Dev Thoddim Magnnim Kiteak Aikona?
Jehova Devak zai ki ami tachea lagim uloilʼlim. Ami tachea lagim kallzantlean magnnem kortat tednam to khub khuxal zata ani amchem aikota. Punn thoddea karonnank lagon Dev thoddim magnnim aikona, oxem-i Bible sangta. Tor, tim karonnam khoinchim ani magnnem kortana ami kitem ugddas dovrunk zai? Tem atam ami polloum-ia.
“Magnnem kortana . . . tinch-tinch utram porot-porot mhunnonakat.”—Matev 6:7.
Tumcho ixtt tumkam zor sodanch tinch-tinch utram sangot ravta zalear tumkam bejar ietolo nhoi? Teach toren, ami zor khoinchea-i pustokant boroilʼlem magnnem vachtat vo tondd-patt kelʼlem magnnem kortat zalear, Jehova Devak koxem bhogtolem? Tor, ami taka aplo ixtt somzon tachea lagim kallzantlean magnnem kelolem taka zai.
‘Tumi magtat tednam tumkam tem mellona, karonn tumi chukichea udʼdhexan magtat.’—Jakob 4:3.
Devak avoddna toslea vostum pasot ami tachea lagim magnnem kortat zalear, to amchem magnnem aikochona. Ek munis apleak lottri laglear puro mhunn magnnem korta zalear, Dev tachem aikotolo? Na. Karonn, Devan amkam axe thaun pois ravonk sanglam. Toxench, ami noxibacher patieun ravlʼlim taka naka. (Izaias 65:11; Lukas 12:15) Devan amchim magnnim aikolʼlim amkam zai zalear, ami kitem magtat tacher ami dhean diunk zai. Ami jem magtat tem Devache nodren sarkem asa vo na tea vixim ami chintunk zai. Bible-ant kitea pasot magnnem korop sarkem asa tem sanglam.
“Zo konn kaideak kan diupachem soddun dita, tachem magnnem legit ollxigavnnem zata.”—Mhonnʼnneo 28:9.
Adlea kallar vaitt kamam kortale, tanchim magnnim Devan aikonk na mhunn Bible-ant boroilam. (Izaias 1:15, 16) Toxench, aizui je lok zannam zaun vaitt kamam korit ravtat tanchem Dev magnnem aikona. (Malaki 3:6) Devan amchem magnnem aikonk zai zalear, tache nodren borem asa tem ami korunk zai. Punn, poilim amchea lagim chuk zalea zalear, Dev kednanch amchim magnnim aikochona kai? Toxem na. Ami bhogsonnem magon tachea nodren borem tem korit ravlear to amchem aikotolo.—Itihas 3:19.