Jehovak Manvota Tea Toren Dating Koxem Korunk Zata?

1-2. Dating korchea vixim thoddeank koxem dista?

EK CHEDDO ani cheddum dating kortat tednam, tim khub khuxal astat. Tor sodʼdheak tumi dating kortat zalear, soglem bore bhaxen zalʼlem tumkam zai nhoi? Zaitim dating kortalim tednam, to tankam ek khuxalkaiecho vell aslo mhunn tim sangtat. Zoxem, Ethiopiantli bhoinn Tsiona sangta: “Mhozo ghov ani hanv dating kortalim tednam, to mhojea jivitantlo khub khuxalkaiecho vell aslo. Ami mhotvachea vixoi-ancher uloilim tem khorem, punn ami hanson-khellon pasun vell sarlo. Mhozo mog korta ani hanv tacho mog kortam toslo ek munis mhaka mellʼllo mhunn hanv khub khuxal aslem.”

² Toxench, Netherlands-antlo bhav Alessio sangta: “Hanv mhojea baile sangata dating kortalom tednam, tichea vixim zannam zaun gheunk mhaka khub borem distalem. Punn amkam thoddea oddchonneancho-i fuddo korcho poddlo.” Tor dating kortat tankam kosleo thoddeo oddchonneo ieunk xoktat, tankam Bible-antlim khoinchim thoddim totvam modot korunk xoktat, ani sobhentlea bhav-bhoinnamnim tankam koxi modot korunk zata tem polloum-ia.

DATING KITEAK KORTAT?

3. Dating kiteak kortat? (Mhonnʼnneo 20:25)

³ Dating korta tednam khuxalkai melltta ti khori, punn hem ek khub mhotvachem panvl zaun asa. Karonn hea udexim, ek cheddo ani cheddum apunn eka-meka lagim kazar zatolim vo na, tem tharaitat. Ani kazar zatolim mhunn nirnnoi ghetat zalear, tim jivim asom porian eka-mekacho mog kortolim ani eka-mekak resped ditolim mhunn kazara disa Jehova mukhar soput ghetat. Punn khoincho-i soput gheunchea poilim, tea vixim bariksannen chintop khub gorjechem. (Mhonnʼnneo 20:25 vachat.) Tor kazaracho soput gheunchea poilim pasun ami toxench korunk zai. Dating kortat tednam, eka cheddeak ani cheddvak eka-mekak bore toren vollkhonk ani tim kazar zatolim vo na tem bore bhaxen tharaunk modot zata. Punn tim kazar zaunchimnant zalear, dating korun kainch faido zaunk na oxem nhoi. Karonn dating kelʼlean tim ek boro nirnnoi gheunk pavtat.

4. Dating-a vixim sarkem chintop dovrop kiteak gorjechem?

⁴ Ek cheddo vo cheddum dating-a vixim sarkem chintop dovorta tednam, tim kazar zaunk sodhinant tachea sangata dating korchimnant. Ankvar asat tanninch nhoi, punn sogleamnim dating-a vixim sarkem chintop dovrop gorjechem. Karonn thodde lok chintʼtat ki ek cheddo ani cheddum dating kortat zalear, tannim kazar zaunkuch zai. Punn oxem chintlear kitem zata? Amerikentli ek ankvar bhoinn Melissa mhunntta: “Thoddim bhav-bhoinnam chintʼtat ki dating kortat tim kazar zatolinch. Hea chintpak lagon, ek cheddo ani cheddum kazar zaunk sodhinant zalear pasun, lokanche bhirantik lagon tim dating korop bond korinant. Toxench, thoddim dating-uch korunk sodhinant. Hem soglem chintun khubuch usko zata.”

EKA-MEKAK BORE BHAXEN ZANNAM ZAUN GHEIAT

5-6. Dating kortat tednam tumi eka-meka vixim kitem zannam zaun gheunk zata? (1 Pedru 3:4)

⁵ Tumi dating kortat zalear, tumi kazar zatolim vo na, ho nirnnoi gheunk tumkam koxi modot zatoli? Eka-mekak bore bhaxen zannam zaiat. Dating korchea poilim, tea munxa vixim tumkam thoddem kitem tori khobor astolem. Punn dating kortat tednam, to ‘kallzant thaun koso asa’ hem zannam zaunk tumkam ek sondhi asa. (1 Pedru 3:4 vachat.) Tor dating kortana, Jehova sangata tachi ixttagot koxi asa, tacho sobhav, toxench tachem chintop koxem asa tem zannam zaiat. Oxem kelʼlean, vell soron voita toso tumkam oslea prosnanche zobab mellttole. Zoxem, ‘Tumi eka-meka pasot borim sangati zaunk pavtolim kai?’ (Mho. 31:26, 27, 30; Ef. 5:33; 1 Tim. 5:8) ‘Tumkam goroz asa tea pormonnem, tumi eka-mekachi kallji gheun mog dakhounk pavtolim kai? Tumi eka-mekachim unnemponnam sosun ghetolim kai?’b (Rom. 3:23) Ugddas dovrat, eka-meka pasot tumi borim sangati zaunk pavtolim vo na, tem tumchea modem kitem ek-sarkem asa tacheruch nhoi, punn tumchem pottona tednam tumi bodol korunk toiar asat vo na tacherui tharlolem asa.

⁶ Dating kortana tea munxa vixim tumi anik kitem zannam zaunk zata? Mogan poddchea poilim tumi thoddea mhotvachea vixoi-ancher, zoxem fuddarak tannem kosle dhei dovorleat, tea vixim ulounk zata. Punn taka koslem tori duens asa kai, poixeanchem unnemponn asa vo tachea jivitant ghoddlolea vaitt ghoddnneank lagon tachim chintnam azun porian taka sotaitat kai? Hea vixim tumi zannam zaunk sodhtat zalear kitem? Dating korunk suru kortat tednanch, tumi soglea vixoi-ancher ulounkuch zai oxem na. (Juanv 16:12 sor korat.) Ani tannem tumkam vicharlolea thoddea prosnanche zobab tumi tednanch diunk sodhinant zalear, tea vixim tumi magir uloitolim mhunn taka sangonk zata. Punn vell soron voita toso tumi ek boro nirnnoi ghetolim zalear, oslea vixoi-ancher kednam-na-kednam ukteponnim ulovop gorjechem.

7. Dating kortat tannim eka-meka vixim anik koxem zannam zaun gheunk zata? (“Tumi Dating Korta To Tumchea Thaun Khub Pois Ravta Zalear Kitem Korchem?” hem boks pasun polloiat.) (Chitram pasun polloiat.)

⁷ Eka munxacho khoro sobhav tumi koxem zannam zatolim? Ek khub bori vatt mhunnttlear, tache lagim ukteponnim ani sot tem ulovop, prosn vicharop, ani dhean diun aikop. (Mho. 20:5; Jak. 1:19) Oxem kortolim zalear, tumi sangata mellon jevunk zata, lok asta tea zageancher pasoiek vochonk zata, ani sangata porgottnni korunk zata. Toxench tumi tumchea famili ani ixttam sangata mellon ietat tednam, eka-meka vixim anikui zannam zaunk zata. Tea bhair, tumi sangata mellon thoddim oslim kamam korunk zatat, jea udexim tumkam to munis veg-vegllea poristhitimnim ani veg-vegllea lokam sangata koso vagta tem kollon ietolem. Netherlands-antlim Aschwin ani Alicia dating kortalim tednam, tannim kitem kelem tea vixim Aschwin oxem mhunntta: “Eka-meka vixim zannam zaun gheunk, ami sangata mellon lhan-lhan kamam kelim. Zoxem, ami jevonn randlem vo ghorantlim her kamam kelim. Oxem kelolean, ami eka-mekache bore gunn ani unnemponnam zannam zaunk pavlim.”

8. Dating kortat tannim sangata mellon Bible-acho obheas kelear kitem faido zatolo?

⁸ Tumi eka-mekak anik bore toren vollkhonk, sangata mellon Bible-antlea veg-vegllea vixoi-ancher obheas pasun korunk zata. Tumi fuddarak kazar zait zalear, Deva lagim tumchi ixttagot ghott korunk tumi kuttumbik bhokti kortolinch. (Up. 4:12) Tor atanch thaun, sangata mellon Bible obheas korunk vell kaddlear, kitlem borem zatolem nhoi! Dating kortat tim sodʼdheak ek famil nhoi ani to bhav tea bhoinnicho mukheli nhoi tem khorem. Tori astana, atanch thaun tannim sangata sodanch Bible-acho obheas kelear, Deva sangata tanchi ixttagot kitli ghott asa tem tim zannam zatolim. Oxem kelʼlean, Amerikentlea Max ani Laysa-k anik ek faido zalo. Max mhunntta: “Ami eka-mekak mellonk laglim tednam rokddench, dating, kazar, ani famil, oslea vixoi-ancher aslolea prokaxonancho obheas korunk laglim. Oxem kelʼlean, ami zaitea mhotvachea vixoi-ancher ulounk pavlim, jea vixim ami bexttinch uloitalim zalear ghoddie kednanch ulounk pavchim naslim.”

TUMI ANIK KOSLEA VIXOI-ANCHER DHEAN DIUNK ZATA?

9. Tumi dating kortat mhunn konnank sangchem hea vixim nirnnoi ghetana tumi kitem ugddas dovrunk zata?

⁹ Tumi dating kortat mhunn konnank sangonk zai? Ho nirnnoi dating korta tea cheddean ani cheddvan gheunk zata. Tumi dating korunk suru kortat tednam, tumi fokot thoddeankuch sangtolim mhunn chintlam astolem. (Mho. 17:27) Oxem kelʼlean, dusrea lokanchea prosnancho ani beginuch kazar zaunk ieta tea dobhavacho tumkam fuddo korunk poddchona. Punn bhirantin, tumi konnakuch sangchimnant mhunn nirnnoi ghetlo zalear khub dhokeachem zaunk xokta. Karonn tumi dating kortat mhunn lipounk, tumi ghoddie ekttinch bhonvot ani patkant poddot. Hea pasot, tumkam bore solʼle diunk xoktat ani modot korunk xoktat tankam tumi hea vixim sangonk zata. Zoxem, tumchea thoddea ghorcheank, ixttank, vo vhoddilank.​—Mho. 15:22.

10. Dating kortat tannim apli vagnnuk Jehovak manvota tea toren koxi dovrunk zata? (Mhonnʼnneo 22:3)

¹⁰ Dating kortat tannim apli vagnnuk Jehovak manvota tea toren koxi dovrunk zata? Tumi eka-meka vixim jitlim chodd zannam zatolim, titloch eka-meka pasot tumcho mog vaddttolo. Tor hea vellar, Jehovak manvona toslem kainch korina zaunk tumkam koxi modot zatoli? (1 Kor. 6:18) Burxem uloinakat, sangata ekttinch ravonakat ani hispa bhair soro pienakat. (Ef. 5:3) Na zalear, chukicheo itsa vaddonk xoktat ani sarkem tem korunk tumkam khub kotthin zaunk xokta. Tor tumchi vagnnuk Jehovak manvota tea toren dovrunk, tumi kitem korunk zata tea vixim eka-meka lagim sodanch uloiat. (Mhonnʼnneo 22:3 vachat.) Oxem kelʼlean, Ethiopiantlea Dawit ani Almaz-ak koxi modot zali tem tim sangtat: “Zaite lok asat tea zageancher ani amchea ixttam sangata ami mellon ietalim. Ami gaddient vo ghorant kednanch ekttim ravonk nant. Hea toren, ami tallnnent poddonk xoktalim toslea poristhitim thaun pois ravlim.”

11. Dating kortat tea cheddean ani cheddvan eka-mekak mog dakhounchea vixim kitem ugddas dovrunk zata?

¹¹ Punn tumi ghoddie kazar zatolim, oxem tumkam atam dista zalear kitem? Tumi anikui veg-vegllea toren eka-mekak mog dakhounk sodhtolim. Punn oxem kortana, tumche kuddiche anvdde vaddonk xoktat, ani tumi dating kortat tea munxa vixim sarkem chintop dovornastana ghoddie chukichem panvl gheunk pavot. (Git. 1:2; 2:6) Toxench, tumkam svotacher tabo dovrunk kotthin zait ani tumi Jehovak manvona tem korunk pavot. (Mho. 6:27) Taka lagon, Jehovachea dorjeam vixim uloiat ani tumi eka-mekak mog dakhounk kitem kortolim ani kitem korchimnant tem poilinch tharaiat.c (1 Tes. 4:3-7) Tumi hea don prosnam vixim chintunk zata: ‘Tumi jea toren eka-mekak mog dakhoitat, tem polloun tumchea vattarantle lok kitem chintʼtole? Ani tumi jea toren eka-mekak mog dakhoitat tea vorvim tumchea kuddiche anvdde vaddttole kai?’

12. Dating kortana tumche vichar pottonant tednam tumi kitem korunk zata?

¹² Tumche vichar pottonant tednam tumi kitem korunk zata? Thodde pavtti, tumche vichar pottonant dekhun, tumi eka-meka pasot borim sangati zaunk pavchimnant mhunn chintinakat. Karonn, soglea zoddpeanchea jivitant kednam-na-kednam voir-sokol zatach. Punn ek zoddpem tankam ietat teo oddchonneo sangata mellon suttaveo kortat tednam tim aplea kazari jivitant khuxal ravonk pavtat. Tor ugddas dovrat, atam tumkam ietat tea oddchonneancho tumi koso fuddo kortat tea udexim, tumi fuddarak kazar zalim zalear tumchem jivit koxem astolem tem kollon ieta. Tumi tumkanch vicharat: ‘Amchea modem kitem voir-sokol zata tednam ami eka-meka lagim xantponnim ani respedan uloun tem suttavem kortat kai? Amcheo chuki manun gheunk ani teo sudharunk ami rokddench panvl ghetat kai? Ami eka-mekak sangtat tem manun gheunk, bhogsonnem magonk ani bhogsunk rokddinch toiar zatat kai?’ (Ef. 4:31, 32) Punn tumi dating kortat tednam, tumchea modem hispa bhair vad-vivad zatat zalear, kazar zalea uprant te unne zatole mhunn chintinakat. Tor to munis tumkam ek boro sangati nhoi mhunn tumkam atam kollon ailem zalear, dating korop bond kelolean tumkam dogainkui faideachem zatolem.d

13. Ek cheddo ani cheddum kitlo temp poriant dating kortolim hem tannim koxem tharaunk zata?

¹³ Kazar zaunk sodhta to cheddo ani cheddum kitlo vell poriant dating korunk xoktat? Goddboddan ghetlolea nirnnoi-ancho porinnam vaitt zaunk xokta. (Mho. 21:5) Ek cheddo ani cheddum eka-mekak bore toren vollkhom poriant tim dating korunk xoktat. Punn hacho orth, tannim kainch nirnnoi ghenastana dating korit ravonk zata oxem nhoi. Karonn Bible pasun sangta: “Kel’li opekxa purnn zaunk vell lagta tednam, kalliz dukhi zata.” (Mho. 13:12, NW) Tea bhair, tumi chodd temp dating korit ravlim zalear, tumchea kuddichea anvddeancher tabo dovrop anikui kotthin zaunk xokta. (1 Kor. 7:9) Tor tumi kitlo temp poriant dating kortat tacher dhean diunchea bodlek, tumi tumkanch ho prosn vicharunk zata: ‘Hanv tachea lagim kazar zatolem vo na ho nirnnoi gheunk, hanv tachea vixim anik kitem zannam zaunk sodhtam?ʼ

DATING KORTAT TANKAM BHAV-BHOINNAMNIM KOXI MODOT KORUNK ZATA?

14. Dating korta tea zoddpeak ami koxi modot korunk zata? (Chitr pasun polloiat.)

¹⁴ Ek zoddpem dating korta mhunn amkam kollon ailem zalear, ami tankam koxi modot korunk zata? Ami tankam amger jevnnak, kuttumbik bhoktek vo her monoronjona vellar apounk zata. (Rom. 12:13) Karonn oslea vellar, tim eka-mekak anik bore toren zannam zaun gheunk xoktat. Tea bhair, ami tanchea sangata bhonvonk vochonk zata, tanchea sangata gaddient vochonk zata, vo tim ekttinch urona zaunk ami tankam amchea ghora apounk zata. (Gal. 6:10) Ami poilim uloilʼlim tim Alicia ani Aschwin dating kortalim tednam, bhav-bhoinnamnim tankam jea toren modot keli tantuntlean tankam kitem borem dislem tea vixim ugddas kortana, Alicia oxem mhunntta: “Ami sangata mellon ulounk sodhtalim tednam, thoddea bhav-bhoinnamnim ami tanger ieunk zata mhunn amkam sanglem. Hem aikon amkam khub borem dislem.” Tor dating korta toslea eka zoddpean amchi modot magli zalear, amchea ixttank modot korunk amkam ek sondhi mellʼlli mhunn chintun tankam adar dium-ia. Punn ugddas dovrat, oxem kortana tim tumchea nodre mukhar asonk zai tem khorem, punn tancheo khobro tumkam aikonk ietat titlea lagim ravonakat. Tankam eka-meka sangata ulounk diat.​—Filp. 2:4.

15. Dating kortat tankam ami anik khoinche toren modot korunk zata? (Mhonnʼnneo 12:18)

¹⁵ Dating kortat tankam ami anik khoinche toren modot korunk zata? Ami tankam kitem mhunnttolim vo kitem mhunnchimnant, tacher ami dhean diunk zata. Thodde pavtti, amcher tabo dovrun amkam vogich ravonk poddot. (Mhonnʼnneo 12:18 vachat.) Udharonnak, ek bhav vo bhoinn dating kortat mhunn amkam kolltta tednam, amkam dusreank sangonk koxem disot. Punn hea vixim tim svota zaun dusreank sangonk sodhtat astolim, tor ami vochon dusreank sangchem nhoi. Toxench, ami tanchea vixim chaddio korcheo nhoi, vo tannim ghetlolea nirnnoi-ant chuki sodhun kaddcheo nhoi. (Mho. 20:19; Rom. 14:10; 1 Tes. 4:11) Tea bhair, ami oxem kainch mhunnchem nhoi vo vicharchem nhoi, jea udexim ami tancher kazar zaunk dobhav ghaltat, oxem tankam distolem. Hea vixim bhoinn Elise ani ticho ghov mhunntta: “Amchea kazarachi toiari koxi cholʼlea mhunn thoddim amkam vichartalim tednam amkam kitench-xem distalem. Karonn hea vixim aminch ulounk naslim.”

16. Ek cheddo ani cheddum dating korop bond kortat zalear ami kitem korunk zai?

¹⁶ Ek cheddo ani cheddum dating korop bond kortat zalear ami kitem korunk zai? Tannim dating bond korcho nirnnoi kiteak ghetlo, hem ami zannam zauncho proitn korcho nhoi, vo tea cheddeacheo vo cheddvacheo chuki kaddcheo nhoi. (1 Ped. 4:15) Lea nanvachi bhoinn oxem mhunntta: “Hanvem eka bhava sangata dating korop bond kelem tednam, dusrim amchea vixim khobro korunk laglim. Tem aikon mhaka khub dukh zalem.” Ami survatek polloilem toxem, ek cheddo vo cheddum dating bond kortat zalear, hacho orth tannim chukicho nirnnoi ghetla oxem nhoi. Punn dating kelolean, tankam ek boro nirnnoi gheunk modot zali mhunn ugddas dovrat. Konnui dating bond kortat tednam, tankam khub dukh zaunk xokta ani eksurponn bhogonk xokta. Tor ami tankam modot korunk veg-veglleo vatto sodhunk zatat.​—Mho. 17:17.

17. Dating kortat tannim kitem korcho proitn korit ravonk zai?

¹⁷ Ami atam meren polloilem toxem, dating kortat tednam amkam oddchonneo ieunk xoktat tem khorem. Punn ho ek khuxalkaiecho vell pasun asta. Jessica sangta: “Khorem sangchem mhunnttlear, ami dating kortalim tednam, amkam khub vavr korcho poddlo. Punn oxem kelʼlean amkam boreak poddlem. Karonn ami eka-mekak bore bhaxen zannam zaunk pavlim.” Tor tumi dating kortat zalear, eka-mekak bore bhaxen zannam zaun gheunk proitn korit ravat. Oxem kelʼlean tumi ek boro nirnnoi gheunk pavtolim.