OBHEASACHO LEKH 41
GIT 108 Devacho Visvaxi Mog
Jehovacho Mog Sodankal Togta
“ Sorvesporak dhinvasat: To khorench boro, Tacho maiemog [“visvaxi mog”] mit-mer naslolo!”—ST. 136:1.
MUKHEL MUD’DO
Jehovacho mog Bible-antli ek mullavi xikounn zaun asa. Hi xikounn ugddas dovorlolean oddchonneanchea vellar niraxiponn pois korunk amkam modot zata.
1-2. Eka Kristanvak oddchonneancho fuddo korunk poddtta tednam taka koxem bhogonk xokta?
EK BOAT eka vhoddlea vadollak sampoddlea mhunn chintat. Ticher vhoddlim-vhoddlim lharam martat dekhun ti hevtten-tevtten halta. Punn hea vellar, boat-int aslolea konnem-i nangor denvoilear ti thir urtoli ani dusrea vatten voichina.
2 Ami eka orthan tea boat-i sarkim asat. Amchea jivitant vadolla sarkeo oddchonneo ieunk xoktat. Oslea vellar, ti boat hevtten-tevtten halta tea toren amchim bhavnam voir sokol zaunk xoktat. Ek dis amkam disot ki Jehova amcho mog korta ani amkam modot korta. Punn dusrea disa amkam kitem ghoddtta tem Jehovak khobor tori asa kai mhunn amchea monant dubhav ieit. (St. 10:1; 13:1) Tednam ghoddie ek ixtt amkam bhuzvonnechim utram sangot ani tim aikon thoddea vella pasot amkam borem disot. (Mho. 17:17; 25:11) Punn uprant, Jehovak khorench amchi porva asa kai mhunn porot ami dubhavunk xoktat. Tor hea vellar nangor uzar korunk, tem mhunnttlear Jehova amcho mog korta ani to amkam modot korta mhunn khatri dovrunk ami kitem korunk zata?
3. Stotr 31:7 ani 136:1-ant uzar kelʼlea “mog” hea utracho orth kitem, ani oslo mog dakhounk Jehovan sogleam-von vortem udharonn dovorlam oxem ami kiteak mhunnonk zata? (Chitr pasun polloiat.)
3 Ek mhunnttlear, Jehovacho mog ani visvaxiponn ugddas dovorlolean kotthin vellar thir ravonk amkam modot zatoli. Stotr 31:7 ani 136:1-ant “mog” hea utrak jem utor uzar kelʼlem, tantuntlean eklo dusreacho kallzant thaun mog korta ani taka visvaxi ravta mhunn kollon ieta. (Vachat.) Hea vixim Jehovan sogleam-von vortem udharonn dovorlam. Khorem mhunnttlear, Suttka 34:6, 7 ani Stotr 86:5-ant, ‘mogak’ Hebrev bhaxent jim utram uzar kelʼlim, tache voilean mog ani visvaxiponn Jehovache mhotvache gunn mhunn kolltta. Hantuntlean Jehova aplea visvaxi sevokank kednanch sanddchona mhunn khatri melltta! Tor to visvaxi asa mhunn ugddas dovorlolean kotthin poristhiticho fuddo korunk amkam modot zata.—St. 23:4.
Vadoll zata tednam boat dusrea vatten vochona zaunk, nangor tika thir dovorta. Teach toren, oddchonneo ietat tednam Jehova amcho mog korta ho bhorvonso amkam thir dovorta (Peregraf 3 polloiat)
JEHOVACHO MOG BIBLE-ANTLI EK MULLAVI XIKOUNN MHUNN UGDDAS DOVRAT
4. Bible-antleo thoddeo mullaveo xikounneo khoincheo, ani teo sot mhunn amkam kiteak khatri asa?
4 Jehovacho mog Bible-antli ek mullavi xikounn mhunn ami ugddas dovrunk zai. “Bible-antli mullavi xikounn” him utram aikotana tumchea monant kitem ieta? Devachem nanv Jehova, Jezu Devacho ekloch Put, meloleank kainch khobor asona, ani hi prithum ek sobit bag zatoli ani munxam sodankal thoim jietolim, heo xikounneo amchea ugddasak ieunk xoktat. (Iz. 42:5; Up. 9:5; Ju. 3:16; Prok. 21:3, 4) Ani heo sot mhunn manun ghetlea uprant, konnem-i amkam teo fott mhunn sanglear pasun ami tanchem aikochimnant karonn teo sotacher adarit asat mhunn amkam kollon ailem. Tor Jehovacho mog Bible-antli ek mullavi xikounn mhunn vollkhon ghetlolean, to amchi kallji ghena vo taka amchem kainch poddlolem na he dubhav pois korunk amkam koxi modot zaunk xokta?
5. Amkam khotti xikounn nakarunk koxi modot zali? Somzaiat.
5 Hem somzonk, Bible xikonk suru kelea uprant, khotti xikounn nakarunk amkam koxi modot zali tem polloum-ia. Ami jem poilim patietalim ani Bible-antlean ami jem kitem xikleant tem ami sor kelem astolem. Udharonnak, sot xikchea poilim Jezu Sorvpodvedar Dev mhunn ami mantalim zait. Punn Bible xiklea uprant, Jezu “akʼkhe rochnnent poilo zaun asa” ani ‘Devacho ekloch Put’ mhunn amkam kollʼllem. (Kol. 1:15; Ju. 3:18) Khotteo xikounneo “kholaien rigloleo” astat, ani teo mulla thaun umttun kaddunk kotthin zaunk xokta tem khorem. (2 Kor. 10:4, 5) Punn ek pavtt toxem kelea uprant, ami teo sot mhunn porot kednanch patieunchim nant.—Filp. 3:13.
6. Jehovacho “visvaxi mog sodankal togta” mhunn ami kiteak khatri dovrunk zata?
6 Teach bhaxen Jehovachea moga vixim amchea monant dubhav ietat tednam, ami oxench kitem korunk zata. Udharonnak, ek oddchonnecho fuddo korunk poddtta tednam Jehova amcho mog korina mhunn ami dubhavtat zalear, ami amkanch vicharunk zai: ‘Mhojem chintop sarkem asa kai?’ Uprant amchem chintop ani hea lekhachem mukhel vers, mhunnche Stotr 136:1-ant kitem sanglam tem ami sor korunk zai, ani hea vixim chintunk zai: ‘Hea versant Jehova aplo mog “visvaxi” oso kiteak mhunntta? ‘Jehovacho visvaxi mog sodankal togta’ mhunn hea stotrant 26 pavtti kiteak sanglam?’ Bible-antlea her mullavea xikounneam bhaxen, Jehova aplea lokank visvaxi mog dakhoita hi pasun ek mullavi xikounn zaun asa mhunn ami ugddas dovrunk zai. Ani ami her kosli-i khotti xikounn rokddinch nakartolim tea toren, ami Jehovak valorachim nant vo to amcho mog korina hi fott pasun ami rokddich nakarunk zai!
7. Jehova amcho mog korta mhunn amkam anik khoinchea versantlean kolltta?
7 Jehova amcho mog korta mhunn Bible-antlea dusrea versamnim pasun amkam khatri melltta. Udharonnak, Jezun aplea xisank sanglem: “Zaitea lhan suknneam poros tumi chodd molachim asat.” (Mt. 10:31) Ani Jehovan svota aplea lokank oxem sanglem: “Tuka Hanv bollvont kortam ani mozot ditam, Mhojea zoitivont uzvea hatan tuka samballun dhortam.” (Iz. 41:10) Him utram kitlim khatrechim asat nhoi! Jezun hanga, ‘Tumi lhan suknneam poros molachim asot,’ vo Jehovan, ‘Hanv tuka modot korit’ oxem mhunnonk na. Punn tannim mhunnttlem: “Tumi chodd molachim asat,” ani “Tuka Hanv . . . mozot ditam.” Tor oddchonneanchea vellar Jehova tumkam modot kortolo vo na mhunn tumi dubhavtat zalear, him versam vachun tumkam fokot borem distolem itlench nhoi, punn Jehova tumcho mog korta mhunn khatri mellttoli. Karonn tim utram sot zaun asat. Tor amchea dubhavam vixim ami magnnem kortat ani hea versancher niall kortat tednam, 1 Juanv 4:16-nt sanglam toxem ami mhunnonk pavtolim: “Dev amcho kitlo mog korta tem amkam kollon ailam, ani hacher amkam purnn visvas asa.”a
8. Jehova amcho mog korta kai na mhunn ami dubhavtat zalear ami kitem korchem?
8 Tori astana Jehova amcho mog korta kai na mhunn ami dubhavtat zalear kitem? Amkam kitem dista ani ami kitem zannant tem ami sor korunk zai. Karonn bhavnam bodlonk xoktat. Punn sot kednanch bodolna. Ani Jehova amcho mog korta hem Bible-antlem sot zaun asa. Tor Jehova amcho mog korina oxem amkam dista zalear, Dev mog zaun asa hem Bible-antlem sot ami nakartat oxem zatolem.—1 Ju. 4:8.
JEHOVACHEA MOGA VIXIM BARIKSANNEN CHINTAT
9-10. “Bap tumcho mog korta” oxem Jezun mhunnttlem tednam to kitea vixim uloitalo? (Juanv 16:26, 27) (Chitr pasun polloiat.)
9 Jezun aplea pattlavdarank jem sanglolem tea vorvim Jehovachea moga vixim amkam anikui xikonk melltta. Jezun mhunnttlolem: “Bap tumcho mog korta.” (Juanv 16:26, 27 vachat.) Jezun fokot tankam khuxal korunk oxem mhunnonk na. Karonn fattlim versam polloilear to tankam koxem dista tea vixim nhoi, punn magnnea vixim uloitalo mhunn kolltta.
10 Jezun tankam sanglolem ki tannim tache lagim nhoi, punn tachea nanvan Bapa lagim magnnem korunk zai. (Ju. 16:23, 24) Ani tannim hem zannam zavop khub mhotvachem aslem. Karonn Jezu jivont zalea uprant, tannim tache lagim magnnem korunk zata oxem te chintunk xoktale. Jezu tancho ixtt aslo ani tancho khub mog kortalo mhunnttoch, to tanchim magnnim aikonk sodhtolo ani tankam modot kor mhunn Bapa lagim vinoti kortolo oxem tankam disonk xoktalem. Punn tannim toxem chintchem nhoi dekhun Jezun tankam sanglolem: “Bap tumcho mog korta.” Ani him utram, Jezun tankam magnnea vixim jem nirdexon dilʼlem tacho bhag zaun aslim. Jezuchim utram aiz amkam koxim lagu zatat? Bible-acho obheas kelʼlean ami Jezuk vollkhonk ani tacho mog korunk pavleant. (Ju. 14:21) Punn tea poilea xekddeantlea xisam bhaxen ‘Bap amcho mog korta’ hi khatri dovrun ami Jehova lagim magnnem korunk zai. Karonn dor ek pavtt ami oxem kortat tednam, hea utrancher amkam visvas asa mhunn ami dakhoitat.—1 Ju. 5:14.
“Bap tumcho mog korta” hem zannam zalʼlean tumi visvasan Jehova lagim magnnem korunk zata (Peregraf 9-10 polloiat)b
DUBHAV KITEAK IETAT TEM ZANNAM ZAIAT
11. Ami Jehovachea mogacher dubhavlear Soitan kiteak khuxal zatolo?
11 Jehova amcho mog korta kai na mhunn ami kiteak dubhavunk xoktat? Tumi mhunnot, Soitanak lagon. Ani hem ek karonn zaunk xokta. Soitan amkam “gillun uddounk” sodhta ani ami Jehovachea mogacher dubhavlear to khuxal zatolo. (1 Ped. 5:8) Punn amcho mog korta mhunn dakhounk Jehovan soddvonnechi manddavoll kelea. Torui, ami itlim patki asat ki amkam ti favo na oxem ami chintlolem Soitanak zai. (Heb. 2:9) Punn ami Jehovachea mogacher dubhavlear ani niraxi zaun tachi seva korunk bond kelear konn khuxal zatolo? Soitan. Khorem mhunnttlear, Jehova Soitanacho mog korina. Punn Jehova amcho mog korina oxem ami chintlolem Soitanak zai. To ‘naddbudʼdhechim kamam’ korun amkam Jehovacho mog favo na ani to amkam nakarta oxem amchea monant ghalunk proitn korta. (Ef. 6:11) Tor amcho dusman kitem korunk sodhta tem ami somzotat zalear, tacho virodh korunk ami amcho nichov ghott korunk pavtolim.—Jak. 4:7.
12-13. Patkak lagon ami Jehovachea mogacher koxim dubhavunk xoktat?
12 Anik eka karonnak lagon ami Jehovachea mogacher dubhavunk xoktat. Tem mhunnttlear, ami zolma thaun patki asat taka lagon. (St. 51:5; Rom. 5:12) Patkak lagon Jehova ani munxam modem asloli ixttagot piddʼddear zalea. Toxench amchea chintnancher, bholaikecher ani bhavnancher tacho probhav poddtta.
13 Ami chuk vo patok kortat tednam ami guneanvkari asat mhunn amkam bhogta, loz dista, fuddem kitem zatolem mhunn bhirant dista ani khub usko zata. Punn patok korunk na zalear pasun, ami patki asat hem ami zannant dekhun, amkam him bhavnam asonk xoktat. (Rom. 8:20, 21) Jehovan munxank poripurnn rochlolim. Punn zoxem tyre puncture zalea uprant ek gaddi sarke toren kam korunk xokona, teach bhaxen, patkak lagon amkam jea toren rochlolim tea toren ami kam korunk xokonant. Tor ami thodde pavtti Jehovachea mogacher dubhavunk xoktat. Oxem zata tednam ami ugddas dovrunk zai ki Jehova, ‘aplo mog kortat ani apleo adnea pallttat, tanche koddem aplea visvaxi mogacho korar samballpi . . . Dev’ zaun asa.—Ne. 1:5.
14. Soddvonnecher niall kelolean Jehova amcho mog korina hem chintop pois korunk amkam koxi modot zatoli? (Romkarank 5:8) (“‘Patkachea Fosoupachea Xokte’ Add Chotur Ravat” hem boks pasun polloiat.)
14 Amkam Jehovacho mog favo na oxem amkam ek-ek pavtti disot. Khorem mhunnttlear, amkam to favo na. Torui, Jehova amcho mog korta. Tea pasot tacho mog khas zaun asa. Ami kitem-i korun Jehovacho mog zoddun gheunk xokonant. Punn Jehova amcho mog korta dekhun, amchim patkam bhogsunk tannem soddvonnechi manddavoll kelea. (1 Ju. 4:10) Toxench, Jezu poripurnn munxank nhoi, punn patkeank salvar korunk hea sonvsarant ailo mhunn ami ugddas dovrunk zai. (Romkarank 5:8 vachat.) Ami sarkem tem korunk sodhtat zalear pasun ami chuktat. Ani Jehova hem somzon gheta. Tor patkak lagon ami Jehovachea mogacher dubhavunk xoktat mhunn ami vollkhon ghetat tednam, toslea chintpa add zhuzonk ami amcho nichov ghott korunk pavtolim.—Rom. 7:24, 25.
JEHOVAK VISVAXI RAVONK THARAIAT
15-16. Jehovak visvaxi ravlear ami kosli khatri dovrunk zata, ani kiteak? (2 Samuel 22:26)
15 Ami Jehovak ‘chittkon ravon’ sarko nirnnoi ghetlolo taka zai. (D.S. 30:19, 20) Oxem kelear to-ui amkam visvaxi astolo. (2 Samuel 22:26 vachat.) Ami taka visvaxi ravlear amchea jivitant kosli-i oddchonn ieum, to amkam modot kortolo mhunn ami khatri dovrunk zata.
16 Tor amkam atam vo fuddarak kosle-i oddchonnecho fuddo korunk poddom, thir ravonk Jehova amkam zaitea vattamnim modot korta mhunn ami hea lekhant xiklim. Karonn Bible-ant sanglolea pormonnem, to amcho mog korta. Tor Jehovachea mogacher ami kednam-i dubhavtat zalear, amkam kitem dista tacher nhoi, punn ami kitem zannant tacher dhean dium-ia. Ani Jehovacho visvaxi mog sodankal togta hea Bible-achea mullavea xikounnecher ghott visvas dovrum-ia.
GIT 159 Jehovak Mhoima Diat
a Dusri Somurt 31:8, Stotr 94:14 ani Izaias 49:15 hea versantlean pasun Jehova amcho mog korta mhunn kolltta.
b CHITRACHI MAHITI: Aplea duent bailechi kallji gheunk, poixe koxe uzar korche tea vixim sarke nirnnoi gheunk, ani aplea dhuvek Jehovacho mog korunk xikounk ek bhav Jehova lagim magnnem korta.