Vaittponnacho Xevott Kednam Zatolo?

VAITTPONN KEDNAM KABAR ZATOLEM MHUNN POVITR PUSTOK SANGTA?

“Mhonnttoch zagrut ravat, kiteak dis, nhoi mhonn ghoddi, tumi nokllot.”​—MATEV 25:13.

“Chotrai dhorat, zagronn korat; tor vell kedna pavtolo to tumi nokllot.”​—MARKU 13:33.

Tor vaittponn kednam kabar zatolem tem konnuch nokllo mhunn amkam hea utrantlean kollon ieta. Hea vixim fokot Devuch zannam. Tannech to dis ani ghoddi tharailea. (Matev 24:36) Mhonnttoch, to dis kednam ietolo tea vixim ami kainch zannam zaunk xokonant kai? Toxem nhoi. Karonn Jezu hea prithumer aslo tednam vaittponnacho xevott zaunchea poilim kitem ghoddttolem tem sanglolem. Ani heo ghoddnneo ghoddttat teo polloun vaittponnacho xevott beginuch zatolo mhunn amkam kollon ieta.

XEVOTT IEUNCHEA POILIM KHOINCHEO GHODDNNEO GHODDTTOLEO

Jezun sanglolem: “Raxttr raxttracher ani raj rajeacher uprastolim. Hanga-thoi bhuk poddtoli ani bhuimkamp zatoli.” (Matev 24:3, 7) Toxench, tannem “voxeachi pidda posortoli” vo rokddinch posortat toslim duensam vaddttolim mhunn sanglolem. (Lukas 21:11) Ani aiz oxench ghoddtta.

Aiz zhuzam, jevnnachem unnemponn, bhuimkamp ani duensam vaddleant. Taka lagon, lokank khub tras sosche poddttat ani zaitea lokancho jiv pasun gela. Udharonnak, 2004-ant Indian Ocean-ant ek vhoddlo bhuimkamp zalo. Tea pasot, tsunami aili zantunt sumar 2,25,000 lok moron gelo. Toxench, tin vorsam bhitor COVID-19 piddek lagon sonvsarbhor sumar 60,90,000 lok melo. Heo ghoddnneo polloun vaittponnacho xevott lagim asa mhunn amkam kollon ieta.

NIMANNE DIS

Xevott ieunchea poilim je dis asat tankam Bible-ant nimanne dis mhunnttleat. (2 Pedru 3:3, 4) Hea nimannea disamnim lok svarthi, axeche, nixttur ani eka-mekacho mog korinant tosle astole mhunn Bible sangta. (2 Timotak 3:1-5; “Vaittponnacho Xevott Zaunchea Poilim” hem boks polloiat.) Ani oslech lok amkam aiz pollounk mellttat nhoi? Hachea voilean vaittponnacho xevott khub lagim asa mhunn amkam kollon ieta.

He nimanne dis kednam porian astole? Thoddoch temp! Karonn Dev beginuch ho “sonvsar padd kortat” tankam kaddun uddoitolo mhunn Bible sangta.—Prokasovnni 11:15-18; 12:12,13.

BEGINUCH HI PRITHUM SOBIT ZATOLI!

Hea vaittponnacho xevott khoinchea disa ani khoinchea vellar zatolo tem Devan adinch tharailam. (Matev 24:36) Punn, ho xevott ieta tednam “konnachench nisontton zalʼlem taka naka.” Tachea bodlek, tim salvar zalolim taka zai. (2 Pedru 3:9) Toxench, fuddarak lokamnim hea prithumer khuxalkaien jielolim taka zai. Tea pasot, to aiz soglea lokank aplea vixim xikonk ani apli khuxi kitem ti zannam zaunk sondhi dita.

Hem to koxem korta? Hem to porgottnnechea kamam udexim korta. Hea vixim Jezun sanglolem ki Devachea Rajeachi bori khobor “akʼkhea sonvsarant” porgott zatoli. (Matev 24:14) Aiz Jehovache Sakxi hem porgottnnechem kam sonvsarbhor kortat. Lokank hi bori khobor porgottunk ani xikounk tim koroddamnim voram sartat.

Hea sonvsarantlem vaittponn Dev beginuch kaddun uddoitolo ani hi akʼkhi prithum ek sobit bag kortolo. Tednam munis munxacher raj cholouncho na. Tor tea novea sonvsarant jieunk ami kitem korunk zai tea vixim ami fuddlea lekhant polloum-ia.