Tallnneo Nakarunk Zagrut Ravat

1-2. (a) Jezun aplea xisank kosli xittkaunni dili? (b) Jezuche xis taka soddun kiteak pollon gele? (Chitram pasun polloiat.)

“MON tor toiar asa, punn kudd oskot asa.”a (Mt. 26:41b) Jezun him utram mhunnttlim tednam, ami opurnn asat ani chuki kortolim, hem to somzolo mhunn amkam kollon ieta. Punn tachea hea utramnim ek xittkaunni pasun asli. Ti mhunnttlear, ami sodanch sarkem tem kortolinch mhunn ami chintunk zaina. Jezun him utram mhunnchea thoddeach vella poilim, tachea xisamnim te taka kednanch soddchenant mhunn sanglolem. (Mt. 26:35) Tor te sarkem tem korunk sodhtale. Punn oxem korunk tancho nichov rokddoch halonk xokta, mhunn te somzonk chukle. Tea pasot Jezun tankam oxi xittkaunni dili: “Tallnnent poddona zaunk zagrut ravat ani magnnem korit ravat.”​—Mt. 26:41a.

² Punn dukhachem mhunnttlear, xis zagrut ravonk chukle. Ani Jezuk dhorun vhelo tednam tachea sangata ravchea bodlek te pollon gele. Tor te tallnni nakarunk zagrut nasle dekhun, apunn korchenant mhunn tannim sanglolem tench tannim kelem.​—Mt. 26:56.

3. (a) Ami sodanch sarkem tem kortolim mhunn ami kiteak chintunk zaina? (b) Hea lekhant ami kitem polloitolim?

³ Ami sodanch sarkem tem korunk pavtolim mhunn ami kednanch chintunk zaina. Jehovak manvona toslem kainch ami korunk sodhinant tem khorem. Punn ami opurnn asat ani ami tallnnent poddttolim mhunn ami ugddas dovrunk zai. (Rom. 5:12; 7:21-23) Karonn ami chintinant tednam amchea mukhar tallnni ieunk xokta. Tor tallnni nakarun, Jehovak ani Jezuk ami visvaxi ravtolim zalear ami sodanch Jezun zagrut ravche vixim dilʼlo solʼlo pallop gorjecho. Ani oxench korunk ho lekh amkam modot kortolo. Tor hea lekhant, khas korun ami khoinchea poristhitimnim zagrut ravonk zai tem ami poilim polloitolim. Uprant, tallnni nakarunk ami zagrut koxim ravonk zata ani sodanch zagrut ravonk ami kitem korunk zai, tem-ui ami polloitolim.

AMI KHOINCHEA PORISTHITIMNIM ZAGRUT RAVONK ZAI?

4-5. Titlim gombhir disonant toslim patkam korina zaunk ami zagrut kiteak ravonk zai?

⁴ Thoddim patkam titlim gombhir nant zait. Tori astana, tea patkank lagon Jehova sangata amchi ixttagot tuttonk xokta. Toxench, sovkas-sovkas korun ami anikui gombhir patkam korunk xoktat.

⁵ Amkam sogleank vaitt kamam korchi tallnni ieta. Ani amkam sogleank veg-veglleo oskotkaieo asat dekhun, ami umkech bhaxeche tallnnent sompeponnim poddonk xoktat. Udharonnak, thoddim onoitik kamam korchea itsa add zhuztat, zoxem pozoddponn. Vo thoddeank her torechim burxim kamam korunk tallnni ieta zait. Zoxem, masturbation vo pornography pollovop. Toxench, thoddeank munxachi bhirant, gorv, rag oslea tallnneam add zhuzonk poddtta zait. Tea pasot, Jakoban oxem mhunnttlem: “Dor ekleak tachich itsa voddtta ani bhuloita tednam to porikxent poddtta.”​—Jak. 1:14.

6. Ami khaltikaien kitem vollkhon gheunk zai?

⁶ Tumi khoinchea poristhitimnim sompeponnim tallnnent poddonk xoktat tem tumi zannant kai? Amcheo oskotkaieo ami vollkhon ghenant, vo ami kednanch patkant poddchimnant oxem ami chintʼtat zalear, tem ekdom dhokeachem! (1 Ju. 1:8) Kiteak? Ugddas korat, Paulun sanglolem ki “bhavarthant purte asat” te zagrut asonant zalear, te pasun tallnnent poddonk xoktat. (Gal. 6:1) Tor ami amcheo oskotkaieo, ani ami khoinchea poristhitimnim tallnnent poddonk xoktat tem khaltikaien vollkhon gheunk zai.​—2 Kor. 13:5.

7. Tallnnent poddona zaunk ami kiteacher chodd dhean diunk zai tem somzonk ek udharonn diat.

⁷ Ami sompeponnim khoinchea poristhitint tallnnent poddonk xoktat tem zannam zalea uprant, ami kitem korunk zai? Ti tallnni nakarunk ami anikui chodd vavr korunk zai. Hem somzonk, hea vixim chintat. Bible kallar, eka xaracho sogleam-von oskot bhag tacho darvontto aslo. Tea pasot, tea xarachi rakhonn korunk choddxe soinik darvonttea lagim astale. Teach bhaxen, tallnnent poddona zaunk, ami jea poristhitimnim oskot asat mhunn ami zannant tacher ami chodd dhean diunk zai.​—1 Kor. 9:27.

AMI ZAGRUT KOXIM RAVONK ZATA?

8-9. Mhonnʼnneo odheai 7-ant sanglolea tornnattean kitem kelʼlem zalear to gombhir patok korunk pavcho naslo? (Mhonnʼnneo 7:8, 9, 13, 14, 21)

⁸ Ami zagrut ravonk kitem korunk zai? Hea vixim zannam zaunk, Mhonnʼnneo odheai 7-ant sanglolea tornnattean kitem kelem tacher dhean dium-ia. Tannem eke pordvari baile sangata pozoddponn kelem. Hem to ‘nokllo astana [“okosmat,” NW]’ korunk pavlo mhunn vers 22-ant sanglam. Punn tachea poilim aslolim versam vachlear, tannem hachea poilim zaitim chukichim panvlam ghetlim dekhun, to uprant hem gombhir patok korunk pavlo mhunn kolltta.

⁹ Tor tannem koslim chukichim panvlam ghetlim? ‘To eke painnintlean cholon ti ravta tea konxeachean gelo.’ Uprant to tichea ghorachea vatten gelo. (Mhonnʼnneo 7:8, 9 vachat.) Magir tea bailek polloilea uprant, thoinchean voichea bodlek, tannem tika aplo kiss gheunk dilo. Toxench, ti ghoddie apunn ek vaitt munis nhoi mhunn dakhounk sodhtali dekhun, apnnem dilʼlea ekcharache bhettoune vixim ti taka sangonk lagli. Hem-ui aikonk to thoinch ravlo. (Mhonnʼnneo 7:13, 14, 21 vachat.) Tor tannem him chukichim panvlam gheunk naslim zalear, to tallnnent poddon hem gombhir patok korunk pavcho naslo.

10. Aiz ek Kristanv tea tornnattea bhaxen patkant koso poddonk xokta?

¹⁰ Tor tea tornnatteak jem ghoddlem, tantuntlean Jehovachi bhokti kortolea eka Kristanvak kitem ghoddonk xokta tem amkam kolltta. Gombhir patok kelea uprant, tem soglem “okosmat” ghoddlem oxem taka disot. Punn bariksannen chintlear, tachea poilim tannem zaitim chukichim panvlam ghetlolim dekhun, tea uprant to gombhir patok korunk pavlo mhunn taka kollttolem. Zoxem, Jehovacho mog korinant toslim ixttam tannem vinchun kaddlolim zait. Vo to jem monoronjon vo website-i polloitalo vo jea zageancher voitalo, tem eka Kristanvak sarkem naslem zait. Toxench, magnnem korop, Bible vachop, mittingek hajir zavop vo porgottnni korop tannem bond kelʼli zait. Tor Mhonnʼnneo pustokant sanglolea tornnattea bhaxen, ho Kristanv “okosmat” nhoi, punn zaitim chukichim panvlam ghetlolean hem gombhir patok korunk pavlo mhunn kolltta.

11. Patkant poddona zaunk ami kitem korunk zai?

¹¹ Tor hantuntlean ami kitem xikonk zata? Ami fokot patokuch nhoi, punn jim panvlam ghetlolean ami patkant poddonk xoktat tim ami nakarunk zai. Tea tornnatteak ani te pordvari bailek kitem ghoddlem tem sanglea uprant, Solomonan oxem mhunnttlem: “Tichea rostear tum cholo naka.” (Mho. 7:25) Toxench, tannem mhunnttlem: “Tuji vatt, tichea poros zata titli pois zaum-di, tichea ghorachea dara laginchean khoinch vochonaka.” (Mho. 5:3, 8) Tor patkantlean pois ravonk, tem patok korunk pavoita toslea soglea vostum vo poristhitim thaun ami pois ravonk zai.b Hacho orth, Kristanvamnim thoddim kamam korop chukichim nhoi astolim. Punn tim kamam kelʼlean ami tallnnent poddonk xoktat mhunn amkam kolltta zalear, ami tim nakarunk zai.​—Mt. 5:29, 30.

12. Joban koslo nichov kelʼlo, ani oxem kelʼlean taka koxi modot zali? (Job 31:1)

¹² Hea vixim amkam Jobachem udharonn asa. Khoincheach ostorek vaitt nodren polloina zaunk tannem aplea ‘dolleam koddem koblat vo korar kel’lo.’ (Job 31:1 vachat.) Hea toren ghott nichov kelʼlean, pordvar korpachea patkant poddona zaunk taka modot zali. Heach bhaxen, amkam tallnnent ghalunk xoktat toslim chukichim panvlam ghena zaunk ghott nichov kelear, ami zagrut ravonk pavtolim ani patkant poddchimnant.

13. Amchem chintop koxem asa tacher ami kiteak dhean diunk zai? (Chitram pasun polloiat.)

¹³ Amchem chintop koxem asa tacher pasun ami dhean diunk zai. (Sutt. 20:17) Thoddeank disot ki tim kitem tori vaitt korunk anvddetat, punn jea meren tem korinant, tea meren tantunt kainch chukichem na. Punn oslem chintop ekdom dhokeachem zaun asa. Karonn ek munis vaitt anvddeam vixim jitlo chodd chintʼta, titlich toxem korunk tachi itsa vaddot voita. Tor eka orthan, to apleach pasot fondd kaddtta. Hem khorem ki amchea monant vaitt anvdde ietole. Punn toxem zata tednam, ami te rokddech pois korun borea vostum vixim chintop ekdom gorjechem. Oxem kelear, ami vaitt anvdde vaddounk pavchimnant ani amkam gombhir patok korunk pavoita toslea tallnnent poddchimnant.​—Filp. 4:8; Kol. 3:2; Jak. 1:13-15.

14. Tallnnent poddona zaunk zagrut ravonk, ami anik kitem korunk zata?

¹⁴ Tallnnent poddona zaunk zagrut ravonk, ami anik kitem korunk zata? Jehovache kaide pallʼllolean amkam sodanch faido zatolo mhunn amkam purnn khatri asonk zai. Punn thodde pavtti, Jehovak manvota tea toren chintunk ani vagonk amkam kotthin zaunk xokta. Tori astana, oxem korunk ami amchean zata tem soglem kortat tednam, amkam monachi xanti astoli ani khuxalkai mellttoli.

15. Sarkem tem korunk amcho nichov ghott aslear amkam koxi modot zatoli?

¹⁵ Toxench ami ‘vaittacho dves korun, borem asa tacho mog korunk’ zai. (Am. 5:15) Oxem kelear, sarkem asa tem korunk amcho nichov ghott zatolo, ani patkak pavoita toslea poristhitim thaun ami pois ravtolim. Toxench, ami okosmat patkant poddonk xoktat toslea poristhitint aslear pasun, ti tallnni nakarunk amkam modot zatoli.

16. Jehovachea bhokte sombondit aslolim kamam amkam zagrut ravonk koxim modot kortat? (Chitram pasun polloiat.)

¹⁶ Sarkem tem korunk ami amcho nichov koso ghott korunk zata? Jehovache bhokte sombondit aslolim kamam korunk ami sodanch bizi ravonk zai. Zoxem, ami mittingek hajir zatat ani porgottnni kortat tednam, Jehovak khuxal korunk amchi itsa ekdom ghott asta ani ami vaitt korche tallnnent fosonant. (Mt. 28:19, 20; Heb. 10:24, 25) Toxench, ami Devachem Utor vachtat, tacho obheas kortat ani tacher niall kortat tednam, borem asa tacho mog korunk ani vaittacho dves korunk amcho nichov anikui ghott zata. (Josh. 1:8; St. 1:2, 3; 119:97, 101) Tea bhair, ami amchea sorginchea Bapa lagim magnnem kortat tednam to amkam modot korta, ani taka manvota tem korunk amchi itsa vaddtta. (Jak. 4:8) Tea pasot, Jezun aplea xisank oxem magnnem korunk sanglolem: “Tallnnent poddona zaunk . . . magnnem korit ravat.”​—Mt. 26:41.

SODANCH ZAGRUT RAVONK AMI KITEM KORUNK ZAI?

17. Pedruk zaito temp poriant khoinche oskotkaie add zhuzonk poddlem?

¹⁷ Amchea thoddea oskotkaiencher, ami ghoddie purnn toren zoit vhelam zait. Punn thoddea oskotkaiam add, amkam zaito temp zhuzonk poddot. Hea vixim amkam apostl Pedruchem udharonn asa. Munxanche bhirantik lagon tannem tin pavtti Jezuk nakarlo. (Mt. 26:69-75) Punn uprant Mha-sobhent sogleam hujir tannem bhienastana sakx dili tednam, tannem aplea oskotkaiecher zoit vhelem oxem disot. (D.I. 5:27-29) Punn thoddea vorsam uprant, “sunot zalʼlea lokank bhieun” tannem thoddea tempa pasot Videxi Kristanvam sangata jevop bond kelem. (Gal. 2:11, 12) Tor hantuntlean, tachi bhirant purnn toren vochonk nasli mhunn kolltta.

18. Amkam aslolea oskotkaiam vixim ami kitem ugddas dovrunk zai?

¹⁸ Pedru bhaxen, amchea umkeach oskotkaiam add amkam khub temp poriant zhuzot ravonk poddot. Oxench, pornography-chea fasant poddlolea eka bhavak ghoddlem. To sangta: “Hanvem dha vorsam pornography pollounk na. Tor hanvem tea oskotkaiecher zoit vhelem oxem mhaka dislem. Punn uprant, umkeach poristhitimnim ti porot pollounk mhojer tallnni aili.” Torui, bhavan soddun diunk na. To dor disa aplea oskotkaie add zhuzot ravlo. Ani Soitanachea hea noxttea sonvsarant, taka jivitbhor hea oskotkaie add zhuzonk poddttolem mhunn taka kollʼllem. Atam to tallnnent poddona zaunk anikui chotrai dovorta, ani tachi bail ani sobhentle vhoddil oxem korunk taka khub modot kortat.

19. Ami umkech eke oskotkaie add zhuztat zalear ami kitem korunk zai?

¹⁹ Ami umkech eke oskotkaie add zhuztat zalear ami kitem korunk zai? Patkant poddona zaunk ami Jezun dilʼlo solʼlo apnnaunk zai. Tannem mhunnttlolem: “Zagrut ravat.” Ami tallnnent poddchimnant oxem amkam dista zalear pasun, ami fosonk xoktat toslea poristhitim thaun pois ravonk vavr korit ravonk zai. (1 Kor. 10:12) Adim jim panvlam ghetlolean amkam tallnni pois korunk modot zali, tim panvlam ami gheit ravonk zai. Ani 2 Pedru 3:14 sangta tea pormonnem tallnnent poddona zaunk sodanch zagrut ravonk, ami “zata titlo proitn” korit ravonk zai.

ZAGRUT RAVLOLEAN AMKAM KOSO FAIDO ZATA?

20-21. (a) Tallnni nakarunk zagrut ravlolean amkam kosle faide mellttole? (b) Tallnni nakarunk ami vavr kelea uprant Jehova amkam koso modot kortolo? (2 Korintkarank 4:7)

²⁰ Tallnnent poddona zaunk zagrut ravlolean amkanch faido zata mhunn ami khatri dovrunk zata. Patok korta tea munxak ‘thoddeach disam pasot patkanchem sukh bhogunk melltta’ tem khorem. Punn Jehovachea dorjeam pormonnem jieta to munis anikui chodd khuxal asta. (Heb. 11:25; St. 19:8) Karonn ami Jehovak khuxal korunk xoktat tea toren tannem amkam rochleant. (Ut. 1:27) Tor ami taka manvota tem kortat tednam, amkam ek nitoll ontoskornn asta, ani fuddarak sasnachem jivit mellonk xokta.​—1 Tim. 6:12; 2 Tim. 1:3; Jud. 20, 21.

²¹ Bible sangta tea pormonnem, “kudd oskot asa” tem khorem. Punn hacho orth, ami amchea oskotkaiam add kainch korunk xokonant oxem nhoi. Karonn Jehova amkam goroz ti xokti diunk toiar asa. (2 Korintkarank 4:7 vachat.) Punn Jehova dita ti xokti “munxachea xokte poros khub vorti asa.” Tor ami poilim, munxachi xokti, mhunnche amchi xokti uzar korun amchea oskotkaiam add zhuzonk vavr korunk zai. Oxem kelear, amkam anikui xokti zai asta tednam, Jehova amchim magnnim aikotolo ani amkam apli xokti ditolo mhunn ami khatri dovrunk zata. (1 Kor. 10:13) Khorench, Jehovachea modotin, tallnni nakarunk ami sodanch zagrut ravonk pavtolim!