Obheas Korchea Poilim Tumchem Mon Toiar Korat

Ami Bible-acho obheas kortat tednam ami Jehova vixim jem kitem xiktat tacho amchea chintnancher, bhavnancher ani itsancher probhav poddlolo amkam zai. Hea vixim amkam Ezrachem ekdom borem udharonn asa. “Jehovache Kaide xikonk . . . tannem aplem mon toiar kelem.” (Ezr. 7:10, NW) Tor ami Ezrachi dekh koxi gheunk zata?

Magnnem korat. Dor ek pavtti obheas korchea poilim Jehova lagim magnnem korat. Tumi xiktat tem tumkam somzonk ani tumchea jivitant apnnaunk Jehova lagim modot magat.—St. 119:18, 34.

Khaltim zaiat. Jim konn gorvixtt asat ani Bible somzonk apnnak modot naka oxem chintʼtat tanchea koddlean Jehova sot lipoita mhunn ugddas dovrat. (Luk. 10:21) Toxench, tumi kitlem zannant tem dusreank dakhounk lagon obheas korinakat. Tea bhair, tumchem chintop Jehovachea chintpa pormonnem na mhunn tumkam kolltta zalear, khaltikaien tumchea chintpant bodol korat.

Raj-git aikat. Songit amchea bhavnancher ani monacher khub probhav ghalunk xokta. Tor obheas suru korchea poilim ami ek Raj-git aikotat zalear, obheasa pasot amchem mon toiar korunk amkam modot zaunk xokta. Hea vorvim, ami jem xiktat tem amchea kallzak lagtolem.