OBHEASACHO LEKH 32
GIT 44 A Prayer of the Lowly One
Sogleamnim Poschatap Kelʼlo Jehovak Zai
“Konnanchoch nas zalʼlo [Jehovak] naka. Tachea bodlek, sogleank poschatap korunk sondhi mellʼlloli taka zai.”—2 PED. 3:9.
MUKHEL MUDʼDO
Poschatap korop mhunnttlear kitem, ami sogleamnim toxem korchi kiteak goroz asa ani Jehovan lokank poschatap korunk koxi modot keli tem ami hea lekhant polloitolim.
1. Poschatap korta to munis kitem korta?
AMI patok kortat tednam poschatap korop khub mhotvachem. Bible sangta ki poschatap korta to munis tannem kelʼlea patkacho dves korta, ti vatt soddun dita ani porot kednanch tem patok korchona mhunn ghott nichov korta.—Xobdhkoxant “Poschatap” hem polloiat.
2. Poschatap korop mhunnttlear kitem tem ami sogleamnim zannam zavop kiteak gorjechem? (Nehemias 8:9-11)
2 Aiz sogleamnim, poschatap korop mhunnttlear kitem tem zannam zavop gorjechem. Karonn Adanv-Evechi sonsot zalʼlean ami patki. Ami dor disak patok kortat ani taka lagon amcher moronn ieta. (Rom. 3:23; 5:12) Ghott bhavarth aslole munis, zoso apostl Pauluk pasun vaitt anvddeam add zhuzonk kotthin zalem. (Rom. 7:21-24) Punn amchea patkank lagon ami soglea vellar niraxi asonk zai oxem nhoi! Karonn Jehova khub doiall ani ami khuxal aslolim taka zai. Nehemiasachea disamnim jielʼlea Judevam sovem kitem ghoddlem tea vixim chintat. (Nehemias 8:9-11 vachat.) Tannim adim kelʼlea patkank lagon niraxi zaunchea bodlek, tannim apli seva khuxalkaien kelʼli Jehovak zai aslem. Ani ami poschatap kelear amkam khuxalkai melltta hem Jehova zannam. Tor poschatap mhunnttlear kitem tem to amkam xikoita. Ani ami poschatap kelear, amcho doiall Bap amkam bhogxitolo mhunn ami khatri dovrunk zata.
3. Hea lekhant ami kitem polloitolim?
3 Hea lekhant ami poschatapa vixim tin mudʼde polloitolim. Poilo, Jehovan poschatapa vixim Izrael porjek kitem xikoilem? Dusro, Jehovan poilem panvl gheun patki lokank poschatap korunk koxi modot keli? Ani tisro, poschatapa vixim Jezun aplea xisank kitem xikoilem?
JEHOVAN POSCHATAPA VIXIM IZRAEL PORJEK KITEM XIKOILEM?
4. Jehovan poschatapa vixim Izrael porjek kitem xikoilem?
4 Jehovan Izraelitkarank kaide dilʼle tednam tim te pallttolim mhunn tannim taka bhas dilʼli. Tannim oxem kelʼlem zalear to tankam rakhtolo ani besanvam ditolo aslo. Apnnem dilʼlea kaidea vixim Jehovan tankam oxem sanglem: “Aiz hanv tuka ditam ti Somurt tuje sokti poros vhodd nhoi ani tujean ti pallunk zata.” (D.S. 30:11, 16) Punn Izraelitkaramnim Jehovache kaide pallunk nasle zalear vo tim khottea devanchi bhokti korunk laglim zalear, to tanchi rakhonn korcho naslo ani tankam tras sosunk poddttole asle. Punn hacho orth, to tankam purnn toren soddun ditolo aslo oxem nhoi. Karonn tim Jehova lagim ‘novean portun ieunk xoktalim ani tacho tallo soglea tanchea kallzan ani monan novean aikonk xoktalim.’ (D.S. 30:1-3, 17-20) Tem mhunnttlear, tim poschatap korunk xoktalim. Ani tannim toxem kelʼlem zalear, Jehova tankam lagim sortolo aslo ani tankam besanvam ditolo aslo.
5. Jehovan aplea lokank modot korop bond korunk na mhunn koxem dakhoilem? (2 Raza 17:13, 14)
5 Punn Jehovan vinchun kaddlole lok porot-porot tache add patok korit ravle. Te murti-puza ani her vitt haddttat toslim kamam kortale. Tea pasot tankam tras sosche poddle. Punn aplea lokank apli seva korit ravonk modot korop Jehovan bond korunk na. Tannem porot-porot provadeank dhaddun, tankam poschatap korun porot aplea lagim ieunk sanglem.—2 Raza 17:13, 14 vachat.
6. Poschatap korop gorjechem mhunn Jehovan aplea lokank koxem xikoilem? (Chitr pasun polloiat.)
6 Jehovan aplea lokank provadeam vorvim zaite pavtti xittkaile. Udharonnak, Jeremiasa vorvim tannem oxem sanglem: “Ovisvaxi Israela, portun ie! Uloita to Sorvespor. Hanv tujer anink rag dhorcho na, kiteak Hanv doiall-movall kallzacho . . . Hanv sodankal rag dhorun ravcho na.” (Jer. 3:12, 13) Joela vorvim tannem oxem mhunnttlem: “Sogllea tumchea kallzan Mhoje-xim portun ieiat.” (Jo. 2:12, 13) Izaiasak tannem oxem sangonk lailem: “Nitoll zaiat. Mhojea dolleam mukhavelem tumchem khotteponn pois kaddat. Anink vaitt korum nakat.” (Iz. 1:16-19) Ani Ezekiela vorvim tannem oxem vicharlem: “Noxtto monis morun gelo zalear, mhaka sontos bhogta mhonn dista tumkam? . . . Aplem noxtteponn soddun diun to jivo urlo zalear ki mhaka odik sontos bhogta! . . . Konnacheach mornnan mhaka sontos bhogona . . . dekhun jivit bodlat ani jivim urat.” (Ez. 18:23, 32) Tor konnui poschatap korta tednam Jehova khub khuxal zata. Karonn tim sasnak jielʼlim taka zai! Punn ek munis poschatap korisor Jehova taka modot korunk ravta kai? Hem zannam zaunk ami thoddim udharonnam polloum-ia.
Jehovache lok tachea add gele tednam, tannim poschatap korunk Jehovan zaite pavtti provadeank uzar kele (Peregraf 6-7 polloiat)
7. Hosea ani tachi bail Gomera udexim Jehovan aplea lokank koslem lisanv xikoilem?
7 Hosea ani tachi bail Gomera udexim Jehovan aplea lokank koslem lisanv xikoilem tacher dhean diat. Gomeran pordvar kelea uprant tinnem her dadleank lagon aplea ghovak soddlo. Tea vellar Jehovan kitem kelem? Kallzam vollkhon gheupi Dev Jehovan Hoseak oxem sanglem: “Aniek pavtt voch, dusrea dadleachea mogant poddlole tuje bailek, he pordvarinnik, tuzo mog di; Israelachi porza dusream devam-xim veta . . . tori Sorvespor ticho mog korta; toxench tum tuje bailecho mog kor.” (Hos. 3:1; Mho. 16:2) Jehovan Hoseak oxem korunk sanglem tea vellar pasun Gomer gombhir patok korit asli. Tori astana, Jehovan Hoseak tika bhogsunk ani porot apli bail mhunn apnnaunk sanglem.a Hea udharonnantlean, aplea lokam vixim apleak koxem bhogta tem Jehova dakhounk sodhtalo. Tem mhunnttlear, tim Jehovak vitt haddttat toslim kamam kortalim, tori astana to tancho mog kortalo. Ani tannim poschatap korun tanchi vaitt vatt soddun diunk to aplea provadeank tanchea lagim dhaddit aslo. Hea udharonnantlean, ‘kallzanchi porikxa korpi’ Jehovak eka munxa vixim soglem khobor asta ani to munis gombhir patok korit asta tednam pasun, Jehova taka poschatap korunk modot korit asta mhunn kolltta. (Mho. 17:3) Tor hea vixim ami fuddem anik zannam zaum-ia.
JEHOVAN POILEM PANVL GHEUN PATKI LOKANK POSCHATAP KORUNK KOXI MODOT KELI?
8. Kainak poschatap korunk Jehovan koxi modot kelʼli? (Utpoti 4:3-7) (Chitr pasun polloiat.)
8 Kain Adanv ani Evecho poilo put aslo. Tor tanchea bhaxen taka pasun vaitt korchi itsa asli. Tache vixim Bible oxem sangta: “Tachim svotachim kamam noxttim aslim.” (1 Ju. 3:12) Ghoddie tea pasot ‘Kain ani tachi bhettounni Jehovak manvonk nant.’ Aplo sobhav bodolchea bodlek, “Kain ekdomuch ragan bhorlo ani tachem mukhamoll sogllench bodolʼlem.” Tor Jehovan kitem kelem? To doiall toren Kaina lagim uloilo. (Utpoti 4:3-7 vachat.) Kainan aplo sobhav bodlun borem kelear, apunn taka besanvam ditolo mhunn Jehovan sanglem. Punn to aplea ragacher tabo dovorna zalear, to kitem tori vaitt kortolo mhunn taka xittkailo. Dukhachem mhunnttlear, Kainan tachem aikonk na. Poschatap korunk Jehovachi modot tannem nakarli. Tor Kainan aplem aikonk na dekhun her patkeank pasun poschatap korunk modot korop Jehovan bond kelem kai? Na! Jehovan toxem korunk na.
Jehova doiall toren Kaina lagim uloilo ani Kainan aplo sobhav bodlun borem kelear apunn taka besanvam ditolo mhunn Jehovan sanglem (Peregraf 8 polloiat)
9. Davidak poschatap korunk Jehovan koxi modot keli?
9 Jehova Raza Davidacho khub mog kortalo. Davida vixim tannem oxem mhunnttlem: “To mhojea kallzak avoddtta toslo asa.” (D.I. 13:22) Punn uprant Davidan gombhir patkam kelim, zoxem pordvar ani khun. Moizesa udexim dilʼlea Kaidea pormonnem taka moronn favo aslem. (Lev. 20:10; Lok. 35:31) Tori astana, Jehova Davidak poschatap korunk modot korunk sodhtalo.b Ani Davidan poschatap korchea poilinch taka modot korunk, tannem provadi Nathanak dhaddlo. Nathanan taka ek udharonn sanglem, jea vorvim aplim patkam kitlim gombhir aslim tem somzonk Davidak modot zali. Tannem Jehovak khub dukhoilʼlo mhunn taka kollon ailem ani tannem poschatap kelo. (2 Sam. 12:1-14) Tea uprant, apnnem kelʼlea patkank lagon apnnak kitlem dukh bhoglolem te tannem dakhoun dilem. (St. 51, superscription, NW) Hea stotra vorvim, patok kelʼlea zaitea munxank aiz bhuzvonn melltta ani tim poschatap korunk fuddem sortat. Tor Jehovan Davidak modot keli mhunn ami kitlim upkari asat nhoi!
10. Jehova amkam pasiens dakhoita ani bhogsunk toiar asta hem zannam zaun tumkam koxem bhogta?
10 Jehova soglea torechea patkancho dves korta. (St. 5:4, 5) Ani ami patki mhunn to zannam. Torui to amcho mog korta dekhun, to amkam poschatap korunk modot korunk fuddem sorta. Gombhir patok kelʼlea munxak pasun, poschatap korunk ani aplea sangata ixttagot zoddunk to sodanch modot korunk toiar asta. Jehova amkam bhogsunk toiar asa tem zannam zaun amkam kitli bhuzvonn melltta nhoi! Jehovachem pasiens ani tachea bhogsonnea vixim ami niall kortat tednam, taka visvaxi ravonk ani ami patok kortat tednam rokddoch poschatap korunk amcho nichov ghott zata. Atam ami Jezun aplea xisank poschatapa vixim kitem xikoilem tacher dhean dium-ia.
POSCHATAPA VIXIM JEZUN APLEA XISANK KITEM XIKOILEM?
11-12. Jehovachea bhogsonnea vixim Jezun kitem xikoilem? ( Chitr polloiat.)
11 Kristi Xokachea poilea xekddeant Mesias ieuncho vell zalʼlo. Ani ami fattlea lekhant polloilʼlem toxem, poschatap korop kitlem mhotvachem tem Jehovan Juanv Batist ani Jezu udexim lokank xikoilem.—Mt. 3:1, 2; 4:17.
12 Jezu hea prithumer aslo tednam tannem lokank xikoilem ki ami patkam kortat tednam Jehova amkam bhogsunk toiar asta. Hem tannem sanddlolea putachi vopar diun somzailem. Tea putan aplea bapaichem ghor soddlem ani zaitim vaitt kamam kelim. Punn uprant “taka apli chuk somzoli” ani to porot ghora ailo. Tednam tachea bapain kitem kelem? “To poisuch astana tachea bapain taka polloilo ani taka tachem churchurem dislem. Tannem dhanvon vochon aplea putak veng marli, ani to mogan tache ume gheunk laglo.” Aplo bapui apleak bhogxichona mhunn tea putak dislem dekhun, apunn tacho chakor zaun kam korunk xokta kai mhunn tannem vicharlem. Punn tacho bapui taka bhogsunk toiar aslo dekhun tannem taka ‘aplo put’ mhunnttlo ani porot aplea familint ieukar dilo. Toxench, tea bapain mhunnttlem: “To . . . sanddlolo to atam mellʼlla.” (Luk. 15:11-32) Jezu hea prithumer ieunchea poilim sorgar aslo tednam, poschatap kortoleank Jehovan koxi doia dakhoili ani bhogxilim tem tannem zaitea pavtti polloilʼlem. Tor Jezun sanglolea hea vopari vorvim, amcho Bap Jehova kitlo doiall asa tem zannam zaun amkam kitli bhuzvonn melltta nhoi!
Jezun sanglolea sanddlolea putache voparintlo bapui porot ghora ailolea aplea putak veng marunk dhanvon voita (Peregraf 11-12 polloiat)
13-14. Poschatap korchea vixim apostl Pedru kitem xiklo, ani hea vixim tannem dusreank kitem xikoilem? (Chitr pasun polloiat.)
13 Poschatap kortat tankam Jehova koso bhogxita, tea vixim apostl Pedru Jezu koddlean mhotvachim lisanvam xiklo. Karonn Pedrun zaiteo chuki kelʼleo. Torui Jezu taka bhogsunk toiar aslo. Udharonnak, Jezuk tin pavtti nakarla uprant aplea chukik lagon taka khub khont bhogli. (Mt. 26:34, 35, 69-75) Punn Jezu jivont zalea uprant, Pedru eklo astana to tachea lagim uloilo. (Luk. 24:33, 34; 1 Kor. 15:3-5) Karonn Pedrun poschatap kela mhunn Jezu zannam aslo, ani apnnem taka bhogxila mhunn Jezu taka khatri diunk sodhtalo.—Mk. 16:7 polloiat.
14 Poschatap kelea uprant bhogsonnem melltta tednam koxem bhogta tem Pedru bore bhaxen somzolo, ani apunn xiklo tem tannem dusreank xikoilem. Paskachi porob zaun thoddea vella uprant, tannem Judevanchea eka zomeak tannim Mesiasak jivexim marlolo mhunn somzailem. Torui, tannem tankam mogan oxem sangon urba dili: “Poschatap korat ani porot ieiat. Oxem kelolean, to tumchim patkam pusun uddoitolo, ani Jehova tumkam novean ghottai melltta tosle dis haddttolo.” (D.I. 3:14, 15, 17, 19) Tor ek patki poschatap korta tednam to aplem jivit sarkem bodolta mhunn Pedrun xikoilem. Hacho orth, to aplem chukichem chintop bodolta, vaitt korop bond korta ani Devak manvota tem korunk lagta. Toxench, Jehova tea patki munxak purnn toren bhogxita vo to tachim patkam sarkim pusun kaddtta mhunn Pedrun dakhoilem. Ani zaitea vorsam uprant, tannem Kristanvank oxi khatri dili: “Jehova . . . tumkam pasiens dakhoita, karonn konnanchoch nas zalʼlo taka naka. Tachea bodlek, sogleank poschatap korunk sondhi mellʼlloli taka zai.” (2 Ped. 3:9) Tor amchim patkam kitlim-i gombhir asum, ami poschatap kortat tednam Jehova amkam purnn toren bhogxita mhunn zannam zalʼlean amkam kitli xanti melltta nhoi!
Jezun Pedruk bhogxilo mhunn tannem mogan taka khatri dili (Peregraf 13-14 polloiat)
15-16. (a) Apostl Paulu bhogsonnea vixim koso xikonk pavlo? (1 Timotak 1:12-15) (b) Fuddlea lekhant ami kitem polloitolim?
15 Kristanv zaunchea poilim Paulun aplea jivitant zaitim vaitt kamam kelʼlim. Tannem krur toren Kristachea pattlavdarank dhumallo dilʼlo ani to kednanch bodolcho na oxem choddxea Kristanvamnim chintlem zait. Punn Paulu bodlonk xokta ani poschatap korunk xokta mhunn Jezu zannam aslo. Karonn tannem ani tachea Bapan Paulu bhitor bore gunn polloilʼle. Tachea vixim Jezun mhunnttlem: “Hanvem taka vinchla.” (D.I. 9:15) Poschatap korunk Pauluk modot korunk Jezun ek vizmit pasun kelem. (D.I. 7:58–8:3; 9:1-9, 17-20) Uprant Paulu poschatap korun Kristanv zalo ani Jezun taka ek apostl mhunn nemlo. Hea toren Jehovan ani Jezun taka doia dakhoili dekhun to kitlo upkari aslo tem Paulun zaitea pavtti dakhoun dilem. (1 Timotak 1:12-15 vachat.) Toxench tannem bhav-bhoinnank oxem sanglem: “Doia dakhoun Dev tuka poschatap korunk modot korcho proitn korta.”—Rom. 2:4.
16 Onoitik jivit jietalo toslea eka munxak Korint sobhentlean bhair kaddunk na mhunn Pauluk kollʼllem tednam tannem sobhek kitem korunk sanglem? Tannem jem sanglem tantuntlean Jehova aplea sevokank xist dita tednam mog koso dakhoita, ani tim poschatap kortat tednam doia koso dakhoita tem amkam kolltta. Toxench, ami tachi dekh koxi gheunk zata tem-ui ami zannam zatat. Tor Korint sobhent kitem ghoddlem tem ami fuddlea lekhant polloum-ia.
GIT 33 Ghal Tuje Uske Jehovacher
a Hea ekuch ghoddnnent Jehovan oxem zaunk dilem. Punn aiz, pordvar kela tachea sangatean tanchem kazar samballun dovrunkuch zai oxem Jehova sangona. Khorem mhunnttlear, Jehovan aplea Puta vorvim kolloilem ki ghov-baile modem konnui eklo pordvar korta, ani haka lagon tacho sangati taka divors diunk sodhta zalear, tannem toxem korunk zata.—Mt. 5:32; 19:9.
b Novembr 15, 2012-chea Pahrogopur-ant, p. 21-23-acher “What Does Jehovahʼs Forgiveness Mean for You?” lekhant, per. 3-10 polloiat.