Jehova Tumkam Sodanch Modot Kortolo

1. Izraelitkarank Ejipttantlean bhair haddttana, Moizes Jehovacher patieun aslo mhunn tannem koxem dakhoilem?

HEBREVANK pustokant, Jehovacher bhavarth dovorlolea zaitea lokam vixim sanglam. Tanchea modlo eklo Moizes. (Heb. 3:2-5; 11:23-25) Taka Jehovacher khub bhavarth aslo dekhun Izraelitkarank Ejipttantlean bhair haddunk to Faraoh-k ani tachea soinikank bhieunk na. Toxench, tannem Jehovacher visvas dovrun Izraelitkarank Tambddo Doria par korunk ani uprant oronnʼnneant vochonk fuddakar ghetlo. (Heb. 11:27-29) Jehova apli kallji ghetolo kai mhunn choddxe Izraelitkar dubhavtale. Punn Moizes sodanch Jehovacher patieun ravlo. Ani Jehovan taka niraxi korunk na. Karonn Jehovan vizmit korun Izraelitkarank oronnʼnneant jevonn ani udok dilem.a—Sutt. 15:22-25; St. 78:23-25.

2. “Mhoje podve-bollak ximʼ-mer asa zait” oxem Jehovan Moizesak kiteak vicharlem? (Lokgonnti 11:21-23)

² Punn Jehovan Izraelitkarank Ejipttantlean salvar korun sumar ek vorsa uprant, Moizes Jehovacher dubhavlo. Apunn Izraelitkarank mas khaunk ditolo mhunn Jehovan sanglolem. Punn oronnʼnneant aslolea lakʼkhamnim lokank, Jehova tem koxem ditolo mhunn Moizes chintunk poddlo. Tednam Jehovan Moizesak vicharlem: “Mhoje podve-bollak ximʼ-mer asa zait?” (Lokgonnti 11:21-23 vachat.) Hebrev bhaxent hanga, “Jehovacho hat” oxem mhunnttlam. Ani “Jehovacho hat” mhunnttlear tachi povitr xokti. Tor dusrea utramnim Jehova Moizesak oxem vichartalo, ‘Hanv jem sangtam tem hanv korunk xokona oxem tuka dista?’

3. Moizes ani Izraelitkaranchea udharonnacher ami kiteak dhean diunk zai?

³ Jehova tumcheo ani tumchea familicho gorzo purnn kortolo mhunn tumkam kednam usko zala kai? Moizes ani Izraelitkarank pasun osoch usko zalʼlo. Tim kiteak dubhavlim tem ami hea lekhant polloum-ia. Toxench ami thoddea Bible versancher dhean dium-ia, jea vorvim Jehova amkam sodanch modot kortolo mhunn amcho visvas anikui ghott zatolo.

MOIZES ANI IZRAELITKARAM THAUN XIKAT

4. Jehova apli kallji ghetolo mhunn zaitim Izraelitkaram kiteak dubhavlim?

⁴ Jehova apli kallji ghetolo mhunn zaitim Izraelitkaram kiteak dubhavlim? Tanchea poristhiti vixim ugddas korum-ia. Izraelitkaram Ejiptta thaun bhair sortalim tednam tanchea sangata Izraelitkar naslolea “jinʼnosvar lokanchi ek vhodd urponz” pasun asli. (Sutt. 12:38; D.S. 8:15) Ani tankam oronnʼnneant pavon thoddo vell zaun gelʼlo. Jehovan vizmit korun dilʼlem manʼna khaun-khaun tankam puro zalʼlem. Tor tim soglim Ejipttant khatalim tea jevnna pasot axetalim dekhun tim Moizesa lagim hea vixim gunngunnunk laglim. Ani zaitea Izraelitkaramnim tankam sangat dilo. (Lok. 11:4-6) Hem aikon apunn itlea lokank mas khoinchean haddun ditolo mhunn Moizesak usko zalo.—Lok. 11:13, 14.

5-6. Izraelit naslolea lokancho probhav Izraelit lokancher poddlo tantuntlean ami kitem xikonk zata?

⁵ Jehovan aplea pasot jem kitem kelʼlem tea pasot Izraelit naslole lok onupkari zale. Ani tancho probhav Izraelitkarancher poddlo. Amchea sangata pasun oxench kitem zaunk xokta. Ami onupkari munxam sangata vell sarlo zalear Jehovan amchea pasot jem kitem kelam tem ami visron amchi khuxalkai hogddaunk xoktat. Amchea lagim poilim aslolea vostum vixim ami chintlear vo dusreanchea vostunchi amkam nattkai zata zalear ami pasun onupkari zaunk xoktat. Punn amchi poristhiti koxi-i asum, Jehovan amchea pasot jem kitem kelam tea pasot tache upkar attoilear ami khuxal astolim.

⁶ Izraelitkaram oronnʼnneant astana nhoi, punn Bhasailʼlea Desant pavlea uprant apunn tankam zaitim besanvam ditolo mhunn Jehovan bhas dilʼli, hem tannim ugddas korunk zai aslem. Teach bhaxen, atam amchea lagim jem kitem na tea vixim chodduch chintchea bodlek, Jehova amkam novea sonvsarant koslim besanvam ditolo tea vixim ami chintunk zai. Tea bhair, ami Bible-antlea thoddea versancher niall pasun korunk zata, jea vorvim Jehovacher aslolo amcho visvas anikui ghott zatolo.

7. Jehova amkam sodanch modot korunk xokta mhunn ami tacher visvas kiteak dovrunk zata?

⁷ Lokgonnti 11:23-ant Jehovan Moizesak prosn vicharlo tednam to ghoddie taka don vostu sangonk sodhtalo. Poilem, taka bhorpur xokti asa ani dusrem, to apli xokti khoinsorui uzar korunk xokta. Izraelitkaram pois oronnʼnneant aslear pasun Jehova tankam bhorpur mas diunk xoktalo. Oxe toren, aplea “bollvont hatan ani podvedar bavllo ubarʼn” Jehovan tankam apli xokti dakhoili. (St. 136:11, 12) Tor ami pasun khoinsorui asum, ami kotthin poristhitincho fuddo kortat tednam, Jehova amkam zonn ekleak modot korunk xokta mhunn ami tacher visvas dovrunk zata.—St. 138:6, 7.

8. Oronnʼnneant zaitea lokamnim kelʼli ti chuk korina zaunk amkam koxi modot zatoli? (Chitr pasun polloiat.)

⁸ Jehovan Izraelitkarank sanglolem toxench kelem ani tannem tankam bhorpur lhove dile. Punn hea vizmita pasot Jehovache upkar attounchea bodlek, zaitim Izraelitkaram axechim zalim. Dhedd dis poriant tankam goroz asle tachea poros chodd lhove tannim ektthaim kele. Hantuntlean tim ‘mas khaunk mirmirtalim vo axetalim’ mhunn kolltta. (Lok. 11:31-34) Ani taka lagon, Jehovak khub rag ailo ani tannem tancher pidda dhaddli. Hantuntlean ami kitem xiktat? As korina zaunk ami chotrai dovrunk zai. Ami girest vo gorib asum ami “sorgar girestkai” ektthaim korpacher dhean dovrunk zai. Tem mhunnttlear, Jehova ani Jezu sangata amchi ixttagot ghott korit ravonk vavr korunk zai. (Mt. 6:19, 20; Luk. 16:9) Oxem kelear, Jehova amchea gorzanchi kallji ghetolo mhunn ami khatri dovrunk zata.

9. Jehova kitem kortolo mhunn ami purnn visvas dovrunk zata?

⁹ Jehova aiz pasun aplea lokank modot korunk toiar asa. Punn hacho orth, amkam kednanch poixeanchem vo jevnnachem unnemponn aschem na oxem nhoi.b Amchi poristhiti kitli-i kotthin aslear pasun Jehova amkam modot korop kednanch bond korchona, ani amkam goroz ti ghottai ditolo mhunn ami tacher purnn visvas dovrunk zata. Tor amkam Jehovacher visvas asa mhunn ami koxem dakhounk zata? Ami don poristhitim vixim polloum-ia: (1) amcheo familicheo gorzo purnn korunk amkam poixeanchi goroz asta tednam ani (2) zanntteponna pasot poixe samballcho nirnnoi ghetana.

POIXEANCHI GOROZ ASTA TEDNAM

10. Amkam koslea oddchonneancho fuddo korunk poddot?

¹⁰ Hea sonvsaracho xevott lagim pavta toso, amkam anikui oddchonneancho fuddo korunk poddot. Karonn sorkar bodlonk xokta, zhuzam, odruxttam ani noveo pidda ieunk xoktat, zaka lagon okosmat mhargai vaddonk xokta, amchem kam vochonk xokta vo amcheo vostu ami hogddaunk xoktat, vo amchem ghor amkam soddun vochonk poddot. Tednam amkam ek novem kam sodhunk vo familik gheun dusrea zagear vochon ravonk poddot. Tor amkam Jehovacher visvas asa mhunn dison ieta tosle nirnnoi ami koxim gheunk xoktat?

11. Poixeanchea unnemponnacho fuddo korunk ami kitem korunk zata? (Lukas 12:29-31)

¹¹ Ami amchea uskeam vixim Jehova lagim ulovop ekdom gorjechem. (Mho. 16:3) Bore nirnnoi gheunk amkam zannvai di, ani amchea poristhiti vixim ‘chodduch usko’ korina zaunk amkam ek xant kalliz di mhunn ami magonk zai. (Lukas 12:29-31 vachat.) Toxench, amchea lagim asa tantunuch dhadoxi ravonk modot kor mhunn Jehova lagim vinoti korit ravonk zai. (1 Tim. 6:7, 8) Tea bhair, poixeanchea unnemponnacho koso fuddo korcho tea vixim amchea prokaxonamnim sodh korunk zai. Karonn zaitim zannam sangtat ki poixeanchi oddchonn asta tednam kitem korchem tea vixim jw.org-acher aslolea video ani lekham vorvim tankam modot zalea.

12. Tumchea famili pasot boro nirnnoi gheunk tumi tumkanch kosle prosn vicharunk zai?

¹² Thoddeamnim aplea famili thaun pois ravon eka dusrea zagear vochon kam korunk nirnnoi ghetlo. Punn uprant to nirnnoi chukicho mhunn tankam kollʼllem. Tor khoinchem-i kam gheunchea poilim thoim kitlo pagar mellttolo tench chintchea bodlek, Jehova sangata tumchea ani tumchea familichea ixttagoticher kitem probhav poddttolo tem pasun chintat. (Luk. 14:28) Tumkanch vicharat: ‘Hanvem dusrea zagear vochon kam kelear mhojea kazari jivitacher kitem probhav poddttolo? Hanv mittingek, porgottnnek, ani bhav-bhoinnam sangata mellon ieunk xoktolom kai?’ Tumkam bhurgim asat zalear, hem-ui vicharop mhotvachem: ‘Hanv dusrea zagear aslear, tankam Jehovache xistin vaddounk ani tacho mog korunk modot korunk pavtolom kai?’ (Ef. 6:4) Tor kamam vixim nirnnoi ghetana, Bible-antlim totvam apnnainant toslea soireanchem vo ixttanchem aikonchea bodlek, Jehovachem chintop apnnaun nirnnoi gheiat.c Hea vixim amkam ostomt Asia-nt ravpi, Tony-chem udharonn asa. Taka dusrea desant vochon chodd pagarachem kam korunk zaiteo sondheo mellʼlleo. Punn hea vixim magnnem kelea uprant ani aplea baile sangata uloilea uprant, tannem teo nakarleo ani aplem jivit sadem dovrunk vavr kelo. Apnnem kelʼlea nirnnoi-a vixim bhav Tony sangta: “Mhaka zaitea lokank Jehova vixim xikounk sueog mellʼllo. Ani mhojim bhurgim khuxalkaien Jehovachi seva kortat. Jea meren ami Matev 6:33-ant Jezun sanglolim utram apnnaitat, tea meren Jehova amchi kallji ghetolo mhunn mhoje familik kollon ailem.”

ZANNTTEPONNA PASOT POIXE SAMBALLCHO NIRNNOI GHETANA

13. Zanntteponnar amcheo gorzo purnn korunk atam ami kitem korunk zata?

¹³ Zanntteponna pasot poixe samballcho nirnnoi ghetana pasun, amkam Jehovacher visvas asa mhunn ami dakhounk zai. Fuddarachea gorzam pasot, Bible amkam koxtti vavr korunk urba dita. (Mho. 6:6-11) Tor ghoddtta zalear, fuddara pasot thodde poixe samballun dovrop borem. Poixe aslear thoddea vattamnim amchi rakhonn zata tem khorem. (Up. 7:12) Punn amchem soglench dhean ami poixe ektthaim korunkuch dovrunk zaina.

14. Zanntteponna pasot poixe samballunk nirnnoi ghetana ami Hebrevank 13:5 koso apnnaunk zata?

¹⁴ Ami poixe samballun dovortat, punn “Devachea nodren girest” nant zalear tem pixeponn mhunn somzaunk, Jezun ek vopar sangloli. (Luk. 12:16-21) Karonn faleam kitem zatolem tem konnakuch khobor na. (Mho. 23:4, 5; Jak. 4:13-15) Toxench Jezun sanglolem ki tachim pattlavdaram zaunk sodhtat tannim tanchea lagim asloleo sogleo vostu ‘soddun diunk’ toiar asonk zai. (Luk. 14:33) Poilea xekddeant pasun Kristanvamnim khuxalkaien he teag kele. (Heb. 10:34) Toxench, amchea disamnim zaitea bhav-bhoinnank, tim rajki pokxank tenko dinant dekhun tanchem kam vo tancheo vostu hogddaunk poddleat. (Prok. 13:16, 17) Tim hem koxem korunk pavlim? Jehovachea hea bhasaunnecher tankam purnn khatri asa: “Hanv tuka kednanch soddchona, ani hanv tuka modot korop kednanch bond korchona.” (Hebrevank 13:5 vachat.) Tor zanntteponnar amcheo gorzo purnn korunk ami amchean zata tem korunk zai tem khorem. Punn ami opekxa korinant toxem kitem-i fuddarak ghoddlem zalear, Jehova amchi kallji ghetolo mhunn amkam purnn visvas asonk zai.

15. Kristi avoi-bapaimnim aplea bhurgeam vixim koslem sarkem chintop dovrunk zai? (Chitr pasun polloiat.)

¹⁵ Thoddea zoddpeank, zanntteponnar apleak poixeancho adar zaunk lagonkuch bhurgim zai astat. Tor eka orthan, bhurgim aplo “retirement plan” mhunn tim chintʼtat. Punn avoi-bapaimnim bhurgeanchi kallji gheunk zai mhunn Bible sangta. (2 Kor. 12:14) Hem khorem ki avoi-bapaik zanntteponnar, bhurgeam thaun poixeanchi ani her vostunchi goroz poddot. Ani zaitim bhurgim khuxalkaien oxem kortat. (1 Tim. 5:4) Punn Jehovacher visvas dovortat tim avoi-bapui, bhurgim zaite poixe zoddun zanntte piraier apleak samballttolim hem chintun tankam vaddoinant. Tachea bodlek, tim aplea bhurgeank Jehovachim sevokam zaunk modot kortat mhunn tankam chodd khuxalkai melltta.—3 Ju. 4.

16. Avoi-bapain bhurgeank svotachea paim-ar ubim ravonk koxi modot korunk zata? (Efezkarank 4:28)

¹⁶ Avoi-bapaimno, bhurgeank aplea paim-ar ubim ravonk modot kortana, tumchea udharonnantlean tankam Jehovacher visvas dovrunk xikoiat. Koxtti vavr korop kitlem faideachem tem tankam lhanuch astana xikoiat. (Mho. 29:21; Efezkarank 4:28 vachat.) Iskolant bore toren xikonk tankam urba diat. Ani Bible-antlea totvancher sodh korun xikxonna vixim bore nirnnoi gheunk tankam modot korat. Oxe toren tim aplea paim-ar ubim ravonk, porgottnni vaddounk vo pioneer seva pasun korunk pavtolim.

17. Ami kosli khatri dovrunk zata?

¹⁷ Jehova aplea visvaxi sevokanchea gorzanchi kallji gheunk xokta ani ghetolo mhunn ami tacher visvas dovrunk zata. Hea noxttea sonvsaracho xevott lagim pavta toso, ami ho visvas anikui ghott korit ravonk zai. Tor fuddarak kitem-i zaum, Jehova apli xokti uzar korun amcheo gorzo purnn kortolo mhunn amcho visvas vaddoum-ia. Ani ami khoinsorui asum, amkam sodanch modot korunk Jehovak xokti asa mhunn khatri dovrum-ia!