tea iskolant xikop bond korunk zai mhunn hanv somzolo ani mhojea avoi-bapaik sangon hanv dusrea iskolant vochonk laglo.

MHAKA PORGOTTNNECHEM KAM KITEAK AVDDONK LAGLEM

Hanvem mhozo Bible obheas chaluch dovorlo. Punn hanv titli vaddavoll korunk pavonk na, karonn mhaka ghor-ghoran vochon porgottnni korunk bhirant distali. Catholic igorjecho thoinchea lokancher boroch tabo aslo ani te porgottnnechea kamacho khor virodh kortale. Maurice Duplessis, ho Quebec-acho rajnoitik odhikari aslo ani to church-i sangata mellon kam kortalo. Tacho tenko aslolean, lokancho zomo Sakxeank domkaitale ani tancher akromonn kortale. Tea vellar porgottnni korunk khorench dhirachi goroz asli.

Mhoji bhirant pois korunk John Rae, hea bhavan mhaka modot keli zo Gilead School-achea nnovea klasicho videarthi aslo. John ho bhav khub onnbhovi aslo. To xant ani khalto aslo. Ani konnui tachea lagim ulounk fattim soro nasle. Tannem chodd korun aplea utramnim nhoi, punn borea udharonnantlean mhaka xikoilem. Taka French bhaxa ulounk kotthin zatali. Taka lagon hanv zaite pavtti tachea sangata porgottnnent voitalo ani French bhaxent ulounk hanv taka modot kortalo. Tachea sangata vell sarlolean Jehovacho Sakxi zauncho nirnnoi gheunk mhaka modot zali. Sakxeank mellon dha vorsam uprant, hanvem May 26, 1951-ant bautizm ghetlo.

Quebec xarant aslolea amchea lhan sobhent choddxim bhav-bhoinnam pioneer aslim. Tanchea borea probhavak lagon hanv pioneer zaunk pavlo. Tea vellar ami fokot Bible uzar korun ghor-ghoramnim porgottnni kortalim. Ami sevent prokaxona uzar korinaslim dekhun amkam Bible-antlim versam bore toren uzar korunk poddttalim. Taka lagon, heranchea prosnanche zobab bore toren diunk Bible-antlim versam zannam zaunk hanvem proitn kelo. Punn zaitim zannam, Catholic Igorjecho chhap naslolea eka Bible-a thaun vachunk pasun fattim sortalim.

1952-ant, hanv Simone Patry nanvachea eka visvaxi Sakxea sangata kazar zalo. Ami Montreal xarant ravonk gelim ani eka vorsa bhitor amkam ek cheddum zolmolem. Tachem nanv Lise. Kazar zaunchea poilim hanvem pioneer seva bond kelʼli. Devachea sevent zata titlem korunk ani amchem jivit sadem dovrunk hanvem ani Simone-an proitn kelo.

Pioneer seva bond korun dha vorsa uprant, hanvem porot pioneer seva suru korunk chintlem. 1962-ant, vhoddilam pasot ek mhoineacho Raj Seva Kors aslo. To Kors Canada Bethel-ant aslo zoim mhaka Camille Ouellette hea bhava sangata ravonk mellʼllem. Camille ho kazari aslo ani taka bhurgim aslim. Tori astana seva pasot taka asloli urba polloun hanv ojap zalo. Tednam Quebec xarant bhav-bhoinnak bhurgim aslear tim pioneer seva korinaslim. Tori astana pioneer seva korcho Camille-cho dhei aslo. Ami sangata astana tannem mhaka-i ho dhei dovrunk urba dili. Thoddea mhoinea uprant tea vixim hanvem chintlem tednam hanv niemit pioneer zaunk xokta mhunn mhaka kollon ailem. Hanvem ghetlolo ho nirnnoi thoddeank sarko disonk na. Tori astana hanvem pioneer seva suru keli karonn Jehova mhaka chodd porgottnni korunk modot kortolo mhunn mhaka khatri asli.

QUEBEC XARANT KHAS PIONEER MHUNN DHADDLIM

1964-ant, amkam khas pioneer mhunn mhojea ganv-ghora Quebec xarant seva korunk dhaddlim. Fuddlim thoddim vorsam ami thoim seva keli. Poilim poros atam thoim porgottnni korunk sompem aslem. Punn thoddea lokancho azun pasun virodh aslo.

Ek dis Sonvara donparam, Quebec xara lagim Sainte-Marie nanvachea eka lhan ganvant mhaka pulisamnim dhorun vhelo. Hanv ghor-ghoramnim porvangi nastana porgottnni kortalo mhunn eka odhikarean mhaka pulis station-ar vhoron jailint ghatlo. Uprant mhaka Baillargeon hea neai korpea fuddem vhelo zo sogleank bhivoitalo. Tujea pasot korttant konn uloitolo mhunn tannem mhaka vicharlem. Jednam hanvem Sakxeancho vokil Glen How-achema nanv ghetlem, to nervos zalo ani tannem mhunnttlem: “Are re! To nakach!” Ho bhav ek boro vokil aslo ani Jehovachea Sakxeank korttant zoit melloun gheunk zaite pavtti modot kelʼli mhunn lokank khobor asli. Uprant korttan hanv guneanvkari nhoi mhunn tharailem.

Quebec xarant amchea kamacher virodh aslo dekhun mittinge pasot zai, to zago sodhunk pasun amkam kotthin zalem. Uprant ami eka pornea garage-int mellon ietalim. Thoim khub thonddi khatali. Khub xim poddttali tednam, gormi mellonk amchea bhavamnim ek telacher cholta toslo heater haddlo. Mitting suru zaunchea poilim, thoddim voram ami heater-a sorvbhonvtim ubim ravtalim ani urbebhorit onnbhov eka-mekak sangtalim.

Atam mere zalolea porgottnnechea kamachi vaddavoll polloun khub borem dista. 1960 hea vorsa uprant, Quebec xarant, Côte-Nord ani Gaspé Peninsula vattarant mellon fokot thoddeoch sobha asleo. Punn aiz hea vattaramnim dona poros chodd sorkitt asat ani bhav-bhoinnam sobit Raj-ghoramnim mellon ietat.

BHONVDDI KORCHEA KAMANT AMONTRONN MELLʼLLEM

1970 hea vorsak, sorkittachem kam korunk Simone ani mhaka amontronn mellʼllem. Uprant 1973 hea vorsak amkam district kam korunk nemlim. Tea vorsamnim hanv Laurier Saumurb ani David Splane,c hea bhavam koddlean zaitem xiklo. Te dogui bonvddechem kam kortale. Dor ek assembly zalea uprant, David ani hanv amchi xikoupachi kola koxi vaddounk zata tea vixim eke-mekak sangtale. Ek pavtt Davidan mhaka sanglolem tem mhaka ugddas asa. Tannem mhunnttlem: “Léonce, tujem xevottachem bhaxonn borem aslem. Punn tujea bhaxonnant je mudʼde asle tem hanv mhojea tin bhaxonnant sangtolom aslo.” Hanvem mhojea bhaxonnant bhorpur mahiti sangloli. Tor hanvem mhojea bhaxonnant hi sudarnni korunk zai asli mhunn mhaka kollon ailem.

District-achi dekhrekh korpeank, sorkittachi dekhrekh korpi bhavank urba diunchi zobabdari asli. Punn Quebec-ant aslole zaite porgottnnar mhaka vollkhotale dekhun, hanv jednam tea sorkittant bhett diunk voitalom, tednam te mhojea sangata kam korunk sodhtale. Tanchea sangata porgottnnent vochonk mhaka-i avoddttalem. Punn hanv sorkittachi dekhrekh korpi bhava sangata zai titlo vell sarinaslo. Ek pavtt eka mogall sorkittachi dekhrekh korpi bhavan mhojea ugddasak haddlem: “Bhavam sangata vell sarop borem zaun asa punn hea sumanant tum mhaka mellonk aila mhunn visornaka. Mhaka pasun urbechi goroz asa!” Hea doiall solʼlea thaun mhaka zaitem xikonk mellʼllem.

1976-ant, okosmat ek dukhachi ghoddnni ghoddli. Mhoji mogall bail Simone khub bori na zali ani bhair poddli. Hem dukh sosunk porgottnni kelolean mhaka khub modot zali. Hea kotthin poristhitint Jehovan mhaka mogan tenko dila mhunn hanv tacho khub upkari. Mhoji bail ek bori sangatin asli. Ti sodanch dusream vixim chintali ani ti Jehovacho khub mog kortali. Uprant hanv Carolyn Elliott-a lagim kazar zalo. Ti Quebec-ant porgottnnaranchi chodd goroz asa thoim seva korunk ailoli. Ti Inglez bhas uloupi ek urbebhorit pioneer zaun asli. Carolyn-ak dusreanchi khub kallji asa. Lojetat toslim ani eksurim asat tim pasun tiche lagim ieun ulounk fattim soronant. Mhojea bhonvddechea kamant ticho mhaka zaito adar mellʼllo.

EK MHOTVACHEM VOROS

Janer 1978-ant, Quebec-ant zalolea poilea Pioneer Seva Korsant xikounchi sondhi mhaka mellʼlli. Hanv khub nervos zalo, karonn hanv kednanch Pioneer Korsak vochonk naslo. Ani thoim xikounk uzar kortale tem pustok pasun hanvem pollounk naslem. Tor, videartheam bhaxen, mhaka pasun soglem novem aslem. Punn, tea klasint zaite onnbhovi pioneer asle mhunn borem zalem. Hanv xikxok ason-ui videartheam thaun mhaka zaitem xikonk mellʼllem!

Uprant 1978-ant, Montreal Olympic Stadium-ant ontoraxttria odhivexon zalem. Tacho vixoi “Victorious Faith,” ho aslo. Hem Quebec-ant zalʼlem sogleam-von vhodd odhivexon aslem. Taka 80,000-a von chodd lok ailole. Mhaka Khobro ani Mahiti Seva Khateant kam korunk sanglem. Hanv zaitea potrkaram lagim uloilo. Tannim amchea vixim bori mahiti dili mhunn hanv khub khuxal zalo. Amchea sangata bhasabhas zaloli hi mahiti TV-cher ani radio-cher ghatli. Ti kariavoll 20 voram von chodd vell asli. Ani tannim xemboramnim lekh chhaple. Hea udexim amchea vixim sogleank ek bori Sakx mellʼlli!

EKA NOVEA VATTARANT SEVA

1996-ant, amchea sevent ek vhodd bodlav ailo. Mhojea bautizma uprant, Quebec-ant French bhas uloitat toslea sobhamnim hanvem seva kelʼli. Punn atam mhaka Toronto vattarant aslolea Inglez bhas uloupi sobhamnim bhett diunk dhaddlo. Hea kamak hanv purto na, oxem mhaka dislem. Karonn, Inglez bhaxen bhaxonnam diunk hanv bhietalo. Jehova lagim porot-porot magnnem korunk ani tacher anik chodd patieun ravonk mhaka goroz asli.

Toronto vattarant seva korchea poilinch hanv bhielo. Punn don vorsam thoim seva kelea uprant mhaka khuxalkai mellʼlli mhunn hanv sangonk xokta. Carolyn-an mhaka pasiensan modot kelolean mhaka Inglez bhaxen ulounk anik sompem zalem. Bhavam koddlean mhaka khub tenko ani urba mellʼlli. Ani rokddinch ami zaitim ixttam korunk pavlim.

Sonvara ani Aitara hanv zomatichea kariavolli pasot toiari kortalo. Ani her kamam bhair, hanv choddso Sukrara sanjer sumar ek vor ghor-ghoramnim porgottnni kortalo. Zomatichem itlem kam astana, porgottnnent anik kiteak bhag gheunk zai, mhunn thoddeank dislem astolem. Punn, porgottnnent lokam lagim uloitana mhaka urba mellttali. Ani aiz pasun porgottnnent bhag ghetana hanv khub khuxal zata.

1998-ant, Carolyn ani mhaka portun Montreal-ant khas pioneer mhunn dhaddli. Zaitim vorsam hanv khas jahir porgottnni manddavoll korchem kam kortalo. Ani Jehovachea Sakxeam vixim lokank aslolem chukichem chintop kaddunk potrkaram sangata kam kortalo. Atam Carolyn ani hanv halinch Canada-nt dhaddlolea pordexank porgottunk sontostat. Bible-a vixim chodd zannam zaunk, chodd korun hea lokank itsa asta.

Jehovacho sevok mhunn bautizm gheun mhaka 68 vorsam zalim. Ani hea vixim hanv chintʼta tednam mhaka khub khuxalkai bhogta. Porgottnnent khuxalkai koxi melloun gheunchi, hem xiklolean ani zaitea zannank sot xikonk modot kelolean aiz hanv ekdom khuxal. Mhoji dhuv Lise-k bhurgim zalea uprant, ti ani ticho ghov niemit pioneer mhunn seva korunk laglim. Lise-k porgottnnent azun pasun urba asa ti polloun mhaka khuxalkai bhogta. Hanv mhojea bhav-bhoinnancho khub upkar attoita. Karonn tanchea borea udharonna udexim ani zannvaiechea solʼlea udexim hanv Jehova sangata ghott ixttagot zoddunk ani tachi seva veg-vegllea toren korunk pavlo. Jehovachea povitr xoktechea bollacher patieun ravlearuch tachem songotton amkam sangta tem korunk ami pavtat mhunn hanv xiklo. (St. 51:11) Ani tachea nanvachi vakhannʼnni korchea moladik sueoga pasot hanv Jehovache khub upkar attoit asta!—St. 54:6.