Bhavarthan Cholot Ravat

1. Paulun aplem jivit koxem sarlem tea vixim tannem chintlem tednam to kiteak khuxal zalo?

APNNAK beginuch jivexim martole mhunn apostl Paulu zannam aslo. Punn to aplem jivit koxem jielo tea vixim chintun to khub khuxal zalo astolo. Tea pasot tannem mhunnttlem: “Hanvem mhoji dhanvodd dhanvon purnn keli, ani mhozo bhavarth ghott dovorlo.” (2 Tim. 4:6-8) Jehovachi seva korun apnnem ek boro nirnnoi ghetlolo dekhun Jehova khuxal aslo mhunn Pauluk khatri asli. Ami pasun Jehovak khuxal kortat tosle bore nirnnoi gheunk sodhtat nhoi? Tor hem ami koxem korunk zata?

2. Bhavarthan cholop mhunnttlear kitem?

² Apostl Paulun aplea ani dusrea visvaxi Kristanvam vixim oxem sanglem: “Ami dixtti poddttat tea vostunchea adaran nhoi, punn bhavarthan choltat.” (2 Kor. 5:7) Tor Paulu kitem mhunnonk sodhtalo? Bible-ant thodde pavtti, ‘cholop’ hem utor, ek munis aplem jivit koxem jieta tem sangonk uzar kelam. Tor ek munis dixtti poddttat tea vostunchea adaran cholta tednam to kitem polloita, aikota ani taka kitem bhogta, tea pormonnem to nirnnoi korta. Punn bhavarthan cholta to munis Jehovacher aslolea tachea visvasachea adaran nirnnoi gheta. Tannem Bible-ant aslolo Jehovacho solʼlo apnnailear, to atam khuxal astolo ani fuddarak Jehova taka inam ditolo, hi taka khatri asa mhunn tachea kamamnim dison ieta.—St. 119:66; Heb. 11:6.

3. Bhavarthan cholʼlear amkam koso faido zatolo? (2 Korintkarank 4:18)

³ Hem khorem ki ami soglim thodde pavtti, ami kitem polloitat, aikotat, vo amkam koxem bhogta tachea adarit nirnnoi ghetat. Punn fokot hacheach adarit ami mhotvache nirnnoi ghetlear ami chodd korun fuddarak trasant poddonk xoktat, ani Jehovak manvona toxem kitem korunk xoktat. (Up. 11:9; Mt. 24:37-39) Karonn ami jem kitem polloitat vo aikotat tem sodanch khorem asona. Hachea bodlek, ami bhavarthan choltat zalear ami ‘Dhoniak manvotat’ tosle nirnnoi gheunk pavtolim. (Ef. 5:10) Hea vorvim amkam monachi xanti ani khori khuxalkai mellttoli. (St. 16:8, 9; Iz. 48:17, 18) Ani bhavarthan cholot ravlear amkam fuddarak sasnachem jivit mellttolem.—2 Korintkarank 4:18 vachat.

4. Ami bhavarthan choltat kai na tem amkam koxem kollonk xokta?

⁴ Tor ami bhavarthan choltat kai na tem amkam koxem kollonk xokta? Ami amkanch vicharunk zata: Mhoje nirnnoi kiteachea adarit astat? Hanv jem polloitam tacheach adarit kai? Vo Jehovacher patieun Bible-antlea solʼleam pormonnem hanv nirnnoi ghetam? Tor hea lekhant, kam vinchun kaddttana, kazari sangati vinchun kaddttana, ani songottnne thaun nirdexon melltta tednam, ami bhavarthan choltat mhunn koxem dakhounk zata tem polloitolim. Toxench, dor eke poristhitint bore nirnnoi gheunk ami kitea vixim chintunk zai tem zannam zatolim.

KAM VINCHUN KADDTTANA

5. Ek kam vinchun kaddttana ami kitea vixim chintunk zai?

⁵ Amkam sogleank amcheo toxench amchea familicheo gorzo purnn korunk zai. (Up. 7:12; 1 Tim. 5:8) Thoddea kamank khub boro pagar melltta, jea udexim ami amcheo dispottʼtteo gorzo purnn korunk ani fuddara khatir thodde poixe samballunk xoktat. Punn thoddea kamank unno pagar melltta zait, jea udexim ami fokot amcheo gorzoch purnn korunk xoktat. Zoxem jevonn, kopdde ani ravonk ek zago. Tor kam vinchun kaddttana, thoim kitlo pagar melltta tem ami polloitolim tem khorem, punn ami fokot tench polloun kam vinchun kaddttat zalear, ami dixtti poddttat tea vostum pormonnem jietat mhunn dakhoitolim.

6. Kam vinchun kaddttana ami bhavarthan choltat mhunn koxem dakhounk zata? (Hebrevank 13:5)

⁶ Punn ami bhavarthan choltat zalear, tea kama vorvim Jehova sangata amchea ixttagoticher koslo porinnam zatolo, tea vixim pasun chintʼtolim. Ami amkanch he prosn vichartolim: ‘Hem kam Jehovachea dorjeam add voita kai vo tea kamant Jehovak manvona toxem kitem mhaka korunk poddttolem kai?’ (Mho. 6:16-19) Tea kamak lagon mhaka mittingo chukounk poddttoleo kai, vo porgottnni korunk, svotacho Bible obheas korunk vo mhojea famili sangata vell sarunk mhojea lagim titlo vell aschona kai?’ (Filp. 1:10) Hantuntlea khoinchea-i prosnacho zobab ‘hoi’ zaun asa zalear, tem kam nakarop xanneponnachem zatolem. Kam mellop kotthin aslearui, ami bhavarthan choltat zalear ami osle nirnnoi ghetolim, jea vorvim Jehova amchea gorzanchi kallji ghetolo, hi khatri amkam asa mhunn dison ietolem.—Mt. 6:33; Hebrevank 13:5 vachat.

7-8. Dokxinn Amerikentlea eka bhavan to bhavarthan cholta mhunn koxem dakhoilem? (Chitr pasun polloiat.)

⁷ Dokxinn Amerikentlea Javiera nanvachea eka bhavan, to bhavarthan cholta mhunn koxem dakhoilem tem polloum-ia. To sangta: “Hanvem eka oslea kama pasot apply kelʼlem, zoim mhaka hanv poilim kam kortalom tachea poros don pavtti chodd pagar mellttolo aslo. Toxench tem kam mhaka avoddtta toslem aslem.” Punn bhavak pioneer seva korunk pasun khub itsa asli. To fuddem sangta: “Mhaka manager-an interview-ak apoilo. Punn mhaka kitem borem tem Jehova zannam mhunn mhaka khatri asli dekhun interview-ak voichea poilim hanvem magnnem kelem. Mhaka ek borem kam ani boro pagar mellʼllolo zai aslo. Punn tea kamak lagon mhaka pioneer seva korunk addkholl zatoli asli zalear, hanv tem kam korunk toiar naslom.”

⁸ Bhav fuddem sangta: “Mhaka choddxe pavtti overtime korunk poddttolo mhunn manager-an interview-a vellar sanglem. Tednam hanvem taka doiall ritin somzailem ki mhaka mhojea bhokte pasot vell diunk zai mhunnttoch, hanv overtime korunk xokchona.” Hea pasot bhav Javier-an tem kam nakarlem. Don sumanam uprant tannem pioneer seva suru keli ani uprant teach vorsak, taka ek part-time kam mellʼllem. To sangta: “Jehovan mhojim magnnim aikolim ani mhaka pioneer seva korunk addkholl zaina toslem kam mellonk modot keli. Hea kama udexim Jehovachi seva korunk ani bhav-bhoinnank modot korunk hanv anikui chodd vell diunk xoktam mhunn hanv khub khuxal!”

9. Tresor-achea onnbhovantlean tumi kitem xiklim?

⁹ Punn ami sodʼdheak kortat tea kamak lagon bhavarthan cholonk amkam kotthin zata zalear kitem? Congo-ntlea Tresor-acho onnbhov polloum-ia. To sangta: “Hem kam mellʼllem tednam mhojem sopon purnn zalem oxem mhaka dislem. Karonn hanga, mhaka poilim poros tin pavtti chodd pagar mellttalo ani soglim mhaka khub resped ditalim.” Punn bhav overtime kortalo mhunnttoch to zaite pavtti mittingek pavonaslo. Ani kamar fottingponnam zatalim tim lipounk tachea sangata kam korpi tacher dobhav ghaltalim dekhun to tem kam soddunk sodhtalo. Punn apunn bekar urot mhunn taka usko aslo. Tor taka ek boro nirnnoi gheunk koxi modot zali? To sangta: “Habakuk 3:17-19-antlean, mhojem kam gelear pasun Jehova koxe-i bhaxen mhoji kallji ghetolo mhunn somzonk mhaka modot zali. Tor hanvem tem kam soddlem.” To fuddem sangta: “Zaite patranv chintʼtat ki ek borea pagarachea kama pasot ek munis kitem-i teag korunk toiar astolo. Zoxem famili sangata, toxench bhokti korunk vell sarop soddun ditolo. Punn hanvem Jehova sangata mhoji ixttagot ani famili sangata mhojem natem samballʼllem dekhun hanv khub khuxal. Eka vorsa uprant, mhaka ek borem kam mellʼllem, jea vorvim hanv mhojeo gorzo purnn korunk xoktalom, ani bhokti sombondit aslolim kamam korunk mhaka anikui vell mellttalo.” Tor ami Jehovak amchea jivitant poilea zagear dovorlear, thoddea vella pasot amkam poixeanchem unnemponn zait. Punn Jehova amchi kallji ghetoloch! Ami Jehovachea solʼleancher ani bhasaunneancher visvas dovorlear, ami bhavarthan cholot ravonk pavtolim ani to amkam besanvam ditolo.

KAZARI SANGATI VINCHUN KADDTTANA

10. Kazari sangati vinchun kaddttana, ek bhoinn dixtti poddtta tea vostunchea adaran cholta mhunn koxi dakhounk xokta?

¹⁰ Kazar, Jehova koddlean ek dennem zaun asa, ani amkam kazar zaunk avodd asta. Ek bhoinn, ek bhava lagim kazar zaunk sodhta zalear, to pollounk koso dista, to koso vagta, dusrim tache vixim kitem chintʼtat, to poixeancho koso samball korta, taka familicheo zobabdareo asat kai, ani tem tachea sangata astana khuxal asta kai, heo vostu polloita zait.b Hea vostum vixim chintop gorjechem. Punn tem heach vostunchea adarit nirnnoi gheta zalear, tem dixtti poddtta tachea adaran cholta mhunn dakhoita.

11. Ami kazari sangati vinchun kaddttat tednam, bhavarthan choltat mhunn koxem dakhounk zata? (1 Korintkarank 7:39)

¹¹ Kazari sangati vinchun kaddttana, bhav-bhoinnam Jehovacho solʼlo apnnaitat tednam, to kitlo khuxal zata astolo nhoi! Udharonnak, Bible-ant sanglolea pormonnem, tim “tornni pirai” zaun gelea uprant dating kortat. (1 Kor. 7:36) Toxench, tim kazar zaunk sodhtat tea munxak Jehova je gunn asonk zai mhunn sangta, te gunn asat kai mhunn tim polloitat. (Mho. 31:10-13, 26-28; Ef. 5:33; 1 Tim. 5:8) Ani ek Sakxi nhoi to munis tanchea lagim kazar zaunk sodhta zalear, tim 1 Korintkarank 7:39-ant aslolo solʼlo apnnaitat, zoim sangta: “Fokot Somiant aslolea lagim” kazar zaunchem. (Vachat.) Tor oxem korun tancheo gorzo ani bhavnam Jehova bore bhaxen somzota mhunn tankam khatri asa mhunn tim dakhoitat.—St. 55:22.

12. Rosa-chea onnbhovantlean tumi kitem xiklim?

¹² Hea vixim ami Rosa nanvache eke bhoinnicho onnbhov polloum-ia. Tem Colombia-nt pioneer seva korta. Tem kam kortalem thoim ek munis taka like korunk laglo, ani Rosa-kui to avddonk laglo. Tem sangta: “To vattarantlea lokank modot kortalo, mhojea sangata doiall toren uloitalo ani hanv eka sangatea bhitor sodhtalem te sogle gunn taka asle dekhun to khub boro munis oxem mhaka dislem. Punn to ek Sakxi naslo. Tor hanv tachea sangata dating korunk sodhina mhunn sangop khub kotthin aslem. Karonn mhaka eksurponn bhogtalem, hanv kazar zaunk sodhtalem, ani sotant mhaka konnuch boro sangati mellonaslo.” Punn Rosa-n fokot dixtti poddtta tachea adarituch nirnnoi gheunk na. Tea munxa sangata natem dovorlear, Jehova sangata tachea ixttagoticher koslo porinnam poddttolo tea vixim tannem chintlem. Tor tannem tachea sangata koslem-i natem dovrop bond kelem ani tem Jehovache sevent bizi ravlem. Uprant rokddench taka Raj Porgottnnarank Korsa pasot apounnem mellʼllem. Ani aiz tem khas pioneer mhunn seva korta. Tem sangta: “Jehovan mhaka zaitim besanvam dileant mhunn hanv aiz khub khuxal asam.” Tor amkam jem avoddtta tem Jehovak ghoddie avoddna zait. Punn kotthin aslearui ami Jehovak manvota tem kortat tednam, amkam sodanch faido zata.

SONGOTTNNE THAUN NIRDEXON MELLTTA TEDNAM

13. Amkam margdorxon melltta tednam ami dixtti poddttat tea vostum adaran choltat mhunn koxem dakhoit?

¹³ Jehovachi seva korunk vhoddil, sorkittachi dekhrekh korpi, xakha ofisantle bhav ani Sonchalon Monddollantle bhav amkam margdorxon ditat. Punn ek-ek pavtt, bhavamnim tem margdorxon kiteak dilam tem amkam somzona zait. Oslea vellar, tem margdorxon sarkem asa kai mhunn ami dubhavtat zait, vo jea bhavamnim amkam margdorxon dilam tanchea chukincher ami dhean ditat zait.

14. Songottnne thaun margdorxon melltta tednam ami bhavarthan choltat mhunn koxem dakhounk zata? (Hebrevank 13:17)

¹⁴ Punn ami bhavarthan choltat tednam, Jehova aple songottnnek margdorxon dita ani to amchi poristhiti bore bhaxen zannam mhunn ami visvas dovortolim. Ani tem margdorxon ami rokddinch apnnaitolim. (Hebrevank 13:17 vachat.) Ami oxem kortat tednam amchea sobhent ekvott urtolo. (Ef. 4:2, 3) Hem khorem ki fuddakar ghetat te bhav opurnn asat. Punn ami tanchem aikotat tednam, Jehova amcher besanv ghaltolo. (1 Sam. 15:22) Ani kitem-i sarkem korunk zai zalear, Jehova tem aplea vellar sarkem kortoloch mhunn ami khatri dovrunk zata.—Mik. 7:7.

15-16. Songottnnen dilʼlea nirdexona vixim dubhav aslearui, eka bhavak bhavarthan cholonk koxi modot zali? (Chitr pasun polloiat.)

¹⁵ Bhavarthan cholʼlolean koso faido zata tea vixim ek onnbhov polloum-ia. Peru desant choddxea zageancher lok Spanish bhas uloitat. Punn porgottnnent zaito oslo lok melltta, jim tea ganvchi bhas uloitat. Hantuntli ek bhas Quechua. Hi bhas uloupi bhav-bhoinnam zaitea vorsam thaun, fokot Quechua uloitat tea lokank sodhtalim. Punn sorkaracho kaido pallunk, hi bhas uloupi lokank sodhchea vixim songottnnen bodol kelo. (Rom. 13:1) Tor, Quechua bhas uloupi lok mellttolo kai mhunn thoddea bhav-bhoinnank usko zalo. Torui, tannim songottnnechem nirdexon pallʼllem ani Jehovachea besanvamnim hi bhas uloupi zaito lok tankam mellʼllo.

¹⁶ Quechua sobhent vhoddil mhunn seva korpi, bhav Kevin-ak hoch usko aslo. To sangta: “Atam amkam Quechua uloupi lok koso mellttolo mhunn hanv chintunk poddlom.” Tor tannem kitem kelem? To sangta: “Hanvem Mhonnʼnneo 3:5-acher niall kelo ani Moizesa vixim chintlem. Jehovan taka dilʼlem nirdexon sarkem aslem kai mhunn Moizes chintunk poddlo zait. Karonn Jehovan taka Izraelitkarank, Ejipttantlean soddoun Tambddea Doria lagim haddunk sanglolem. Punn thoim pavtoch anik vattuch na, oxem taka dislem zait. Tori astana, tannem Jehovan sanglolem toxench kelem ani Jehovan vizmit korun tankam salvar kelim.” (Sutt. 14:1, 2, 9-11, 21, 22) Tor bhav Kevin-an pasun songottnnechea nirdexona pormonnem porgottnnent bodol kelo. Hacho porinnam? To mhunntta: “Jehovan amchea vavracher koxem besanv ghatlem tem polloun hanv ojap zalom. Poilim amkam vattarant khub cholonk poddttalem ani Quechua bhas uloupi fokot ek vo dog zannam mellttalim. Punn atam hi bhas uloupi lok asat tea vattarancher ami dhean ditat. Oxem kelʼlean, amkam anikui zaito lok melltta ani ami tanchea sangata porot-bhetto ani Bible obheas suru kortat. Atam mittingent poilim poros chodd lok hajir zata. Khorench, ami bhavarthan choltat tednam Jehova sodanch amkam besanvam dita!

17. Hea lekhantlean tumi kitem xiklim?

¹⁷ Hea lekhant, ami khoinchea tin poristhitimnim bhavarthan cholot ravonk zata tem polloilem. Punn ami her poristhitimnim pasun bhavarthan choltat mhunn dakhounk zai. Zoxem, ami koslem monoronjon vinchun kaddttolim, amcho vell koso sartolim, kitlem xikxonn ghetolim ani amchea bhurgeank koxim vaddoitolim tea vixim. Tor koslo-i nirnnoi ghetana to fokot dixtti poddttat teach vostunchea adarit nhoi, punn Jehova sangata amchi ixttagot, tannem dilʼlo solʼlo, ani to amchi kallji ghetolo mhunn tannem dilʼli bhas, hacher pasun adarit asonk zai. Tor ami oxem kortat tednam, ‘ami sasnachea sasnak Sorvespor amchea Devachea nanvan fuddem cholot ravonk pavtolim.’—Mik. 4:5.