Jehova Amkam Khoro ‘Sontos Dita’

1-2. (a) Aiz zaitea zannanchi poristhiti koxi asa? (b) Hea lekhant ami kitem polloitolim?

KHUXAL ravonk aiz zaito lok tanchean zata tem soglem korta. Punn kitlo-i vavr kelear pasun tim khuxal asonant. Zaitim zannam ekdom dukhi astat ani tanchi poristhiti kednanch bori zaunchi na, oxem tankam dista. Dukhachem mhunnttlear, Jehovachea thoddea sevokank pasun oxench bhogonk xokta. Kiteak? Ami “nimannea disamnim” jietat mhunnttoch, ‘fuddo korunk khub kotthin zata’ tosleo oddchonneo amcher ieunk xoktat.—2 Tim. 3:1.

² Tor hea lekhant, amchi khuxalkai kiteak unni zaunk xokta ani ami porot koxim khuxal zaunk xoktat tem polloum-ia. Punn poilim, khorea khuxalkaiechi Zhor konn zaun asa tem polloum-ia.

KHOREA KHUXALKAIECHI ZHOR KONN?

3. Rochnna polloun amkam Jehova vixim kitem kolltta? (Chitram pasun polloiat.)

³ Jehova sodanch khuxal asa ani ami-i khuxal aslolim taka zai. Amkam khuxal dovrunk tannem zaiteo vostu rochleat. Zoxem amchi sobit prithum, sorvbhonvtonnim aslole veg-veglle rong, ani zonvaram khellttat tem polloun ami khuxal zatat. Toxench amkam avoddtta tem jevonn jevun amkam sontos bhogta. Hache voilean, Dev khorench amcho mog korta ani ami khuxal aslolim taka zai mhunn kolltta!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Munxanche tras polloun pasun Jehova kiteak khuxal ravonk xokta? (b) Jehova amkam kitem korunk modot korta? (Stotr 16:11)

⁴ Punn munxanchea trasam vixim Jehovak khobor asa ani te polloun to khub dukhi zata. Torui, Bible-ant taka ‘khuxal Dev’ mhunnttla. (1 Tim. 1:11) Tor Jehova khuxal koso ravonk xokta? Ek karonn mhunnttlear, sogle dukh-tras sasnak kaddun uddounk tannem ek dis tharaila. Tea mhunnosor, to amchi kallji gheta ani amkam khuxal ravonk modot korta. (Stotr 16:11 vachat.) Jehovan, Jezuk pasun khuxal ravonk modot keli. Koxi?

5-6. Jezu kiteak khuxal asa?

⁵ Jehovache rochnne modem Jezu sogleam-von khuxal asa. Kiteak? Hachim don karonnam polloum-ia. (1) “To disonaslolea Devachea rupa sarko asa” ani poripurnn toren Jehovache gunn apnnaita. (Kol. 1:15; 1 Timotak 6:15-nt “happy” ho study note polloiat.) (2) Jehova, zo khuxalkaiechi Zhor zaun asa, tachea sangata Jezun sogleam-von chodd vell sarla.

⁶ Jezu Jehovachem sodanch aikota tea pasot to khuxal asa. (Mho. 8:30, 31; Ju. 8:29) Ani tachea hea visvaxiponnak lagon taka Jehovachi maniotai asa.—Mt. 3:17.

7. Amkam khori khuxalkai koxi mellonk xokta?

⁷ Jezu bhaxen, khuxalkaiechi Zhor Jehovak lagim soron, amkam pasun khori khuxalkai mellonk xokta. Jehova vixim xikonk ani tachi dekh gheunk ami jitlo chodd vell sartolim, titlinch ami anikui khuxal astolim. Toxench, Jehovachi khuxi korun ani amkam tachi maniotai asa mhunn zannam zaun amkam sontos bhogta.a (St. 33:12) Hem khorem ki thodde pavtti ami khub dukhi vo niraxi asot. Punn hacho orth, amkam Jehovachi maniotai na oxem nhoi. Karonn opurnn aslolean amkam oxem bhogta mhunn Jehova somzota. (St. 103:14) Tor amchi khuxalkai kiteak unni zaunk xokta ani porot khuxal zaunk ami kitem korunk zata tem atam polloum-ia.

AMCHI KHUXALKAI KITEAK UNNI ZAUNK XOKTA?

8. Oddchonneank lagon amcher koslo probhav poddonk xokta?

⁸ 1: Jivitantlea oddchonneank lagon. Ami zaitea oddchonneancho fuddo kortat zait. Zoxem dhumallo, odruxttam, goribi, duensam vo zanntteponn. Ani hea oddchonneank lagon amchi khuxalkai unni zaunk xokta, khas korun tea vixim ami kainch korunk xokonant tednam. Hea vellar ami itlim dukhi zaunk xoktat ki ami porot kednanch khuxal zaunchimnant oxem amkam disot mhunn Bible sangta. (Mho. 15:13) Babis nanvachea eka vhoddilak oxench zalem. Char vorsam bhitor tacho bhav ani mummy-daddy bhair poddlim. To sangta: “Mhaka khub eksurponn bhoglem ani modot korunk konn na oxem distalem. Mhaka tanchea sangata chodd vell sarunk zai aslo, punn hanv toxem korunk pavlo na mhunn thodde pavtti mhaka khub dukh bhogtali.” Khorench amchea oddchonneank lagon ami khub thokonk xoktat ani niraxi zaunk xoktat.

9. Ami porot koxim khuxal zaunk xoktat? (Jeremias 29:4-7, 10)

⁹ Ami porot koxim khuxal zaunk xoktat? Amchea jivitant soglem borem cholta zalearuch ami khuxal astolim oxem lokank dista. Punn hem khorem nhoi. Oxem ami kiteak mhunnonk zata? Babilonant koidi aslolea Judevank Jehovan kitem sanglolem tacher dhean diat. Tea kotthin poristhitint vavr korunk ani khuxal ravonk Jehovan tankam sanglolem. (Jeremias 29:4-7, 10 vachat.) Hantuntlean ami kitem xiktat? Amchea jivitant jem kitem borem cholta tea pasot ami upkari asonk zai ani khuxal ravonk vavr korunk zai. Toxench Jehova amkam modot kortolo mhunn ami sodanch ugddas dovrunk zai. (St. 63:7; 146:5) Oxench Effie nanvache eke bhoinnin kelem. Eka accident-ak lagon ti paralyze zali ani tichean cholonk zaina. Ti sangta: “Jehovan, mhoje familin ani bhav-bhoinnamnim mhaka khub modot keli ani urba dili. Tor tannim mhojea pasot jem kelam ani azunui jem korit asat taka lagon hanv upkari asa mhunn dakhounk sodhtam. Hea pasot khuxal ravonk hanv mhojean zata tem kortam.”

10. Oddchonneo aslear pasun ami khuxal kiteak ravonk zata?

¹⁰ Tor ami vo amchea familintlim kotthin poristhitincho fuddo kortat tednam pasun ami khuxal ravonk xoktat kai?b (St. 126:5) Hoi. Karonn amchi khuxalkai amchea poristhiticher adarloli na. Hea vixim Maria nanvachi pioneer bhoinn sangta: “Oddchonneo ietat tednam pasun ami khuxal ravtat, karonn Jehovan amkam jem bhasailam tem ami ugddas dovortat. Hacho orth, amkam kednanch roddonk ieunchem na oxem nhoi, punn Jehova amkam modot kortolo mhunn ami ugddas dovortat.” Tor ek lhar ailea uprant veller aslolim panvlam nanch zatat toxim, amcheo oddchonneo fokot thoddeach tempacheo ani beginuch teo purnn toren nanch zatoleo mhunn ami ugddas dovortat.

11. Apostl Pauluchea udharonnantlean tumkam koxi urba melltta?

¹¹ Punn amkam oddchonneancho fuddo korunk poddtta dekhun ami Jehovachi maniotai hogddailea oxem ami chintit. Oslea vellar ami Jehovachea visvaxi sevokancho ugddas korunk zata, zankam kotthin poristhitincho fuddo korunk poddlo, zoxem apostl Paulu. Jezun apostl Pauluk, ‘videxiank toxench razank ani Izraelitkarank aplea nanva vixim’ govai diunk svota vinchlolo. (D.I. 9:15) Ho Pauluk ek vhodd sueog aslo. Torui tachea jivitant khub oddchonneo asleo. (2 Kor. 11:23-27) Hacho orth, tannem Jehovachi maniotai hogddailʼli kai? Na! Tea soglea oddchonneam vellar Paulu thir ravonk pavlo tantuntlean, Jehova taka modot kortalo mhunn kolltta. (Rom. 5:3-5) Tor oddchonneo aslear pasun ami visvaxiponn Jehovachi seva kortat dekhun amkam Jehovachi maniotai asa mhunn khatri melltta.

12. Jehovache sevent ami chintlam tem korunk xokonant tednam kitem zaunk xokta?

¹² 2: Ami chintlam tem korunk xokonant taka lagon. (Mho. 13:12, NW) Ami Jehovacho mog kortat ani tache upkari asat dekhun ami tache sevent chodd korunk dhei dovortat. Punn amche poristhitik lagon he dhei ami melloun gheunk xokonant tednam ami niraxi zait. (Mho. 17:22) Hea vixim Holly nanvachi pioneer bhoinn sangta: “Hanvem Raj Porgottnnarank Korsak vochonk, dusrea desant seva korunk, vo Ramapo bandkamachea kamak modot korunk chintlolem. Punn mhoji poristhiti bodolʼli dekhun hanv hantuntlem kainch korunk xoklem na. Tor hanv khub niraxi zalem. Ami korunk sodhtat tem korunk xokonant tednam ami dukhi zatat.” Jehovachea zaitea sevokank oxench bhogta.

13. Amchi poristhiti koxi-i asum, ami sogleamnim kitem korunk zata?

¹³ Ami porot koxim khuxal zaunk xoktat? Jehova amchea thaun chodd opekxa korina mhunn ami ugddas dovrunk zai. Tache sevent amchean chodd korunk zaina zalearui, ami dor eklim taka moladik asat. Tor amche lagim kitem korunk zata ani zaina tem ami vollkhon ghetlolem ani taka visvaxi ravlolim Jehovak zai. (Mik. 6:8; 1 Kor. 4:2) Karonn ami bhitorlean koslim munxam asat tem Jehovak chodd mhotvachem. Tor Jehova amche lagim chodd opekxa korina zalear, ami pasun toxem korchem nhoi.c Punn amche poristhiti pormonnem amchea lagim jem zata tem korunk ami proitn korunk zai. Zoxem ami tornatteank proxikxonn diunk zata kai? Vo zannttea bhav-bhoinnank modot korunk zata kai? Vo dusreank mellon vo fon korun vo message dhaddun ami tankam urba diunk zata kai? Amchean jem zata tem ami kortat tednam, Jehova khuxal zata ani amkam-i khuxal ravonk modot zata. Itlench nhoi, novea sonvsarant ami atam chintunk pasun xokonant toslea veg-vegllea vattamnim ami Jehovachi seva korunk xoktolim. Hea vixim ami poilim uloilʼli bhoinn Holly sangta: “Hanv niraxi zata tednam, Jehova mhaka fuddarak sasnachem jivit diuncho asa mhunn hanv ugddasak haddttam. Ani tache sevent hanv jem korunk sodhtam tem soglem hanv tea vellar korunk pavtolem mhunn chintun hanv khuxal zatam.”

14. Anik kiteak lagon amchi khuxalkai unni zaunk xokta?

¹⁴ 3: Amkam avoddtta tench korunk chodd dhean ditat taka lagon. Internet-ar aslolea lokank polloun, amkam avoddttat teo vostu kelear ami khuxal astolim oxem amkam disot. Tor amkam borem dista tem kelear, amkam avoddttat teo vostu ghetlear, ani veg-vegllea zagear provas kelear ami khuxal astolim oxem ami chintit. Amkam borem dista tem korop chukichem nhoi tem khorem. Karonn ami khuxal aslolim Jehovak zai. Punn zaitea lokank kollon ailam ki tankam avoddttat teo vostu kelear pasun tim khuxal asonant. Hea vixim pioneer bhoinn Eva sangta: “Tumkam avoddtta tench korunk chintlear, tumkam kednanch puro zaunchem na.” Ami soglea vellar amkam avoddtta tench kelear ami dukhi ani niraxi zatolim.

15. Raza Solomona thaun amkam kitem xikonk melltta?

¹⁵ Amkam avoddtta tench kelear porinnam kitem zata tem amkam Raza Solomonachea udharonnantlean kolltta. Khuxalkai melloun gheunk tannem zaiteo vostu keleo. Zoxem to borim-borim jevnnam jevlo, borem songit aikolem ani zaiteo mharog vostu ghetleo. Punn hem soglem korun pasun taka khoro sontos mellonk na. Apnnem kelʼlea vostum vixim tannem mhunnttlem: “Polleun-polleun dolle ubgonant, aikun-aikun kan vajenant.” (Up. 1:8; 2:1-11) Tor Solomona bhaxen, zaite poixe aslear ani apleak avoddtta tem kelear apunn khuxal astolim mhunn lok chintʼtat. Punn tanchem hem chintop khottea poixeam sarkem asa. Khotte poixe sarkea poixeam bhaxen distat, punn te uzar korun kainch viktem gheunk zaina. Teach bhaxen, amkam zai tem kelear ami khuxal astolim oxem amkam disot, punn amkam khori khuxalkai mellona.

16. Dusreank modot kelolean ami porot koxim khuxal zaunk xoktat? (Chitram pasun polloiat.)

¹⁶ Ami porot koxim khuxal zaunk xoktat? Jezun sanglem ki “gheunchea poros diunk chodd khuxalkai melltta.” (D.I. 20:35) Hea vixim Alekos nanvacho ek vhoddil sangta: “Hanv dusream pasot lhan-lhan kamam kortam. Tor hanv dusreank jitlom chodd modot kortam, titlench mhojem dhean svotacher nhoi punn tancher asta ani mhaka khuxalkai melltta.” Tor ami dusream pasot kitem korunk zata? Konnui dukhi asa mhunn ami polloilam zalear ami taka urba diunk zata. Ami tache tras kaddun uddounk xokonant tem khorem, punn ami kan diun tachem aikotat ani tachim bhavnam somzonk proitn kortat tednam taka bhuzvonn mellttoli. Toxench tacho uskeancho bhar Jehovacher ghalunk ami taka urba diunk zata. (St. 55:22; 68:19) Tea bhair, Jehova taka kednanch sanddchona mhunn ami taka khatri diunk zata. (St. 37:28; Iz. 59:1) Itlench nhoi, ami tachea pasot lhan-lhan kamam korunk zatat. Zoxem taka kitem-i randun diunk zata, vo tachea borabor pasoiek vochonk zata. Toxench ami sangata mellon porgottnni korunk zata, jea vorvim amkam anikui khuxalkai mellttoli. Tor hea toren ami Jehovak amkam uzar korunk ditat ani amchem dhean svotacher nhoi, punn dusreancher dovortat tednam amkam khori khuxalkai mellttoli!—Mho. 11:25.

17. Khoreponnim khuxal asonk ami kitem korunk zai? (Stotr 43:4)

¹⁷ Jehovak lagim sorot ravlear ami khoreponnim khuxal astolim. Karonn Bible sangta ki Jehova amkam khoro ‘sontos dita.’ (Stotr 43:4 vachat.) Tor amchea jivitant kosleo-i oddchonneo ieum, amkam bhieunchi goroz na. Jehova amcho lagxilʼlo ixtt zalear ami sasnak khuxal astolim!—St. 144:15.