OBHEASACHO LEKH 42
GIT 44 Lhanvik Munxachem Magnnem
Jehova Lagim Kallzantlean Magnnem Korunk Xikat
“ Sogllea kallzan Tuka ulo martam; mhaka zap di, Sorvespora!”—ST. 119:145.
MUKHEL MUD’DO
Bible-ant aslolea Jehovachea visvaxi sevokanchea magnneam vorvim ami kitem xikonk zata?
1-2. (a) Ami Jehova lagim kallzantlean magnnem korunk kiteak fattim sorot? (b) Jehova amchim magnnim aikota mhunn amkam kiteak khatri asa?
MAGNNEM kortana kednam-kednam tumi tinch utram porot-porot uzar kortat vo tumkam khoreponnim kitem bhogta tem tumi Jehovak sangonant oxem tumkam dista kai? Zaiteank toxench dista. Ami bizi asat dekhun ami lhan magnnem korit, vo ami Jehova lagim ulounk purtim nant oxem amkam dista dekhun, tachea lagim kallzantlean ulounk ami fattim sorot.
2 Punn Bible sangta ki ami kitlea bore toren utram uzar kortat tachea poros ami kallzantlean ani khaltikaien magnnem korop Jehovak chodd mhotvachem. Karonn to “goribanchem [“khalteanchem,” NW] magnnem” aikota. (St. 10:17) Jehova amchem dor ek utor aikota karonn taka amchi khoreaninch porva asa.—St. 139:1-3.
3. Hea lekhant ami khoinchea prosnanche zobab polloitolim?
3 Tor amkam koxem bhogta tem Jehovak sangonk ami kiteak fattim sorchem nhoi? Ami Jehovak lagim sortolim tea toren koxem magnnem korchem? Bible-ant boroilʼlea Jehovachea sevokanchea magnneam thaun ami kitem xikonk zata? Ani tanchea magnneancher dhean dilolean ami anik bore toren magnnem koxem korunk zata? Ami ekdom niraxi asat ani Jehova lagim kitem magchem tem amkam somzona tednam kitem korchem? Hea prosnanche zobab ami hea lekhant polloum-ia.
KALLZANTLEAN MAGNNEM KORUNK FATTIM SORONAKAT
4. Kitem ugddas dovorlolean Jehova lagim magnnem korunk amkam sompem zatolem? (Stotr 119:145)
4 Jehova amcho visvaxi ixtt ani taka amchi porva asa mhunn ugddas dovorlolean, amchim chintnam ani bhavnam taka sangonk ami fattim sorchimnant. Stotr 119-achea boroupean oxench korunk proitn kelo. Taka zaiteo oddchonneo asleo. Zoxem, thoddea lokamnim tachea vixim fotti posrailʼleo.(St. 119:23, 69, 78) Toxench aplea chukink lagon taka niraxiponn bhogtalem. (St. 119:5) Torui, kallzantlean Jehova lagim magnnem korunk to fatti soronk na.—Stotr 119:145 vachat.
5. Ami Jehova lagim magnnem korunk kiteak fattim sorchem nhoi? Ek udharonn diat.
5 Gombhir patkam keleant, tannim pasun aplea lagim magnnem kelʼlem Jehovak zai. (Iz. 55:6, 7) Tor amkam kitem-i disom, ami magnnem korunk kednanch fattim sorchem nhoi. Hem somzonk hea vixim chintat: Plane-achea pilot-an gorje vellar air traffic controller-achi modot gheunk zata mhunn taka khobor asta. Punn to vatt chuklo vo tannem kosli-i chuk keli zalear, apleak loz zatoli mhunn chintun tannem modot gheunk fatti sorchem kai? Na! Teach bhaxen, kitem korchem tem amkam khobor na vo ami chuklim zalear pasun, Jehova amchem aikotoloch mhunn ami tachea lagim khatren magnnem korunk zata.—St. 119:25, 176.
TUMI JEHOVAK LAGIM SORTOLIM TEA TOREN MAGNNEM KORAT
6-7. Jehovachea gunnam vixim chintlolean amkam ukteponnim magnnem korunk koxi modot zaunk xokta? Ek udharonn diat. (Futtnott pasun polloiat.)
6 Ami amchim chintnam ani bhavnam Jehovak magnneant ukteponnim sangtat tednam, ami taka anikui lagim sortolim. Hem ami koxem korunk zata?
7 Jehovachea gunnam vixim chintat.a Jitlim chodd ami Jehovachea gunnam vixim chintʼtolim, titlim chodd ami ukteponnim tachea lagim uloitolim. (St. 145:8, 9, 18) Hea vixim bhoinn Kristine-achem udharonn asa. Ticho bapui tichea lagim khub krur toren vagtalo. Ti sangta: “Jehova ek mogall Bapui mhunn chintunk ani tachea lagim ulounk mhaka kotthin zatalem. Toxench, mhojea chukink lagon to mhozo mog korop bond kortolo, oxem mhaka distalem.” Jehovachea khoinchea gunnancher dhean dilʼlean tika modot zali? Ti sangta: “Jehovachea visvaxi moga vixim zaitea pavtti niall kelʼlean, to mhozo mog korta ani mhaka kednanch soddchona mhunn mhaka khatri zali. Hanv chuklear pasun to mhaka modot korit ravtolo. Tor, mhojem soglem sukh-dukh taka sangonk mhaka sompem zata.”
8-9. Magnneant ami kitem sangtolim tem poilinch chintlolean amkam koso faido zatolo? Ek udharonn diat.
8 Magnneant kitem sangtolim tem chintat. Magnnem korchea poilim, ami amkanch vicharunk zata: ‘Hanv sodʼdheak koslea oddchonneancho fuddo kortam? Hanvem konnakui bhogsunk zai kai? Halinch mhojea jivitant bodol zala dekhun mhaka Jehovachi modot zai kai?’ (2 Raz. 19:15-19) Toxench Jezun jea toren amkam magnnem korunk xikoilem tem ami ugddas korunk zata. Hea vorvim Jehovachem nanv, tachem Raj, ani khuxe vixim ami kitem magonk zata tem chintunk amkam modot zatoli.—Mt. 6:9, 10.
9 Bhoinn Aliska-cho ghov brain cancer-ak lagon mortolo mhunn kollʼllea uprant, magnnem korunk tika kotthin zatalem. Ti mhunntta: “Hanv itlem dukhi aslem ki kitem magchem tem mhaka kollonaslem.” Tor bhoinnin kitem kelem? Ti mhunntta: “Magnnem korchea poilim hanv Jehovak kitem sangtolem tem chintlolean, fokot amcheach vixinch nhoi, punn dusream vixim pasun magonk mhaka modot zali. Hea vorvim mhojem mon xant dovrunk mhaka modot zali.”
10. Ami zaito vell kiteak magnnem korunk zai? (Chitram pasun polloiat.)
10 Magnneant zaito vell sarat. Thoddo vell magnnem korun ami Jehovak lagim soronk xoktat tem khorem, punn chodd vell magnnem kelear amkam kitem dista tea vixim ami Jehovak chodd sangonk pavtolim.b Hea vixim Aliska-cho ghov, Elijah sangta: “Disantlean zaite pavtti magnnem kelʼlean hanv Jehovak anik lagim soronk pavlam. Hanv mhojem magnnem rokddoch sompoitolo mhunn Jehova opekxa korina. Tor hanvem mhaka zai titlo vell magnnem korunk zata.” Ami-i oxench kitem korunk zata: Kosloch bovall na ani vhoddlean magnnem korunk zata toslo ek vell ani zago vinchun, ami zaito vell magnnem korunk sonvoim korunk zata.
Amkam zaito vell magnnem korunk mellttolo toslo ek vell ani zago vinchun kaddunk zata (Peregraf 10 polloiat)
JEHOVACHEA VISVAXI SEVOKANCHEA MAGNNEANTLEAN XIKAT
11. Bible-ant aslolea magnneancher niall kelear amkam koso faido zatolo? (“Tumkam-i Kednam Tancheach Bhaxen Bhoglam Kai?” hem boks pasun polloiat.)
11 Bible-ant aslolea Jehovachea adlea sevokanchea magnneancher, toxench gitancher vo stotrancher niall kelear amkam faido zaunk xokta. Zoxem, tannim kalliz uktem korun Jehova lagim magnnem kelem, toxench ami-i korunk zata. Tea bhair, magnneant uzar korunk amkam novim utram mellot. Toxench, amkam oslea munxanchim magnnim mellonk xoktat, zanchi poristhiti amcheach sarki asli.
12. Bible-ant boroilʼlea magnneancher niall kortana ami amkanch kosle prosn vicharunk zatat?
12 Bible-ant boroilʼlea khoinchea-i magnneancher niall kortana, tumkanch vicharat: ‘Hem magnnem konnem ani khoinchea poristhitint kelʼlem? Mhaka bhogta toxench taka-i bhogtalem kai? Tachea magnneantlean hanv kitem xiktam?’ Hacho zobab mellonk amkam kholaien sodh korunk poddot. Punn oxem kelear amkanch faido zatolo. Tor atam ami char magnneancher dhean dium-ia.
13. Hana koddlean ami magnnea vixim kitem xikonk zata? (1 Samuel 1:10, 11) (Chitr pasun polloiat.)
13 1 Samuel 1:10, 11 vachat. Hem magnnem kortana Hanak don vhodd oddchonneo asleo. Ek mhunnttlear ti vanz asli, ani dusrem, haka lagon tichea ghovachi dusri bail, eka orthan tichea ghaveacher mitt ghaltali. (1 Sam. 1:4-7) Tor ami zaitea vella thaun eke kotthin poristhiticho fuddo kortat zalear, Hanachea magnneantlean ami kitem xiktat? Jehova lagim zaito vell magnnem korun ani aplem vojem tacher ghalun tika monachi xanti mellʼlli. (1 Sam. 1:12, 18) Tor ami pasun amche ‘huske Sorvesporachea kallzant ghaltat,’ mhunnche amkam koxem bhogta tem taka sangtat tednam, amkam-i monachi xanti mellttoli.—St. 55:22.
Hana vanz asli ani tichea ghovachi dusri bail tika tomnne marit ravtali. Tor Hanan aplea kallzantle sogle uske Jehovak sangle (Peregraf 13 polloiat)
14. (a) Hanachea udharonnantlean ami anik kitem xiktat? (b) Bible-acher niall kelʼlean amchim magnnim anikui borim koxim zaunk xoktat? (Futtnott polloiat.)
14 Samuel zolmon thoddea vorsam uprant Hana taka Mha-iadnik Eli lagim gheun geli. (1 Sam. 1:24-28) Jehova aplea visvaxi sevokanchi kallji gheta ani tanchi rakhonn korta mhunn tinnem kallzantlean kelʼlea magnneant sanglem.c (1 Sam. 2:1, 8, 9) Tea vellar, Hanachi ghorchi poristhiti bodlonk na zait, punn Jehovan apleak dilʼlea besanvacher tinnem dhean dilem. Hantuntlean ami kitem xiktat? Atam poriant Jehovan amkam koxi modot kelea tacher dhean dilear, amchea oddchonneancho fuddo korunk amkam anikui sompem zatolem.
15. Jeremiasachea magnnea thaun ami kitem xiktat? (Jeremias 12:1)
15 Jeremias 12:1 vachat. Vaitt kamam kelear pasun lok khuxal asa oxem Jeremiasak dislem tednam, to khub dukhi zalo. Toxench her Izraelitkaram tachim fokannam kortalim dekhun, to zaite pavtti ekdom niraxi zalo. (Jer. 20:7, 8) Oslea vellar apleak koxem bhogta tem tannem Jehovak sanglem. Punn Jehova onʼneai korta oxem tannem kednanch mhunnonk na. Aplea add voitat tea lokank Jehovan xist dili tem tannem polloilem tednam, to neai kortolo mhunn tacho visvas anikui vaddlo astolo. (Jer. 32:19) Lok aiz amchim-i fokannam kortat ani vaitt kamam kelear pasun tim khuxal asat oxem amkam disot. Hea vellar ami pasun Jeremiasa bhaxen amkam koxem bhogta tem Jehovak sangonk zai ani amkam zalʼlo onʼneai to aplea vellar kaddun uddoitolo mhunn tacher visvas dovrunk zai.
16. Levitachea magnneantlean ami kitem xiktat? (Stotr 42:1-4) (Chitram pasun polloiat.)
16 Stotr 42:1-4 vachat. Hem stotr eka Levitan boroilʼlem. Taka dusrea Izraelitkaram sangata Jehovachi bhokti korunk mellonasli. Taka koxem bhogtalem tem tannem hea stotrant boroilem. Amkam pasun tacheach bhaxen disot. Duensak lagon ami ghorantuch asot, vo Jehovachi bhokti kortat dekhun amkam bondkhonnint ghatleant zait. Thodde pavtti amchem mon xant asot ani dusrea vellar ami khub niraxi asot. Punn amkam koxem bhogta tem Jehovak ukteponnim sanglolean, amche poristhiti vixim amkam sarki somzonni mellttoli ani kitem chodd mhotvachem tem amchea ugddasak ietolem. Tea Levitakui oxench ghoddlem. Udharonnak, Jehovak vakhannunk apleak noveo sondheo mellttoleo mhunn taka kollʼllem. (St. 42:5) Jehova apli koxi kallji ghetalo tacho-i tannem ugddas kelo. (St. 42:8) Teach bhaxen, ami kallzantlean Jehova lagim magnnem kortat tednam amkam umkech toren kiteak bhogta tem somzonk, xant ravonk ani sosnikai dakhounk modot zata.
Stotr 42 boroilʼlea Levitan apleak koxem bhogtalem tem Jehovak sanglem. Tor ami pasun amkam koxem bhogta tem Jehovak sangtat tednam kitem chodd mhotvachem tacher ami dhean diunk pavtolim (Peregraf 16 polloiat)
17. (a) Jonasachea magnnea thaun ami kitem xikonk zata? (Jonas 2:1, 2) (b) Kotthin poristhitint astana Stotrantlim thoddim utram amkam koxim modot korunk xokta? (Futtnott polloiat.)
17 Jonas 2:1, 2 vachat. Jonas vhoddlea nusteachea pottant aslo tednam tannem hem magnnem kelʼlem. Tannem Jehovachi adnea moddloli, torui Jehova aplem magnnem aikotolo mhunn taka khatri asli. Hea magnneant tannem Stotrantlim zaitim utram uzar kelim.d Ghoddie taka tim bore bhaxen khobor aslim. Tancher niall kelʼlean Jehova apleak modot kortoloch mhunn taka khatri mellʼlli. Tor ami pasun Bible-antlim thoddim versam tonddpatt kelim zalear, kotthin poristhitint magnnem kortana tim amchea monant ieunk xoktat ani amkam bhuzvonn mellonk xokta.
MAGNNEANT JEHOVAK LAGIM SOROT RAVAT
18-19. Amkam koxem bhogta tem Jehovak sangonk kollona tednam, Romkarank 8:26, 27-antlean amkam kosli khatri melltta? Ek udharonn diat.
18 Romkarank 8:26, 27 vachat. Thodde pavtti amkam itlo usko zata ki amkam koxem bhogta tem Jehovak sangonk amkam kollona. Oslea vellar, ami bhieunchem nhoi. Karonn Jehovachi povitr xokti amchea pasot “vinoti” korta. Hacho orth kitem? Jehovan povitr xokte vorvim zaitim magnnim aplea Utrant boroun dovorleant. Tor amkam koxem bhogta tem Jehovak sangonk amkam kollona tednam, Jehova tea magnneantlim thoddim utram amchim magnnim mhunn manun gheit ani amkam zobab di-it.
19 Hem ugddas dovorlolean, Russia-ntle bhoinn Yelena-k modot zali. Ti magnnem kortali ani Bible vachtali dekhun tika arrest kelʼli. Tea vellar ti itli niraxi asli ki tika magnnem korunk kotthin zatalem. Ti mhunntta: “Tea kotthin vellar, Jehova aplea adlea visvaxi sevokanchim magnnim, mhojim magnnim mhunn manun ghetolo hem mhojea ugddasak ailem ani mhaka khub bhuzvonn mellʼlli.”
20. Khub uskeant astana magnnem korunk ami amchem mon koxem toiar korunk zata?
20 Ami khub uskeant astana magnnem kortat tednam, amchem mon dusrea vostuncher vochonk xokta. Tor magnnem korchea poilim ami amchem mon koxem toiar korunk zata? Ami Stotr pustokanchim audio rekorddingam aikonk zatat. Toxench, Raza Davidan kelem toxem, amkam koxem bhogta tem ami borounk zata. (St. 18, 34, 142; superscriptions, NW) Punn ami oxench korunk zai oxem nhoi. (St. 141:2) Amkam jem boreak poddtta tem ami korunk zata.
21. Ami purnn kallzantlean Jehova lagim kiteak magnnem korunk zai?
21 Magnnem korchea poilim amkam koxem bhogta tem Jehovak khobor asa hem zannam zalolean amkam bhuzvonn melltta. (St. 139:4) Torui, ami tache lagim magnnem kelʼlem ani amkam tacher visvas asa mhunn dakhoilʼlem Jehovak zai. Tor amkam koxem bhogta tem amchea sorginchea Bapak sangonk ami fattim sorchem nhoi. Bible-ant aslolea Jehovachea sevokanchea magnneantlean ami xikonk zata. Tor ami purnn kallzantlean Jehova lagim magnnem korunk zai ani amchem sukh-dukh taka sangonk zai. Eka khorea Ixtta porim to sodanch amkam modot kortolo!
GIT 45 Mhojea Kallzachim Chintnam
a Sodanchea Jivita Pasot Bible-antlean Modot, hantunt “Jehova” hea vixoi-a khala, “Jehovache thodde vorte gunn” polloiat.
b Sobhe pasot sogleam hujir kelʼlim magnnim chodd korun lhan astat.
c Hanan magnnem kortana, Moizesan boroilʼlim thoddim utram uzar kelim. Hantuntlean, Devachea utracher tinnem bariksannen niall kelo mhunn dison ieta. (D.S. 4:35; 8:18; 32:4, 39; 1 Sam. 2:2, 6, 7) Xekddeamnim vorsam uprant, Jezuchi avoi Marien aplea magnneant, Hanan uzar kelʼlim toslim utram uzar kelim.—Luk. 1:46-55.
d Udharonnak, Jonas 2:3-9 him versam, Stotr 69:1; 16:10; 30:3; 142:2, 3; 143:4, 5; 18:6; ani 3:8-a sangata sor korat. Tim Jonasan mhunnttlolea magnneachea manddavollin asat.