Ami Kednanch Eksurim Nant!

1-2. (a) Amchea trasanchea vellar ami eksurim nant mhunn ami kiteak khatren sangonk zata? (b) Hea lekhant ami kitem xiktolim?

AMKAM ekdom chodd tras sosunk poddttat tednam ami eka ranant sanddleant ani tantuntlean ami kednanch bhair sorchimnant oxem amkam disot. Punn amkam amchea trasancho ekttinch fuddo korunk poddona. Karonn amcho mogall sorgincho Bap amche tras polloita itlench nhoi, punn tantuntlean bhair soronk modot kortolo mhunn to bhas dita. Tannem amkam oxem utor dilam: “Hanv tuka modot kortolom.”—Iz. 41:10, NW.

² Tor hea lekhant, Jehova (1) amkam margdorxon diun, (2) amcheo gorzo purnn korun, (3) amchi rakhonn korun, ani (4) amkam bhuzvonn diun koso modot korta tem ami xiktolim. Amkam kosle-i tras sosunk poddlear pasun Jehova amkam kednanch visorchona ani soddun diunchona. Tor ami kednanch eksurim nant!

JEHOVA AMKAM MARGDORXON DITA

3-4. Jehova amkam koso margdorxon dita? (Stotr 48:14)

³ Stotr 48:14 vachat. Margdorxona pasot amkam Jehovachi goroz asa mhunn to zannam. To aiz aplea visvaxi sevokank margdorxon dita ti ek vatt mhunnttlear, Bible-a vorvim. (St. 119:105) Bible-a udexim bore nirnnoi gheunk ani Jehova bhaxen chintunk ani vagonk amkam modot zata. Hea udexim ami atam khuxal asonk xoktat ani fuddarak amkam sasnik jivitacho bhorvonso melltta.a Udharonnak, Jehova amkam dusreank bhogsunk ani rag dhorun ravona zaunk, soglea kamamnim promannik asonk ani kallzantlean dusreancho mog korunk xikoita. (St. 37:8; Heb. 13:18; 1 Ped. 1:22) Hea gunnam vorvim ami anikui borim avoi-bapui, kazari sangati ani ixttam zaunk pavtat.

⁴ Toxench, Bible-ant Jehovan zaitea munxanchim udharonnam boroun dovorleant. Tankam amcheach sarkim bhavnam aslim, ani amcheach sarke tras sosunk poddle. (1 Kor. 10:13; Jak. 5:17) Tanche vixim ami vachtat ani tanchea thaun xiktat tim lisanvam apnnaitat tednam amkam don vattamnim tori faido zata. Poilem, fokot amkanch trasancho fuddo korunk poddona, punn tea munxamnim pasun amcheach sarke tras sosle ani Jehovachea modotin tim tacho fuddo korunk pavlim mhunn amkam kolltta. (1 Ped. 5:9) Ani dusrem, tras aslearui khuxal ravonk amkam koxi modot zatoli tem ami tanchea thaun xiktat.—Rom. 15:4.

5. Jehova konnank uzar korun amkam margdorxon dita?

⁵ Amkam margdorxon diunk Jehova bhav-bhoinnank pasun uzar korta.b Udharonnak, amkam urba diunk sorkittache dekhrekh korpi chukonastana sobhank bhett ditat. Tanchea bhaxonnam udexim amcho bhavarth ghott zata ani ekvott samballunk modot zata. (D.I. 15:40–16:5) Toxench ami dor eklean Jehova sangata amchi ixttagot samballunk, sobhentle vhoddil khub vavr kortat. (1 Ped. 5:2, 3) Tea bhair, avoi-bapui aplea bhurgeank Jehovacho mog korunk, bore nirnnoi gheunk ani boreo sonvoim-o apnnaunk modot kortat. (Mho. 22:6) Toxench sotant ghott asloleo bhoinno, tornattea bhoinnank ek borem udharonn dovrun, toxench goroz to solʼlo ani urba diun modot kortat.—Tit. 2:3-5.

6. Jehovachea margdorxona pasot ami upkari asat mhunn koxem dakhounk zata?

⁶ Bore nirnnoi korunk ani khuxal ravonk Jehovan amkam margdorxon dilam. Tea pasot ami tache upkari asat mhunn koxem dakhounk zata? Mhonnʼnneo 3:5, 6 sangta: “Sogllea kallzan Devacher visvas dovor, svotache zannvaiecher bhavarth dhorinakai.” Ami oxem kortat tednam “to [amcheo] vatto nitt kortolo.” Tem mhunnttlear, amkam ek khuxal jivit astolem ani zaitea oddchonneam thaun pois ravonk modot zatoli. Jehova amkam dor ekleak itlea mogan margdorxon dita mhunn ami tache kitlim upkari asonk zai nhoi!—St. 32:8.

JEHOVA AMCHEO GORZO PURNN KORTA

7. Margdorxon diunchea borabor Jehova amkam anik koso modot korta? (Filipkarank 4:19)

⁷ Filipkarank 4:19 vachat. Margdorxon diunchea borabor, jevonn, kopdde ani ravonk zago mellonk ami zo vavr kortat, tacher Jehova besanv ghalta. (Mt. 6:33; 2 Tes. 3:12) Heo vostu melloun gheunk amkam usko zata tem khorem, punn tea vixim ami chodduch usko kelʼlo Jehovak naka. (Matev 6:25-acho study note polloiat.) Karonn amcho Bap aplea visvaxi sevokank, tanchea gorjechea vellar kednanch soddun diunchona. (Mt. 6:8; Heb. 13:5) Tor apnnem dilʼli bhas to samballttolo mhunn ami tacher purnn visvas dovrunk zata.

8. Jehovan Davidak koxi modot keli?

⁸ Jehovan Davidak koxi modot keli tacher dhean diat. David Saulu thaun pollon voitalo tea kotthin vellar, Jehovan tacheo ani tachea sangateancheo gorzo purnn keleo. Jehovan apli kallji koxi ghetli tea vixim iad kortana, David oxem boroita: “Tornno aslom, atam zalam mhataro, punn borea monxak Devan sanddlolo hanvem kodinch polleunk na. Tachea bhurgeank bhik magunk poddlolem aiz porian hanvem polleunk na.” (St. 37:25) Tor Davida bhaxen kotthin vellar, Jehovan tumkam vo bhav-bhoinnank koxi modot keli tem tumi pasun polloilam astolem.

9. Odruxttak sampoddlolea aplea lokank aiz Jehova koso modot korta? (Chitram pasun polloiat.)

⁹ Jehova odruxttak sampoddlolea aplea lokank pasun modot korta. Zoxem, poilea xekddeant Jeruzalemant bhuk poddli tednam, dusrea vattarantlea bhav-bhoinnamnim tankam gorjecheo vostu dileo. (D.I. 11:27-30; Rom. 15:25, 26) Ani aiz pasun Jehovache lok gorjek sampoddlolea aplea bhav-bhoinnank modot kortat. Odruxtt ghoddtta tednam, Jehova mogan aplea lokam vorvim tankam jevonn, udok, kopdde, ani vokhdam dita. Toxench, bandkam korpi ttim, moddon gelʼlim ghoram ani Raj-ghoram porot bandtat. Ani zanchim mogachim bhair poddleant vo zanchim ghoram moddon geleant tankam Jehovachim sevokam rokddinch Bible-antlean bhuzvonn ani urba ditat.c

10-11. Borys-achea onnbhovantlean tumi kitem xiklim?

¹⁰ Toxench, azun porian apli seva korinant, tancheo gorzo pasun Jehova udar kallzan purnn korta. Tor ami Jehovachi dekh gheun tachi bhokti korinant tea lokank doia dakhounk vatto sodhum-ia. (Gal. 6:10) Oxem kelʼlean chodd korun tankam ek bori sakx mellonk xokta. Hea vixim Borys-acho onnbhov polloum-ia. To Ukraine-ant eka iskolant principal asa. To Jehovacho Sakxi nhoi tem khorem, punn tachea iskolant Sakxi aslolea bhurgeam sangata to sodanch doiall toren vagtalo ani tanchea patiennik resped ditalo. Zhuzak lagon to aplo ganv soddun eka surokxit zagear vochonk sodhtalo tednam Sakxeamnim taka modot keli. Uprant, to Jezuchea mornnachea Ugddas Disak hajir zalo. Sakxeamnim taka ji modot dilʼli tea vixim chintʼtana tannem oxem sanglem: “Tannim mhaka khub doia dakhoili ani mhoji bori kallji ghetli. Hanv Jehovachea Sakxeancho khub upkari.”

¹¹ Ami amchea doiall Bapachi dekh gheun, Jehovachi bhokti korinant tankam pasun gorjechea vellar mog dakhounk zai. (Luk. 6:31, 36) Amcho mog polloun tim Jehovachi bhokti korunk fuddem sortolim mhunn ami bhorvonso dovortat. (1 Ped. 2:12) Tor tim Jehovachi bhokti korunk vinchun kaddum vo na, ami khuxal astolim. Karonn “diunk chodd khuxalkai melltta.”—D.I. 20:35.

JEHOVA AMCHI RAKHONN KORTA

12. Jehova aplea sevokank koso rakhtolo mhunn tannem bhas dilea? (Stotr 91:1, 2, 14)

¹² Stotr 91:1, 2, 14 vachat. Aplea sangata ixttagot piddʼddear korta toslea soglea vostum thaun Jehova aplea sevokanchi rakhonn kortolo mhunn bhas dita. Tor to Soitanak khori bhokti piddʼddear korunk kednanch diunchona. (Ju. 17:15) Ani ‘vhodd sonkoxtt’ suru zatolem tednam apnnem dilʼli bhas to purnn kortolo mhunn ami khatri dovrunk zata. Tem mhunnttlear, to aplea sevokancho bhavarth ghott samballunk modot kortolo ani tanchi rakhonn pasun kortolo.—Prok. 7:9, 14.

13. Jehova amchi dor ekleachi koxi rakhonn korta?

¹³ Jehova amchi dor ekleachi koxi rakhonn korta? Aplea Utra vorvim, borea ani vaitta modem ontor vollkhonk to amkam modot korta. (Heb. 5:14) Tor ami Bible-achea totvam pormonnem jietat tednam Jehova sangata amchi ixttagot ghott urta ani ami khuxal astat. (St. 91:4) Toxench, tannem amkam sobhent bhav-bhoinnam dileant, jim amkam taka visvaxi ravonk modot kortat. (Iz. 32:1, 2) Tor ami mittinge vellar, porgottnnent ani dusrea vellar bhav-bhoinnam sangata mellon ietat tednam tim amkam urba ditat ani vaitt asa tem pois korunk modot kortat.—Mho. 13:20.

14. (a) Amcher ietat te soglech tras Jehova kiteak addaina? (b) Stotr 9:10-ntlean amkam kosli khatri melltta? (Futtnott pasun polloiat.)

¹⁴ Adlea kallar Jehovan thodde pavtti aplea sevokank mornnantlean vanchoile. Punn tannem soglech pavtti toxem korunk na. Bible sangta: ‘Vell ani sondhi sogleank asa vo chintunk nant tosleo ghoddnneo konnakui ghoddonk xoktat.’ (Up. 9:11) Toxench, Jehovachea thoddea sevokank dhumalleancho ani mornnacho fuddo korunk poddlo tednam, Jehovan tem addaunk na. Karonn Soitan ek fotting mhunn to dakhounk sodhta. (Job 2:5, 6; Mt. 23:34) Tor aiz amkam-i tras sosunk poddttat. Jehova ghoddie te kaddina, punn jim tacho mog kortat tankam modot korop to kednanch bond korchona mhunn ami khatri dovrunk zata.d—St. 9:10.

JEHOVA AMKAM BHUZVONN DITA

15. Jehova amkam koso bhuzvonn dita? (2 Korintkarank 1:3, 4)

¹⁵ 2 Korintkarank 1:3, 4 vachat. Thodde pavtti amkam usko zata vo niraxiponn vo dukh bhogta. Sodʼdheak tumi osle poristhitint asat kai? Oslea vellar konnuch tumkam somzona ani tumi eksurim asat oxem tumkam disot. Punn tumkam koxem bhogta tem Jehova somzota. Itlench nhoi, to ‘tumchea soglea sonkoxttamnim tumkam bhuzvonn dita.’ Koso? Ami kallzantlean magnnem kortat tednam to amkam ‘apli xanti dita ji somzon gheupachea tanki poros vorti asa.’ (Filp. 4:6, 7) Toxench, Jehova amkam Bible-a vorvim pasun bhuzvonn dita. Ami Bible vachtat tednam to amcho kitlo mog korta tem amkam kolltta, ami xannim zaunk xiktat, ani amkam bhorvonso melltta. Tea bhair, to amkam mittinge vorvim pasun bhuzvonn dita. Thoim amkam Bible-antlean urbebhorit xikounn ani amcho mog kortat toslim bhav-bhoinnam mellttat.

16. Nathan ani Priscilla-chea onnbhovantlean tumi kitem xiklim?

¹⁶ Aplea Utra vorvim Jehova amkam koso urba ani bhuzvonn dita tea vixim ek onnbhov polloum-ia. Bhav Nathan ani bhoinn Priscilla, United States-ant ravtalim. Punn thoddea vorsam poilim, porgottnnaranchi chodd goroz asa thoim seva korunk tim gelim. Nathan mhunntta: “Jehova amchea kamacher besanv ghaltolo mhunn amkam khatri asli.” Punn okosmat tim duent zalim ani tankam poixeanchem unnemponn zalem. Ani hea pasot tankam porot United States-ant voichem poddlem. Uprant pasun tankam poixeanchem unnemponn aslem. Nathan mhunntta: “Amchea vavracher Jehovan kiteak besanv ghalunk na, mhunn hanv chintunk laglom. Toxench, hanvem kitem chuk kelea kai mhunn hanv chintunk poddlom.” Punn uprant Jehovan tankam soddun diunk na mhunn tankam kollʼllem. Koxem? Nathan mhunntta: “Bible amcho ixtt koso zalo, jea udexim amkam urba ani margdorxon mellʼllem. Toxench, amchea oddchonneancher dhean diunchea bodlek, kotthin vellar Jehovan amkam koxim samballʼllim tacher dhean dilʼlean, fuddarak ietolea koslea-i oddchonneancho fuddo korunk Jehova amkam modot kortolo mhunn amkam khatri mellʼllea.”

17. Bhoinn Helga-k bhuzvonn koxi mellʼlli? (Chitr pasun polloiat.)

¹⁷ Jehova bhav-bhoinnam vorvim amkam koso urba dita tem zannam zaunk, ami bhoinn Helga-cho onnbhov polloum-ia. Ti Hungary-nt ravta ani tika zaitea vorsam thaun veg-vegllea oddchonneancho fuddo korcho poddlo. Haka lagon tika khub usko zatalo. Punn tea kotthin poristhiti vixim chintʼtana, Jehovan bhav-bhoinnam vorvim tika koxi urba dili tea vixim ti oxem sangta: “Mhojem kam, mhojea duent putachi kallji ghevop ani her oddchonneank lagon, mhojean anik zaunchem na oxem distalem tednam, Jehovan mhaka sodanch modot keli. Mhaka bhuzvonn ditolo mhunn tannem ji bhas dilʼli, ti fattlea 30 vorsam thaun tannem sodanch samballʼlli. Bhav-bhoinnanchea doiall ani urbebhorit utram vorvim tannem mhaka ghottai dilea. Mhaka ekdom chodd goroz astali tednam, tim mhaka message dhaddttalim, kardd korun ditalim vo xabaski ditalim.”

18. Ami dusreank bhuzvonn koxi diunk zata?

¹⁸ Jehovachi dekh gheun dusreank bhuzvonn diunk amkam ek sueog asa. Hem ami koxem korunk zata? Ami dusreanchem pasiensan aikonk zata, tanchea lagim doiall utramnim ulounk zata, ani amchean zata tea bhaxen tankam modot korunk zata. (Mho. 3:27) Ami sogleank, tem mhunnttlear, jim konn azun poriant Jehovachi seva korinant, tankam pasun bhuzvonn diunk vavr kortat. Konnui dukhant astat, duent astat, vo konnak usko zata tednam, ami tankam bhett ditat, tanchem aikotat ani Bible-antlim versam uzar korun tankam bhuzvonn ditat. Ami “sogle torechi bhuzvonn diupi Dev” Jehovachi dekh ghetat tednam, ami trasant aslolea amchea bhav-bhoinnank modot korunk pavtolim itlench nhoi, punn azun porian tachi seva korinant tankam pasun Jehova vixim zannam zaunk ami ghoddie modot korunk pavtolim.—Mt. 5:16.

JEHOVA SODANCH AMKAM MODOT KORTOLO

19. Jehova amchea pasot kitem korta, ani ami tachi dekh koxi gheunk zata?

¹⁹ Aplo mog kortoleanchi Jehovak khub kallji asa. Ani kotthin vellar to amkam kednanch soddchona. Zoxim avoi-bapui mogan aplea bhurgeachi kallji ghetat, toxench Jehova aplea visvaxi sevokanchi kallji gheta. To amkam margdorxon dita, amcheo gorzo purnn korta, amchi rakhonn korta ani amkam bhuzvonn dita. Ami pasun kotthin poristhitincho fuddo kortoleank urba ditat ani modot kortat tednam, Jehovachi dekh ghetat mhunn dakhoitat. Ani ami koslea-i poristhitincho fuddo korum, Jehova amchea sangata asa mhunn ugddas dovrat. Karonn tannem amkam oxi bhas dilea: “Bhieum naka, kiteak Hanv tujea sangata asam.” (Iz. 41:10) Him kitlim khatrechim utram nhoi! Khorench, ami kednanch eksurim nant.