Tornattea Bhavamno—Marku ani Timotachi Dekh Gheiat

1-2. Marku ani Timot koslea karonnank lagon Jehovache sevent anik chodd korunk fattim soronk xoktale?

TORNATTEA bhavamno, tumkam Jehovache sevent anik chodd korunk, toxench bhav-bhoinnank anik modot korunk zai kai? Hoi mhunn kosloch dubhav na. Bhav-bhoinnanchi seva korunk zaite tornatte bhav fuddem sortat tem polloun amkam khub khuxalkai bhogta! (St. 110:3, NW) Punn oxem korop tumkam kotthin disot. Kiteak? Jehovache sevent anik chodd kelolean tumchem jivit koxem astolem tem chintun vo umkench kam korunk tumi purte nant mhunn chintun tumi fattim sortat zait. Toxem zalear ugddas dovrat, tumchea sarkea zaitea tornattea bhavank pasun oxench dislem.

² Marku ani Timota vixim chintat. Jehovache sevent anik chodd kelolean aplem jivit koxem astolem vo umkench kam korunk apunn purte nant oxem ghoddie tankam dislem. Torui, te fattim soronk nant. Apostl Paulun ani Barnabasan, Markuk aplea poilea mixinori bhonvddek apoilo tednam, Marku ghoddie aplea avoi sangata ekdom borea ghorant ravtalo. (D.I. 12:12, 13, 25) Punn Jehovache sevent anik chodd korunk tannem aplem susegad jivit soddun dilem. To poilo Antiokant gelo ani uprant Paulu ani Barnabasak modot korunk poixilʼlea zagear gelo. (D.I. 13:1-5) Toxench, Paulun Timotak aplea sangata porgottnni korunk apoilo tednam, Timot chodd korun aplea avoi-bapai sangata ravtalo. Apunn tornatto asa, ani apleak titlo onnbhov na hem chintun Jehovache sevent anik chodd korunk to fatti soronk xoktalo. (1 Kor. 16:10, 11 ani 1 Tim. 4:12 sor korat.) Torui to Paulu sangata gelo ani taka zaitim besanvam mellʼllim.—D.I. 16:3-5.

3. (a) Marku ani Timot Pauluk kitle moladik zale? (2 Timotak 4:6, 9, 11) (Chitram pasun polloiat.) (b) Hea lekhant ami khoinchea prosnanche zobab polloitolim?

³ Tornattponnaruch Marku ani Timot sobhent veg-veglleo zobabdareo samballunk xikle, ani tankam khub onnbhov mellʼllo. Te dogui Pauluk itle moladik zale ki apunn rokddoch morcho asa mhunn Pauluk kollʼllem tednam, tannem tankam dogainkui apoi mhunn sanglem. (2 Timotak 4:6, 9, 11 vachat.) Tor Markuche ani Timotache khoinche gunn Pauluk avoddle? Aiz tornattea bhavamnim tanchi dekh koxi gheunk zata? Ani Paulun mogan dilʼlo solʼlo apnnailʼlean tornatteank koso faido zaunk xokta?

MARKUCHI DEKH GHEIAT—AP-KHUXEN BHAV-BHOINNANCHI SEVA KORAT

4-5. Apunn ap-khuxen bhav-bhoinnanchi seva korunk sodhta mhunn Markun koxem dakhoilem?

⁴ Dusreanchi seva korop hacho oso-i orth zaunk xokta—dusreank modot korunk khub vavr korop, ani kotthin aslear pasun toxem korit ravop. Markun oxench kelem. Paulu taka porot aplea sangata mixinori bhonvddek vhoronk toiar naslo tednam, Markuk khub vaitt dislem ani dukh bhogli astoli. (D.I. 15:37, 38) Punn hea karonnak lagon tannem aplea bhav-bhoinnanchi seva korop bond korunk na.

⁵ Marku aplo cousin Barnabasa sangata eka dusrea zagear seva korunk gelo. Sumar 11 vorsam uprant Paulu Romant bondkhonnint aslo tednam, taka modot kortolea bhavam modem Marku pasun aslo. (Fil. 23, 24) Khorem mhunnttlear, Paulu Markuk itlo upkari aslo ki tachea udexim apleak “khub bhuzvonn mellʼllea” oxem tannem mhunnttlem.—Kol. 4:10, 11.

6. Visvaxi bhavam sangata vell sarlolean Markuk koso faido zalo? (Futtnott polloiat.)

⁶ Visvaxi bhavam sangata vell sarlolean Markuk khub faido zalo. Paulu sangata vell sarlea uprant, Marku Pedru sangata kam korunk Babilonant gelo. Thoim tanchi ixttagot itli ghott zali ki Pedrun taka, ‘mhozo put Marku’ oxem mhunnttlem. (1 Ped. 5:13) Tannim sangata vell sarlo toso, Pedrun chodd korun taka Jezuchem jivit ani porgottnne vixim bariksannechi mahiti sangli, ji Markun uprant aplea nanvan aslolea Bore Khobrechea Pustokant boroili.a

7. Seung-Woo nanvachea eka tornattea bhavan Markuchi dekh koxi ghetli? (Chitr pasun polloiat.)

⁷ Marku Jehovache sevent bizi ravlo ani visvaxi bhavank chittkon ravlo. Tumi Markuchi dekh koxi gheunk zata? Ghoddie tumkam Jehovache sevent chodd korunk zai. Zoxem, sobhecho sevok vo vhoddil mhunn seva korunk zai. Punn azun pasun tumkam ti sondhi mellonk na. Tor niraxi zaunchea bodlek, tumi dusrea vattamnim Jehovachi seva ani bhav-bhoinnank koxi modot korunk zata tea vixim chintat. Hea vixim amkam Seung-Woo-achem udharonn asa. To atam vhoddil mhunn seva korta. Punn to tornatto aslo tednam, apleak dusrea tornattea bhavam vangdda sor kortalo. Tantuntlea thoddeank aplea poilim sobhent zobabdari mellʼlli mhunn to niraxi zalo. Uprant to hea vixim vhoddilam lagim uloilo. Tednam, dusrim tachea kamacher dhean dinant zalear pasun, bhav-bhoinnank modot korunk tachean zata tem korit ravonk eka vhoddilan taka urba dili. Hea pasot, to zanntteank ani goroz asa tankam aple gaddien mittingek haddunk-vhoronk laglo. Tea vixim ugddas korun to sangta: “Purnn toren dusreanchi modot korop mhunnttlear kitem tem mhaka kollʼllem ani oxem korun mhaka khub khuxalkai mellʼlli.”

TIMOTACHI DEKH GHEIAT—DUSREANK KALLJI DAKHOIAT

8. Aplea sangata provas korunk Paulun Timotak kiteak vinchun kaddlo? (Filipkarank 2:19-22)

⁸ Apnnem virodh soslo tea xaramnim porot vochonk, Pauluk dhirvont bhavanchi goroz asli. Tannem poilo Silasak vinchun kaddlo, zannem zaitim vorsam Jehovachi seva kelʼli. (D.I. 15:22, 40) Uprant tannem tornattea Timotak pasun vinchun kaddlo. Kiteak? Poilem mhunnttlear, sobhent Timotak ek borem nanv aslem. (D.I. 16:1, 2) Ani dusrem, to kallzantlean bhav-bhoinnanchi porva kortalo.—Filipkarank 2:19-22 vachat.

9. Timotak khorench aplea bhav-bhoinnanchi kallji asli mhunn tannem koxem dakhoilem?

⁹ Timotak aplea poros dusreanchi chodd kallji asli mhunn tannem Paulu sangata seva suru kortanch dakhoilem. Dekhun Pauluk Bereia xar soddun voichem poddlem tednam, Timot thoinchea bhav-bhoinnanchi kallji ghetolo mhunn Pauluk khatri asli. (D.I. 17:13, 14) Tea vellar, Silas Timota sangata aslo dekhun tachea thaun Timotak zaitem xikonk mellʼllem astolem. Ani uprant, Tesalonikentlea bhav-bhoinnank ghottai diunk Paulun Timotak ekleakuch dhaddlo. (1 Tes. 3:2) Fuddlim 15 vorsam, bhav-bhoinnam pasot Timotacho mog itlo vaddlo ki thodde pavtti jim ‘roddttalim tanchea sangata to-ui roddttalo.’ (Rom. 12:15; 2 Tim. 1:4) Tor aiz tornattea bhavamnim Timotachi dekh koxi gheunk zata?

10. Woo Jae bhav-bhoinnanchea gorzancher dhean diunk koso xiklo?

¹⁰ Hea vixim amkam bhav Woo Jae-achem udharonn asa, zo bhav-bhoinnanchea gorzancher dhean diunk xiklo. To tornatto aslo tednam taka zannttea bhav-bhoinnam lagim ulounk kotthin zatalem. Hea pasot to sobhent fokot tankam zap kortalo ani kuxin sortalo. Tor taka dusream vixim kitem avoddtta tem tankam sangon tanchea lagim ulovop suru korunk eka vhoddilan Woo Jae-ak urba dili. Toxench, tea bhav-bhoinnank kitem avoddtta tea vixim chintunk sanglem. Ani Woo Jae-an to solʼlo apnnailo. Aiz to ek vhoddil mhunn seva korta. To mhunntta: “Veg-vegllea piraiechea lokam lagim bore toren ulounk atam mhaka anikui sompem zata. Toxench, dusreancheo oddchonneo hanv bore toren somzonk xoktam ani tea vorvim hanv tankam modot korunk pavtam.”

11. Tornattea bhavamnim sobhentlea bhav-bhoinnanchea gorzancher koxem dhean diunk zata? (Chitr pasun polloiat.)

¹¹ Tor tornattea bhavamno, tumi pasun bhav-bhoinnanchea gorzancher dhean diunk zata. Koxem? Mittinge vellar veg-vegllea piraiechea bhav-bhoinnam lagim ulounk fuddem sorat. Soglem koxem cholta mhunn tankam vicharat. Ani tim jem sangtat tem dhean diun aikat. Oxem kelʼlean, tankam kosli modot zai tem tumkam kollon ietolem. Ghoddie tumkam kollon ieit ki eka zannttea zoddpeak, JW Library^® app uzar korunk modot zai vo porgottnni korunk tankam ek partner na. Tor oslea bhav-bhoinnank tumi modot korunk zata kai? Oxem korunk fuddem sorlolean sobhentlea dusrea bhav-bhoinnank tumi borem udharonn dovortole.

PAULUCHO SOL’LO TUMKAM MODOT KORTOLO

12. Paulun Timotak dilʼlo solʼlo tornattea bhavamnim koso apnnaunk zata?

¹² Jivitant khuxal ravonk ani Devachi seva purnn toren korunk, apostl Paulun Timotak solʼlo dilo. (1 Tim. 1:18; 2 Tim. 4:5) Tor tornattea bhavamno, Paulucho ho solʼlo apnnailolean tumkam pasun faido zatolo. Paulun Timotak boroilʼleo donui chitti, tannem tumkam boroileat toxeo vachat. Ani khoincho solʼlo tumchea jivitant tumi apnnaunk zai tem polloiat. Tor atam ami tachea thoddea solʼleancher dhean dium-ia.

13. Ami Devachi bhokti koxi korit ravonk zata?

¹³ “Devachi bhokti korunk tuzo dhei dovrun tukach proxikxonn di-it rav.” (1 Tim. 4:7b) Devachi bhokti korop mhunnttlear, taka visvaxi ravop ani taka kitem manvota tem korit ravop. Amkam ho gunn zolma thaun asona. Tea pasot ami to vaddounk zai. Koso? “Tukach proxikxonn di-it rav” hea utrank uzar kelʼlem Grik utor, spordent bhag ghetole khellpi proxikxonn ghetat taka uzar kortale. Khellpeank boreo sonvoim-o apnnaunk poddttaleo jea vorvim tanchem dhean halonastana tancho dhei mellounk tankam modot zatoli asli. Tor ami pasun osleo sonvoim-o apnnaunk zai, jeo amchem dhean halonastana Jehovak lagim sorot ravonk amkam modot kortoleo.

14. Ami koslo dhei dovrun Bible vachunk zai? Somzaiat.

¹⁴ Tor tumi Bible vachpachi sonvoim vaddoitat tednam tumcho dhei Jehovak lagim sorop mhunn ugddas dovrat. Udharonnak, Jezu eka girest tornattea odhikarea sangata koso vaglo tea ghoddnnentlean tumkam kitem xikonk melltta? (Mk. 10:17-22) Jezu Mesias mhunn to munis zannam aslo. Punn tacho pattlavdar zaunk tacho bhavarth ghott naslo. Tori astana, “Jezun mogan taka polloilem” ani tachea lagim doiallaien uloilo. Tor hantuntlean, tea munxan khuxalkaien Jehovachi seva kelʼli Jezuk zai asli mhunn kolltta. Ani tea munxa vixim Jehovak pasun toxench bhogtalem mhunn kosloch dubhav na. (Ju. 14:9) Tor hi ghoddnni vachlea uprant tumi tumchea poristhiti vixim chintun tumkanch ho prosn vicharunk zata, ‘Jehovak anik lagim soronk, toxench bhav-bhoinnanchi seva anik purnn toren korunk hanvem kitem korunk zai?’

15. Tornattea bhavamnim dusream pasot ek borem udharonn koxem dovrunk zata? Somzaiat. (1 Timotak 4:12, 13)

¹⁵ “Visvaxi lokam pasot ek udharonn dovor.” (1 Timotak 4:12, 13 vachat.) Paulun Timotak fokot vachpachi ani xikoupachi kolach nhoi, punn mog, bhavarth ani nirmollponn osle gunn pasun vaddounk sanglem. Karonn ami kitem uloitat, tachea poros ami kitem kortat tem chodd mhotvachem. Udharonnak, amchi porgottnni vaddounchea vixim tumkam ek bhaxonn diunchem asa mhunn chintat. Zori tor, tumi urben porgottnni kortat zalear, tem bhaxonn diunk tumkam sompem zatolem ani tumi sangtat tem apnnaunk bhav-bhoinnam toiar astolim.—1 Tim. 3:13.

16. (a) Tornattea bhavamnim khoinchea panch vostumnim dusreank ek borem udharonn dovrunk zata? (b) Tornattea bhavamnim ‘aplea utramnim’ dusreank ek borem udharonn koxem dovrunk zata?

¹⁶ 1 Timotak 4:12-nt, tornattea bhavamnim dusream pasot ek borem udharonn dovrunk, Paulun panch vostuncher kam korunk sanglem. Tor tea versant sanglolea panchui vostuncher tumi tumchea svotachea obheasa vellar sodh korunk zata kai? Zoxem, tumi ‘tumchea utramnim’ dusream pasot ek borem udharonn dovrunk sodhtat mhunn chintat. Tor oxem korunk tumi khoincheo vatto uzar korunk zatat? Tumi tumchea avoi-bapai sangata ravtat zalear, tumchea pasot jem tim kortat tachea pasot tumi tanche anikui chodd pavtti upkar attounk zata kai? Vo mittinge uprant, eka bhavan vo bhoinnin kelʼlea bhagant, tumkam kitem avoddlem tea vixim tankam sangonk zata kai? Vo mittingent tumchea utramnim zobab diunk zata kai? Hea toren, tumchea utram vorvim ek borem udharonn dovrunk tumi zo vavr kortat to dusreank dison ietolo.—1 Tim. 4:15.

17. Eka tornattea bhavak Jehovache sevent anik chodd vavr korunk koxi modot zatoli? (2 Timotak 2:22)

¹⁷ ‘Tornattponnachea vondovnneam thaun pois dhanv, ani nitivontponn utpon kor.’ (2 Timotak 2:22 vachat.) Jehovache sevent anik vavr korunk taka addkholl korunk xokta ani Jehova sangata tachi ixttagot oskot korunk xokta, tea vostum thaun, Paulun Timotak pois ravonk sanglem. Thoddeo vostu korop ghoddie vaitt nhoi, punn ami teo vostu korunk kitlo vell sartat tacher ami dhean diunk zai. Udharonnak, internet uzar korunk, video game vo her khell khellonk tumi kitlo vell sartat? Tantuntlo thoddo vell tumi Jehovache seve sombondit kamam korunk uzar korunk zata kai? Tumi Raj-ghor samballpachem kam vo kartt uzar korun porgottnni korunk zata kai? Oslim kamam kelear, chodd korun tumi novim ixttam korunk pavtolim jim tumkam Jehovache sevent dhei dovrunk ani te melloun gheunk modot kortolim.

DUSREANCHI SEVA KELOLEAN BESANVAM MELLTTAT

18. Markun ani Timotan aplea jivitant teag kelolean tankam koslim besanvam mellʼllim?

¹⁸ Dusreanchi seva anik purnn toren korunk, Markun ani Timotan aplea jivitant zaite teag kele ani taka lagon tankam zaitim besanvam mellʼllim. (D.I. 20:35) Markuk pois-pois zageancher vochon bhav-bhoinnank modot korunk sueog mellʼllo. Itlench nhoi, Jezuchem jivit ani porgottnne vixim tannem Bore Khobrechem ek pustok boroilem. Toxench, noveo sobha suru korunk ani bhav-bhoinnank urba diunk, Timot Pauluk modot korunk pavlo. Markun ani Timotan je teag kelʼle te sogle Jehovan polloile ani to khub khuxal zalo.

19. Tornattea bhavamnim Paulun Timotak dilʼlea solʼleacher kiteak dhean diunk zai, ani oxem kelear tankam koslim besanvam mellttolim?

¹⁹ Paulun Timotak boroilʼlea chittim udexim, to tacho kitlo mog kortalo tem kollon ieta. Khorem mhunnttlear, teo chitti borounk Jehovan Pauluk prerit kelʼlo. Tor Jehova tornattea bhavancho kitlo mog korta tem kollon ieta. Tumi tache sevent khuxal aslole Jehovak zai. Tor Paulucho solʼlo apnnaiat ani dusreanchi seva anik purnn toren korat. Oxem kelear, tumi atam khuxal astole ani ‘khorea jivitacho bhorvonso tumi ghott korunk pavtole.’—1 Tim. 6:18, 19.