OBHEASACHO LEKH 34
GIT 3 Tunch Adar, Tunch Visvas, Tujer Bhorvonso
Jehovan Tuka Bhogxila Mhunn Visvas Dovor
“Tunvem mhojem patok bhogxileim.”—ST. 32:5.
MUKHEL MUDʼDO
Ami poschatap kortat tednam Jehova amkam bhogxita mhunn Bible-antlea khoinchea versam thaun kolltta ani ami hem manun ghevop kiteak gorjechem tem hea lekhant polloum-ia.
1-2. Jehova amchim patkam bhogxita mhunn amkam kolltta tednam amkam koxem bhogta? (Chitr pasun polloiat.)
RAZA Davidan thoddim gombhir patkam kelʼlim. (St. 40:12; 51:3) Tor guneanvkari bhavnam asop mhunnttlear kitem ti taka khobor asli. Punn tannem kallzant thaun poschatap kelo tednam Jehovan taka bhogxilo. (2 Sam. 12:13) Ani Jehovan apleak bhogxilo mhunn taka kollʼllem tednam to khuxal zalo.—St. 32:1.
2 Jehova amkam doia dakhoita ani bhogxita hem kolltta tednam ami pasun khuxal zatat. Ami gombhir patok adarlam zalear pasun ami kallzant thaun poschatap kortat, Jehova lagim bhogsonnem magtat, vhoddilanchi modot ghetat, ani porot ti chuk korina zaunk amchean zata tem soglem kortat tednam, Jehova amkam bhogxita mhunn zannam zalʼlean amkam bhuzvonn melltta! (Mho. 28:13; D.I. 26:20; 1 Ju. 1:9) Ani Jehovan amkam bhogxilea uprant to porot tem kednanch voir kaddchona vo tea chukik lagon amkam khast launcho na mhunn zannam zaun ami khub khuxal zatat!—Ez. 33:16.
Raza Davidan boroilʼlea zaitea stotrantlean Jehovachea bhogsonnea vixim kolltta (Peregraf 1-2 polloiat)
3-4. Bautizm ghetlea uprant pasun eke bhoinnik koxem bhogtalem, ani hea lekhant ami kitem polloitolim?
3 Punn thodde pavtti, Jehovan tanchim patkam bhogxileant mhunn manun gheunk thoddeank kotthin zaunk xokta. Hea vixim amkam bhoinn Jennifer-achem udharonn asa. Tichea avoi-bapain tika lhanponnim thaun Jehova vixim xikoilʼlem. Punn vaddlea uprant tem vaitt kamam korunk laglem ani aplea avoi-bapai koddlean tim lipounk laglem. Punn zaitea vorsam uprant tannem aplea jivitant bodol kelo ani somorponn korun bautizm ghetlo. Tem sangta: “Poilim hanv onoitik kamam kortalem, khub soro pietalem, poixeank mhojea jivitant sogleam-von chodd mhotv ditalem ani mhaka khub rag ietalo. Ami bhogsonnem magon poschatap kelea uprant, Jezuchea bolidana vorvim Jehova amchim patkam bhogxita mhunn hanv zannam aslem, punn tannem khoreaninch mhaka bhogxilam mhunn manun gheunk mhaka kotthin zatalem.”
4 Tumi adim kelʼlim patkam Jehovan bhogxileant mhunn manun gheunk tumkam thodde pavtti kotthin zata kai? Jehovache doie vixim Davidak koxem bhoglem tacher niall korat. Jehova khub doiall asa dekhun tannem aplim patkam bhogxileant mhunn Davidak purnn khatri asli. Ani hich khatri amkam-i asloli Jehovak zai. Tor Jehova amchim patkam bhogxita mhunn ami amcho visvas koso ghott korunk zata ani oxem korunk amkam kitem modot korunk xokta, tem ami hea lekhant polloum-ia.
JEHOVA AMKAM BHOGXITA MHUNN VISVAS DOVROP KITEAK MHOTVACHEM?
5. Ami kitem chintlolem Soitanak zai? Ek udharonn diat.
5 Jehova amkam bhogxita mhunn visvas dovorlear ami Soitanachea fasant poddchimnant. Ugddas dovrat, ami Jehovachi seva bond kelʼli Soitanak zai. Ani tacho ho dhei melloun gheunk to apleachean zata tem soglem korta. Udharonnak, Jehova amchim patkam kednanch bhogxichona, hem amchea monant ghalunk Soitan proitn korit. Hem somzonk Korintant kitem zalem tem ugddas korat. Eka munxan onoitik kuddicho sombond dovorlolo dekhun taka sobhentlean bhair kaddlolo. (1 Kor. 5:1, 5, 13) Uprant tannem poschatap kelo. Punn bhav-bhoinnamnim taka bhogxilʼlo ani porot sobhent ieukar dilʼlo Soitanak naka aslem. Bhav-bhoinnamnim taka bhogsunk na zalear, Jehova pasun taka kednanch bhogixchona oxem taka distolem aslem. Tor to “dukhant buddon” Jehovachi seva korop bond kortolo aslo. Ani hench Soitanak zai. Aiz pasun tacho ho dhei bodlonk na. Punn “tacheo naddbudʼdheo amkam khobor asat.”—2 Kor. 2:5-11.
6. Ami adim kelʼlea patkam vixim chintit ravona zaunk kitem korunk zai?
6 Jehova amkam bhogxita mhunn visvas dovorlear ami porot khuxal zatolim. Patok kelea uprant amkam dukh zatach. (St. 51:17) Ani hem borem zaun asa. Karonn hea vorvim ami amchea jivitant bodol kortolim ani kitem sarkem asa tem korunk nichov kortolim. (2 Kor. 7:10, 11) Punn poschatap kelea uprant pasun, tea vixim chintit ravlear ami itlim niraxi zait, ki ami Jehovachi seva pasun bond korunk xoktat. Tor Jehovan amkam khoreaninch bhogxileant mhunn ami visvas dovortat tednam ami khuxalkaien ani ek nitoll ontoskornnan tachi seva korit ravonk pavtolim. (Kol. 1:10, 11; 2 Tim. 1:3) Punn Jehovan amkam khoreaninch bhogxileant mhunn amcho visvas ami koso ghott korunk zata?
JEHOVA AMCHIM PATKAM BHOGIXTA MHUNN AMI AMCHO VISVAS KOSO GHOTT KORUNK ZATA?
7-8. Jehovan Moizesak aplea vixim kitem sanglem, ani hantuntlean amkam kosli khatri melltta? (Suttka 34:6, 7)
7 Jehovan aplea vixim kitem sanglem tacher niall korat. Udharonnak, Moizes Jehova vixim anik zannam zaunk sodhtalo tednam, Jehovan aplea vixim kitem sanglem tem ugddas korat.a (Suttka 34:6, 7 vachat.) Jehovak zaite bore gunn asat tem khorem, punn tannem Moizesak sanglem ki apunn “doiall-movall kallzacho Dev.” Tor zo munis Jehovacho mog korta tannem poschatap kelear, Jehova taka bhogxichona na kai? To bhogxitoloch! Karonn, to bhogxina zalear to krur ani doia naslolo Dev zatolo. Punn Jehova toso nhoi!
8 Jehovan aplea vixim sangtana apunn doiall asa mhunn sanglem. Tor to kednanch fott uloina dekhun ami tachea utrancher visvas dovrunk zata. (St. 31:5) Punn Jehovan tumkam khoreaninch bhogxileant mhunn tumkam dubhav ieta zalear, tumi tumkanch ho prosn vicharunk zata: ‘Jehova doiall-movall kallzacho Dev, ani jim aplea patkancho poschatap kortat tankam to bhogxitolo mhunn mhaka visvas asa kai?’ Hoi zalear, Jehova tumkam-i bhogxitolo mhunn tumi visvas dovrunk zata.
9. Jehovachea bhogsonnea vixim amkam Stotr 32:5-ant kitem xikonk melltta?
9 Aplea bhogsonnea vixim Jehovan Bible boroupeank kitem borounk prerit kele tacher niall korat. Udharonnak, Davidan Jehovachea bhogsonnea vixim kitem boroilem tacher dhean diat. (Stotr 32:5 vachat.) Tannem mhunnttlem: “Tunvem mhojem patok bhogxileim.” Hea versant “bhogxileim” hea utrak uzar kelʼlem Hebrev utracho orth mhunnttlear, “voir ubarop” vo “pois vhorop” oso zaunk xokta. Tor Jehovan Davidak bhogxilo tednam tannem eka orthan tachea patkachem vojem pois vhelem. Ani Jehovan apleak purnn toren bhogxila mhunn David khuxal zalo. (St. 32:2-4) Tor ami pasun khoreaninch poschatap kortat tednam, Jehova amkam purnn toren bhogxita ani amchea patkanchem vojem pois vhorta. Tea pasot ami pasun khuxal zaunk xoktat.
10-11. Jehova “bhogsunk toiar asa” hantuntlean amkam kitem kolltta? (Stotr 86:5, NW)
10 Stotr 86:5, NW vachat.b Hea versant Jehova “bhogsunk toiar asa” oxem Davidan mhunnttlam. Hacho orth ami chuki kortat tednam Jehova rokddoch ragar zaina ani ami poschatap kortat tednam to amkam bhogsunk axeun asta. To oxem kiteak korta? Hacho zobab amkam tea versant fuddem melltta: “Tuka ulo martolea sogleank tum bhorpur visvaxi mog dakhoita.” Ami fattlea lekhant polloilem toxem, jim Jehovacho mog kortat tankam to visvaxi mog dakhoitolo ani kednanch soddchona mhunn tannem bhas dilea. Tor ami poschatap kortat tednam Jehova amkam visvaxi mog dakhoit ravtolo ani ‘udar kallzan bhogxitolo.’ (Iz. 55:7) Punn Jehova amkam bhogxita mhunn visvas dovrunk kotthin zata zalear ami amkanch vicharunk zata: ‘Jim konn aplea patkancho poschatap kortat ani Jehovache doie pasot vinoti kortat tankam sogleank Jehova bhogxita mhunn hanv visvas dovortam kai?’ Hoi zalear, ami pasun toxem kortat tednam, Jehova amkam pasun bhogxitolo mhunn ami visvas dovrunk zata.
11 Ami opurnn asat ani amchea lagim chukeo zatoleoch mhunn Jehovak khobor asa. Tori astana, Jehova amkam somzota hem zannam zalʼlean amkam bhuzvonn melltta. (St. 139:1, 2) Hea vixim Davidan anik eka stotrant kitem mhunnttlem tacher dhean dium-ia. Hea vorvim Jehova amkam bhogsunk sodhta mhunn amcho visvas ghott zatolo.
JEHOVA AMCHEA VIXIM KITEM UGDDAS DOVORTA?
12-13. Jehova amchea vixim kitem ugddas dovorta ani taka lagon to kitem korta? (Stotr 103:14)
12 Stotr 103:14 vachat. Ami poschatap kortat tednam Jehova amkam kiteak bhogxita tachem anik ek karonn Davidan sanglem. Tem mhunnttlear, “ami fokot dhulʼl-mati mhonn Taka ugddas asa.” Hacho orth, amchea lagim patkam zatolinch mhunn to zannam. Hem anik bore toren somzonk Davidachea utrancher ami bariksannen dhean dium-ia.
13 Jehovan Adanvak “zomniveli mati gheun” rochlo. (Ut. 2:7) Tor amkam kiteachim rochleant ani amcheo gorzo kitem tem Jehova zannam. Udharonnak, amkam jevonn, nhid, ani svas gheunchi goroz asa. Poripurnn munxank pasun hea vostunchi goroz asa. Punn Adanv ani Even patok kelea uprant, munxam anik eka orthan dhulʼl zalim. Tem mhunnttlear, Adanv ani Evechi sonsot zalʼlean ami zolma thaunuch opurnn zalim ani amkam patka add zhuz korunk poddtta. Tor ami patki asat mhunn Jehova zanna itlench nhoi, punn tem to “ugddas” pasun dovorta mhunn David hanga sangta. Tor amchea lagim chukeo zatoleoch mhunn Jehova somzota ani ami kallzant thaun poschatap kelear, to amkam doia dakhoun bhogxitolo mhunn David hanga sangonk sodhta.—St. 78:38, 39.
14. (a) Jehovachea bhogsonnea vixim Davidan anik kitem sanglem? (Stotr 103:12) (b) Jehovan jea toren Davidak bhogxilo tantuntlean ami kitem xiktat? (“Jehova Amchim Patkam Bhogxita Ani Tancho Porot Ugddas Korina—Koso?” hem boks pasun polloiat.)
14 Stotr 103:12-ntlean amkam Jehovachea bhogsonnea vixim anik kitem xikonk melltta? (Vachat.) Hanga David sangta ki “Udent ani Ostomt jitleo ekameka thaun pois-pois asat, titlim pois” Jehova amchim patkam kaddun uddoita. Stotrachea hea versa vixim eka pustokant sanglam ki Jehova amchim patkam itlim pois uddoita ki taka tancho vas pasun iena. Chintat, amkam jevnnacho vo her koslea-i vostuncho vas ieta tednam, adlea khoinchea-i ghoddnnecho ugddas ieunk xokta. Punn Jehovan amkam bhogxilea uprant to amchim patkam itlim pois uddoita ki to tim porot kednanch ugddas korina, tim voir kaddina vo tea patkank lagon amkam khast laina.—Ez. 18:21, 22; D.I. 3:19.
15. Ami adim kelʼlim patkam Jehovan azunui bhogsunk nant mhunn amkam dista zalear ami kitem korunk zata?
15 Jehovan amkam bhogxileant mhunn visvas dovrunk kotthin zata zalear, Stotr 103-antlim Davidachim utram amkam koxim modot korunk xoktat? Jehovak koxem dista tea vixim ami chintunk zata. Ami opurnn mhunn to ugddas dovorta ani ami kallzantlean poschatap kortat tednam to amkam bhogxita. Toxench, amkam bhogxilea uprant Jehova porot kednanch amchim patkam ugddas korina vo tim voir kaddina. Tor tea patkank lagon to amkam porot kednanch khast launchona. Ami adim kelʼlea patkancho Jehova hixob dovorna. Tor ami pasun tim visronk zai. (St. 130:3) Jehovan amkam purnn toren bhogxileant mhunn ami manun ghetat tednam, ami kelʼlea patkam vixim chintit ravop ami bond kortolim ani khuxalkaien tachi seva korit ravtolim.
16. Jehovan bhogxilʼlea patkam vixim chintit ravop kiteak dhokeachem? Ek udharonn diat. (Chitr pasun polloiat.)
16 Ami hea udharonnacher dhean dium-ia. Gaddi choloita tednam ek munis kednam-kednam rearview mirror-ant pollounk xokta. Oxem kelolean, fattlean kitem ieta tem taka kollttolem. Punn tannem rearview mirror-antuch polloun gaddi choloili zalear tem dhokeachem zaunk xokta. To surokxit ritin gaddi choloitolo zalear tannem fuddem rostear pollounk zai. Teach bhaxen, kednam-kednam ami adim kelʼlea patkam vixim chintop borem zaun asa. Karonn tanchea vorvim amkam xikonk mellttolem ani tim porot korina zaunk ami amcho nichov ghott korunk pavtolim. Punn ami sogloch vell tea patkam vixim chintit ravlear, ami ghoddie amchi khuxalkai hogddaitolim ani amchean zata title bore toren Jehovachi seva korunk pavchimnant. Hea pasot, ami Jehovachea sevecher ani tannem bhasailʼlea fuddaracher amchem dhean dovrunk zai, jea vellar vaitt iadincho amkam “anink . . . ugddas ieuncho na.”—Iz. 65:17; Mho. 4:25.
Gaddi choloitana eka munxan fuddem rosteacher chodd dhean diunk zai. Teach bhaxen, ami adlea patkancher nhoi punn fuddarachea besanvancher chodd dhean diunk zai (Peregraf 16 polloiat)
KHATRI KORUN GHEIT RAVAT
17. Jehova amcho mog korta ani amkam bhogsunk toiar asa mhunn ami kiteak amcho visvas ghott korit ravonk zai?
17 Jehova amcho mog korta ani sodanch amkam bhogsunk toiar asa mhunn amcho visvas ami ghott korit ravonk zai. (1 Ju. 3:19) Karonn Jehova amcho mog korina ani to amkam kednanch bhogxichona hem amchea monant ghalunk Soitan proitn korit ravta. Oxe toren, ami Jehovachi seva bond kelʼli taka zai. Ani hea noxttea sonvsaracho xevott lagim pavta toso, Soitan hem anikui chodd kortolo. Karonn taka thoddoch vell urla mhunn to zannam. (Prok. 12:12) Punn ami Soitana add zhuzonk zai ani visvaxiponnan Jehovachi seva korit ravonk zai!
18. Jehova amcho mog korta ani amkam bhogxita mhunn amcho visvas ghott korunk ami kitem korunk zata?
18 Jehova amcho mog korta mhunn amcho visvas ami koso vaddounk zata tem ami fattlea lekhant polloilem. Ani Jehova amkam bhogxita mhunn ami amcho visvas koso ghott korunk zata tem ami hea lekhant polloilem. Zoxem, Jehova amkam bhogxita mhunn visvas dovrunk tannem aplea vixim kitem sanglem tem ugddas dovrat. Toxench, tannem aplea bhogsonnea vixim Bible boroupeank kitem borounk prerit kele tacher niall korat. Ami opurnn asat mhunn Jehova ugddas dovorta ani to amkam doia dakhoita mhunn visornakat. Tea bhair, Jehova amkam bhogxita tednam to amkam purnn toren bhogxita mhunn ugddas dovrat. Tednam Jehova amkam doia dakhoita mhunn amchi khatri vaddttoli, ami khuxal astolim ani Davida bhaxen oxem mhunnonk pavtolim: “Jehova, tunvem ‘mhojem patok’ bhogxilem mhunn tuje khub upkar!”—St. 32:5.
GIT 1 Jehovache Gunn
b Stotr 86:5 (NW): “Tum Jehova boro ani bhogsunk toiar asa; tuka ulo martolea sogleank tum bhorpur visvaxi mog dakhoita.”