Zhuz Ani Hinvsa Koxim Kabar Zatolim?

DEV MUNXANCHE SORKAR KABAR KORTOLO

Bible sangta ki Dev Armageddon zhuzant munxanchea sorkarancho nas kortolo.a (Prokasovnni 16:16) Tea vellar, ‘akʼkhe prithumeche raza Sorvxoktivont Devachea vhoddlea disachea zhuza pasot’ ektthaim zatole. (Prokasovnni 16:14) Armageddona uprant anik kednanch zhuzam aschimnant.

Munxancho sorkar bodlun Dev aplem Raj vo sorkar hea prithumer haddttolo. Tachem Raj sorgar thaun astolem ani tacho kednanch nas zauncho na. (Daniel 2:44) Devan aplea Putak, Jezuk, tea Rajeacho Raza nemla. (Izaias 9:6, 7; Matev 28:18) Ani heach Rajeab vixim Jezun aplea xisank magnnem korunk xikoilʼlem. (Matev 6:9, 10) Tea vellar, akʼkhe prithumer ekuch sorkar astolo ani soglim ekvottan ravtolim.

Munxanche odhikari apleak aslolo odhikar fokot apleach faideak lagon uzar kortat. Punn Jezu tanchea bhaxen nhoi. Karonn to kednanch bhedbhav korina. Tor lok veg-vegllea zagear thaun asat, tanchi sonskruti veglli asa dekhun tankam onʼneai soscho poddttolo hea vixim tankam kednanch bhieunchi goroz poddchina. (Izaias 11:3, 4) Toxench, tea vellar konnakuch aplo hokʼk melloun gheunk zhogddonk poddchem na. Karonn Jezu sogleank boreponn haddunk vavurtolo. Apleak “ulo martolea goribank, adar-naxilʼlea dublleank to pavtolo. . . . Zulum ani zobordosti sonstoleank to soddoitolo.”—Stotr 72:12-14.

Toxench Devachem Raj soglea hotʼtearancho nas kortolem. (Mika 4:3) Tea bhair, zhogddim korop bond korinant ani dusreanchi xanti piddʼddear kortat tea noxttea lokancho tem nas kortolem. (Stotr 37:9, 10) Tor, dor ek dadlo, bail ani bhurgo hea prithumer khoinsorui gelear surokxit astolo.—Ezekiel 34:28.

Aiz lok gorib vo bhuken asat, toxench tankam ravonk sarko zago na dekhun tim zhogddim kortat. Punn Devachea Rajeant heo sogleo oddchonneo kabar zatoleo. Tea vellar, soglea lokanchem jivit ekdom borem astolem. Sogleank bholaikek boreak poddtta toslem bhorpur jevonn astolem ani ravonk ap-aplem ghor astolem.—Stotr 72:16; Izaias 65:21-23.

Zhuzank lagon lokank mar lagta tem khorem, punn tanchea chintnancher ani bhavnancher pasun probhav poddtta ani taka lagon lokank khub tras zatat. Punn Devachea Rajeant hem soglem kabar zatolem. Toxench meleant tim pasun jivont zatolim. (Izaias 25:8; 26:19; 35:5, 6) Tim aple familik porot mellttolim ani konnakuch zhuzancho ugddas anik ieuncho na. Karonn ‘adleo vostu nanch zatoleo’ mhunn Bible sangta.—Prokasovnni 21:4.

DEV PATOK KADDUN UDDOITOLO

Devachea Rajeant soglo lok ekvottan, ekloch khoro Dev Jehovachic bhokti kortole. To “mog ani xanticho Dev” zaun asa. (2 Korintkarank 13:11) Soglo lok sangata xantin jieunk xiktole. (Izaias 2:3, 4; 11:9) Ani jim konn Devachi adnea pallttat tankam patkantlean purnn toren suttka mellttoli.—Romkarank 8:20, 21.

DEV SOITANACHO ANI TACHEA NOXTTEA AINZANCHO NAS KORTOLO

Soitanak ani tachea noxttea ainzank lagon zhuzam zatat, punn Devachem Raj tancho nas kortolem. (Prokasovnni 20:1-3, 10) Tor tancho probhav aschona dekhun ‘sogleak xanti astoli.’—Stotr 72:7.

Zhuz ani Hinvsa kabar korunk Devan dilʼli bhas to purnn kortoloch mhunn tumi khatri dovrunk zata. Karonn oxem korunk taka itsa ani xokti asa.

• Zhuz ani Hinvsa kabar korunk Devak zannvai ani xokti asa. (Job 9:4) Ani aplo udʼdhex purnn korunk taka konnuch addaunk xokona.—Job 42:2.

• Lok tras sostat tem Devak matui avoddna. (Izaias 63:9) Toxench, “zulumacho mog kortoleancho Tachea Kallzak kanttallo dista.”—Stotr 11:5.

• Apnnem dilʼlem utor Dev sodanch palltta; to kednanch fott marina.—Izaias 55:10, 11; Titak 1:2.