OBHEASACHO LEKH 47
Eka-meka Pasot Mog Ghott Korum-ia—Koso?
“Eka-mekacho mog korum-ia, kiteak mog mhollear Deva koddchoch.”—1 JUANV 4:7.
GIT 109 Love Intensely From the Heart
KITEM XIKTOLIMa
1-2. (a) Apostl Paulun mog “sogleant vhodd” oxem kiteak mhunnttlem? (b) Ami khoinchea prosnancher dhean ditolim?
APOSTL Paulu, bhavarth, bhorvonso ani moga vixim uloitalo tednam, tannem xevottak oxem mhunnttlem: “Tantuntlo sogleant vhodd mhunnttlear mog.” (1 Kor. 13:13) Tannem oxem kiteak mhunnttlem? Karonn fuddarak, Jehovan novea sonvsara vixim jeo bhas dileat teo purnn zatoleo. Tor tea vellar, amkam bhavarth ani bhorvonxeachi goroz poddchina. Punn ami Jehovak ani lokank sodanch mog dakhounchi goroz poddttoli. Khorem mhunnttlear, tanche pasot amcho mog sodankal vaddot voitolo.
2 Amkam sodanch eka-mekacho mog korchi goroz poddttoli mhunnttoch, ami tin prosnancher dhean dium-ia. Poilo, ami eka-mekacho mog kiteak korunk zai? Dusro, ami ho mog koso dakhounk zata? Ani tisro, ami to mog koso ghott samballunk zata?
AMI EKA-MEKACHO MOG KITEAK KORUNK ZAI?
3. Ami eka-mekacho mog korop kiteak gorjechem?
3 Ami eka-mekacho mog korop kiteak gorjechem? Poilem karonn mhunnttlear, amchea modem mog aslear ami khorim Kristanvam mhunn kollon ietolem. Jezun aplea apostlank oxem sanglolem: “Tumi eka-mekacho mog kortat zalear tumi mhoje xis mhunn sogleank kollon ietolem.” (Ju. 13:35) Dusrem karonn mhunnttlear, ami eka-mekacho mog kelear amchea modem ekvottkai astoli. Hea vixim Paulun oxem mhunnttlem: “Mog sogleank ekvottan dovorta.” (Kol. 3:14) Anik ek mhotvachem karonn, apostl Juanvan Kristanvank sanglolem. Tannem mhunnttlem: “Jim konn Devacho mog kortat, tannim aplea bhavam-bhoinnincho-i mog korcho.” (1 Ju. 4:21) Tor ami eka-mekacho mog kortat tednam ami Devacho-i mog kortat mhunn dakhoun ditat.
4-5. Jehova pasot, ani bhav-bhoinnam pasot amcho mog koso zuddlolo asa tem somzaiat.
4 Jehova pasot, ani bhav-bhoinnam pasot amcho mog koso zuddlolo asa? Hem somzonk, amchem kalliz amchea kuddintlea her bhagank koxem zuddlolem asa tacher dhean diat. Ek dotor amcho hat dhorun pulse check korta tednam, amchem kalliz bore toren kam korta vo na tacho taka odmas melltta. Tor hea udharonnantlean ami kitem xiktat?
5 Tea dotorak amcho pulse check korun amchem kalliz bore toren kam korta vo na tem kollon ieta tea bhaxen, bhav-bhoinnam pasot amcho mog polloun, Jehova pasot amcho mog ghott asa vo na tem amkam kollon ieta. Tor bhav-bhoinnam pasot amcho mog poilim poros unno zala zalear, hacho orth, Jehova pasotui amcho mog unno zait asa. Punn ami sodanch bhav-bhoinnank mog dakhoitat zalear, hacho orth, Jehova pasot amcho mog ghott asa.
6. Bhav-bhoinnam pasot amcho mog unno zait voita zalear, hem kiteak dhokeachem zaun asa? (1 Juanv 4:7-9, 11)
6 Bhav-bhoinnam pasot amcho mog unno zait voita zalear, hem dhokeachem asa. Karonn hacho orth, Jehova sangata amcho sombond oskot zait asa. Ani hea vixim apostl Juanvan oxem mhunnttlem: “Apunn dekhtat tea bhavacho vo bhoinnicho tim mog korinant zalear, apnnem polleunk na tea Devacho koxim mhonn tim mog kortolim?” (1 Ju. 4:20) Tor ami kitem xiktat? Ami ‘eka-mekacho mog kortat’ zalearuch ami Jehovak khuxal korunk pavtolim.—1 Juanv 4:7-9, 11 vachat.
AMI EKA-MEKACHO MOG KORTAT MHUNN KOXEM DAKHOUNK ZATA?
7-8. Eka-mekak mog dakhounk thoddeo vatto khoincheo?
7 Bible-ant amkam porot-porot hi adnea melltta: “Eka-mekacho mog korat.” (Ju. 15:12, 17; Rom. 13:8; 1 Tes. 4:9; 1 Ped. 1:22; 1 Ju. 4:11) Punn khorem mhunnttlear, mog kallzant thaun utpon zata. Ani khoincho-i munis amchem kalliz pollounk xokona. Tor ami eka-mekacho mog kortat mhunn koxem dakhounk zata? Amchea utramnim ani korneamnim.
8 Ami zaitea vattamnim amchea bhav-bhoinnancho mog kortat mhunn dakhounk zata. Zoxem Bible-ant sanglam: “Ekameka kodde sot uloiat.” (Zek. 8:16) “Eka-meka sangata xantin ravat.” (Mk. 9:50) “Tumi poilim fuddem soron dusreank man diat.” (Rom. 12:10) “Eka-mekak apnnaiat.” (Rom. 15:7) “Eka-mekak kallzant thaun bhogxit ravat.” (Kol. 3:13) “Eka-mekacho bhar ubarit ravat.” (Gal. 6:2) “Eka-mekak bhuzvonn di-it ravat.” (1 Tes. 4:18) ‘Eka-mekak urba diat.’ (1 Tes. 5:11) “Ekameka pasot magat.”—Jak. 5:16.
Kotthin poristhitint aslolea eka bhavak vo bhoinnik ami koxi modot korunk zata? (Peregraf 7-9 polloiat)
9. Bhuzvonn divop, mog dakhounchi ek mhotvachi vatt kiteak zaun asa? (Chitr pasun polloiat.)
9 Hantuntlea eke vattecher ami dhean dium-ia. Paulun mhunnttlem: “Eka-mekak bhuzvonn di-it ravat.” Bhuzvonn divop, mog dakhounchi ek mhotvachi vatt kiteak zaun asa? Eka pustokant Bible-achea hea versa vixim sanglam, ki Paulun uzar kelʼlem “bhuzvonn” hea utracho orth mhunnttlear, “ek munis kotthin poristhitint asta tednam tachea sangata ubo ravon taka urba divop.” Tor niraxi aslolea bhav-bhoinnank ami bhuzvonn ditat tednam, ami tankam visvaxiponnan Jehovachi seva korit ravonk modot kortat. Ani dor ek pavtt ami oxem kortat tednam, ami tancho khub mog kortat mhunn dakhoun ditat.—2 Kor. 7:6, 7, 13.
10. Doia-maia disop ani bhuzvonn divop, hanche modem koslo sombond asa tem somzaiat.
10 Doia-maia disop ani bhuzvonn divop, hanchea modem lagxilʼlo sombond asa. Koso? Eka munxak, tras sostolea konnachi-i doia-maia dista tednam, to taka bhuzvonn diunk ani modot korunk fuddem sorta. Tor poilim taka doia-maia dista, ani uprant to bhuzvonn diunk panvl gheta. Jehovachi doia-maia taka dusreank bhuzvonn diunk koxi fuddem kaddtta, tea vixim Paulun bore toren somzailem. Tannem Jehovak “doien bhorlolo Bap ani sogle torechi bhuzvonn diupi Dev” oxem mhunnttlo. (2 Kor. 1:3) Hanga Paulun uzar kel’lem ‘doia’ hea utracho orth, dusream pasot doia-maia disop. Tor Jehovak “doien bhorlolo Bap” mhunnon Paulu sangonk sodhtalo ki doia-maia ho gunn Jehova thaun upzota. Ani ho gunn taka ‘amchea soglea sonkoxttamnim bhuzvonn diunk’ fuddem kaddtta. (2 Kor. 1:4) Eke zhorintlean vhanvtolem nitoll udok tanelʼleank ghottai dita tea bhaxen, kotthin poristhiti sostoleank Jehova bhuzvonn ani ghottai dita. Tor dusreanchi doia-maia disonk ani tankam bhuzvonn diunk ami Jehovachi dekh koxi gheunk zata? Oxem korunk amkam modot kortat tosle gunn ami amche bhitor vaddounk zai. Te gunn khoinche?
11. Koloskarank 3:12 ani 1 Pedru 3:8-a pormonnem, dor disa eka-mekak bhuzvonn di-it ravonk goroz to mog ami koso vaddounk xoktat?
11 Dor disa ‘eka-mekak bhuzvonn di-it ravonk’ goroz to mog ami koso vaddounk xoktat? Ami eka-mekachem dukh somzon gheunk zai, bhavam sarko mog dakhounk zai, ani doiallaien vagonk zai. (Koloskarank 3:12; 1 Pedru 3:8 vachat.) He gunn dakhounchi amkam sonvoim zata tednam, bhav-bhoinnanche tras polloun ami vogi boschim nant. Ami rokddinch tankam bhuzvonn diunk fuddem sortolim. Jezun pasun oxem mhunnttlolem: “Jem kallzant asa tench tonddantlean bhair sorta. Boro munis aplea borea theveantleo boreo vostu bhair kaddtta.” (Mt. 12:34, 35) Khorench, trasant aslolea bhav-bhoinnank bhuzvonn divop, tankam mog dakhounchi ek mhotvachi vatt zaun asa!
EKA-MEKA PASOT AMCHO MOG AMI KOSO GHOTT SAMBALLUNK ZATA?
12. (a) Ami kiteak chotrai dovrunk zai? (b) Atam ami khoinchea prosnacher dhean ditolim?
12 Ami soglim sodanch ‘eka-mekacho mog korunk’ sodhtat. (1 Ju. 4:7) Punn Jezun dilʼli xittkaunni ami ugddas dovrop mhotvachi. Tannem mhunnttlolem: “Zaiteancho mog thondd zatolo.” (Mt. 24:12) Him utram mhunnon, aplea xisam modlim choddxim zannam eka-mekacho mog korop bond kortolim, oxem to sangonk sodhinaslo. Punn aiz sonvsarant polloilear, lokank eka-mekacho mog na. Tor tancho sobhav apnnaina zaunk ami chotrai dovrunk zai. Tea pasot atam ami, hea eka mhotvachea prosnacher dhean dium-ia: Bhav-bhoinnam pasot amcho mog ghott asa kai na tem ami koxem zannam zaunk zata?
13. Bhav-bhoinnam pasot amcho mog ghott asa kai na tem amkam koxem kollon ietolem?
13 Ek vatt mhunnttlear, umkech poristhitint ami koxim vagtat tacher dhean divop. (2 Kor. 8:8) Oslech eke poristhiti vixim apostl Pedrun mhunnttlolem: “Sogleant mhotvachem mhunnttlear, eka-mekacho kallzant thaun mog korat. Karonn mog zaitim patkam dhampta.” (1 Ped. 4:8) Tor amchim bhav-bhoinnam chuki kortat vo amchem mon dukhoitat tednam, ami koxim vagtat tea vorvim kollon ieta ki bhav-bhoinnam pasot amcho mog ghott asa kai na.
14. 1 Pedru 4:8-a pormonnem, bhav-bhoinnam pasot amcho mog koso asonk zai? Somzaiat.
14 Ami Pedruchea utrancher bariksannen dhean dium-ia. Vers 8-achea poilea bhagant, bhav-bhoinnam pasot amcho mog koso asonk zai tem sanglam. Tem mhunnttlear, ami tancho “kallzant thaun mog” korunk zai. Ani Pedrun uzar kelʼlem “kallzant thaun” hea utracho orth, “voddun lamb korop” oso zaun asa. Ho mog aslolean porinnam kitem zata, tem tea versachea dusrea bhagant sanglam. To mhunnttlear, ho mog zaitim patkam dhampta. Pedrun uzar kelʼlem dhampop hem utor, bhogsop haka uzar zata. Hem somzonk ami amchea dolleam mukhar ek chitr haddum-ia. Amchea mezar zaite dag asat vo tem zhorlam mhunn chintum-ia. Tor ami ek lugott gheun tem akʼkhea mezar ghaltat. Oxe toren tea meza voile ek vo don nhoi, punn sogle dag dhamptat. Heach toren, bhav-bhoinnam pasot amcho mog oso asta ki ami tanchim ek vo don nhoi, punn “zaitim patkam” dhamptat. Hoi, tancheo oskotaieo ani chukeo ami bhogxitat.
15. Bhav-bhoinnam pasot amcho mog ghott aslear ami kitem korunk pavtolim? (Koloskarank 3:13)
15 Bhav-bhoinnam pasot amcho mog itlo ghott asonk zai ki amkam kotthin dista tednam pasun ami tankam bhogxitolim. (Koloskarank 3:13 vachat.) Ami oxem kortat tednam, tanchea pasot amcho mog khorench ghott asa, ani ami Jehovak manvota tem korunk sodhtat mhunn dakhoun ditat. Tor dusreank bhogsunk ani tim amkam tiddok haddttat tednam tem gheun bosona zaunk, ami anik kitem korunk zata?
Ami bore fottu samballun dovortat ani bore nant te delete kortat tea bhaxen, ami amchea bhav-bhoinnancheo boreo iadi samballun dovortat, ani vaitt iadi amchea monantlean bhair kaddun uddoitat (Peregraf 16-17 polloiat)
16-17. Bhav-bhoinnancheo lhan-lhan chuki gheun bosona zaunk ami anik kitem korunk zata? Somzaiat. (Chitr pasun polloiat.)
16 Bhav-bhoinnanchea vaitt gunnancher nhoi, punn borea gunnancher dhean diat. Hea vixim chintat. Tumi thoddea bhav-bhoinnam sangata ektthaim mellon ietat ani boro vell sartat. Ani xevottak tumi, don-tin grup fottu ghetat. Punn uprant te fottu polloitana, tantuntlea ek fottvant eka bhavachea tonddar hanso na tem tumkam dista. Tor tumi to fottu kitem kortat? Tumi to delete kortat. Karonn tumchea lagim anik don fottu asat, zantunt to bhav ani soglim zannam smile kortat.
17 Ami samballun dovortat te fottu, bhav-bhoinnam vixim ami kitem ugddas dovortat taka sor korunk zata. Choddxe pavtti, ami bhav-bhoinnam sangata boro vell sartat. Punn ghoddie eka vellar, eka bhavan vo bhoinnin amkam dukhoita toxem kitem tori mhunnttlem vo kelem zait. Tor ami kitem kortolim? Ami to fottu delete kelo tea toren, ami tancheo lhan-lhan chuki amchea monantlean bhair uddoitolim. (Mho. 19:11; Ef. 4:32) Ani ami oxem korunk xoktat! Karonn urlolea don fottvam bhaxen, amchea lagim tea bhav vo bhoinni sangata sarloleo zaiteo boreo iadi asat. Ani osleoch iadi ami samballun dovrunk sodhtat.
AIZ AMI EKA-MEKACHO MOG KOROP KITEAK ITLEM GORJECHEM?
18. Hea lekhant ami moga vixim khoinche mhotvache mudʼde polloile?
18 Eka-meka pasot amcho mog kiteak ghott asonk zai? Ami hea lekhant polloilem toxem, ami bhav-bhoinnancho mog kortat tednam ami Jehovacho mog kortat mhunn dakhoitat. Bhav-bhoinnam pasot amcho mog ami koso dakhounk zata? Ek vatt mhunnttlear, tankam bhuzvonn diun. Amkam doia-maia aslear, ami ‘eka-mekak bhuzvonn di-it ravonk’ pavtolim. Ani eka-meka pasot ami amcho mog koso ghott korunk zata? Ami dusreank bhogxitolim, ani kotthin zata tednam pasun oxem kortolim.
19. Khas korun, aiz amchea modem mog asop kiteak itlem gorjechem asa?
19 Tor khas korun, aiz amchea modem mog asop kiteak itlem gorjechem asa? Hachem karonn apostl Pedrun sanglolem: “Soglea vostuncho xevott lagim pavla. Taka lagon . . . eka-mekacho kallzant thaun mog korat.” (1 Ped. 4:7, 8) Hea noxttea sonvsaracho xevott lagim pavta toso, ami kitem opekxa korunk zata? Aplea pattlavdarank kitem ghoddttolem, tea vixim Jezun oxem sanglolem: “Mhojea nanva pasot soglea raxttrache lok tumcho dves kortole.” (Mt. 24:9) Tor lokamnim amcho dves kelear pasun, visvaxiponnan Jehovachi seva korit ravonk amchea modem ekvott asonk zai. Ami amchea bhav-bhoinnancho mog kortat zalear, Soitan kednanch amchea modem futt ghalunk xokchona. Karonn “mog sogleank ekvottan dovorta.”—Kol. 3:14; Filp. 2:1, 2.
GIT 130 Udar Kallzan Bhogsum-ia
a Poilim poros, ami atam amchea bhav-bhoinnancho mog korop kiteak itlem gorjechem, ani ami tankam anikui purnn toren mog koso dakhounk zata tem ami hea lekhant polloum-ia.