Chukichea Anvddeancher Ami Koxem Zoit Melloun Gheunk Zata?

1. Soglea munxank kiteachea add zhuzonk poddtta?

TUMKAM kednam-i Jehovak manvona toslem kitem korunk dislam kai? Hoi zalear niraxi zainakat. Bible sangta: “Dusrea munxancher ailea tachea poros veglli porikxa tumcher ieunk na.” (1 Kor. 10:13) Hacho orth, soglea munxank aplea chukichea anvddeam add zhuzonk poddtta. Tor tumi ekttinch nant. Ani bori khobor mhunnttlear, Jehovache modotin tumi tumchea chukichea anvddeancher zoit melloun gheunk xoktat.

2. Thoddea Kristanvank ani Bible vidʼdheartheank kosleo tallnneo ieunk xoktat? (Chitram pasun polloiat.)

² Bible-ant oxem-i sanglolem asa: “Dor ekleak tachich itsa voddtta ani bhuloita tednam to porikxent poddtta.” (Jak. 1:14) Tor hea versantlean amchea modlea dor ekleak veg-veglleo itsa asonk xoktat vo tallnneo ieunk xoktat mhunn kolltta. Udharonnak, thoddea Kristanvank ani Bible vidʼdheartheank, dusrea lingachea munxam sangata vo tancheach lingachea munxam sangata onoitik kamam korchi tallnni ieunk xokta. Toxench, thoddim zannam zannim pornography pollovop soddun dilam, tankam ti porot pollounchi tallnni ieunk xokta. Tea bhair, drugs ghevop ani chodduch soro pievop bond kelolea zaitea zannank porot toxem korunk tallnni ieunk xokta. Hachea bhair, amkam anikui veg-veglleo tallnneo ieunk xoktat. Ani oxem zata tednam, amkam apostl Paulu bhaxen disonk xokta. Tannem mhunnttlolem: “Hanv borem tem korunk sodhtam tednam, mhojea bhitor mhaka vaitt tench dista.”—Rom. 7:21.

3. Amkam porot-porot umkench vaitt kam korchi tallnni ieta zalear amkam kitem disonk xokta?

³ Amkam porot-porot umkench vaitt kam korchi tallnni ieta zalear, amchean ti pois korunk zaunchina oxem amkam disot. Toxench, amkam tallnni ieta dekhun ami Jehovak manvololim nant oxem amkam disonk xokta. Punn hem sot nhoi! Kiteak tem zannam zaunk ami hea don prosnanche zobab zannam zaum-ia: (1) Vaitt anvddeancher zoit vhoronk amchean zaunchem na ani Jehovak ami manvololim nant, him chintnam amkam kiteak ieunk xoktat? (2) Vaitt anvddeancher zoit vhoronk ami kitem korunk zata?

AMI KITEM CHINTLOLEM SOITANAK ZAI?

4. (a) Ami amchea chukichea anvddeancher tabo dovrunk xokchimnant, oxem ami kiteak chintlolem Soitanak zai? (b) Ami chukichea anvddeancher zoit vhoronk xoktat mhunn amkam kiteak khatri asa?

⁴ Amchea chukichea anvddeancher ami zoit vhoronk xokchimnant oxem ami chintlolem Soitanak zai. Ani amcher tallnneo haddunk to proitn korit ravtolo mhunn Jezun xikoilʼlea magnneantlean amkam kollon ieta. Jezun mhunnttlolem: “Amkam tallnneant poddonk dium naka, punn noxtteachea hatantlim vattai.” (Mt. 6:13) Amcher tallnneo ietat tednam ami Jehovak visvaxi ravchimnant oxem Soitan sangta. (Job 2:5) Taka oxem kiteak dista? Karonn tannem svota zaun aplea chukichea anvddeancher tabo dovrunk na, ani to Jehovak visvaxi ravlo na. Tachea bhaxen ami pasun Jehovak visvaxi ravchimnant oxem taka dista. Itlench nhoi, Devacho poripurnn Put pasun taka ovisvaxi zatolo oxem taka dislolem! (Mt. 4:8, 9) Punn chintat, amchea chukichea anvddeancher ami khoreaninch tabo dovrunk xokonant oxem kai? Na, toxem nhoi. Karonn amkam apostl Paulu bhaxen hi khatri asa. Tannem boroilʼlem: “Zo mhaka boll dita tacheach udexim soglea vostunt mhaka xokti melltta.”—Filp. 4:13.

5. Amchean chukichea anvddeancher zoit vhoronk zatolem mhunn Jehovak khatri asa hem koxem kolltta?

⁵ Jehova Soitana bhaxen nhoi. Ami chukichea anvddeancher zoit vhoronk xoktat mhunn taka purnn khatri asa. Hem ami kiteak mhunnonk zata? Karonn vhodd sonkoxttantlean apleak visvaxi aslolea lokancho ek vhodd zomo salvar zatolo mhunn tannem sanglem. Tor hea vixim chintat. Jehova, zo kednanch fott marina, to sangta ki fokot ek lhan nhoi, punn ‘dhove kopdde ghatlolo’ ek vhodd zomo sobit bagent voitolo. Hacho orth, Jehovache nodren tim soglim nitoll astolim. (Prok. 7:9, 13, 14) Hantuntlean, ami amchea chukichea anvddeancher zoit vhoronk xoktat mhunn Jehovak khatri asa hem spoxttponnim kolltta.

6-7. Ami anik kitem chintlolem Soitanak zai?

⁶ Toxench, Soitanak ami hem pasun chintlolem zai ki amkam vaitt anvdde ietat dekhun ami Jehovak manvololim nant. Punn khorem mhunnttlear, Soitanan Jehovachi maniotai hogddailea ani taka kednanch sasnachem jivit mellchem na! (Ut. 3:15; Prok. 20:10) Hea pasot to khub ragan bhorla. Karonn amkam sasnachea jivitacho bhorvonso asa. Ani sasnachem jivit mellonk Jehova amkam modot korunk sodhta mhunn Bible khatri dita. Tantunt sanglam ki “konnanchoch nas zalʼlo [Jehovak] naka. Tachea bodlek, sogleank poschatap korunk sondhi mellʼlloli taka zai.”—2 Ped. 3:9.

⁷ Tor ami amchea vaitt itsancher zoit vhoronk xokonant, vo amkam vaitt itsa asat dekhun ami Jehovak manvololim nant, oxem ami kednanch chintchem nhoi! Karonn oxem chintlear, ami Soitanak zai toxem chintʼtolim. Hem ugddas dovorlolean Soitanacho virodh korunk amcho nichov ghott astolo.—1 Ped. 5:8, 9.

AMCHEA PATKANK LAGON AMI KITEM CHINTUNK XOKTAT?

8. Chukichea kamam bhair, Bible-ant anik kiteak patok mhunnttlam? (Stotr 51:5) (“Utrachi Somzonni” hem pasun polloiat.)

⁸ Amchea chukichea anvddeancher amchean zoit vhoronk zaunchem na ani Jehovak ami manvololim nant oxem amkam anik eka karonnak lagon disonk xokta. Tem mhunnttlear, Adanv ani Eve koddlean mellʼllolea patkak lagon.a—Job 14:4; Stotr 51:5 vachat.

9-10. (a) Adanv ani Even patok kelea uprant tankam koxem bhoglem? (Chitr pasun polloiat.) (b) Ami patkant zolmoleant dekhun amkam koxem bhogta?

⁹ Adanv ani Even patok kelea uprant tankam koxem bhoglem tea vixim chintat. Jehovachi adnea moddlea uprant tim tachea thaun liponk laglim ani tannim apli kudd dhampli. Hea vixim Insight on the Scriptures sangta: “Patok kelea uprant tankam aplich loz disonk lagli, tim guneanvkari asat mhunn tankam bhoglem, tankam khub usko zalo, ani fuddem kitem zatolem mhunn tankam bhirant disli.” Tor tim eka orthan, fokot char rumachea eka ghorant bond aslolea sarkim aslim. Tim eka ruma thaun dusrea rumant vochonk xoktalim, punn tea ghora thaun bhair soronk xokonaslim. Tor tankam patka thaun kednanch suttka mellonk xokonasli.

¹⁰ Punn amchi poristhiti Adanv ani Eve poros matxe veglli asa. Karonn soddvonne udexim amkam amchea patkanchem bhogsonnem melltta ani Jehova sangata lagxilʼli ixttagot zoddunk sondhi melltta. (1 Kor. 6:11) Torui, ami patki dekhun amkam pasun guneanvkari bhavnam asat, loz dista, khubuch usko zata ani fuddarak kitem zatolem mhunn bhirant dista. Bible sangta ki patok munxancher raz choloita. “Adanva bhaxen kaido moddun patok korunk na tancher pasun tannem raj choloilem.” (Rom. 5:14) Punn ami patkant zolmoleant dekhun ami kednanch sarkem tem korunk xokchimnant, vo amkam fuddarak kosloch bhorvonso na, oxem ami chintchem nhoi. Oslim bhavnam ami pois korunk zatat. Koxim?

11. Chukichea anvddeancher ami zoit melloun gheunk xokchimnant oxem dista tednam ami kitem korunk zai, ani kiteak? (Romkarank 6:12)

¹¹ Ami opurnn asat dekhun amchea chukichea anvddeancher ami kednanch zoit melloun gheunk xokchimnant, oxem amchea monant ieunk xokta. Punn oslem chintop ami nakarunk zai. Karonn Bible sangta ki ami patkak amcher “raza zaun raz cholounk” diunchem nhoi. (Romkarank 6:12 vachat.) Hacho orth, amchea chukichea anvddeam pormonnem ami kam korchem nhoi. (Gal. 5:16) Toxench, ami amchea chukichea anvddeancher zoit melloun gheunk xoktat mhunn Jehovak khatri asa. Na zalear toxem korunk to amkam kednanch sangcho naslo. (D.S. 30:11-14; Rom. 6:6; 1 Tes. 4:3) Hantuntlean, amchea chukichea anvddeancher ami zoit melloun gheunk xoktat mhunn spoxttponnim kolltta.

12. Chukichea anvddeank lagon ami Jehovak manvololim nant oxem dista tednam ami kitem ugddas dovrunk zai, ani kiteak?

¹² Toxench, ami patki asat ani amchea monant chukiche anvdde ietat dekhun ami Jehovak manvololim nant oxem amkam disot. Punn oslem chintop ami nakarunk zai. Karonn Bible amkam sangta ki ami patki asat mhunn Jehova somzota. (St. 103:13, 14) To amche vixim “soglem zannam.” Ami patki asat dekhun amchea monant vaitt anvdde ietolech mhunn taka khobor asa. (1 Ju. 3:19, 20) Punn ami vaitt anvddeancher zhuztat ani te nakartat tea meren, ami Jehovache nodren nitoll astolim. Hem ami khatren kiteak sangonk zata?

13-14. Amchea monant chukiche anvdde ietat hacho orth ami Jehovak manvololim nant oxem kai? Somzaiat.

¹³ Bible dakhoita ki amkam chukiche anvdde ievop ani tea pormonnem kam korop, hachea modem ontor asa. Amkam chukiche anvdde ievop, hacher ami tabo dovrunk xokonant, punn tea pormonnem kam korina zaunk ami tabo dovrunk xoktat. Udharonnak, poilea xekddeantlim Korint sobhentlim thoddim Kristanvam, adim apleach lingachea munxam sangata onoitik kamam kortalim. Tanche vixim Paulun mhunnttlem: “Tumchea modle thodde lok adim oslim kamam kortale.” Tor hacho orth, tea Kristanvank porot kednanch chukiche anvdde ieunk nant kai? Oxem chintop pixeponn. Karonn osle chukiche anvdde eka munxa bhitor khol riglole astat. Punn jea Kristanvamnim svotacher tabo dovorlo ani tea pormonnem kam korunk na, tankam Jehovachi maniotai mellʼlli. Taka lagon Jehovache nodren tim “dhuvun xudʼdh” zalʼlim. (1 Kor. 6:9-11) Tor ami pasun Jehovache nodren xudʼdh zaunk xoktat.

¹⁴ Amkam koslea-i chukichea anvddeam add zhuzonk poddom, ami tancher zoit melloun gheunk xoktat. Amchea monant chukiche anvdde ietole tem khorem. Punn ‘amcheo kuddicheo itsa purnn korina zaunk ani amchea chintnam pormonnem vagona zaunk’ ami svotacher tabo dovrunk zata. (Ef. 2:3) Tor amchea chukichea anvddeancher zoit melloun gheunk ami kitem korunk zata tacheo thoddeo vatto polloum-ia.

CHUKICHEA ANVDDEANCHER ZOIT MELLOUN GHEUNK KITEM KORCHEM?

15. Chukinchea anvddeancher zoit melloun gheunk ami amcheo oskotaieo vollkhon ghevop kiteak borem?

¹⁵ Chukinchea anvddeancher zoit melloun gheunk ami amcheo oskotaieo vollkhon gheunk zai. Ami amkanch fosounchem nhoi. (Jak. 1:22) Udharonnak, konnakui soro pieunchi sonvoim asa zalear to ghoddie oxem mhunnot: ‘Dusrim mhojea poros chodd soro pietat.’ Vo konnakui pornography pollounchi sonvoim asa zalear to oxem chintit: ‘Mhoji bail mhaka chodd mog dakhoitali zalear, hanv hea tallnnent poddchom naslom.’ Punn oxem chintlear, tallnnent poddonk amkam chodd vell lagchona. Tea pasot, ami nimitam diun koslem-i vaitt kam korchea vixim chintchem pasun nhoi! Karonn ek munis jem kitem korta tacho toch zobabdar asta.—Gal. 6:7.

16. Vaitt anvddeancher zoit melloun gheunk ami koso ghott nichov korunk zata?

¹⁶ Toxench, vaitt anvddeancher zoit vhoronk ami ghott nichov korunk zai. (1 Kor. 9:26, 27; 1 Tes. 4:4; 1 Ped. 1:15, 16) Ami khoinchea vellar ani kosle tallnnent poddonk xoktat tem ami vollkhon gheunk zai. Ghoddie umkeach poristhitint astana vo umkeach vellar ami sompeponnim tallnnent poddonk xoktat. Udharonnak, thoklolim astana vo ekdom ratchea vellar ami tallnnent poddonk xoktat kai? Osle poristhitint ami kitem kortolim tea pasot ami toiari korunk zai. Ani hem korunk sogleam-von boro vell mhunnttlear, tallnni ieunchea poilim.—Mho. 22:3.

17. Juzechea udharonnantlean ami kitem xiktat? (Utpoti 39:7-9) (Chitram pasun polloiat.)

¹⁷ Hea vixim chintat. Potifarache bailen vaitt kam korunk Juzecher dobhav ghatlo tednam, tannem kitem kelem? (Utpoti 39:7-9 vachat.) Toxem korunk tannem rokddench nakarlem. Hantuntlean ami kitem xiktat? Potifarache bailen vaitt korunk Juzek tallnnent ghalchea borench poilim, sarkem tem korunk Juzecho nichov ghott aslo. Teach bhaxen, tallnni ieunchea borench poilim, sarkem asa tem korunk amcho nichov ghott asonk zai. Oxem kelʼlean, ti poristhiti ieta tednam sarkem tem korunk amkam anikui sompem zatolem.

“TOPAXIT RAVAT”

18. Vaitt anvddeancher zoit melloun gheunk ami anik kitem korunk zata? (2 Korintkarank 13:5)

¹⁸ Toxench, vaitt anvddeancher zoit melloun gheunk ami amkanch ‘topaxit ravonk’ zai. (2 Korintkarank 13:5 vachat.) Ami vella-vellar, amchea chintpacher ani vagnnukecher dhean diunk zai ani goroz te bodlav korunk zai. Udharonnak, ami umkich ek tallnni nakarli zalear pasun, ami amkanch vicharunk zai: ‘Hi tallnni nakarunk mhaka kitlo vell laglo?’ Toxem korunk amkam chodd vell laglo mhunn amkam kollʼllem zalear, ami niraxi zaunchem nhoi. Punn fuddle pavtti tallnni ieta tednam, ti rokddich nakarunk ami thoddim panvlam gheunk zatat. Oxem korunk, ami amkanch he prosn vicharunk zai: ‘Mhojea monant vaitt chintnam ietat tednam hanvem tim anikui begin nakarunk zatat kai? Hanv jem kitem polloitam, vachtam vo aikotam taka lagon tallnneo nakarunk mhaka kotthin zata kai? Mhojea dolleam mukhar onoitik chitram ietat tednam, hanv rokddich mhoji nodor tanchea thaun pois kortam kai? Jehovache dorje pallunk mhaka svotacher tabo dovrunk khub vavr korunk poddtta zalear pasun, te dorje sodanch mhojea borea pasot asat mhunn mhaka khatri asa kai?’—St. 101:3.

19. Lhan-lhan chukiche nirnnoi ghetlear amkam vaitt anvddeam add zhuzonk kiteak kotthin zaunk xokta?

¹⁹ Toxench, ami vaitt kamam korunk nimitam diunk zaina. Karonn Bible sangta: “Kalliz soglleam-von ghatki, itlem vaitt ki taka anink ilaz na.” (Jer. 17:9) Toxench, “vaitt chintnam kallzantlean bhair sortat” mhunn Jezun sanglem. (Mt. 15:19) Udharonnak, ek munis zo poilo pornography polloitalo, to uprant oxem chintunk xokta: ‘Loingik anvdde vaddoitat toslim chitram polloilear tantunt kainch vaitt na, karonn tem pornography kaim nhoi.’ Vo ‘jea meren hanv vaitt kamam korina, tea meren tea vixim chintlear kainch vaitt na.’ Punn khorem mhunnttlear, oslea munxachem ghatki kalliz ‘kuddicheo itsa purnn korpacheo ievzonneo korta.’ (Rom. 13:14) Tor amkam oxem zaina zaunk, ami kitem korunk zata? Ami ugddas dovrunk zai ki ami lhan-lhan chukiche nirnnoi ghetlear, ami vhodd chukiche nirnnoi gheunk pavtolim, zoxem ami gombhir patkant poddonk xoktat.b Toxench, vaitt kamam korunk ami nimitam diunk zainant ani vaitt chintnam rokddinch nakarunk zai.

20. Novea sonvsarant ami Jehovachi bhokti koxim kortolim, ani vaitt anvddeam add zhuzonk amkam aiz kosli modot asa?

²⁰ Ami hea lekhant polloilem toxem, Jehovache modotin ami vaitt anvddeam add zhuzonk xoktat. Toxench, Jehovan soddvonnechi manddavoll kelea dekhun, to amchim patkam bhogxita ani novea sonvsarant sasnachea jivitacho amkam bhorvonso asa. Tea vellar ami xudʼdh kallzan ani monan Jehovachi bhokti kortolim hem zannam zaun, amkam kitli khuxalkai bhogta nhoi! Punn to dis ieta mhunnosor, ami amchea chukichea anvddeancher zhuzonk xoktat. Toxench, amchea monant vaitt anvdde ietat dekhun ami Jehovak manvololim nant oxem nhoi mhunn ami khatri dovrunk zata. Vaitt anvddeam add zhuzonk ami zo vavr kortat, tacher Jehova besanv ghaltolo. Tor ami vaitt anvddeam add zoit melloun gheunk xoktat mhunn kainch dubhav na.