Sosnikai Dakhounk Jehova Amkam Koso Modot Korta?

1. Amkam sosnikaiechi kiteak goroz asa, ani konn amkam modot kortolo? (1 Pedru 5:10)

HEA nimannea disamnim, Jehovachea sevokank sosnikaiechi goroz asa. Karonn thoddim zaitea vorsam thaun duent asat, thoddeanchim mogachim bhair poddleant, toxench anikui zaitea zannank tanchea ghorchea koddlean vo sorkari odhikaream koddlean dhumallo sosunk poddtta. (Mt. 10:18, 36, 37) Punn amche tras kitle-i kotthin asum, sosnikai dakhounk Jehova amkam modot kortoloch mhunn ami khatri dovrunk zata.—1 Pedru 5:10 vachat.

2. Ami sosnikai kiteak dakhounk xoktat?

² Sosnikai dakhovop mhunnttlear, amkam oddchonneancho, dhumalleancho vo tallnneancho fuddo korunk poddlear pasun Jehovak visvaxi ravop ani khuxalkaien tachi seva korit ravop. Toxench sosnikai dakhounk, poristhiti bori zatoli mhunn ami visvas dovrunk zai. Ami amcheach bollan nhoi punn Jehovachea modotin ami sosnikai dakhounk xoktat. Karonn to dita ti “xokti . . . munxachea xokte poros khub vorti asa.” (2 Kor. 4:7) Tor hea lekhant, ami sosnikai dakhounk Jehovan kosli manddavoll kelea ani tantuntlean faido melloun gheunk ami kitem korunk zai tem polloum-ia.

JEHOVA AMKAM APLEA LAGIM MAGNNEM KORUNK DITA

3. Magnnem ek vizmit kiteak zaun asa?

³ Sosnikai dakhounk Jehovan amchea pasot ek ojapachi manddavoll kelea. Ti mhunnttlear, magnnem. Ami patki asonui aplea lagim ulounk Jehovan manddavoll kelea ani to amchem aikonk sodanch toiar asta. (Heb. 4:16) Hea vixim chintat. Ami khoinchea-i vellar ani koslea-i vixoi-acher Jehova lagim magnnem korunk zata. Toxench ami khoinchea-i bhaxent magnnem korum vo ami khoinchea-i zagear, tem mhunnttlear ami eksurim vo bondkhonnint aslear pasun to amchem magnnem aikonk xokta. (Jon. 2:1, 2; D.I. 16:25, 26) Ani ami itlim niraxi astat ki kitem magchem tem amkam kollona tednam pasun ami kitem mhunnonk sodhtat tem Jehova bore bhaxen somzota. (Rom. 8:26, 27) Khorench, magnnem ek vizmit zaun asa!

4. Sosnikai dakhounk Jehova lagim magnneant modot magop tachea khuxe pormonnem asa oxem ami kiteak mhunnonk zata?

⁴ Jehova aplea Utrantlean amkam khatri dita ki ‘tache khuxe pormonnem ami kitem-i maglear to amchem aikota.’ (1 Ju. 5:14) Tor sosnikai dakhounk Jehova lagim magnneant modot magop, tachea khuxe pormonnem asa oxem ami mhunnonk zata. Karonn ami sosnikai dakhoitat tednam Jehovak tomnne marpi Soitanak, to zobab diunk xokta. (Mho. 27:11) Toxench, Bible-ant sanglam ki Jehova ‘soglea kallzan apnnak sodhtoleank ghottai dita.’ (2 It. 16:9) Hacho orth amkam modot korunk to axeun ravla. Tor ami sosnikai dakhounk Jehova amkam xokti dita ani toxem korunk to axeun asa mhunn ami khatri dovrunk zata.—Iz. 30:18; 41:10; Luk. 11:13.

5. Magnnea vorvim amkam xanti koxi melltta? (Izaias 26:3)

⁵ Ami Jehova lagim magnnem kortat tednam, ‘Devachi xanti ji somzon gheupachea tanki poros vorti asa, ti amchea kallzanchi ani amchea chintnanchi rakhonn korta.’ (Filp. 4:7) Ani hea pasot ami Jehovak khub upkari asat. Karonn Jehovachi seva korinant tim munxam tancher tras ietat tednam, xanti mellonk veg-veglleo vatto uzar kortat. Udharonnak, xanti mellonk tim aplem mon khali kortat. Punn oxem kelear tanchea chintnancher tancho tabo asona ani noxtte dut tancher probhav ghalunk xoktat jem khub dhokeachem zaunk xokta. (Matev 12:43-45 sor korat.) Heo vatto uzar korun apleak xanti melltta oxem lokank dislear pasun, tankam Jehova dita ti khori xanti mellona ji khub vorti asa. Punn ami Jehova lagim magnnem kortat tednam amkam tacher purnn visvas asa mhunn ami dakhoun ditat ani to amkam ‘purnn xantin jieunk dita vo xanti di-it ravta.’ (Izaias 26:3 vachat.) Koso? Ek vatt mhunnttlear, amkam bhuzvonn ditat toslim versam to amchea ugddasak haddtta. Hea vorvim Jehova amcho khub mog korta ani amkam modot korunk toiar asta mhunn amkam khatri melltta. Ani taka lagon amkam xanti melltta.—St. 62:1, 2.

6. Magnnea vorvim zata titlo faido melloun gheunk tumi kitem korunk zata? (Chitr pasun polloiat.)

⁶ Tumi kitem korunk zata? Tumkam eke umkech oddchonnecho fuddo korunk poddtta tednam, ‘Sorvesporachea kallzant vo Jehovacher tumche uske ghalat’ ani tumkam monachi xanti di mhunn magnnem korat. (St. 55:22) Toxench te oddchonnecho fuddo korunk zannvai magat. (Mho. 2:10, 11) Tea bhair magnnem kortana, Jehovache upkar attounk visornakat. (Filp. 4:6) Sosnikai dakhounk Jehova dor disa tumkam koxi modot korta tem niall korat ani to ji modot ani boreo vostu dita tea pasot tache upkar attoiat. Oddchonneank lagon tumkam tras sosunk poddtta tem khorem, punn Jehovan tumkam jim besanvam dileant tim visornakat.—St. 16:5, 6.

JEHOVAN AMKAM APLEM UTOR DILAM

7. Devachea Utra vorvim sosnikai dakhounk amkam koxi modot zaunk xokta?

⁷ Jehovan amkam aplem Utor dilam jea vorvim amkam sosnikai dakhounk modot zata. Jehova amkam modot kortoloch mhunn Bible-antlea zaitea versantlean khatri melltta. Udharonnak, Matev 6:8-ant oxem sanglam: “Tumkam kiteachi goroz asa tem tumi magchea poilinch tumcho Bap zannam.” Him utram Jezun mhunnttlolim, ani to Jehovak sogleam-von bore toren vollkhota. Tor amkam oddchonneancho fuddo korunk poddtta tednam amkam kiteachi goroz asa tem Jehova zannam, ani to amkam modot kortolo mhunn ami purnn khatri dovrunk zata. Ani Bible-ant oxim anikui zaitim versam asat jea vorvim Jehova amkam oddchonneanchea vellar sosnikai dakhounk ghottai diunk xokta.—St. 94:19.

8. (a) Bible-antlim totvam amkam koxim modot korunk xoktat? Ek udharonn diat. (b) Amkam goroz asa tednam, Bible-antlim totvam ugddasak ieunk ami kitem korunk zai?

⁸ Bible-antlim totvam amkam sosnikai dakhounk modot kortat. Tantuntlean amkam zannvai melltta jea udexim ami bore nirnnoi gheunk pavtat. (Mho. 2:6, 7) Udharonnak, Bible amkam fuddara vixim usko korinastana dor disak Jehovacher patieun ravonk urba dita. (Mt. 6:34) Tor amkam dor disa Bible vachpachi ani tacher bariksannen niall korpachi sonvoim asa zalear, tim versam sompeponnim amchea ugddasak ietolim ani oddchonneancho fuddo korunk, toxench boro nirnnoi gheunk amkam modot zatoli.

9. Jehovachea visvaxi sevokam vixim ami Bible-ant vachtat tednam amkam kosli khatri melltta?

⁹ Bible-ant amkam amcheach sarkea munxam vixim vachunk melltta jim Jehovacher patieun ravlim ani Jehovan tankam modot keli. (Heb. 11:32-34; Jak. 5:17) Jehovan tankam koxi modot keli tacher ami niall kortat tednam, to “amcho asro, . . . To amchem boll, koxttam-akantachea vellar adar diunk sodanch toiar” asta mhunn amchi khatri vaddtta. (St. 46:1) Toxench tannim Jehovacher koso bhavarth dakhoilo ani oddchonneam vellar Jehovachi seva koxim korit ravlim tem polloun amkam pasun toxem korunk urba melltta.—Jak. 5:10, 11.

10. Bible-acho purnn faido melloun gheunk tumi kitem korunk zata?

¹⁰ Tumi kitem korunk zata? Dor disa Bible vachat ani tumkam khoinchea versantlean faido zala tim boroun dovrat. Zaitim bhav-bhoinnam dor sokallim Dispottʼttem Devachea Utra Thaun Xikom-ia hantunt aslolem vers vachtat. Hea vorvim akʼkho dis borea vostuncher dhean diunk tankam modot zata. Hea vixim amkam Mariea nanvache eke bhoinnichem udharonn asa. Tichea avoi-bapaik ekach borabor cancer zalʼlo ani tim mornnachea tonnir aslim. Tanchi kallji ghetana bhoinnik koxi modot zali tea vixim ti oxem sangta. “Dor sokallim hanv Dispottʼttem Devachea Utra Thaun Xikom-ia hantunt aslolem vers vachtalem ani tacher niall kortalem. Hea vorvim mhojea oddchonneancher chodduch dhean dinastana Jehova vixim chintunk ani tachea Utrant to amkam jem xikoita tacher niall korunk mhaka modot zali.”—St. 61:2.

JEHOVAN AMKAM BHAV-BHOINNAM DILEANT

11. Amchim bhav-bhoinnam amcheach sarkea dukh-trasancho fuddo kortat hem zannam zalolean amkam koxem bhogta?

¹¹ Amche tras sosunk modot korunk Jehovan amkam bhav-bhoinnam dileant. ‘Sonvsarbhor aslolea soglea bhav-bhoinnank amcheach sarkea dukh-trasancho fuddo korcho poddtta’ mhunn zannam zalolean amkam bhuzvonn melltta. (1 Ped. 5:9) Punn itle tras asonui tim Jehovak visvaxi ravtat. Tor ami pasun sosnikai dakhoun Jehovak visvaxi ravonk zata!—D.I. 14:22.

12. Bhav-bhoinnam amkam koxim modot korunk xoktat, ani ami tankam koxi modot korunk zata? (2 Korintkarank 1:3, 4)

¹² Amchea trasanchea vellar sosnikai dakhounk amchim bhav-bhoinnam aplea utramnim ani korneamnim amkam modot korunk xoktat. Hea vixim amkam apostl Pauluchem udharonn asa. To ghorant koidi aslo tednam thoddea bhav-bhoinnamnim taka modot kelʼli. Tannim taka bhuzvonn, urba ani goroz teo vostu dilʼleo. Ani apostl Paulun aplea chittint tea bhav-bhoinnanchim nanvam gheun tanche upkar attoile. (Filp. 2:25, 29, 30; Kol. 4:10, 11) Aiz amchim bhav-bhoinnam pasun trasanchea vellar sosnikai dakhounk amkam bhuzvonn ditat ani modot kortat. Ani tanchea trasanchea vellar ami pasun tankam modot kortat.—2 Korintkarank 1:3, 4 vachat.

13. Maya nanvachea bhoinnik sosnikai dakhounk koxi modot zali?

¹³ Bhav-bhoinnamnim Russia-nt ravpi Maya nanvachea bhoinnik koxi modot keli tem polloum-ia. 2020-ant, pulisamnim okosmat tichea ghora ieun sodh kelo. Ti porgottnni kortali dekhun tika korttant voichem poddlem. Hea vellar bhav-bhoinnamnim tika koxi modot keli tea vixim ti oxem sangta: “Tea vellar hanv sarkem nirax zalʼlem ani dukhi aslem. Punn bhav-bhoinnamnim mhaka khub modot keli. Tannim mhaka fon kelo, message-o dhaddleo ani chitteo boroileo. Hea vorvim tim mhozo kitlo mog kortat tem mhaka kolloun ailem. Sonvsarbhor aslolim amchim bhav-bhoinnam amcho khub mog kortat ani amchi famil zaun asat mhunn hanv zannam aslem. Punn 2020-a thaun mhoji hi khatri anik ghott zali.”

14. Bhav-bhoinnam thaun modot mellonk ami kitem korunk zata? (Chitr pasun polloiat.)

¹⁴ Tumi kitem korunk zata? Tumi tras sostat tednam bhav-bhoinnam lagim ulovop ani tanchea sangata vell sarop mhotvachem zaun asa. Toxench vhoddilanchi modot gheunk fattim soronakat. Karonn te amkam “varo suttʼta tedna asro” ani “tufan uprasta tedna xeronn” zatat. (Iz. 32:2) Hem ugddas dovrat ki amchim bhav-bhoinnam pasun tras sostat. Tor oslea bhav-bhoinnank tumi modot kortat tednam tumi khuxal zatolim ani tumchea trasanchea vellar sosnikai dakhounk tumkam modot zatoli.—D.I. 20:35.

JEHOVAN AMKAM BHORVONSO DILA

15. Bhorvonxeak lagon Jezuk koxi modot zali, ani amkam koxi modot zata? (Hebrevank 12:2)

¹⁵ Jehovan amkam ek oslo bhorvonso dila zo purnn zatoloch mhunn ami khatri dovrunk zata. (Rom. 15:13) Haka lagon sosnikai dakhounk amkam modot zata. Bhorvonxeak lagon Jezuk tachea mornnachea disa sosnikai dakhounk koxi modot zali tem ami ugddas korunk zata. (Hebrevank 12:2 vachat.) Apunn Jehovak visvaxi ravlo zalear Soitanan Jehovacher ghatlole arop fott mhunn kollon ietolem ani Jehovak vakhannʼnni mellttoli mhunn taka khobor asli. Toxench, apunn sorgar Bapak porot mellttolo ani Raza zaun aplea makhlolea bhavam sangata raz choloitolo tea vellachi to vatt polloitalo. Heach bhaxen, novea sonvsarant sasnak jieunk Jehovan amkam zo bhorvonso dila, taka lagon atam amkam kosle-i tras sosunk modot zata.

16. Sosnikai dakhounk eke bhoinnik koxi modot zali, ani tichea utrantlean amkam kitem xikonk melltta?

¹⁶ Hea vixim amkam Russia-nt ravpi bhoinn Anna-chem udharonn asa. Tichea ghovak pulisamnim arrest kelʼlo ani tachi kes suru zaunchea poilinch taka bondkhonnint ghatlolo. Hea vellar tika sosnikai dakhounk koxi modot zali tea vixim bhoinn oxem sangta: “Fuddarachea bhorvonxea vixim zaite pavtti magnnem ani niall kelolean mhaka chodduch niraxi zaina zaunk modot zali. He sogle tras oxech urchenant mhunn mhaka khobor asa. Karonn Jehova beginuch aplea dusmanancher zoit vhortolo ani amkam inam ditolo.”

17. Jehovan fuddarak amkam bhorvonso dila tea pasot ami tache upkari asat mhunn koxem dakhounk zata? (Chitr pasun polloiat.)

¹⁷ Tumi kitem korunk zata? Jehovan bhasailʼlea sobit fuddara vixim niall korunk vell kaddat. Tea vellar poristhiti koxi astoli ani tumkam koslim besanvam mellttolim tem tumchea dolleam mukhar haddat. Oxem kelʼlean atam tumi sostat te tras ‘lhan ani thoddea vellache’ mhunn tumchea ugddasak ietolem. (2 Kor. 4:17) Toxench, fuddara vixim dusreank sangonk tumchean zata tem soglem korat. Aiz lokank pasun zaite tras asat. Punn fuddarachea bhorvonxea vixim tankam kainch khobor na. Tor Devachem Raj ani tannem jem bhasailam tea vixim tumi thoddem pasun tankam sangtat tednam, tim tea vixim anikui zannam zaunk fuddem sorot.

18. Jehovan jem bhasailam tacher ami kiteak visvas dovrunk zata?

¹⁸ Jobak zaite tras sosunk poddle. Punn to Jehovak visvaxi ravlo ani xevottak tannem oxem mhunnttlem: “Tum Sorvpodvedar mhonn hanv zannom: Tum ievjitai titlem-i tum korunk xoktai.” (Job 42:2) Tor Jehovacho udʼdhex purnn korunk taka konnuch addaunk xokona mhunn Jobak kollon ailem. Ani hem sot zannam zalʼlean amkam pasun sosnikai dakhounk modot zaunk xokta. Hem somzonk hea vixim chintat. Ek bail khub tempa thaun duent asa ani bori zaunk ti zaitea dotoram lagim voita. Punn konnuch tika boro korunk xokona dekhun ti khub niraxi zata. Uprant, tika onnbhov aslolo ek boro dotor melltta zo tika kitem zalam ani to koxe toren tika boro kortolo tem tika somzaita. Tor ilaz zaunk thoddo vell ravonk poddlear pasun, tea dotorachim utram aikon tika khub borem dista. Ani apunn bori zatolich hem zannam zalolean, apleak aslole tras soxit ravonk tika modot zata. Heach bhaxen, sobit bage vixim Jehovan ji bhas dilea ti purnn zatolich mhunn zannam zalolean sosnikai dakhoit ravonk amkam modot zata.

19. Amkam sosnikai dakhounk koxi modot zatoli?

¹⁹ Ami hea lekhant polloilem toxem magnnem, Bible, bhav-bhoinnam ani amchea bhorvonxea udexim amche tras sosunk Jehova amkam modot korta. Tor amcher kosle-i tras ieum, hea manddavollincho ami zata titlo faido ghetlear Soitanacho sonvsar kabar zaisor sosnikai dakhounk amkam modot zatoli.—Filp. 4:13.