Amcho Bap Jehovacho Ami Khub Mog Kortat

1-2. Amkam aplea familicho bhag zaunk, Jehovan kiteak ani koxi vatt utki kelea?

JEHOVACHI bhokti kortat te lok, ek famil koxi asat. Ani tea familicho bhag zaunk tannem amkam ieukar dila. Hem amontronn ekdom khas zaun asa. Hea familichea sodoxeamnim, Devak aplem jivit somorponn kelam ani tachea Putachea soddvonnechea bolidanacher bhavart dovorla. Amchea hea familint soglim khuxal asat. Amchea jivitak ek orth aslolean ani sorgar vo Sobit Bag zatolea prithumer sasnank jieuncho bhorvonso aslolean ami khuxal zatat.

² Jehova amcho khub mog korta dekhun tannem amkam aplea familicho bhag zaunk vatt ukti kelea. Punn hem korunk taka ekdom vhodd teag korcho poddlo. (Juanv 3:16) Tannem amkam “kimot farik korun” ghetleant. (1 Kor. 6:20) Tea soddvonne udexim ami Jehova sangata ek ghott ixttagot zoddunk xoktat. Tea bhair, vixvant sogleant vhodd podvi asloleak amcho Bap mhunnpacho ek vhodd sueog amkam melltta. Ani poilinchea lekhant ami bhasabhas kelʼlea pormonnem, Jehova sogleam-von boro Bapui zaun asa.

3. Ami amkanch kosle prosn vicharunk xoktat? (“Jehova Mhojer Dhean Dita Kai?” hem boks pasun polloiat)

³ Eka Bible boroupea sarkim, ami amkanch oxem vicharunk xoktat: “Sorvesporan mhaka itlem borem kelam: koso mhonn hanv Taka farik kortolom?” (St. 116:12) Khorem mhunnttlear, amchea sorginchea Bapak ami kednanch farik korunk xokona. Punn tannem dakhoilʼlea mogak lagon ami tacho mog korunk fuddem sortat. Apostl Juanvan boroilem: “Tannem poilo amcho mog kelo dekhun, ami-i mog korum-ia.” (1 Juanv 4:19) Ami amchea sorginchea Bapacho mog kortat mhunn khoinchea vattamnim dakhounk xoktat.

JEHOVACHEA LAGIM RAVAT

4. Jakob 4:8-ant sanglolea pormonnem, Jehovachea lagim soronk ami kiteak proitn korunk zai?

⁴ Ami tachim ixtt zalolim ani tachea lagim uloilolim Jehovak zai. (Jakob 4:8 vachat.) To amkam “thambonastana magnnem korat” mhunn urba dita ani to amchem sodanch aikota. (Rom. 12:12) To amchem magnnem aikon thokona ani amchem magnnem aikonk to sodanch toiar asta. Ami tachem Utor, Bible ani tem somzonk modot kortat toslim prokaxonam vachtat tednam ami tachem aikotat. Mittingent ami dhean diun aikotat tednam pasun ami tachem aikotat. Bhurgim aplea avoi-bapai lagim sodanch uloitat tednam tanchea modem aslolo sombond ghott zata. Heach toren, ami Jehova lagim sodanch uloitat tednam tachea sangata amcho sombond ghott zata.

5. Ami amchim magnnim anik bore toren koxim korunk xoktat?

⁵ Tumi Jehovak kortat tim magnnim koslea torechim asat tea vixim chintat. Amchea kallzantlim chintnam ani bhavnam ami taka sanglolim Jehovak zai. (St. 62:8) Ami amkanch ho prosn vicharunk zata: ‘Mhojim magnnim voilea-voir mhunnttlolim vo boroun dovrun mhunnttlolim koxim asat kai, vo tim kallzant thaun ailolim asat?’ Tumi Jehovacho khub mog kortat ani tachea sangata tumchi ixttagot ghott dovrunk sodhtat tem khorem. Punn hem korunk tumi sodanch tachea sangata ulounk zai. Tumkam kallzant koxem dista tem taka sangat. Tumkam kitem khuxalkai haddtta ani kitea pasot tumi dukhi zatat hem taka sangat. Tumkam modotichi goroz asta tednam to tumkam modot kortoloch mhunn khatri dovrat.

6. Ami amchea sorginchea Bapa lagim uronk kitem korunk zai?

⁶ Ami sodanch upkari astat tednam ami amchea sorginchea Bapa lagim uronk xoktat. Stotrkaran pasun oxench kelem. Tannem mhunnttlem: “Kitlim Tujim vismitam, Sorvespora, mhojea Deva! Jem sogllem amche khatir ievjilai, tachem map-mezop na! Tuje sarko dusro konn? Tujim sogllim kortutvam hanv vornnin zalear, tim ucharum-nozo titlim!” (St. 40:5) Ami fokot kallzant upkari aslear pavona. Punn ami tem utramnim ani korneamnim dakhoun diunk zai. Ami oxem kortat tednam aiz sonvsarantlea zaitea lokam poros ami vegllim asat mhunn dison ietolem, zoim lok Devan tanchea pasot jem kitem kelam tachim tim upkari nant. Khorem mhunnttlear, “nimannea disamnim” lok onupkari zatole mhunn Bible-ant sanglam. (2 Tim. 3:1, 2) Amkam toxem kednanch zaunk naka.

7. Ami kitem kelolem Jehovak zai, ani kiteak?

⁷ Aplim bhurgim eka-meka sangata zhogoddlolim khoincheach avoi-bapaik naka. Punn tim eka-mekachim ixtt zalolim tankam zai. Teach toren, Jehovak pasun tachim soglim bhurgim eka-mekachim ixtt zalolim zai. Khorem mhunnttlear, amkam eka-mekacho mog asa dekhun ami khorim Kristanv mhunn dusrim amkam vollkhotat. (Juanv 13:35) Hachea vixim Stotrkaran jem boroilʼlem toxench amkam dista. “Khorim bhavbhoinn koxim zor ekcharan jietat sogllim, kitlem borem, kitlem sobit!” (St. 133:1) Ami amchea bhav-bhoinancho mog kortat tednam amkam Jehovacho mog asa mhunn dakhoun ditat. (1 Juanv 4:20) “Eka-meka thaim doiall-movall kallzachim” bhav-bhoinnam aslolea familicho bhag zaunk ami kitlim khuxal!—Ef. 4:32.

JEHOVA SANGTA TEM PALLUN TUMCHO MOG DAKHOIAT

8. 1 Juanv 5:3- a pormonnem, ami Jehovachem Utor pallunk mukhel karonn khoinchem?

⁸ Bhurgeamnim aplea avoi-bapaichem utor pallʼllolem Jehovak zai, toxench ami pasun tachem utor pallʼllolem taka zai. (Ef. 6:1) Jehova amcho Rochnnar, jivitant goroz tem soglem diupi ani sogleancho bapui zalʼlean ami tachem utor pallunkuch zai. Punn, ami Jehovachem Utor pallunk mukhel karonn mhunnttlear ami tacho mog kortat. (1 Juanv 5:3 vachat.) Tachem Utor pallunk amkam zaitim karonnam asat tem khorem, punn tem korunk to amcher dobhav ghalina. Jehovan amkam borem-vaitt vinchun kaddchem dennem dilam. Ani amkam tacho mog aslolean ami tachem Utor pallunk vinchun kaddttat tednam to khuxal zata.

9-10. Devache dorje zannam zavop ani tea pormonnem jievop kiteak gorjechem zaun asa?

⁹ Avoi-bapaink aplim bhurgim surokxit aslolim zai. Taka lagon tanchea surokxotaiek pasot tim kaide kortat. Ani tantuntlean bhurgeank faido zata. Bhurgim te kaide pallttat tednam tankam aplea avoi-bapaicher visvas ani resped asa mhunn ti dakhoun ditat. Toxem zalear, amchea sorginchea Bapan dovorlole dorje zannam zavop ani tanchea pormonnem jievop kitlem gorjechem. Oxem kortat tednam ami Jehova pasot mog ani resped dakhoitat ani tantuntlean amkam faido pasun zata. (Iz. 48:17, 18) Punn jim konn Jehovak ani tachea dorjeank nakartat, tim apleacheruch tras haddttat.—Gal. 6:7, 8.

¹⁰ Ami Jehovak manta tea toren jietat tednam amchi bholaiki bori urta. Amchea bhavnancher poddttat tea vaitt porinnama thaun ami surokxit uronk xoktat. Ani Jehova sangata aslolea amchea ixttagoticher poddtta tea vaitt porinnama thaun ami surokxit urtat. Amkam kitem borem tem Jehova zannam. United states-antli bhoinn Aurora oxi mhunntta: “Devachem Utor pallʼllolean amkam sogleant borem jivit melltta mhunn hanv zannam.” Hem khorem zaun asa mhunn ami pasun zannant. Jehovachem margdorxon pallʼllolean tumkam faido zala kai?

11. Magnnem amkam kitem korunk modot korta?

¹¹ Devachem Utor pallunk kotthin zata tednam pasun magnnem amkam modot korta. Ami soglim patkim aslolean Jehovachem Utor pallunk thodde pavtti amkam kotthin zaunk puro. Punn, tachea Utra pormonnem jieunk ami proitn korit ravonk zai. Stotrkaran Deva lagim oxi vinonti keli: “Tuji Somurt samballunk mhaka xikoi, ani sogllea kallzan hanv ti palltolom.” (St. 119:34) Denise navachi ek niemit pioneer, oxem mhunntta: “Jehovachi khoinchi-i ek adnea pallunk mhaka kotthin zata tednam, sarkem tem korunk xokti di mhunn hanv Jehova lagim magnnem kortam.” Osli vinoti ami kortat tednam Jehova sodanch amkam modot kortolo mhunn ami khatri dovrunk zata.—Lukas 11:9-13.

AMCHEA BAPACHO MOG KORUNK DUSREANK XIKOIAT

12. Efezkarank 5:1-a pormonnem, ami kitem korunk zai?

¹² Efezkarank 5:1 vachat. Jehovachim “opurbaiechim bhurgim” zalolean ami tachi dekh gheunk zata titlo proitn kortat. Ami dusreank mog ani doia dakhoitat ani bhogxitat tednam ami tachi dekh ghetat. Ani Devak vollkhonant tim amchi bori vagnnuk polloitat tednam amchea vixim chodd xikonk fuddem sortolim. (1 Ped. 2:12) Jehova amchea sangata koso vagta teach toren, Kristi avoi-bapaimnim aplea bhurgeam sangata vagonk zai. Tim oxem kortat tednam tanchim bhurgim pasun amchea mogall Bapachim ixtt zaunk sodhtolim.

13. Dhirvont zaunk ami kitem korunk zai?

¹³ Chodd korun lhan bhurgeank aplea bapai vixim gorv bhogta ani tachea vixim dusreank sangonk ti khuxal zatat. Teach toren amcho sorgincho Bap Jehova vixim amkam gorv bhogta, ani tachea vixim dusreank sangonk amkam zai. Amchea kallzant amkam sogleank Davida bhaxen dista. Tannem boroilem: “Sorvespora sovem mhojea otmeak vhoddvik mellta.” (St. 34:2) Punn, Jehova vixim dusreank sangonk ami lojetat zalear kitem? Ami dhirvont koxim zaunk xoktat? Jehova vixim ami dusreank sangtat tednam, Jehova kitlo khuxal zata ani dusreank koso faido zata tea vixim ami niallttat zalear ami dhirvont zaunk xoktat. Hem korunk zai titlo dhir Jehova amkam ditolo. Dhirvont zaunk tannem amchea poilea xekddeantlea bhavank modot keli ani to amkam-i modot kortolo.—1 Tes. 2:2.

14. Xis korchem kam kiteak gorjechem?

¹⁴ Jehova bhed-bhav korina. Ani dusreanchi poristhiti kitem-i asum vo tim khoichea-i ganvchim asum, ami tankam mog dakhoitat tem to polloita tednam to khuxal zata. (D.I. 10:34, 35) Dusreank mog dakhounchi sogleant bori vatt mhunnttlear tankam bori khobor sangop. (Mt. 28:19, 20) Porgottnnechem kam kelolean koslo faido zata? Bori khobor aikotat tanchem jivit aiz sudhronk xokta ani fuddarak tankam sasnachem jivit mellonk xokta.—1 Tim. 4:16.

AMCHEA BAPACHO MOG KORAT ANI KHUXAL ZAIAT

15-16. Khuxal zaunk amkam koslim karonnam asat?

¹⁵ Jehova ek mogall Bapui zalʼlean tachi famil khuxal asloli taka zai. (Iz. 65:14) Ami aiz kotthin poristhiticho fuddo kortat zalear pasun, khuxal zaunk amkam zaitim karonnam asat. Udharonnak, amcho sorgincho Bap amcho khub mog korta mhunn ami zannant. Devachem Utor Bible-achem, amkam khorem ginean asa. (Jer. 15:16) Ani ami Jehovacho, tachea noitik dorjeancho ani eka-mekancho mog kortat toslea eka khas familicho bhag zaun asat.—St. 106:4, 5.

¹⁶ Fuddarak amchem jivit anik borem astolem mhunn ghott bhorvonso aslolean ami sodanch khuxal asonk xoktat. Beginuch Jehova soglea noxtteank kaddun uddoitolo ani tachea Razvottkechea khala prithum ek Sobit Bag zatoli mhunn ami zannant. Tea bhair, melolim portun jivont zatolim ani tanchea mogachea lokam sangata tim portun ektthaim zatolim mhunn amkam ek boro bhorvonso asa. (Juanv 5:28, 29) To vell kitlo khuxalkaiecho astolo! Ani chodd mhotvachem mhunnttlear, sorgar ani prithumer asat tim soglim amchea mogall Bapak favo to man, vakhannʼnni ani bhokti ditolim mhunn amkam khatri asa.