Jehova Pasot Mog ani Upkariponn Bautizm Gheunk Urba Dita

1-2. Itihas 8:27-31, 35-38-ant dakhoilolea pormonnem Ethiopiecho odhikari kiteak bautizm gheunk pavlo?

TUM bautizm gheun Jezucho xis zaunk sodhta? Kallzant mog ani upkariponn aslolean zaitim zannam hem pavl gheunk pavleant. Ethiopiechea Rannie pasot kam korpi eka odhikareachem udharonn gheum-ia.

² Ethiopiekarak apnnem kitem korunk zai tem Devachea Utrantlean kollʼllea uprant tannem vogot korinastana bautizm ghetlo. (Itihas 8:27-31, 35-38 vachat.) To hem pavl kiteak gheunk pavlo? To Devachea Utracho upkari aslo dekhun ghoddea gaddier voitana pasun to Izaias pustokantlo ek bhag vachtalo. Ani Filip tachea lagim uloilo tednam apnnak lagon Jezun jem kelʼlem tea pasot to upkari zalo. Punn ho odhikari Jerusalemak kiteak gelʼlo? Karonn taka Jehovacho mog aslo. Ami koxim zannant? Tannem aplo dhorm bodolʼlolo ani khorea Devak somorpit aslolea tea ekuch raxttracho to bhag zalʼlo. Atam Jerusalemant Jehovachi bhokti korun to portotalo. Taka Jehovacho mog aslo dekhun to anik ek pavl gheunk fuddem sorlo. Tannem Kristacho ek xis zaunk bautizm ghetlo.—Mt. 28:19.

3. Eka munxak bautizm gheunk kitem addaunk xokta? (“Tujem Kalliz Koxem Asa?” hem boks polloiat.)

³ Jehovacho mog tuka bautizm gheunk modot korta. Punn thodde pavtti moguch tuka addaunk pasun xokta. Tem koxem? Thoddea udharonnancher dhean diat. Tum ghoddie tujea sotant naslolea familicho ani ixttancho khub mog korta astolo. Ani tunvem bautizm ghetlo zalear tim tuzo dves kortolim mhunn tum chintunk puro. (Mt. 10:37) Vo tuka osleo sonvoim-eo avoddttat zait jeo Dev dves korta mhunn tum zannam, ani teo soddunk tuka kotthin zaunk puro. (St. 97:10) Vo lhanponnim thaun tum khottea dhorma sombondit festam vo chali-riti khuxalkaien pallit aila astolo. Hem kortalo tednancheo boreo iadi tujea monant asat dekhun Jehovak manvonant tosleo heo chali-riti soddunk tuka kotthin zaunk puro. (1 Kor. 10:20, 21) Tor tunvem tukach vicharunk zai, “Hanv sogleam poros chodd kiteacho vo konnacho mog kortam?”

SOGLEANT CHODD KONNACHO MOG KORUNK ZAI

4. Tunvem bautizm gheunk sogleant mhotvachem karonn kitem?

⁴ Tunvem zaitea borea vostum pasot mog ani upkariponn dakhounk zata. Udharonnak, tum ghoddie Jehovachea Sakxeam sangata obheas suru korchea poilinch, Bible-ak khub resped ditalo zait. Ani tum Jezucho pasun mog kortalo astolo. Atam Jehovachea Sakxeanchi vollokh zalea uprant, tanchea sangata vell sarunk tum khuxal zata. Punn tum hea borea vostuncho mog korta dekhun tuka ghoddie tujem jivit Jehovak somorponn korun, bautizm gheunk modot zaunchi na. Tunvem bautizm gheunk sogleant mhotvachem karonn mhunnttlear Jehova Deva pasot aslolo tuzo mog. Tum sogleam poros chodd Jehovacho mog korta zalear tachi seva korunk tum kitem-i vo konnakui tachea add ieunk diuncho na. Tuka Devacho mog aslear, tum bautizm gheunk pavtolo ani bautizm ghetlea uprant to mog tuka sodanch taka visvaxi ravonk modot korunk xoktolo.

5. Khoinchea prosnancher ami bhasabhas kortolim?

⁵ Ami akʼkhea kallzan, jivachea bollan, monan ani xokten Jehovacho mog korunk zai mhunn Jezun sanglem. (Marku 12:30) Tunvem kallzant thaun Jehovak mog ani resped koso dakhounk zata? Jehova amcho kitlo mog korta tea vixim chintlolean tacho mog korunk amkam modot zatoli. (1 Juanv 4:19) Ho mog tunvem utpon kelea uprant tujea bhitor koslim bhavnam upzotolim ani tum kitem korunk pavtolo?b

6. Romkarank 1:20-a pormonnem Jehova vixim zannam zaunk ek vatt khoinchi?

⁶ Rochnna udexim Jehova vixim zannam zav. (Romkarank 1:20 vachat; Prok. 4:11) Jehovan zhaddam ani zonvaram rochunk kitli zannvai uzar keli tacher niall kor. Tuji kudd kitlea ojapvont ritin rochlea tea vixim zannam zav. (St. 139:14) Amchea suriak kitli xokti asa tea vixim chint. Ani ho suria tor kottʼtteamnim noketram modlo fokot ek zaun asa.c (Iz. 40:26) Oslea vostuncher tum niall korta tednam Jehova pasot tuzo resped anik vaddttolo. Punn, fokot Jehovak zannvai ani xokti asa mhunn zannam zalear tachea sangata tuji ixttagot vaddona. Jehova pasot tuzo mog ghott korunk zai zalear tunvem tachea vixim anik zannam zaunk zai.

7. Jehova pasot tuzo mog vaddonk tuka kitem khatri asonk zai?

⁷ Jehova khoreanich tuji kallji gheta mhunn tuka khatri asonk zai. Sorg ani prithumecho Rochnnar tuka vollkhota ani to tuji kallji gheta mhunn manun gheunk tuka kotthin zata kai? Toxem zalear, Jehova dor eklea “thaun pois na” mhunn visornakat. (Itihas 17:26-28) Jehova sogleanchim “kallzam topasta,” ani Davidan aplo Put Solomonak sanglem toxem, Jehova tuka utor dita. To sangta, “zor tum taka sodxi, to tuka melltolo.” (1 Itihas 28:9) Khorem mhunnttlear, Jehovan ‘tuka aplea-xim voddun haddla’ dekhun tum Bible xikonk pavla. (Jer. 31:3) Jehovan tujea pasot jem kelam, tea vixim tum jitlo upkari zata, titlo tachea pasot tuzo mog vaddttolo.

8. Jehovachea moga pasot tum upkari asa mhunn tunvem koxem dakhounk zata?

⁸ Tum Jehovachea moga pasot upkari asa mhunn dakhounk ek vatt mhunnttlear magnnem. Magnnea vorvim tum tuje uske taka sangta tednam, ani tannem tujea pasot jem kelam taka lagon tum tacho upkar attoita tednam tachea pasot aslolo tuzo mog vaddtta. Ani tujea magnneak to koso zobab dita tem tum polloita tednam tuji ixttagot anik vaddttoli. (St. 116:1) To tuka somzota mhunn tuka khatri mellttoli. Punn tachea lagim soronk, taka kitem avoddtta, kitem avoddnna ani to umkeach bhaxen kiteak vagta toxench to tuje thaun kitem opekxa korta tem tunvem zannam zaunchi goroz asa. Hem soglem tum tachem Utor Bible-acho obheas kelearuch zannam zaunk xokta.

9. Bible-acho tum valor korta mhunn tunvem koxem dakhounk zata?

⁹ Devachem Utor Bible-acho valor kor. Jehova vixim ani tachea udʼdhexa vixim sot fokot Bible-antuch asa. Jednam tum dor disa Bible vachta, tujea svotachea Bible obheasak lagon tum bori toiari korta, ani xikta tem tum apnnaita tednam Bible-a pasot tum upkari asa mhunn dakhoita. (St. 119:97, 99; Juanv 17:17) Bible sodanch vachunk lagon tunvem ek manddavoll korun dovorlea kai? Tum dor disa chukonastana Bible vachta kai?

10. Bible-ant aslolo ek khas vixoi kitem zaun asa?

¹⁰ Bible-ant aslolo ek khas vixoi mhunnttlear, Jezuk polloilʼlea lokamnim tachea vixim tantunt boroilʼlem asa. Jezun tujea pasot kitem kelam tachi sarki mahiti tuka fokot heach pustokant mellttoli. Jezun jem kitem sanglem ani kelem tea vixim tum zannam zata tednam tachi ixttagot zoddunk tuka urba mellttoli.

11. Jehova pasot tuzo mog vaddounk tuka kitem modot korunk xokta?

¹¹ Jezucho mog kor ani Jehova pasot tuzo mog vaddttolo. Kiteak? Karonn Jezun aplea Bapache gunn sompurnn toren dakhoile. (Juanv 14:9) Tor tum Jezu vixim jitlo xikta, titlo tum Jehova vixim zannam zaunk ani tacho valor korunk pavtolo. Lok goribank, piddevontank, osoktank unnea molachim mhunn lekhtale punn oslea lokank Jezun dakhoilʼlea doia-maia vixim chintun polloi. Tea bhair, Jezun sodanchea jivita pasot dilole solʼle apnnailolean tujem jivit koxem sudhorta tem pasun chintun polloi.—Mt. 5:1-11; 7:24-27.

12. Jezu vixim zannam zata tednam tuka kitem korunk modot zatoli?

¹² Tujea patkanchem bhogsonnem mellonk Jezun dilʼlea bolidanacher niall kelear tachea pasot tuzo mog anik vaddttolo. (Mt. 20:28) Jezu tujea pasot moronk toiar aslo mhunn tum zannam zata tednam poschatap korun Jehovachem bhogsonnem magonk tuka modot zatoli. (D.I. 3:19, 20; 1 Juanv 1:9) Ani jitlo tum Jezucho ani Jehovacho mog korta, titlo tum tancho mog kortolea lokam sangata vell sarunk axetolo.

13. Jehovan tuka kitem dilam?

¹³ Jehovacho mog kortat tancho mog kor. Tum tujem jivit Jehovak kiteak somporponn korunk sodhta tem ghoddie sotant naslolea tujea familik ani tujea adlea ixttank somzochem na. Tim ghoddie tuzo virodh korit. Punn Jehova tuka sobhentlim bhav-bhoinnam diun modot korta. Him bhav-bhoinnam tuji famil koxim asat. Tum tanchea lagim ixttagot dovorta zalear tuka tanchea thaun mog ani tenko mellttolo. (Marku 10:29, 30; Heb. 10:24, 25) Vell sorta toso, ghoddie tujea familintlim pasun tujea sangata Jehovachi seva korun tachea dorjeam pormonnem jieunk suru korunk xoktat.—1 Ped. 2:12.

14. 1 Juanv 5:3-ant sanglolea pormonnem, Jehovachea dorjeam vixim tum kitem zannam zaunk pavla?

¹⁴ Jehovachea dorjeancho valor kor ani te apnnai. Jehovak vollkhon gheunchea poilim kitem sarkem ani kitem chukichem tem tunch tharaitalo astolo. Punn atam Jehovachea dorjeam pormonnem jievop chodd faideachem mhunn tuka kollon ailam. (St. 1:1-3; 1 Juanv 5:3, 4 vachat.) Ghov, bail, avoi-bapui, ani bhurgeam pasot Bible-ant dilolea solʼleam vixim chint. (Ef. 5:22–6:4) Tea dorjeam pormonnem jielolean tujea familichem jivit chodd khuxalbhorit zalam oxem tuka disona? Tunvem kosle toreche ixtt vinchunk zai tea vixim Bible-antle solʼle apnnailolean tujea jivitant faideak poddlam? Atam tum chodd khuxal asa kai? (Mho. 13:20; 1 Kor. 15:33) Tum ghoddie hea soglea prosnanche zobab hoi mhunn ditolo.

15. Bible-achim totvam apnnaunk tuka modot zai zalear tunvem kitem korunk zata?

¹⁵ Thodde pavtti, Bible-antlim totvam koxim apnnaunchim tem tuka somzonk kotthin zait. Teach pasot aplea songottnne udexim Jehova Bible-acher adarit prokaxonam dita, jea vorvim sarkem kitem ani chukichem kitem tem tuka zannam zaunk modot zata. (Heb. 5:13, 14) Him prokaxonam tum vachta ani xikta tednam, tim sodanchea jivitak koxim faideak poddttat ani umkeach oddchonnecho fuddo korunk koxi modot zata tem tuka kollttolem ani tednam Jehovachea songottnnecho bhag zaunk tuka avoddttolem.

16. Jehovan aplea lokank koxe songottit keleat?

¹⁶ Jehovachea songottnnecho mog kor ani tika tenko di. Jehovan aplea lokank sobham udexim songottit keleat. Tacho Put Jezu tanchem mostok zaun asa. (Ef. 1:22; 5:23) Jezun obhixikt dadleanchea eka lhan zomeak nemla. Aichea kallar Jezu kitem kam korunk sodhta, tachi manddavoll korunk ho zomo vavurta. Hea dadleanchea zomeak Jezun, ‘visvaxi ani xanno chakor,’ mhunnttla. Jehova sangata tuji ixttagot ghott korunk ani ti samballunk lagon modot korunk, apleak asa ti zobabdari te bore toren samballttat. (Mt. 24:45-47) Visvaxi chakor tuji kallji gheunk purte aslolea dadleank vhoddil mhunn nemchi manddavoll korta. He vhoddil tuka vatt dakhoitat ani tuji rakhonn kortat. (Iz. 32:1, 2; Heb. 13:17; 1 Ped. 5:2, 3) Toxench, te tuka buzvonn diunk ani Jehovachea anik lagim soronk modot korunk zata titlem soglem kortat. Punn te kortat tem sogleant chodd mhotvachem kam mhunnttlear, Jehova vixim dusreank xikounk tuka modot korop.—Ef. 4:11-13.

17. Romkarank 10:10, 13, 14-a pormonnem ami Jehova vixim dusream lagim kiteak uloitat?

¹⁷ Jehovacho mog korunk dusreank modot kor. Jezun aplea xisank Jehova vixim dusreank xikoi mhunn sanglem. (Mt. 28:19, 20) Ami ho kaido pallunk zai mhunn ghoddie pallit. Punn Jehova pasot aslolo tuzo mog vaddtta toso tuka apostl Pedru ani Juanva bhaxen disonk lagtolem. Tannim mhunnttlem: “Ami kitem dekhlam ani aikolam tem porgott korinastana amchean ravunk zaina.” (Itihas 4:20) Ami konnakui Jehovacho mog korunk modot kortat tednam amkam khub khuxalkai bhogta. Ethiopiekarak Devachea Utrantle sot xikonk ani bautizm gheunk modot keli tednam porgottnnar Filipak kitli khuxalkai bhogli astoli tem chintat! Filipachi dekh gheun, tum porgott korchi Jezuchi adnea palltta tednam tum ek Jehovacho Sakxi zaunk sodhta mhunn dakhoun dita. (Romkarank 10:10, 13, 14 vachat.) Ani tea vellar tum Ethiopiekaran vicharlem toxem ghoddie vichartolo: “Hanvem Povitr-Snan gheunk kosli addkholl asa?”—Itihas 8:36.

18. Fuddlea lekhant ami kitem bhasabhas kortolim?

¹⁸ Tum bautizm gheuncho nirnnoi gheta tednam tum tujea jivitant sogleam-von mhotvachem pavl gheta. Hem ek ekdom mhotvachem pavl zalolean tantunt kitem mellon asa tem tunvem bore toren somzunchi goroz asa. Bautizma vixim tunvem kitem zannam zaunk zai? Bautizm gheunchea poilim ani uprant tunvem kitem korunk zai? Hea prosnanche zobab ami fuddlea lekhant polloitolim.