Dusream Pasot Magnnem Korunk Visornakat

1. Amchim magnnim Jehovak mhotvachim mhunn ami koxim zannant?

MAGNNEM Jehova koddlean ek moladik dennem zaun asa. Kiteak? Hea vixim chintat. Jehovan devdutank thoddim kamam dileant. (St. 91:11) Toxench, aplea Putak tannem thoddeo mhotvacheo zobabdareo dileat. (Mt. 28:18) Punn magnnem aikocho odhikar tannem aplea laginch dovorla. Tor Jehova svota zaun amchem ‘prarthon aikota.’—St. 65:2.

2. Dusream pasot magnnem korchea vixim apostl Paulun ek borem udharonn koxem dovorlem?

² Amchea uskeam vixim ami ukteponnim Jehovak sangonk zata tem khorem, punn ami dusream pasotui magnnem korunk zai. Apostl Paulun toxench kelem. Udharonnak, Efezantle sobhek tannem oxem boroilem: “Hanv sodanch tumchea pasot magnnem korit asam.” (Ef. 1:16) Tannem dusreanchim nanvam gheun pasun magnnem kelem. Zoxem tannem Timotak mhunnttlem: “[Devacho] hanv upkari zaun asa. Ani hanv dis-rat kallzantlean vinovnneo kortam tednam chukonastana tuzo ugddas kortam.” (2 Tim. 1:3) Pauluk zaiteo oddchonneo asleo. (2 Kor. 11:23; 12:7, 8) Torui, tannem vell gheun dusream pasot magnnem kelem.

3. Ami dusream pasot magnnem korunk kiteak visrot?

³ Punn thodde pavtti ami dusream pasot magnnem korunk visrot. Kiteak? Bhoinn Sabrinaa hachem ek karonn sangta. Ti mhunntta: “Jivit ekdom bizi zalam dekhun, amchem dhean fokot amcheruch asot ani ami amcheach gorzam vixim magot.” Tumkam-i kednam oxench ghoddlam kai? Hoi zalear, hea lekhantlean tumkam modot zaunk xokta. Karonn hantuntlean, (1) dusream pasot magnnem korop kiteak mhotvachem ani (2) ami hem koxem korunk zata tem amkam kollttolem.

DUSREAM PASOT MAGNNEM KITEAK KORCHEM?

4-5. Dusream pasot kelʼlea magnneank “khub xokti asta” oxem ami kiteak mhunnonk zata? (Jakob 5:16)

⁴ Magnneank “khub xokti asta.” (Jakob 5:16 vachat.) Dusream pasot kelʼlea magnneam vorvim tanchi poristhiti bodlonk xokta kai? Hoi. Hem ami koxim zannant? Apostl Pedru apleak nakartolo mhunn Jezuk khobor asli. Torui tannem taka oxem sanglem: “Tuzo visvas unno zaina zaunk hanvem kallzantlean vinovnni kelea.” (Luk. 22:32) Magnneak xokti asta mhunn Pauluk pasun khobor asli. Khotto arop ghalun taka Romant koidi kelʼlo tednam, tannem Filemonak sanglem: “Tumchea magnneank lagon hanv beginuch tumkam mellonk pavtolom mhunn mhaka bhorvonso asa.” (Fil. 22; “for I am hoping that through your prayers” ho study note polloiat.) Ani toxench zalem. Pauluk beginuch suttka mellʼlli ani to porot porgottunk laglo.

⁵ Punn magnneam vorvim ami Jehovacher dobhav ghalunk xoktat, oxem nhoi. Khorem mhunnttlear, ami umkeach vixim magnnem kortat tednam, tea vixim amkam kitlo usko asa tacher Jehova dhean dita. Ani thodde pavtti, ami maglam toxem to korunk xokta. Hem zannam zalʼlean, eke poristhiti vixim kallzantlean magnnem korunk ani Jehova tem polloun ghetolo mhunn visvas dovrunk amkam modot zatoli.—St. 37:5; 2 Kor. 1:11 ani study note polloiat.

6. Dusream pasot magnnem kelolean kitem faide asat? (1 Pedru 3:8)

⁶ Ami tankam “doia-maia” dakhoitat. (1 Pedru 3:8 vachat.) Ek doiall munis dusreank koxem bhogta tem somzon gheta ani tankam modot korunk fuddem sorta. (Mk. 1:40, 41) Michael nanvacho ek vhoddil sangta: “Hanv dusreanchea gorzam pasot magtam tednam, tanchea trasam vixim mhaka anikui somzonni melltta, ani tanchea pasot mhozo mog vaddtta. Hea vixim ghoddie tankam khobor pasun aschina, punn hanv tankam anikui lagim sortam.” Dusream pasot magnnem kelear anik kitem faido asa? Richard nanvacho ek vhoddil sangta: “Ami dusream pasot magnnem kortat tednam, tanchea pasot kitem tori korunk fuddem sortat. Ani ami tankam adar ditat tednam, eka orthan amchea magnneacho zobab mellonk ami modot kortat oxem zata.”

7. Dusream pasot magnnem kelolean amchea oddchonneam vixim sarkem chintop dovrunk amkam koxi modot zaunk xokta? (Filipkarank 2:3, 4) (Chitram pasun polloiat.)

⁷ Ami amchea oddchonneam vixim sarkem chintop dovrunk pavtat. (Filipkarank 2:3, 4 vachat.) Ho sonvsar Soitanachea tabeant asa. Tor amkam sogleank oddchonneo asat. (1 Ju. 5:19; Prok. 12:12) Punn ami dusream pasot magnnem korchi sonvoim kortat tednam, ‘sonvsarbhor aslolea amchea bhav-bhoinnank osleach torechea dukh-trasancho fuddo korcho poddtta mhunn’ amchea ugddasak ieta. (1 Ped. 5:9) Katherine nanvachem pioneer sangta: “Dusream pasot magnnem kelolean, tankam-i oddchonneancho asat mhunn ugddas dovrunk mhaka modot zata, ani hanv mhojea oddchonneancher chodduch dhean dina.”

TANKAM AMCHEA MAGNNEANCHI GOROZ ASA

8. Ami konnam pasot magnnem korunk zata?

⁸ Ami konnam pasot magnnem korunk zata? Duent asat vo zanntte piraiek lagon tras sostat tea bhav-bhoinnam pasot ami magonk zata. Toxench, ami amchea tornatteam pasot magonk zata, zankam iskolant tallnneo ietat vo her bhurgim tanchim fokannam kortat. Zaitea bhav-bhoinnank tanchea ghorcheam vo sorkari odhikaream koddlean virodh soscho poddtta. (Mt. 10:18, 36; D.I. 12:5) Thoddeank zhuzak lagon tanchim ghoram soddun vochonk poddtta. Herank odruxttancho fuddo korcho poddtta. Hea bhav-bhoinnank ami vollkhonant zait, punn tanchea pasot magnnem korun, “eka-mekacho mog korat” mhunn Jezun dilʼli adnea ami pallttat mhunn dakhoitat.—Ju. 13:34.

9. Songottnnent fuddakar ghetat tea bhavam ani tanchea bailam pasot ami kiteak magonk zai?

⁹ Songottnnent fuddakar ghetat tea bhavam pasotui ami magnnem korunk zata. Zoxem Sonchalon Monddollache vangddi ani tankam modot korpi, Xakha Somiti, xakhent her zobabdareo samballpi, sorkittachi dekhrekh korpi, sobheche vhoddil ani sobheche sevok. Hantuntle zaite bhav oddchonneancho fuddo kortat. Torui, te amkam modot korunk khub vavr kortat. (2 Kor. 12:15) Mark nanvacho sorkittachi dekhrekh korpi sangta: “Mhoji sogleam-von vhodd oddchonn mhunnttlear, hanv mhojea zannttea avoi-bapai thaun pois asam. Tanchi bholaiki bori asona. Mhoji bhoinn ani ticho ghov, tancho samball kortat tem khorem, punn hanv tanchea pasot chodd korunk xokona mhunn mhaka khub dukh zata.” Hea bhavank koslo usko asta ti amkam khobor na zalear pasun, ami tanchea pasot magonk zai. (1 Tes. 5:12, 13) Toxench, tancheo bailo tankam tenko di-it astat dekhun, ami tanchea-i pasot magnnem korunk zai.

10-11. Ami soglea bhav-bhoinnam pasot magnnem kortat tednam Jehovak tem manvota kai? Somzaiat.

¹⁰ Tor ami polloilem toxem, choddxe pavtti ami soglea bhav-bhoinnam pasot magnnem kortat. Udharonnak, bondkhonnint asat vo zanchim mogachim bhair poddleant tankam sogleank bhuzvonn di mhunn ami Jehova lagim magtat. Donald nanvacho ek vhoddil sangta: “Amchim zaitim bhav-bhoinnam trasancho fuddo kortat dekhun, ami umkinch nanvam ghenastana, thodde pavtti sogleam pasot magnnem kortat.”

¹¹ Oslim magnnim Jehovak manvotat kai? Hoi! Karonn dor eke bhav-bhoinnik kiteachi goroz asa tem amkam khobor asona. Tor ami sogleam pasot magnnem korop chukichem nhoi. (Ju. 17:20; Ef. 6:18) Ami oxem kortat tednam, ami ‘soglea bhav-bhoinnancho mog kortat’ mhunn dakhoitat.—1 Ped. 2:17.

DUSREAM PASOT MAGNNEM KORTANA KITEM UGDDAS DOVORCHO?

12. Dhean dilolean dusream pasot magnnem korunk amkam koxi modot zaunk xokta?

¹² Dhean diat. Ami bhav-bhoinnanchim nanvam gheun pasun magnnem korunk zai. Amchea sobhent konnui gombhir duensacho fuddo korta kai? Eka tornatteak iskolantlim her bhurgim vaitt kamam korunk tacher dobhav ghaltat dekhun to niraxi asa kai? ‘Jehovache khuxe pormonnem xist diun ani xikoun’ aplea bhurgeank sotant ekttinch vaddounk eke Kristi avoik vo bapaik kotthin zata kai? (Ef. 6:4) Oxe toren dhean dilolean ami bhav-bhoinnancho anikui mog korunk pavtolim ani tankam kitem bhogta tem somzonk pavtolim. Hea vorvim tanchea pasot magnnem korunk amchi itsa anikui vaddttoli.b—Rom. 12:15.

13. Ami kednanch mellonk nant tea bhav-bhoinnam pasot ami koxem magnnem korunk zata?

¹³ Tanchim nanvam gheun magnnem korat. Ami kednanch mellonk nant tea bhav-bhoinnam pasotui ami magnnem korunk zata. Udharonnak Crimea, Eritrea, Russia ani Singapore, oslea desant bondkhonnint aslolea bhav-bhoinnam pasot ami magnnem korunk zata. Tanchim nanvam amkam jw.org-acher mellonk xoktat.c Hea vixim Brian nanvacho sorkittacho dekhrekh korpi sangta: “Hanv bondkhonnint aslolea eka bhav vo bhoinnichem nanv boroun dovortam, ani uprant vhoddlean tem mhunnttam. Oxem kelʼlean, tanchem nanv gheun magnnem korunk mhaka modot zata.”

14-15. Bhav-bhoinnanchea gorzam pasot magnnem korunk amkam koxi modot zatoli?

¹⁴ Tanchea gorzam pasot magnnem korat. Ami poilim uloilʼlo bhav Michael sangta: “Hanv jw.org-acher bondkhonnint aslolea bhavam vixim vachtam tednam, tanchea zagear hanv aslom zalear mhaka koxem bhogtolem aslem tea vixim chintʼtam. Mhaka mhojea bailecho usko zatolo aslo. Ani tika goroz asa tem tika melltta mhunn hanv khatri korun ghetolom aslom. Oxem kelolean bondkhonnint aslolea kazari bhavanchea gorzam pasot magnnem korunk mhaka modot zata.”—Heb. 13:3, ftn.

¹⁵ Bondkhonnint aslolea bhav-bhoinnanchea sodanchea jivita vixim chintlolean, ami tanchea her gorzam pasotui magnnem korunk pavtolim. Udharonnak, bondkhonnichea rakhonndaramnim, amchea bhav-bhoinnam sangata doiall toren vagonk ani odhikareamnim tankam Jehovachi bhokti korunk diunk ami magonk zata. (1 Tim. 2:1, 2) Toxench, tanchea borea udharonnantlean tanchea sobhentlea bhav-bhoinnancho bhavarth ghott zaum, vo tancho boro sobhav polloun Sakxi nant te lok bori khobor aikonk fuddem sorom mhunn ami magonk zata. (1 Ped. 2:12) Dusrea torechea oddchonneancho fuddo kortat tea bhav-bhoinnam pasot magnnem kortana pasun, ami hench monant dovrunk zata. Tor ami dhean ditat, bhav-bhoinnanchim nanvam gheun magnnem kortat, ani tanchea gorzam pasot magnnem kortat tednam, ‘eka-meka pasot amcho mog vaddot voitolo.’—1 Tes. 3:12.

MAGNNEAM VIXIM SARKEM CHINTOP DOVRAT

16. Ami magnneam vixim sarkem chintop koxem dovrunk zata? (Matev 6:8)

¹⁶ Ami polloilem toxem, dusream pasot magnnem kelʼlean tanchi poristhiti bodlonk xokta. Punn magnneam vixim ami sarkem chintop dovrunk zai. Kiteak? Ami magnneant Jehovak novem kainch sangonant, nhoi mhunn tannem kitem kelear borem zatolem, tea vixim taka solʼlo dinant mhunn ami ugddas dovrunk zai. Karonn aplea sevokank kiteachi goroz asa tem ami vo tim magchea poilinch Jehovak khobor asta. (Matev 6:8 vachat.) Tor Jehovak poilinch sogli khobor asa zalear, ami dusream pasot kiteak magnnem korunk zai? Hachim zaitim karonnam ami hea lekhant polloilim. Punn hachea bhair, amkam dusreanchi kallji ani mog asa dekhun ami tanchea pasot magnnem kortat. Ani ami Jehovachea mogachi dekh ghetat mhunn to polloita tednam to khub khuxal zata.

17-18. Ami dusream pasot kiteak magnnem korunk zai? Ek udharonn diat.

¹⁷ Dusream pasot magnnem kelear poristhiti bodolna, oxem amkam dista zalear pasun, ami tanchea pasot magnnem korit ravtat tednam, ami tancho mog kortat mhunn dakhoitat. Ani Jehova tacher dhean dita. Hem somzonk hea vixim chintat. Eka ghorant don lhan bhurgim asat—ek cheddo ani ek cheddum. To cheddo ekdom duent asa. Tor tem cheddum aplea bapaik sangta: “Daddy, please taka modot kor nhoi. To boro na!” Bapui aplea cheddeacho mog korta ani bore toren tachi kallji gheit asa. Torui aplea dhuvek, tachea bhavachi porva asa tem polloun to bapui kitlo khuxal zatolo nhoi!

¹⁸ Jehova pasun amkam tench korunk urba dita. Ami dusreanchi kallji ghetloli ani tanchea pasot magnnem kelʼlem taka zai. Ami oxem kortat tednam ami amcheach vixim chintinant, punn dusreancho khoreponnim mog kortat mhunn dakhoun ditat. Ani Jehova hacher dhean dita. (2 Tes. 1:3; Heb. 6:10) Ami poilim polloilem toxem, amchea magnneam vorvim ek-ek pavtti poristhiti bodlonk pasun xokta. Tor ami dusream pasot magnnem korunk kednanch visorchem nhoi!