‘Tumi Konnachi Seva Kortolim Tem Vinchun Kaddat’

1. Ami kitem kelear khoreaninch khuxal astolim, ani Jehovan amkam kosli tank diunk na? (Izaias 48:17, 18)

AMCHO sorgincho Bap amcho khub mog korta ani ami atam toxench fuddarak khuxal aslolim taka zai. (Up. 3:12, 13) Tannem amkam zaitim kamam korunk tank dilea, punn eka-mekacher raz cholounk vo vaitt-borem kitem tem tharaunk tannem amkam tank diunk na. (Up. 8:9; Jer. 10:23) Karonn ami tachi seva kelear ani tachea dorjeam pormonnem cholʼlear ami khoreaninch khuxal astolim mhunn taka khobor asa.—Izaias 48:17, 18 vachat.

2. Ami kitem chintlolem Soitanak zai, ani Soitan fotting mhunn dakhounk Jehovan kitem kelam?

² Punn amkam Jehovachi goroz na, ani ami eka-mekacher raz choloun khuxal asonk xoktat oxem ami chintlolem Soitanak zai. (Ut. 3:4, 5) Punn Soitan fotting mhunn dakhounk, Jehovan thoddea vella pasot munxank munxancher raz cholounk dilam. Ani hacho vaitt porinnam ami pollounk xoktat. Toxench, Bible-ant zaitea dadlea-bailam vixim sanglam, jim Jehovachi seva korunk khub khuxal aslim. Hantunt sogleam-von borem udharonn Jezuchem asa. Tor hea lekhant, Jezun Jehovachi seva korunk kiteak vinchun kaddlem, Jehovak amchi bhokti kiteak favo, ani ami Jehovachi seva korunk kiteak vinchun kaddttat tem ami polloitolim.

JEZUN JEHOVACHI SEVA KORUNK KITEAK VINCHUN KADDLEM?

3. Soitanan Jezuk kitem ditolo mhunn sanglem, ani Jezun kitem vinchun kaddlem?

³ Hea sonvsarant astana, Jezu konnachi seva kortolo tem tannem vinchun kaddunk zai aslem. Tannem bautizm gheun thoddea vella uprant, Soitan Jezu-xim ailo ani tannem tachi fokot ekuch pavtti bhokti kelear, hea sonvsaracheo sogleo razvottkeo taka ditolo mhunn sanglem. Punn Jezun taka oso zobab dilo: “Pois sor Soitana! Karonn oxem boroilʼlem asa: ‘Tunvem fokot Jehova Devachich bhokti korunk zai, ani tachi ekleachich povitr seva korunk zai.’” (Mt. 4:8-10) Tor Jezun fokot Jehovachich seva korunk kiteak vinchun kaddlem tachim thoddim karonnam atam ami polloum-ia.

4-5. Jezun Jehovachich seva korunk kiteak vinchun kaddlem?

⁴ Sogleam-von mhotvachem karonn mhunnttlear, Jezu Jehovacho khub mog korta. (Ju. 14:31) Toxench Jehovachi seva korop sarkem asa mhunn Jezuk khobor asa. (Ju. 8:28, 29; Prok. 4:11) Tea bhair, Jehova jivitachi Zhor zaun asa, to visvas dovorpa sarko, ani udar kallzacho mhunn Jezu zannam. (St. 33:4; 36:9; Jak. 1:17) Karonn Jehova sodanch tache lagim sot uloila ani aplea lagim jem kitem asa tem soglem taka dilam. (Ju. 1:14) Punn Soitan toso nhoi. To axen bhorlolo, svarthi ani fottkiro. Takach lagon soglea munxank patok ani moronn ailam. (Ju. 8:44) Hem soglem zannam zalʼlean, Jehovachea add vochonk ani Soitana bhaxen zaunk Jezun kednanch chintunk pasun na.—Filp. 2:5-8.

⁵ Anik ek karonn mhunnttlear, apunn Jehovak visvaxi ravlear, tacho kitem boro porinnam zatolo tea vixim Jezun niall kelo. (Heb. 12:2) Tem mhunnttlear, aplea Bapachem nanv to povitr korunk xoktolo aslo ani munxank patka ani mornna thaun suttka diunk pavtolo aslo.

JEHOVAK AMCHI BHOKTI KITEAK FAVO?

6-7. Aiz zaite lok Jehovachi bhokti kiteak korinant, punn Jehovakuch amchi bhokti kiteak favo?

⁶ Aiz zaitea lokank Jehovachea sobit gunnam vixim ani tannem tanchea pasot kitem kelam tea vixim kainch khobor na dekhun, tim tachi bhokti korinant. Tim apostl Paulun porgott kelʼlea Athenachea lokam sarkim asat.—D.I. 17:19, 20, 30, 34.

⁷ Paulun Athenachea lokank sanglem ki khoro Dev “sogleank jivit, svas ani sogleo vostu dita. Tannem fuddem mhunnttlem: “Takach lagon ami jivim asat, choltat-bhonvtat ani ostitvant asat.” Ani Devan amchea Rochnnaran “ekach munxa udexim soglim raxttram toiar kelim.” Tor takach amchi bhokti favo.—D.I. 17:25, 26, 28.

8. Jehova kednanch kitem korchona, ani to zonn ekleacho khub mog korta mhunn tannem koxem dakhoilam?

⁸ Jehova Rochnnar ani akʼkhea vixvacho Dhoni zaun asa. Tor taka zai zalear, apli seva korunk to lokancher dobhav ghalunk xokta. Punn toxem to kednanch korchona! Tachea bodlek, apunn khoreaninch asa ani zonn ekleacho khub mog korta mhunn tannem amkam zaite purave dileat. Zata titlo lok sodankal aplim ixttam zalʼlim taka zai. (1 Tim. 2:3, 4) Hea pasot apunn fuddarak kitem borem korcho asa tea vixim lokank sangonk tannem amkam proxikxonn dilam. (Mt. 10:11-13; 28:19, 20) Tea bhair ami sangata mellon tachi seva korunk tannem sobhanchi manddavoll kelea ani amchi kallji gheunk mogall vhoddilank nemleat.—D.I. 20:28.

9. Jehova sogleancho mog korta mhunn koxem kolltta?

⁹ Apunn asa mhunn maninant tankam pasun Jehova boreo vostu dita. Hantuntlean to kitlo mogall asa tem kolltta. Hea vixim chintat. Hozaramnim vorsam poriant zaito lok Jehovache dorje nakarun apleak kitem sarkem dista tem kortat. Tori astana tankam jieunk ani khuxal ravonk Jehova goroz tem soglem dita. (Mt. 5:44, 45; D.I. 14:16, 17) Toxench tache doiek lagon tim ixttam korunk xoktat, kazar zaun bhurgeank zolmak haddunk xoktat ani koxtti vavr korun khuxalkai melloun gheunk xoktat. (St. 127:3; Up. 2:24) Hem dakhoun dita ki Jehova sogleancho mog korta. (Sutt. 34:6) Tor ami Jehovachi seva korunk kiteak vinchun kaddttat ani Jehova amkam koso besanvam ditolo tem atam ami polloum-ia.

AMI JEHOVACHI SEVA KORUNK KITEAK VINCHUN KADDTTAT?

10. (a) Ami Jehovachi seva korunk kiteak vinchun kaddttat? (Matev 22:37) (b) Jehovachea bhogsonneak lagon tuka koso faido zala? (Stotr 103:13, 14)

¹⁰ Jezu bhaxen ami pasun Jehovacho khub mog kortat dekhun, tachi seva kortat. (Matev 22:37 vachat.) Tachea gunnank lagon ami taka lagim sortat. Zoxem, to amkam kitlo somzon gheta ani bhogxita tea vixim chintat. Izraelitkaram tachea add gelim tednam tannem tanchea lagim oxi vinoti keli: “Tumchi khotteponnachi vatt soddun diat.” (Jer. 18:11) Ami opurnn asat mhunn Jehova somzon gheta. (Stotr 103:13, 14 vachat.) Tor Jehovachea oslea gunnam vixim chintʼtana amkam sodankal tachi seva korit ravonk dista nhoi?

11. Ami anik koslea karonnank lagon Jehovachi seva korunk vinchun kaddttat?

¹¹ Toxench, ami Jehovachi seva kortat karonn toxem korop sarkem zaun asa mhunn ami zannant. (Mt. 4:10) Tea bhair, ami visvaxiponnan Jehovachi seva kelear kitem boro porinnam zatolo tem-ui ami zannant. Zoxem, Jehovachem nanv povitr zatolem, Soitan fottkiro mhunn kollon ietolem ani ami Jehovachem kalliz khuxal korunk pavtolim. Toxench aiz ami Jehovachi seva korunk vinchun kaddttat zalear, sodankal tachi seva korunk amkam sondhi mellttoli!—Ju. 17:3.

12-13. Jane ani Pam-achea udharonnantlean ami kitem xiktat?

¹² Ami lhan astanach Jehovacho mog korunk xikonk zata ani ami vhodd zatat toxim tachea pasot amcho mog anikui vaddot ravtolo. Hea vixim amkam dog bhoinno, Jane ani Pam-achema udharonn asa. Jane 11 ani Pam 10 vorsanchem aslem tednam tannim dogaimnim Bible obheas suru kelo. Punn tanchea avoi-bapaik Bible xikonk khuxi nasli. Tori astana jea meren Jane ani Pam famili borabor igorjent vochonk toiar aslim, tea meren tannim Bible xikonk zata mhunn tanchea avoi-bapain sanglem. Jane sangta: “Sakxeamnim Bible-antlean mhaka jem xikoilem, tea vorvim iskolantlea bhurgeam koddlean ailʼli drugs gheunchi ani onoitik jivit jieunchi tallnni nakarunk mhaka modot zali.”

¹³ Thoddea vorsam uprant, tim porgottnnaram zalim. Uprant tannim pioneer seva suru keli ani tim aplea zannttea avoi-bapaichi kallji pasun ghetalim. Tanchea pasot Jehovan jem kitem kelem tem ugddas kortana Jane sangta: “Jehova aplea ixttanchi koxi kallji gheta tem hanvem onnbhovlem. 2 Timotak 2:19-a pormonnem, ‘aple asat tankam Jehova vollkhota.’” Tor aplo mog korunk ani apli seva korunk vinchun kaddttoleanchi Jehova sodanch kallji gheta!

14. Amchea utram ani korneam vorvim Jehovachea nanvak laglolo dag pusun uddounk koxi modot zata? (Chitram pasun polloiat.)

¹⁴ Dusrim Jehova vixim sot zannam zalʼlim amkam zai. Hea vixim chintat: Tumcho ek khub lagxilʼlo ixtt asa. To khub doiall, udar kallzacho ani sodanch dusreank bhogxita. Punn ek dis, tumcho ho ixtt ekdom krur ani fottkiro mhunn konn tori tacher boglanttam ghalta. Tor tumi kitem kortolim? Teo sogleo fotti mhunn tumi dusreank sangtolim nhoi? Heach bhaxen, Soitan ani tachea odhikara khala aslole munis, Jehova vixim fotti sangon tachem nanv piddʼddear kortat tednam, ami dusreank Jehova vixim sot sangon tachea nanvak laglolo dag pusun kaddunk sodhtat. (St. 34:1; Iz. 43:10) Oxem korun ami fokot utramninch nhoi, punn korneamnim pasun Jehovachi seva korunk sodhtat mhunn dakhoitat.

15. Jehovachi seva korunk vinchun kaddlolean apostl Pauluk koslim besanvam mellʼllim? (Filipkarank 3:7, 8)

¹⁵ Jehovak manvota tem korunk vo tache sevent anikui chodd korunk, amchea jivitant ami ap-khuxen bodlav kortat. Hea vixim amkam apostl Pauluchem udharonn asa. Judev dhormant taka mhotvachi podvi asli. Punn Jezucho xis zaunk ani Jehovachi seva korunk, tannem ti soddun dili. (Gal. 1:14) Haka lagon taka Jehovache sevent zaiti khuxalkai mellʼlli, ani Jezu sangata sorgar raz korunk pasun sueog mellʼllo. Tannem Jehovachi seva korunk vinchun kaddlem mhunn to kednanch niraxi zaunk na, ani ami-i zaunchimnant!—Filipkarank 3:7, 8 vachat.

16. Julia-chea onnbhovantlean ami kitem xiktat? (Chitram pasun polloiat.)

¹⁶ Jehovachi seva poilea zagear dovorlear, ami atam toxench fuddarak khuxal astolim. Hea vixim Julia-cho onnbhov polloum-ia. Lhan piraier thaun tem igorjechea choir-ant gaitalem. Tor eka opera gavpean, tem ekdom borem gaita mhunn polloilem ani to taka opera-nt gaunk proxikxonn diunk laglo. Rokddench, Julia khub famad zalem ani tem vhoddlea-vhoddlea music holamnim gaunk laglem. Uprant tem eka music iskolant voitalem tednam, tachea borabor xiktolea eka munxan Devachem nanv Jehova mhunn taka sanglem ani tache lagim Deva vixim ulounk laglo. Tea uprant, Julia sumanak don pavtti Bible obheas korunk laglem. Ani opera-nt gaunchea poros, tannem aplem purnn jivit Jehovachi seva korunk vinchun kaddlem. Oxem korunk taka sompem naslem. Karonn tem sangta: “Mhaka aslolem dennem hanv piddʼddear kortam mhunn zaitim zannam mhaka sangtalim. Punn hanv mhojem akʼkhem jivit Jehovachi seva korunk sodhtalem.” Tem Jehovachi seva korunk laglear atam 30-am poros chodd vorsam zalim. Tachea nirnnoi-a vixim taka koxem bhogta? Tem sangta: “Mhaka monachi xanti asa ani fuddarak Jehova mhoji dor itsa purnn kortolo mhunn mhaka khatri asa.”—St. 145:16.

JEHOVACHI SEVA KORIT RAVAT

17. Ami nimannea disanchea xevottak jietat hachea voilean amkam kitem kolltta?

¹⁷ Ami nimannea disanchea xevottak jietat. Apostl Paulun mhunnttlem: “Karonn ‘atam thoddoch vell urla,’ ani ‘zo ieuncho asa to ietolo, to vell korchona.’” (Heb. 10:37) Tor hachea voilean amkam kitem kolltta? Lokamnim Jehovachi seva korunk vinchun kaddunk atam thoddoch vell urla. (1 Kor. 7:29) Ani ami Jehovachi seva korunk vinchun kaddlam zalear, atam amkam tras sosunk poddttole khorem, punn te ‘thoddeach vella’ pasot mhunn ami zannant.

18. Jehovak ani Jezuk ami kitem kelʼlem zai?

¹⁸ Jezun lokank fokot aplim xisam zaunk nhoi, punn aplea fattlean cholot ravonk pasun urba dili. (Mt. 16:24) Tor ami zaitea vorsam thaun Jehovachi seva kortat zalear, fuddem pasun oxem korit ravonk ghott nichov korum-ia. Jehovachi seva visvaxiponnan korit ravonk khub vavr lagta tem khorem. Punn oxem korit ravlear, Jehova amkam atam toxench fuddarak ami chintunk pasun xokonant titlim besanvam ani khuxalkai ditolo!—St. 35:27.

19. Gene-achea onnbhovantlean ami kitem xiktat?

¹⁹ Thoddea zannank dista ki Jehovachi seva korunk vinchun kaddlear, jivitant kainch mouza aschina. Tornatteamno, tumkam-i oxench dista kai? Gene nanvacho ek tornatto bhav sangta: “Hanv ek Jehovacho Sakxi aslom dekhun, mhojea jivitant koslich mouza na oxem hanv chintʼtalom. Karonn mhojea boraborchim bhurgim partti kortalim, dating kortalim vo hinvsen bhorloleo video game-i khellttalim. Punn mhaka mittingek ani porgottnnek vochonk poddttalem.” Oslea chintpak lagon Gene-acher koslo porinnam zalo? To sangta: “Tea tornatteam bhaxen hanv-ui thoddeo vaitt vostu korunk laglom. Ani thoddea vella pasot mhaka borem dislem. Punn mhaka khori khuxalkai mellonk na. Tor Bible-ant sanglam tem pallʼllolean koso faido zata tea vixim hanv chintunk laglom, ani purnn kallzan Jehovachi seva korunk vinchun kaddlem. Tednam thaun Jehovan mhojea dor eka magnneacho zobab dila oxem mhaka dista.”

20. Ami kitem korunk nichov korunk zai?

²⁰ Eka stotrkaran Jehovak oxem gailem: “Zaka Tunvem venchun kaddlai, zaka Tujea khaxelea angnnant jieunk apoilai, to monis bhagi!” (St. 65:4) Tor ami pasun Jehovachi seva korit ravonk nichov korum-ia ani Joshua bhaxen oxem mhunnom-ia: “Hanv ani mhojem kuttumb Sorvesporachi seva kortoleanv.”—Josh. 24:15.