OBHEASACHO LEKH 21
GIT 107 Devachea Mogachi Vatt
Tumkam Kazar Zaunk Ek Boro Sangati Koso Mellonk Xokta?
“Ek sugunni ostori konnak mellot? Motiam poros vortem tichem mol.”—MHO. 31:10.
MUKHEL MUDʼDO
Kazar zaunk ek boro sangati sodhunk Bible-antlim khoinchim totvam amkam modot kortat, ani sobhentlea bhav-bhoinnamnim kazar zaunk sodhtat tankam koxi modot korunk zata tem ami hea lekhant polloitolim.
1-2. (a) Tumi kazar zauncho dhei dovrun konnachi-i vollokh korun gheunk sodhtat zalear, tumi khoinchea vostuncher dhean diunk zata? (b) “Dating” mhunnttlear kitem? (“Utrachi Somzonni” polloiat.)
TUMI kazar zaunk sodhtat kai? Zaitim tornnattim, toxench matxi pirai zalʼlim pasun, apleak ek kazari sangati sodhtat. Kazar zalʼlean khuxalkai melltta tem khorem. Punn tumi ankvar astat tednam pasun tumi khuxal asonk xoktat. Tumi kazar zauncho dhei dovrun konnachi-i vollokh korun gheunk sodhtat zalear, tumi thoddea vostuncher dhean divop gorjechem. Zoxem, Jehova sangata tumchi ixttagot koxi asa, kazar zaunk tumchem mon toiar asa kai, kazar zalea uprant tumi tumcho khorch koxim bhagoitolim?a (1 Kor. 7:36) Hea vostuncher niall korun kam kelʼlean, tumchem kazari jivit khuxalkaiechem zaunk xokta.
2 Kazar zaunk ek boro sangati sodhop sompem nhoi. (Mho. 31:10) Konnui amkam avoddlo zalear pasun, ami tachea lagim dating koxem suru korchem, hem thodde pavtti amkam somzona zait.b Tor eka bhavan vo bhoinnin ek boro sangati sodhunk kitem korchem? Amkam konnui avoddlo zalear, tachea sangata ami dating koxem suru korunk zata? Toxench, sobhentlea bhav-bhoinnamnim kazar zaunk sodhtat tankam koxi modot korunk zata? Hea vixim ami hea lekhant polloitolim.
EK BORO SANGATI SODHUNK KITEM KORCHEM?
3. Kazar zaunk ek boro sangati sodhta tea bhavan vo bhoinnin kitem monant dovrunk zai?
3 Tum ek bhoinn ani tum kazar zaunche vixim chintʼta zalear, dating korunk suru korchea poilim, kazar zaunk tuka koslo sangati zai tea vixim tunvem chintun dovrunk zata.c Na zalear, tum ghoddie eka oslea bhava sangata dating korunk lagot zo tujea pasot ek boro sangati nhoi. Vo tum ghoddie tujea pasot ek boro sangati zaunk xokta toslea eka bhavacher dhean diunk chukot. Hem khorem, ki tum bautizm ghetlolea bhava laginch dating kortolem. (1 Kor. 7:39) Punn tannem bautizm ghetla hacho orth, to tujea pasot ek boro sangati zatolo oxem nhoi. Tor tunvem tukach vicharunk zata: ‘Hanvem mhojea jivitant kosle dhei dovorleat? Hanv zachea lagim kazar zaunk sodhtam taka kosle gunn aslole mhaka zai? Hanv tache koddlean chodduch opekxa korina nhoi?’
4. Thoddea bhav-bhoinnamnim kitea vixim magnnem kelam?
4 Tumi kazar zaunk sodhtat zalear, hea vixim tumi Jehova lagim magnnem kelam astolem. (Filp. 4:6) Jehova tumkam ek sangati ditoloch mhunn to utor dina tem khorem. Punn tumcheo gorzo ani tumkam koxem bhogta tem Jehova bore bhaxen somzota ani ek boro sangati sodhunk to tumkam modot korunk xokta. Tor tumchim bhavnam taka ukteponnim sangot ravat. (St. 62:8) Tumkam pasiens ani zannvai di mhunn tache lagim magat. (Jak. 1:5) Oxench Amerikentlea Johnd nanvachea eka ankvar bhavan kelem. To magnneant kitem magta tea vixim to oxem sangta: “Mhojea sangateak kosle gunn aslole mhaka zai tem hanv Jehovak sangtam. Toxench, mhojea pasot ek borem sangati zatolem toslem ek cheddum mellonk mhaka modot kor mhunn hanv magtam. Tea bhair, mhaka ek boro ghov zaunk modot kortat tosle gunn vaddounk pasun hanv tache lagim adar magtam.” Toxench Sri Lanka-ntli bhoinn Tanya sangta: “Kazar zaunk ek sangati sodhtana, visvaxi ravonk, sarkem chintop dovrunk ani khuxal ravonk hanv Jehovachi modot magtam.” Tor kazar zaunk ek boro sangati mellonk tumkam chodduch vell lagta zalear pasun, Jehovan bhas dilea toxi, to tumkam samballttolo ani tumcheo gorzo purnn kortolo mhunn khatri dovrat.—St. 55:22.
5. Ankvar bhav-bhoinnank Jehovacho mog korta toslo ek sangati kednam mellonk xokta? (1 Korintkarank 15:58) (Chitr pasun polloiat.)
5 “Somiachea sevent . . . sodanch khub kam” korunk Bible amkam urba dita. (1 Korintkarank 15:58 vachat.) Tumi Jehovachea sevent bizi ravtat tednam, tumkam veg-vegllea bhav-bhoinnam sangata kam korunk ani vell sarunk mellttolo. Oxem kortana tumi oslea ankvar bhav-bhoinnank mellonk pavtolim, jim tumcheach sarkim purnn kallzan Jehovachi seva kortat. Tor tumi kallzant thaun Jehovachi seva kortat tednam, tumkam khori khuxalkai mellttoli.
Jehovachea sevent bizi ravlolean ani veg-vegllea bhav-bhoinnam sangata vell sarlolean tumkam ghoddie oslim bhav-bhoinnam mellonk xoktat jim kazar zaunk sodhtat (Peregraf 5 polloiat)
6. Kazar zaunk ek sangati sodhtat tednam ankvar bhav-bhoinnamnim kitem ugddas dovrunk zai?
6 Punn ugddas dovrat, tumchem soglem dhean-mon fokot ek boro sangati sodhop hacheruch asonk zaina. (Filp. 1:10) Karonn khori khuxalkai, tumi kazari asat vo ankvar asat tacher nhoi, punn Jehova sangata aslolea tumchea ixttagoticher adarit asta. (Mt. 5:3) Khorem mhunnttlear, tumi ankvar astat tednam tumi Jehovachea sevent chodd korunk xoktat. (1 Kor. 7:32, 33) Tor ho vell zata title bore toren uzar korat. Amerikentlea Jessica-chea udharonnacher dhean diat, jem sumar 40 vorsanchem astana kazar zalʼlem. Tem mhunntta: “Hanv kazar zaunk sodhtalem, punn hanv fokot teach vixim chintit ravonaslem. Tachea bodlek, hanvem porgottnnent zata titlo vavr kelo. Ani oxem kelʼlean hanv khuxal ravonk pavlem.”
TACHEA VIXIM ZANNAM ZAUN GHEIAT
7. Konnui tumkam avoddtta mhunn taka rokddench sangche poilim tachea vixim zannam zaun ghevop kiteak gorjechem? (Mhonnʼnneo 13:16)
7 Kazar zaunk tumkam konnui avoddlo zalear kitem? Tumi hea vixim rokddench vochon taka sangonk zai kai? Bible amkam sangta ki ek xanno munis kitem-i korchea poilim tea vixim zannam zaun gheta. (Mhonnʼnneo 13:16 vachat.) Tor to tumkam avoddtta mhunn taka rokddench sangchea poilim, to koso vagta tacher dhean diunk vell gheiat. Karonn, Netherlands-antlo bhav Aschwin sangta: “Amchim bhavnam rokddinch bodlonk xoktat. Survatek ghoddie ek munis amkam khub avoddtta astolo, punn uprant titlo avoddna zait. Tor thoddo vell gheun tachea vixim zannam zalʼlean, dating korunk ami goddbodd korunk pavchimnant.” Oxem kelʼlean, to munis ghoddie amkam ek boro sangati zaunk pavchona mhunn amkam kollon ieit.
8. Tumkam konnui avoddlo zalear tumi tachea vixim koxem zannam zaunk zata? (Chitr pasun polloiat.)
8 Tumkam konnui avoddlo zalear tumi tachea vixim koxem zannam zaunk zata? Sobhent vo her vellar to bhav-bhoinnam sangata koso vagta tacher tumi dhean diunk zata. Oxem kortana hea prosnancher dhean diat. Zoxem, tache ixtt konn ani to kitea vixim uloita? (Luk. 6:45) Tache ani tumche dhei ek-sarke asat kai? Oxem kelʼlean, Jehova sangata tachi ixttagot koxi asa, taka kosle gunn asat ani tachi vagnnuk koxi asa tem tumi zannam zaunk pavtolim. Toxench, taka bore toren vollkhotat tea sobhentlea vhoddilam lagim vo bhavarthant ghott aslolea bhav-bhoinnam lagim tumi ulounk zata. (Mho. 20:18) Sobhent taka ek borem nanv asa kai, toxench taka kosle gunn asat tea vixim tumi tanchea lagim vicharunk zata. (Ruth 2:11) Punn oxem kortana, tachea vixim barik-barik mahiti zannam zauncho proitn korinakat vo 24-ui voram tachea bhonvtonnim bhonvonakat. Karonn oxem kelʼlean taka vaitt disonk xokta.
Tumkam konnui avoddtta zalear taka tem sangchea poilim, tacho sobhav zannam zaunk tacher dhean diat (Peregraf 7-8 polloiat)
9. Konnui tumkam avoddla mhunn taka sangchea poilim tumkam kosli khatri asonk zai?
9 Tumkam konnui avoddtta ani tumi tachea sangata dating korunk sodhtat zalear, hea vixim taka sangonk tumi kitlo vell gheunk zata? Tumi rokddench vochon sanglem zalear, taka ghoddie tumi goddboddan nirnnoi ghetat oxem disot. (Mho. 29:20) Punn dusrea vatten to tumkam avoddtta mhunn taka kollon ailam, ani tumi taka tem sangonk chodduch vell kaddttat zalear, tumi nirnnoi gheunk khubuch bhietat oxem taka disot. (Up. 11:4) Ugddas dovrat, to tumkam avoddla mhunn tumi taka sangonk voiche poilim, tumi tachea lagim kazar zatolinch mhunn tumkam khatri asonk zai oxem nhoi. Punn tumi kazar zaunk toiar asat, ani tumkam zo avoddla to tumchea pasot boro sangati zaunk xokta mhunn tumkam khatri asonk zai.
10. Tumi konnak tori avoddttat mhunn tumkam kollon ailam, punn to tumkam avoddna zalear tumi kitem korunk zai?
10 Tumi konnak tori avoddttat mhunn tumkam kollon ailem zalear tumi kitem korunk zai? Tumkam to avoddna zalear, tumchea vagnnukentlean tem spoxtt toren dakhoun diat. Karonn tumi oxem korinant zalear to-ui tumkam avoddtta mhunn to ghoddie chintit, ani hem sarkem zaunchem na. Karonn oxem kelʼlean ami tachea bhavnam sangata khellttat oxem zatolem.—1 Kor. 10:24; Ef. 4:25.
11. Tumkam konnui soirik korunk sangta zalear tumi kitem korunk zai?
11 Thoddea desamnim, ankvar asloleank sangati vinchun kaddchi zobabdari avoi-bapaichi vo ghorcheanchi, oxem mantat. Dusrea desamnim ghorchim vo ixttam tankam soirik haddit. Punn uprant to cheddo ani cheddum mellttat ani eka-mekak zannam zaun ghetat. Ani tim eka-meka pasot borim sangati zaunk pavtolim vo na tea vixim apunn nirnnoi ghetat. Tor tumkam konnem-i tori soirik sodhunk sanglam zalear tumi kitem korunk zata? Sogleam-von poilim mhunnttlear, tumkam soirik korunk sanglam tea cheddea vo cheddva vixim zannam zaiat. Taka koslo sangati zai tem zannam zaiat. Uprant, tache lagim kazar zaunk umkoch konn boro asa oxem tumkam dislem zalear, tache-i vixim zannam zaun gheiat. Tacho sobhav koso asa, taka kosle gunn asat, ani sogleam-von mhotvachem mhunnttlear Jehova sangata tachi ixttagot koxi asa, hea vixim zata titli mahiti sodhun kaddat. Karonn to kitlo girest asa, kitlo xikla, vo tachi famil koxi asa hachea poros chodd, Jehova sangata tachi ixttagot kitli ghott asa hem chodd mhotvachem. Ugddas dovrat, tumi soirik haddttat tem khorem, punn kazar zaunchem vo na to nirnnoi tea bhav ani bhoinnicho zaun asa.—Gal. 6:5.
TUMI DATING KOROP KOXEM SURU KORUNK ZATA?
12. Tumkam zo avoddla tachea sangata dating korunk tumi kitem korunk zata?
12 Tumkam konnui avoddtta ani tumi tachea sangata dating korunk sodhtat zalear tumi kitem korunk zata?e Tumi fon korun vo bhair khoinsorui mellon tachea lagim ulounk zata. Toxench to tumkam avoddtta, ani tumi taka bore toren vollkhonk sodhtat mhunn taka spoxttponnim sangonk zata. (1 Kor. 14:9) Apleak chintunk thoddo vell zai mhunn to sangta zalear, taka vell diat. (Mho. 15:28) Punn to apleak dating korunk naka mhunn sangta zalear, tachea nirnnoi-ak man diat.
13. Tum apnnak avoddlam mhunn konnui tumkam sangta zalear tumi kitem kortolim? (Koloskarank 4:6)
13 Tum apnnak avoddlam mhunn konnui tumkam sangta, ani tumchea sangata dating korunk sodhta zalear, tumi kitem kortolim? To khub dhiran tumchea lagim ulounk fuddem sorla mhunn ugddas dovrat. Tor taka man diun doiallaien tachea lagim uloiat. (Koloskarank 4:6 vachat.) Taka zobab diunchea poilim tumkam chintunk thoddo vell zai zalear, taka sangat. Punn oxem kortana chodduch vell kaddinakat. (Mho. 13:12) Tumi tachea sangata dating korunk sodhinant zalear, doiall ani spoxttponnim taka sangat. Austria-antlea Hans nanvachea bhavan kitem kelem tacher dhean dium-ia. Taka eke bhoinnin, to tika avoddtta mhunn sanglem tednam, tannem kitem kelem tem to sangta: “Mhaka tichea sangata dating korunk naka mhunn hanvem tika spoxttponnim ani doiall ritin sanglem. Hem hanvem rokddench kelem. Karonn tinnem koslich as dovorloli mhaka naka asli. Tea uprant, hanv tichea lagim jea toren vagtam tantuntlean, mhojem mon bodolʼlam oxem tika disona zaunk hanvem dhean dilem.” Punn tumi tea bhava sangata dating korunk toiar asat zalear tumi kitem korunk zata? Hea vixim taka sangat ani dating kortana tumi eka-meka koddlean kitem opekxa kortat tea vixim pasun uloiat. Oxem kelear borem zatolem. Karonn tumkam veg-vegllea toren vaddoilʼlean, tumchem chintop vegllem asonk xokta.
BHAV-BHOINNAMNIM ANKVAR ASAT TANKAM KOXI MODOT KORUNK ZATA?
14. Ami ankvar bhav-bhoinnank koxi modot korunk zata?
14 Kazar zaunk sodhtat tea ankvar bhav-bhoinnank ami sogleamnim koxi modot korunk zata? Ek vatt mhunnttlear, amchim utram xanneponnan uzar korun. (Ef. 4:29) Ami amkanch vicharunk zata: ‘Kazar zaunk sodhtat tea bhav-bhoinnank hanv challoitam kai? Ek ankvar bhav ani bhoinn eka-meka lagim uloitat tednam, tanche modem kitem tori cholta mhunn hanv chintʼtam kai?’ (1 Tim. 5:13) Toxench, amchea utram vorvim ankvar bhav-bhoinnank oxem disonk zaina ki tim kazar zaunk nant dekhun, tanchea jivitant kitem tori unnemponn asa. Hans, zache vixim ami poilim uloilʼlim, to sangta: “Thoddim bhav-bhoinnam mhunnttat, ‘Tuji pirai tor zaun geli, tum azun porian kazar kiteak zaunk na?’ Oslim utram mhunnttat tednam, ankvar bhav-bhoinnank apunn kainch valorachim nant ani apnnem begin kazar zaunk zai oxem dista.” Tor oxem mhunnchea bodlek, amchea ankvar bhav-bhoinnank urba dili zalear kitlem borem zatolem nhoi!—1 Tes. 5:11.
15. (a) Romkarank 15:2-ant dilʼlea totva pormonnem ami konnakui kazar zaunk ek sangati sodhtat tednam kitem ugddas dovrunk zata? (Chitr pasun polloiat.) (b) Video-ntlean tumi koslim mhotvachim lisanvam xiklim?
15 Umkoch bhav ani bhoinn kazar zalim zalear tanchi zoddi bori zatoli, oxem amkam dislear ami kitem korunk zai? Bible sangta, ami dusreanchea bhavnank man diunk zai. (Romkarank 15:2 vachat.) Zaitea ankvar bhav-bhoinnank dusreamnim aplea pasot ek sangati vinchun kaddlolo naka, ani tanchea hea nirnnoi-ak ami man diunk zai. (2 Tes. 3:11) Punn thoddea bhav-bhoinnank dusreamnim modot kelʼli zai asta. Tori astana, tannim amkam sangchea poilim ami tanche pasot soirik sodhunk fuddem sorchem nhoi.f (Mho. 3:27) Toxench, thoddea ankvar bhav-bhoinnank konnem-i somtench vhoron konnachea-i mukhar ubem kelʼlem naka. Hea vellar tumi kitem kortolim? Germany-nt ravpi Lydia nanvachi ek ankvar bhoinn oxem mhunntta: “Tumi get-together dovrun dusream sangata hea bhav ani bhoinnik pasun apounk zata. Hea toren tim eka-mekak mellon ulounk xoktolim. Ani tachea fuddem kitem korchem, tem tumi tancher soddunk zata.”
Sobhentlim bhav-bhoinnam get-together dovortat tednam ankvar bhav- bhoinnank eka-mekak mellonk sondhi melltta (Peregraf 15 polloiat)
16. Ankvar bhav-bhoinnamnim kitem ugddas dovrunk zata?
16 Ami kazari vo ankvar asum, ami soglim khuxal ravonk xoktat. (St. 128:1) Tor tumi kazar zaunk sodhtat ani tumkam azunui ek boro sangati mellonk na zalear, visvaxiponnan Jehovachi seva korit ravat. Macao-ntli, Sin Yi nanvachi bhoinn oxem mhunntta: “Fuddarachea Sobit Bagent tumi tumchea kazari sangatea borabor sodankal jieunk xoktolim. Tor hea vellak sor kelear, aiz tumi jitlo temp ankvar asat to vell kainch nhoi koso. Tor tumchem kazar zai poriant, tumcho vell bore toren uzar korat. Hi sondhi tumkam porot mellchi na!” Punn tumkam konnui avoddla ani tumi dating suru kelam zalear, boro nirnnoi gheunk tumi koslea vostuncher dhean diunk zata? Fuddlea lekhant amkam hea vixim zannam zaunk mellttolem.
GIT 137 Faithful Women, Christian Sisters
a Tumi kazar zaunk khorench toiar asat vo na tem zannam zaunk jw.org-acher “Dating—Part 1: Am I Ready to Date?” ho lekh vachat.
b UTRACHI SOMZONNI: Hea ani fuddlea lekhant, ami “courtship” vo “dating” hachea vixim polloitolim. Kazar zauncho hetu dovrun eka-mekachi vollokh korun ghetat vo mellttat, taka dating korop mhunnttat. Dating kortat tednam ek cheddo ani cheddum tim eka-meka pasot borim sangati zaunk xoktat vo na tem zannam zauncho proitn kortat. Ek cheddo vo cheddum, tim eka-mekak avoddtta mhunn sangtat tednam dating korop suru zata, ani tim eka-meka lagim kazar zatolim vo na ho nirnnoi gheum poriant tem chalu urta.
c Ho lekh bhoinnam lagim uloilʼlea bhaxen boroila. Punn hantunt dilʼlim totvam bhavank pasun lagu zatat.
d Thoddim nanvam bodolʼleant.
e Choddxea zageancher ek cheddo eka cheddvak, tem taka avoddtta ani to tachea sangata dating korunk sodhta mhunn sangot. Punn eka cheddvak ek cheddo avoddtta zalear, tem pasun taka tea vixim sangonk xokta. (Ruth 3:1-13) Hea vixim anik zannam zaunk 22 Otumbr, 2004-achea Zagrut Ravat! masikent, “Young People Ask . . . How Can I Tell Him How I Feel?” ho lekh vachat.