Jehova Tuzo Mog Korta Mhunn Visvas Dovor

1. Tunvem tujem jivit Jehovak kiteak somorponn kelʼlem? (Chitr pasun polloiat.)

TUNVEM magnnem korun Jehovak somorponn kelʼlem to vell tuka ugddas asa? Tunvem Jehovachi vollokh ghetli ani tum tacho mog korta mhunn tum ho nirnnoi gheunk pavlo. Tum tujea jivitant Jehovachi khuxi poilea zagear dovortolo ani tujea soglea kallzan, jivan, monan ani bollan Jehovacho mog kortolo mhunn tunvem taka bhas dilʼli. (Mk. 12:30) Ani tea uprant thaun Jehova pasot tuzo mog vaddot ravlo. Tor, “tum khoreaninch Jehovacho mog korta kai?” oxem konnem-i tuka vicharlear, tum taka kitem sangtolo? Dubhav nastana tum taka oxem sangtolo: “Hanv kiteachea-i vo konnam-i poros Jehovacho chodd mog kortam!”

2-3. Amkam koslo dubhav aslolo Jehovak naka, ani hea lekhant ami kitem polloitolim? (Jeremias 31:3)

² Ami Jehovacho khub mog kortat. Hem zannam zalear pasun, Jehova amcho mog korta mhunn visvas dovrunk amkam kotthin zaunk xokta. Ami taka kainch valorachim nant oxem ghoddie amkam disonk xokta. Eke bhoinnik bhurgeponnar thaun mog mellonk naslo. Ti sangta: “Hanv Jehovacho mog kortam mhunn mhaka khobor asa. Ani hea vixim mhaka kosloch dubhav na. Punn Jehova mhozo mog korta mhunn visvas dovrunk mhaka zaite pavtti kotthin zata.” Tor amchea vixim Jehovak koxem bhogta, hem zannam zaunk amkam kitem modot korunk xokta?

³ Jehova amcho mog korta hea vixim amkam kosloch dubhav aslolo Jehovak naka. (Jeremias 31:3 vachat.) Khorem mhunnttlear, ami tache vixim xiklolim ani tachim ixttam zalolim taka zai. Ami amchem jivit taka somorponn korun bautizm ghetlo tednam tannem amkam ek moladik dennem dilem. Tem mhunnttlear, aplo visvaxi mog. Hacho orth, to amcho khub mog korta ani to amkam kednanch sanddchona. Aplea soglea visvaxi sevokank Jehova “khas porza” mhunn lekhta dekhun to tankam visvaxi mog dakhoita. (Mal. 3:17, ftn.) Tor ami pasun tachea pasot khas zaun asat. Jehova amcho mog korta mhunn apostl Pauluk ghott visvas aslo. Ani tea pasot tannem oxem boroilem: “Mhaka khatri asa ki nhoi mhunn moronn, nhoi mhunn jivit, nhoi mhunn devdut, nhoi mhunn sorkar, nhoi mhunn aicheo vostu, nhoi mhunn ieuncheo asat teo vostu, nhoi mhunn koslich xokti, nhoi mhunn unchai, nhoi mhunn kholai, nhoi mhunn koslich dusri rochnna amkam Devachea moga thaun vegllim korunk xokona.” (Rom. 8:38, 39) Ani hoch visvas amkam aslolo Jehovak zai. Tor Jehova amcho mog korta hem manun ghevop kiteak gorjechem, ani ho visvas ghott korunk ami kitem korunk zata tem ami hea lekhant polloitolim.

JEHOVA AMCHO MOG KORTA HEM MANUN GHEVOP KITEAK GORJECHEM?

4. Soitan Jehova vixim kosli fott posraita, ani ami tacho virodh koxim korunk pavtolim?

⁴ Jehova amcho mog korta hem manun ghetlolean, ami Soitanachea “naddbudʼdhechea kamam” add thir ubim ravonk xoktat. (Ef. 6:11) Ami Jehovachi seva korop bond keloli Soitanak zai. Oxem korunk to zaiteo vatto uzar korta. Hantuntli ek vatt mhunnttlear, Jehova amcho mog korina hi fott to posraita. Ami ugddas dovrunk zai ki Soitan eka xinva sarko zaun asa, zo oskot aslolea zonvarancher akromonn korta ani tankam marun uddoita. Tor amchea jivitant adim kitem ghoddlem vo atanchea oddchonneank lagon ami bejar astat tednam, vo fuddarak kitem zatolem tea vixim amkam bhirant dista tednam, Soitan amcher akromonn korta. (Mho. 24:10) Oxem korun ami Jehovachi seva korop bond kortolim oxem taka dista. Punn Jehova amcho mog korta, hi amchi khatri ghott korit ravlear ami “Soitanacho virodh” korunk pavtolim.—1 Ped. 5:8, 9; Jak. 4:7.

5. Jehova amcho mog ani valor korta hi amchi khatri vaddovop kiteak mhotvachem?

⁵ Jehova amcho mog korta hem manun ghetlolean ami taka anikui lagim sortolim. Oxem ami kiteak mhunnonk zata? Ami dusreank mog dakhounk xoktat ani dusream thaun mog onnbhovunk xoktat tea toren Jehovan amkam rochleant. Konnui amkam mog dakhoita tednam, ami pasun taka mog dakhounk fuddem sortat. (1 Ju. 4:19) Tor Jehova amcho mog ani valor korta hea vixim amchi khatri jitli vaddttoli, titloch tachea pasot amcho mog vaddttolo. Ani Jehova pasot amcho mog vaddtta toso, Jehova pasun amcho anikui mog kortolo. Bible sangta: “Devak lagim sorat, ani to tumchea lagim sortolo.” (Jak. 4:8) Tor Jehova amcho mog korta hi amchi khatri ami koxi ghott korunk zata?

JEHOVA AMCHO MOG KORTA MHUNN AMCHO VISVAS KOSO GHOTT KORCHO?

6. Jehova amcho mog korta mhunn manun gheunk amkam kotthin zata zalear ami kitem korunk zata?

⁶ Jehova amcho kiteak mog korta hem somzonk ami tachea lagim magnnem korit ravonk zai. (Luk. 18:1; Rom. 12:12) To amcho mog korta hem manun gheunk amkam kotthin zaunk xokta. Punn Jehova amchea kallzam poros vhodd asa hem ami ugddas dovrunk zai. (1 Ju. 3:19, 20) Amkam aslole bore gunn amkam khobor nant zalear pasun, Jehovak te khobor asat. (1 Sam. 16:7; 2 It. 6:30) Tor ami magnneant ‘amchea kallzache uske tachea kallzant ghalunk’ zai ani to amcho mog korta mhunn manun gheunk ami tache lagim modot magonk zai. (St. 62:8) Tor magnnem kelea uprant ami anik kitem korunk zata tem atam polloum-ia.

7-8. Jehova amcho mog korta, hi amchi khatri vaddounk Stotrantlean amkam koxi modot zata?

⁷ Jehova jem sangta tacher visvas dovrat. Jehovan aplea povitr xokte vorvim munxank Bible borounk prerit kele. Ani tannim Jehova vixim sot asa tench boroilem. Jehovak amchi kitli kallji asa tea vixim Stotrkar Davidan oxem boroilem: “Zanchem kalliz dukhovlam khontovlam, tanche sorxem Sorvespor asach! Zanchem mon kollvollta vollvollta, tancher Sorvespor hat oddta.” (St. 34:18) Ami niraxi astat tednam ami eksurim asat ani konnuch amkam somzonk xokona vo modot korunk xokona oxem amkam disot. Punn oslea vellar amkam Jehovachi anikui chodd goroz asa hem to polloita dekhun, to amchea lagim astolo mhunn bhas dita. Davidan anik ek stotrant oxem boroilem: “Mhojim dukam mezun-mapun Tujea dobeant bhorun dovorleai.” (St. 56:8) Amkam dukh zata tednam Jehova tem bore bhaxen somzota ani amchim dukham taka itlim moladik asat ki eka orthan, to tim aplea dobeant ektthaim korun dovorta. Stotr 139:3-ant, amkam oxem vachunk melltta: “Soglleo mhojeo kornnio Tuje [Jehova] mukhar ukteo!” Ami kortat tem soglem Jehova polloita. Punn ami kortat tea borea kamancher to chodd dhean dita. (Heb. 6:10) Karonn taka manvota tem korunk ami jem kitem kortat tacho to khub valor korta.a

⁸ Oslea bhuzvonnechea versam vorvim, Jehova amkam eka orthan oxem sangta: “Ugddas dovor, hanv tuzo khub mog kortam ani mhaka tuji porva asa.” Punn ami poilim polloilem toxem, Jehova amcho mog korina hi fott Soitan posraita. Tor Jehova amcho mog korta mhunn amkam kednam-i dubhav ieta zalear, ami amkanch vicharunk zata: ‘Hanv konnacher visvas dovortolom; Soitanacher zo “fottincho bapui” zaun asa, vo Jehovacher zo “Sotacho Dev” zaun asa?’—Ju. 8:44; St. 31:5, NW.

9. Aplo mog kortoleank Jehovan kosli bhas dilea? (Suttka 20:5, 6)

⁹ Aplo mog kortoleam vixim Jehovak koxem bhogta tem chintat. Tannem Moizesak ani Izraelitkarank kitem mhunnttlem tacher dhean diat. (Suttka 20:5, 6 vachat.) Aplo mog kortat tancho apunn visvaxi mog korit ravtolo mhunn Jehovan bhas dilea. Jehova visvaxi asa dekhun zo konn aplo mog korta tacho to mog korinastana kednanch ravchona. (Ne. 1:5) Tor Jehova amcho mog korta vo na, tea vixim amkam dubhav ieta zalear ami amkanch ho prosn vicharunk zata: ‘Hanv Jehovacho mog kortam kai?’ Ami Jehovacho mog kortat ani taka manvota tem korunk amchean zata tem soglem kortat zalear, to-ui amcho khub mog korta mhunn ami tacher visvas dovrunk zata. (Dan. 9:4; 1 Kor. 8:3) Dusrea utramnim sangchem mhunnttlear, ami Jehovacho mog kortat mhunn amkam dubhav na zalear, Jehova amcho mog korta mhunn ami kiteak dubhavunk zai? Tor Jehova amcho mog korta ani amkam kednanch soddchona mhunn ami purnn khatri dovrunk zata.

10-11. Soddvonne vixim ami kitem vollkhon ghetlolem Jehovak zai? (Galasiekarank 2:20)

¹⁰ Soddvonnecher niall korat. Soddvonn Jehova koddlean soglea munxakulla pasot ek vortem dennem zaun asa. (Ju. 3:16) Punn hem dennem tujea pasot asa kai? Hoi! Hem somzonk amkam apostl Pauluchem udharonn asa. Kristanv zaunchea poilim tannem ekdom vaitt kamam kelʼlim. Ani Kristanv zalea uprant pasun, taka aplea oskotaiam add zhuzot ravonk poddlem. (Rom. 7:24, 25; 1 Tim. 1:12-14) Tori astana, soddvonnechem dennem Jehovan aplea pasot dilam mhunn tannem vollkhon ghetlem. (Galasiekarank 2:20 vachat.) Ani him utram boroun dovrunk Jehovan Pauluk prerit kelo. Karonn tannem jem boroilem tantuntlean ami pasun xiklolim Jehovak zai. (Rom. 15:4) Tem mhunnttlear, soddvonnechem dennem Jehovan amchea dor eklea pasot dilʼlem asa. Hem dennem kitlem moladik asa ani Jehovan tem amkam dilam hacher ami niall kortat tednam, Jehova pasot amcho mog anikui vaddttolo.

¹¹ Jehovan Jezuk amchea pasot aplo jiv bolidan korunk dhaddlo mhunn ami tache khub upkari asat. Punn Jezu hea prithumer ieunk anik ek karonn aslem. Tem mhunnttlear, to Jehova vixim sot xikounk ailʼlo. (Ju. 18:37) Tantuntlem ek sot mhunnttlear, Jehova aplea bhurgeancho, mhunnche amcho dor ekleacho khub mog korta.

JEHOVA AMCHO MOG KORTA HEM MANUN GHEUNK JEZU AMKAM KOSO MODOT KORTA?

12. Jezun Jehova vixim jem sanglem tacher ami kiteak patieunk zata?

¹² Hea prithumer astana Jezun lokank Jehova vixim xikoilem, ani oxem korunk taka khub avoddttalem. (Luk. 10:22) Jezun Jehova vixim jem sanglem tem patieunk amkam borem karonn asa. Tem mhunnttlear, Jezu sorgar sogleam-von chodd vell Jehova sangata aslo. (Kol. 1:15) Jehova aplo khub mog korta mhunn Jezu zannam. Toxench, to sorgar ani prithumer aslolea aplea bhurgeancho kitlo mog korta tem Jezun polloilam. Tor Jehova lokancho mog korta mhunn Jezun tankam koxi khatri dili?

13. Ami Jehova vixim kitem zannam zalʼlim Jezuk zai?

¹³ Amche vixim Jehovak koxem bhogta tem ami zannam zalʼlim Jezuk zai. Jezun Jehovak “Bap” mhunnttlo hem Bore Khobrechea Pustokamnim 160-am poros chodd pavtti amkam vachunk melltta. Ani aplea pattlavdaram lagim Jehova vixim uloitana, tannem ‘tumcho Bap’ vo “tumcho sorgincho Bap” him utram uzar kelim. (Mt. 5:16; 6:26) Matev 5:16-cho study note sangta: “Jehovachim adlim visvaxi sevokam tachea lagim magnnem kortalim vo tachea vixim uloitalim tednam, ‘Sorvxoktivont,’ ‘Bhov Vorto,’ ‘Rochnnar’ vo oslinch her utram uzar kortalim. Punn Jezun zaite pavtti Jehovak ‘Bap’ mhunnttlo. Eka lhan bhurgeacho tachea bapai sangata ghott sombond asta toso, amcho Bap Jehova sangata amcho pasun ek lagxilʼlo sombond aslolo Jehovak zai mhunn hea utrantlean kollon ieta.” Tor ek mogall bapui aplea bhurgeancho mog korta toso, Jehova pasun amcho mog korta hem Jezu lokank xikoitalo. Tor atam ami don ghoddnneam vixim polloum-ia, zoim Jezun Jehovak “Bap” mhunnttlo.

14. Ami dor eklim amchea sorginchea Bapak moladik asat mhunn Jezun koxem dakhoilem? (Matev 10:29-31) (Chitr pasun polloiat.)

¹⁴ Poilem ami, Matev 10:29-31-ant Jezun kitem mhunnttlem tacher dhean dium-ia. (Vachat.) Dor ek lhan suknnem khoim asa tem amchea sorginchea Bapak khobor asa. Punn tem suknnem Jehovacho mog ani bhokti korunk xokona. Tori astana, Jehova tea suknneachi itli kallji gheta zalear, tacho mog ani tachi bhokti korta tea dor eka sevokachi pasun to kallji ghetolo mhunn amchi khatri ghott zata. Toxench, “tumchea toklecho ek-ek kens pasun mezlolo asa” mhunn Jezun sanglem. Tor Jehovak amchea vixim itli barik mahiti asa mhunnttoch, to dor ekleachi kallji ghetolo mhunn amkam kollon ieta. Hantuntlean, ami amchea sorginchea Bapak khub moladik asat hem ami zannam zalʼlim Jezuk zai mhunn spoxttponnim kolltta.

15. Jezun Juanv 6:44-ant mhunnttlolea utrantlean amchea sorginchea Bapa vixim amkam kitem kollon ieta?

¹⁵ Jezun Jehovak “Bap” mhunnttlo hachem anik ek udharonn polloum-ia. (Juanv 6:44 vachat.) Amchea sorginchea Bapan amchea bhitor bore gunn polloile dekhun tannem mogan amkam aplea sorxim voddun haddleant. (D.I. 13:48) Jezun Juanv 6:44-ant aslolim utram mhunnttlim tednam, to Jehovan Jeremias 31:3-ant mhunnttlolea utrancho ulʼlekh kortalo zait. Thoim Jehovan aplea lokank oxem mhunnttlolem: “Doiall mogan [“Visvaxi mogan,” NW] Hanvem tuka Mhoje-xim oddun haddla.” (Jer. 31:3; Hosea 11:4 sor korat.) Tor hantuntlean amkam kitem kollon ieta? Amcho mogall sorgincho Bap sodanch amchea borea gunnancher dhean dita je ghoddie ami amchea bhitor pollounk xokonant.

16. (a) Jezun Jehova vixim kitem xikoilem, ani ami tacher kiteak visvas dovrunk zata? (b) Jehova sogleam-von boro Bapui mhunn ami amchi khatri koxi ghott korunk zata? (“Jehova Sogleam-von Boro Bapui,” hem boks polloiat.)

¹⁶ Jezun Jehovak amcho Bap oxem mhunnttlem tednam, to eka orthan oxem sangtalo: “Jehova fokot mhozo Bap nhoi, punn to tumcho-i Bap zaun asa. To tumcho zonn ekleacho khub mog korta ani taka tumchi khub kallji asa mhunn hanv khatren sangtam.” Tor thodde pavtti, Jehova tumcho mog korta kai na mhunn tumchea monant dubhav ieta zalear, tumi Jezuchim utram ugddas dovrun tacher visvas dovrunk zata. Karonn Jezu Jehovak sogleam-von boro vollkhota ani to sodanch sot uloita.—1 Ped. 2:22.

TUMCHI KHATRI VADDOIT RAVAT

17. Jehova amcho mog korta hi khatri ami kiteak vaddoit ravonk zai?

¹⁷ Jehova amcho mog korta hi amchi khatri vaddounk ami amchean zata tem soglem korunk zai. Punn ami hea lekhant polloilem toxem, ami Jehovachi seva korop soddun diunk Soitan tache lagim zata tem soglem korit ravtolo. Jehova sangata amchi ixttagot to oskot korunk sodhta. Tea pasot Jehova amcho mog korina, hem to amchea monant ghalit ravtolo. Punn Soitanachea fottincher ami kednanch visvas dovorcho nhoi!—Job 27:5.

18. Jehova amcho mog korta mhunn ami amchi khatri koxi ghott korunk zata?

¹⁸ Jehova amcho mog korta mhunn amchi khatri ghott korunk ami kitem korunk zai tem ami hea lekhant polloilem. To amchea bhitor je bore gunn polloita, tech gunn ami-i pollounk ami tachea lagim magnnem korit ravonk zai. Bible boroupeamnim boroilem ki aplo mog kortoleanchi Jehova khub kallji gheta. Tor oslea versa vixim ami chintunk zai. Zoxem, aplo mog kortoleancho Jehova mog kortach mhunn ami ugddas dovrunk zai. Tea bhair, soddvonnechem dennem Jehovan amchea dor eklea pasot dilam mhunn ami niall korunk zai. Ani Jezun mhunnttlem toxem, Jehova tumcho sorgincho Bap zaun asa, hea utrancher ami visvas dovrunk zai. Oxem kelolean, ‘Jehova khorench tuzo mog korta?’ mhunn konnem-i tuka vicharlear, tum taka khatren oxem sangtolo: “Hoi! Jehova mhozo mog korta ani hanv-ui tacho mog kortam mhunn dakhounk, hanv dor disa mhojean zata tem soglem kortam!”