Mogak Lagon Porgott Korit Ravom-ia!

1. 2023-achea vorsavolliche mittingek amkam kitem kollon ailem?

AMCHE somzonnent kosle thodde bodlav zaleat tem amkam 2023-achea vorsavolliche mittingeka sanglolem. Toxench, amche porgottnne vixim thoddeo kollounneo amkam tea mittingek aikonk mellʼlleo. Udharonnak, amkam kollon ailem ki Bollixtt Babilonacho nas zalea uprant pasun, thoddea zannank Jehovachea lokam sangata tachi seva korunk sondhi mellttoli. Toxench, amkam kollon ailem ki Novembr 2023-ant, porgottnnaramnim porgottnne vixim soglench ripott korchi goroz na. Tor he bodlav zaleat hacho orth, porgottnnechem kam poilim poros mhotvachem na oxem kai? Na, toxem nhoi.

2. Dor ek dis voita toso porgottnni korop anikui mhotvachem kiteak zaun asa? (Marku 13:10)

² Dor ek dis voita toso, porgottnnechem kam korop anikui mhotvachem zaun asa. Karonn xevott ieunk atam chodd vell uronk na. Nimannea disamnim, porgottnni korop anikui mhotvachem astolem mhunn Jezun sanglolem. (Marku 13:10 vachat.) Ani Matevachea pustoka pormonnem, Jezun sanglem ki hem porgottnnechem kam “xevott” ieunchea poilim zatolem. (Mt. 24:14) Ho xevott mhunnttlear, Soitanachea tabeant aslolea noxttea sonvsaracho purnn toren nas. Ani ho nas korunk, Jehovan ek ‘dis ani ek vell’ tharaila. (Mt. 24:36; 25:13; D.I. 1:7) Tor ek-ek dis voita toso, xevott lagim pavot asa. (Rom. 13:11) Tor xevott iesor ami porgottnnechem kam korit ravonk zai.

3. Ami bori khobor kiteak porgottʼttat?

³ Ami sogleamnim eka mhotvachea prosna vixim chintunk zata. To mhunnttlear, ami bori khobor kiteak porgottʼttat? Sompea utramnim sangchem mhunnttlear, mogak lagon. Ami porgottʼttat ti bori khobor amkam khub mogachi. Toxench, amkam lokancho mog asa. Ani sogleant mhotvachem mhunnttlear, amkam Jehovacho ani tachea nanvacho mog asa. Tor amchea porgottnnechea kama udexim, ho mog dison ieta. Atam ek-ek korun ami hea tin mudʼdeam vixim uloum-ia.

AMI PORGOTTʼTTAT TI BORI KHOBOR AMKAM KHUB MOGACHI

4. Amkam ek bori khobor melltta tednam amkam koxem bhogta ani ami kitem kortat?

⁴ Chintat, tumchea soireanger ek bhurgem zolmolam mhunn tumi aikotat. Vo tumi khub gorjen sodhtalim tem kam mellʼllam mhunn tumkam kolltta. Osli ek bori khobor melltta tednam tumi kitlim khuxal zatat nhoi! Ani ti khobor tumchea ghorcheank ani ixttank sanglea bogor tumchean ravonk zaina. Tor tumkam sogleam-von bori khobor, tem mhunnttlear Rajeachi bori khobor mellʼlli tednam, tumkam oxench kitem bhoglem nhoi?

5. Tumkam poilech pavtt Bible-antlem sot kollon ailem tednam koxem bhoglem? (Chitram pasun polloiat.)

⁵ Tea vellacho ugddas korat, jednam tumkam poilech pavtt Bible-antlem sot kollon ailem. Udharonnak, tumcho sorgincho Bap tumcho khub mog korta ani tumi tachea familicho bhag zalʼlim taka zai mhunn tumkam kollon ailem tednam, tumkam koxem bhoglem? Toxench, Dev amche sogle dukh-tras kabar kortolo ani amchim mogachim meleant tankam pasun to jivont kortolo, hem zannam zaun tumkam koxem bhoglem? (Mk. 10:29, 30; Ju. 5:28, 29; Rom. 8:38, 39; Prok. 21:3, 4) Him sotam xiktat tednam tumchem kalliz bhoron ailem astolem nhoi! (Luk. 24:32) Tumi kitem xiktalim tem tumkam khub avoddlem ani him sotam tumkam itlim mogachim aslim ki dusreank sanglea bogor tumchean ravonk zaina zalem!—Jeremias 20:9 sor korat.

6. Ernest ani Rose-achea onnbhovantlean tumi kitem xiklim?

⁶ Hea vixim ek onnbhov polloum-ia. Ernestb nanvacho ek bhav sumar dha vorsancho aslo tednam, tacho daddy bhair poddlo. Bhav sangta: “‘Daddy sorgar gela astolo kai? Vo to mhaka porot kednanch mellchona kai?’ oxem hanv chintʼtalom. Ani hanv dusrea bhurgeank tanchea bapai sangata polloitalom tednam mhaka khub unnemponn bhogtalem.” Bhav zaite pavtti aplea bapaichea fondda lagim dimi ghalun oxem magtalo: “Deva, mhozo daddy khoim asa tem please mhaka sang.” Bhavacho bapui moron sumar 17 vorsam uprant taka Sakxi mellʼllim ani to rokddoch tanchea sangata Bible xikonk laglo. Tea vellar, taka Bible-antlean kollon ailem ki meleant tim nhident aslolea porim asat, tankam kainch khobor na ani tim fuddarak jivont zatolim. (Up. 9:5, 10; D.I. 24:15) Hem zannam zaun to ekdom khuxal zalo. Karonn itlim vorsam poriant to jea prosnanche zobab sodhtalo te taka mellʼlle. Uprant tachi bail Rose pasun, Bible-acho obheas korunk lagli ani tika pasun ti jem xiktali tem khub avoddlem. Magir 1978-ant, tannim dogaimnim bautizm ghetlo. Ani tim jem xiklolim, tem tim urben aplea familik, ixttank ani herank sangonk laglim. Ani tea udexim tim 70-am poros chodd zannank sot xikounk ani bautizm gheunk modot korunk pavlim.

7. Bible-antlim sotam amchea kallzak lagtat tednam kitem zata? (Lukas 6:45)

⁷ Bible-antlim sotam amchea kallzak lagtat tednam, tim dusreank sanglea bogor amchean ravonk zaina. (Lukas 6:45 vachat.) Poilea xekddeantlea xisank bhoglem toxem amkam-i bhogta. Tannim mhunnttlolem: “Amchean zalear, ami jem kitem polloilam ani aikolam, tea vixim ulounchem bond korunk zaunchem na.” (D.I. 4:20) Tor ami Bible-antlea sotancho itlo mog kortat ki ami tea vixim zata titlea lokank sangonk sodhtat.

AMI LOKANCHO MOG KORTAT

8. Dusreank bori khobor sangonk ami amchean zata tem soglem kiteak kortat? (“Mog Dakhoiat—Xis Korat,” hem boks polloiat.) (Chitr pasun polloiat.)

⁸ Jehova ani Jezu bhaxen, ami lokancho mog kortat. (Mho. 8:31; Ju. 3:16) Aiz lok ‘Deva bogor vo Devachi vollokh nastana jietat’ ani tankam ‘kainch bhorvonso na.’ (Ef. 2:12) Amkam hea lokanchi khub doia-maia dista. Tim jivitachea oddchonneamnim eka orthan buddttat ani tankam salvar korchi life-jacket, mhunnche Devachea Rajeachi bori khobor amchea lagim asa. Tor amkam tancho mog asa dekhun, hi bori khobor sangon tancho jiv salvar korunk amchean zata tem soglem korunk ami khub vavr kortat. Karonn hea vorvim tankam ek bhorvonso melltta ani atam ek khuxal jivit jieunk tankam modot zata. Ani novea sonvsarant ‘khorem jivit,’ mhunnche sasnachem jivit melloun gheunchi sondhi tankam melltta.​—1 Tim. 6:19.

9. Ami fuddara vixim kitem xittkaunni ditat, ani kiteak? (Ezekiel 33:7, 8)

⁹ Ami lokancho mog kortat dekhun, ami tankam hea noxttea sonvsaracho beginuch xevott zatolo mhunn pasun xittkaunk sodhtat. (Ezekiel 33:7, 8 vachat.) Amkam amchea xezareanche ani sotant naslolea ghorcheanche churchure distat. Karonn tim aplea sodanchea jivitant itlim bizi astat ki tankam fuddarak beginuch kitem zaunchem asa tem khobor na. Punn beginuch “sonvsarachea survatek thaun atam poriant ieunk na ani fuddem kednanch ieunchem na toslem vhodd sonkoxtt ietolem” mhunn ami zannant. (Mt. 24:21) Tor ami tankam hea zhoddttechea vella vixim sangtat ki beginuch khottea dhormancho xevott zatolo ani tea uprant Armageddonachea zhuzant ho akʼkho noxtto sonvsar kabar zatolo. (Prok. 16:14, 16; 17:16, 17; 19:11, 19, 20) Tor ho xevott ieunchea adim, zata titlo lok hi xittkaunni aikon amchea sangata Jehovachi bhokti korunk ektthaim zalʼlo amkam zai. Punn amchea ghorcheanchem ani tea lokanchem kitem zatolem jim atam hi xittkaunni aikon ghenant?

10. Ami lokank atam xittkaunni di-it ravop kiteak ekdom mhotvachem?

¹⁰ Ami fattlea lekhant zannam zalʼlim toxim, Bollixtt Babilonacho nas zalo tem polloun, thoddeanchem mon bodlonk xokta ani tim Jehovachi bhokti korunk suru korunk xoktat. Tor ami atanch thaun tankam tea vixim xittkaunni divop ekdom gorjechem asa. Ami hem ugddas dovrum-ia: Ami atam tankam hea vixim sanglem zalear, tankam ghoddie tea vellar tem ugddas ietolem. (Ezekiel 33:33 sor korat.) Ani oxem zalem zalear, tim amchea sangata mellon Jehovachi bhokti korunk lagot. Paulu Filipint bondkhonnint aslo tednam, bondkhonnichea odhikarean “ek vhoddlo bhuimkamp zalo” tem polloilea uprantuch, Jehovacher bhavarth dovorlo. (D.I. 16:25-34) Teach bhaxen, Bollixtt Babilonacho nas zata hi ojap korta tosli ghoddnni polloilea uprantuch, ghoddie thoddim zannam Jehovacher bhavarth dovrunk lagot.

AMI JEHOVACHO ANI TACHEA NANVACHO MOG KORTAT

11. Ami Jehovak mhoima, man ani xokti koxi ditat? (Prokasovnni 4:11) (Chitram pasun polloiat.)

¹¹ Bori khobor porgottunk sogleam-von mhotvachem karonn mhunnttlear, ami Jehova Devacho ani tachea povitr nanvacho khub mog kortat. Ani porgottnni korun ami Jehovak vakhannunk sodhtat mhunn dakhoun ditat. (Prokasovnni 4:11 vachat.) Sogli mhoima, man ani xokti fokot Jehova Devak favo mhunn ami manun ghetat. Tea pasot, Jehovanuch “sogleo vostu rochleat” ani takach lagon ami jivim asat mhunn ami dusreank khatreche purave ditat. Oxem korun, ami taka mhoima ani man ditat. Toxench ami amcho vell, takot ani amche lagim asat teo vostu diun amchean ghoddtta tea bhaxen porgottnnent vavr kortat. Oxem korun, ami eka orthan taka amchi xokti ditat. (Mt. 6:33; Luk. 13:24; Kol. 3:23) Khorem mhunnttlear, ami mog kortat tea Deva vixim ulounk amkam khub avoddtta. Toxench, tachea nanva vixim ani to koslo Dev tea vixim dusreank sangonk amkam gorv bhogta. Kiteak?

12. Ami porgottnni kortat tednam Jehovachem nanv koxem povitr kortat?

¹² Ami Jehovacho mog kortat dekhun ami tachem nanv povitr korunk sodhtat. (Mt. 6:9) Soitanan Jehova vixim jeo fotti posraileat ani tachea nanvacher zo arop ghatla to ami kaddun uddounk sodhtat. (Ut. 3:1-5; Job 2:5a; Ju. 8:44) Tor porgottnni korun, Jehova Dev konn ani taka kosle gunn asat tem ami dusreank sangtat. Tem mhunnttlear, Jehova ek mogall Dev, to sarke toren raz choloita ani konnacheach sangata onʼneai korina. Toxench, tachem Raj beginuch munxakullache sogle dukh-tras kaddun uddoitolem ani xanti toxench khuxalkai haddttolem mhunn ami dusreank sangtat. (St. 37:10, 11, 29; 1 Ju. 4:8) Oxem korun ami Jehovachem nanv povitr kortat. Ani amkam hem zannam zaun khuxalkai melltta ki Jehovan amkam aplim Sakxi mhunn ji zobabdari dilea ti ami pallttat. Koxi?

13. Ami Jehovachim Sakxi mhunn amkam khub gorv kiteak bhogta? (Izaias 43:10-12)

¹³ Jehovan amkam aplim “sakxidaram” mhunn vinchun kaddleant. (Izaias 43:10-12 vachat.) Thoddea vorsam poilim Sonchalon Monddollachea eke chittint oxem sanglolem: “Jehovan amkam aplim Sakxi mhunn vinchun kaddleant. Hachea poros amkam vhodd man anik kainch na.”c Tor ho amkam ek vhodd man oxem ami kiteak mhunnttat? Hea udharonna vixim chintat: Konnem tori tumchea vixim fotti sangon tumchem nanv piddʼddear kelam ani atam tumchea add kes cholta. Tor tumchea pasot sakx diunk tumi konnank vinchun kaddttolim? Tumi oslea eka munxak vinchun kaddttolim, zaka tumi vollkhotat, zacher tumi patietat ani zo sarkem tem sangta mhunn lokank visvas asa. Teach bhaxen, Jehovan amkam aplim Sakxi mhunn vinchun kaddun to amkam ekdom bore toren vollkhota, ani ami tache vixim sarkem tem sangtolim mhunn taka visvas asa mhunn dakhoilam. Tor ho Jehovan amkam dilʼlo kitlo vhodd sueog asa nhoi! Tea pasot amkam melltta ti dor ek sondhi uzar korun, ami soglea lokank tachem nanv kolloitat. Ani tache vixim jeo fotti posraileat teo sarkeo nhoi mhunn ami dakhoun ditat. Ami oxem kortat tednam amkam khub gorv bhogta!—St. 117:1; Rom. 10:13-15.

XEVOTT IESOR PORGOTTIT RAVOM-IA

14. Fuddarak kitem zatolem mhunn ami axeun asat?

¹⁴ Fuddarak kitem zaunchem asa tem pollounk ami khub axeun asat nhoi! Karonn vhodd sonkoxtt suru zaunchea poilim zaite lok sot apnnaitole mhunn ami axeun asat. Titlench nhoi, munxakullachea ekdom kotthin vellar, mhunnche vhodd sonkoxttachea vellar, ghoddie anikui zaitim zannam amchea sangata Jehovak vakhannunk ektthaim ietolim mhunn ami axetat.​—D.I. 13:48.

15-16. Ami kitem korit ravtolim, ani kednam mhunnosor oxem kortolim?

¹⁵ Tea mhunnosor, Jehovan amkam dilʼlem mhotvachem kam ami korit ravom-ia. Tem mhunnttlear, sonvsarbhor Devachea Rajeachi bori khobor porgottop. Ani hem kam porot kednanch zaunchem na! Punn hachea borabor ami lokank xittkaunni pasun di-it ravonk zai. Karonn hea noxttea sonvsaracho beginuch nas zauncho asa mhunn tankam kollonk zai. Tankam hem kollʼllem zalear, zhoddttecho vell suru zata tednam, ami jem kitem porgottʼttalim tem Jehova Devanuch amkam sangonk lailʼlem mhunn tim zannam zaunk pavtolim.​—Ez. 38:23.

¹⁶ Tor ami kitem korum-ia? Atam porgottnni korop anikui chodd mhotvachem mhunn ami vollkhon gheum-ia ani urben porgottit ravom-ia. Karonn ami porgottʼttat ti khobor amkam khub mogachi asa, amkam lokancho mog asa, ani sogleam-von mhotvachem mhunnttlear amkam Jehovacho ani tachea nanvacho mog asa. Tor Jehovan “Puro!” oxem mhunnosor, ami porgottnnechem kam korit ravom-ia.