OBHEASACHO LEKH 49
GIT 44 Lhanvik Munxachem Magnnem
Solʼlo Ditana Jobachem Pustok Amkam Modot Korunk Xokta
“Job, upkar korun chotraien aik.”—JOB 33:1.
MUKHEL MUDʼDO
Solʼlo ditana kitem sangchem ani koxem sangchem tem Jobachea pustokantlean xikom-ia.
1-2. Jobache tin sangati ani Elihuk kitem korop sompem naslem, ani kiteak?
JOBAN apli sogli girestkai hogddaili. Hi khobor Udentechea lokam modem rokddich posorli. Tednam Jobache tin sangati, tem mhunnttlear Elifaz, Bildad ani Zofar taka bhuzvonn diunk Uz desant aile ani Jobak kitem ghoddlolem tem tannim aplea dolleamnim polloilem tednam, te samke thottakle.
2 Jobak kitem zalʼlem tea vixim chintat. Aplea lagim aslolem soglem tannem hogddailʼlem. Tachea menddranche, unttanche, ani gaddvanche hindd, toxench gorvam chorun vhelʼlim. Toxench tachea choddxea sevokancho jiv kaddlolo. Tea bhair, tachim dha-ui bhurgim jea ghorant jevtalim tem ghor moddon poddlem ani tim soglim moron gelim. Itlench nhoi, Jobak ek bhirankull duens zalem. Tache akʼkhe kuddik fodd ailʼle ani tachean sosunk zaina titli dukh taka zatali. Jobache tin sangati taka pollounk aile tednam to samko dukhi aslo ani gobrant boslolo. Punn tache tras polloun pasun, sat dis poriant tannim tonddantlean ekui utor bhair kaddunk na. (Job 2:12, 13) Magir Elihu nanvacho ek tornatto Jobak mellonk ailo ani te asle thoim laginch to boslo. Xevottak Job uloilo ani apunn zolmolʼlo tea disacher tannem xirap ghatlo, toxench apleacher moronn ieum mhunn tannem maglem. (Job 3:1-3, 11) Khorench, tea ekdom kotthin poristhitint Jobak aplea ixttanchi modot zai asli! Punn taka modot korop tankam sompem naslem. Karonn te tachea lagim kitem uloitole ani koxe toren uloitole tea vorvim tankam khoreaninch tachi porva asa kai na ani te tache khore ixtt zaun asat kai na tem kollon ietolem aslem.
3. Hea lekhant ami kitem polloitolim?
3 Jobachea tin sangateamnim ani Elihun kitem mhunnttlem ani kelem tem boroun dovrunk Jehovan Moizesak prerit kelo. Elihuchim utram Jehova thaun aslim, punn Elifazachim utram ghoddie eka noxttea duta thaun aslim. (Job 4:12-16; 33:24, 25) Tor Jobachea pustokant amkam sogleam-von borea, toxench sogleam-von vaitt solʼleam vixim vachunk melltta. Hea lekhant, ami dusreank solʼlo ditana Jobachem pustok amkam koxem modot korunk xokta tem polloum-ia. Ami kitem mhunnchem nhoi ani korchem nhoi tem ami Jobachea tin sangateam koddlean xikom-ia. Toxench, ami kitem mhunnchem ani korchem tem ami Elihu thaun xikom-ia. Tea bhair, tanchea thaun Izraelitkaram kitem xikonk xoktalim, toxench ami kitem xikonk zata tem-ui polloum-ia.
JOBACHEA TIN SANGATEAMNIM KOXE TOREN SOLʼLE DILE?
4. Jobache tin sangati taka kiteak bhuzvonn diunk pavonk nant? (Chitr pasun polloiat.)
4 Jobacher ailʼlea trasam vixim aikon, tache tin sangati “taka buzvonn diunk ani moipas dakhounk” aile. (Job 2:11) Punn te toxe korunk chukle. Kiteak? Hachim tin karonnam polloum-ia. Poilem, tannim Jobachem aikonk na ani tachi poristhiti somzon gheunk na. Tachea bodlek, tannem kitem tori chuk kelʼli dekhun Jehova taka khast laita oxem tannim chintlem.a (Job 4:7; 11:14) Dusrem, tanche choddxe solʼle bore asle oxem dislear pasun, te Jobak kainch faideache nasle. Karonn te tachea kallzak toptat tosle asle. (Job 13:12) Zoxem, Job chodduch uloita oxem Bildadan don pavtti mhunnttlem. (Job 8:2; 18:2) Ani Zofaran taka okʼkol naslolea munxak sor kelo. (Job 11:12) Hem soglem aikon Job sarkoch tuntton gelo astolo. Ani tisrem, te ghoddie tachea lagim vhoddlea avazan ulounk nant zalearui, tannim tacho opman kelo, tomnne marle ani boglanttam ghatlim. (Job 15:7-11) Tor tacho bhavarth ghott korchea bodlek tannim taka guneanvkari tharailo, ani tachea ghaveacher molom launchea bodlek mitt ghatlem.
Dusreank solʼlo ditana tankam modot korunk proitn korat. Tumi tanchea poros vortim asat oxem tankam disonk zaina (Peregraf 4 polloiat)
5. Jobachea sangateamnim taka jem kitem mhunnttlem tacho porinnam kitem zalo?
5 Aplea sangateanchim utram aikon Jobachem dukh anikui vaddlem. (Job 19:2) To guneanvkari asa mhunn te tacher jitle chodd arop ghaltale, titloch chodd apunn guneanvkari na mhunn to tankam sangonk laglo. Tor Job zaite pavtti chintinastana kiteak uloilo ani apunn promannik asa mhunn tannem kiteak mhunnttlem tem ami somzonk xoktat. (Job 6:3, 26) Jobachea sangateanchem ulovop Jehovachea chintnam pormonnem naslem ani tannim taka doia dakhounk na. Hea vorvim Jobak niraxi korunk Soitan tankam uzar korunk xoklo. (Job 2:5, 6) Jobachea ghoddnnentlean Izraelitkarank koso faido zatolo aslo ani aiz amkam koso faido zaunk xokta?
6. Izraelant fuddakar gheupi Jobachea tin sangateam koddlean kitem xikonk xoktale?
6 Izraelitkarank koso faido zatolo aslo? Izraelitkarank aple kaide dilea uprant, tancho neai korunk ani te kaide pallunk tankam modot korunk, Jehovan zannvai aslolea ani visvas dovorpa sarkea munxank nemle. (D.S. 1:15-18; 27:1) Hea munxamnim, lokank solʼlo diunchea poilim vo neai korchea poilim bariksannen tanchem aikonk zai aslem. (2 It. 19:6) Toxench, tankam soglem khobor asa oxem chintchea bodlek, tannim prosn vicharun sogli mahiti zannam zaunk zai asli. (D.S. 19:18) Tea bhair, tanchi modot gheunk ietat tanchea lagim tannim krur toren ulounk zainaslem. Karonn toxem kelear, aplea kallzant kitem asa tem tankam ukteponnim sangonk tim fattim sortolim aslim. (Sutt. 22:22-24) Tor he fuddakar gheupi Jobachea ghoddnne thaun mhotvachim lisanvam xikonk xoktale.
7. Fuddaream bhair anik konn solʼlo diunk xoktalo, ani Jobachea ghoddnne thaun tim kitem xikonk xoktalim? (Mhonnʼnneo 27:9)
7 Fokot fuddarich nhoi, punn her Izraelitkaram pasun eka-mekak solʼlo diunk xoktalim, zaum tim zannttim vo tornattim, dadlo vo bail. Zoxem, eka Izraelitkarak Jehovache bhokte vixim vo aplea vagnnukent sudharnni korunk zai zalear tacho ixtt taka solʼlo diunk xoktalo. (St. 141:5) Karonn ek khoro ixtt oxench korta. (Mhonnʼnneo 27:9 vachat.) Elifaz, Bildad ani Zofar, Joba lagim jea toren uloile tacher Izraelitkaramnim dhean dilʼlem zalear, solʼlo ditana kitem mhunnchem nhoi ani kitem korchem nhoi tem tim zannam zatolim aslim.
8. Solʼlo ditana ami khoincheo tin vostu ugddas dovrunk zai? (Chitram pasun polloiat.)
8 Amkam koso faido zaunk xokta? Bhav-bhoinnam trasancho fuddo kortat tednam, ami tankam modot korunk sodhtat. Punn Jobache tin sangati uloile toxem ami uloilim zalear ami tankam bhuzvonn diunk pavchimnant. Tea pasot poilem mhunnttlear, amkam soglem khobor asa oxem ami chintchem nhoi punn solʼlo diunchea poilim sogli mahiti zannam zaun gheunk zai. Dusrem, Elifazan kelem toxem amchea onnbhovam pormonnem solʼlo diunchea bodlek ami Devachea Utra pormonnem solʼlo diunk zai. (Job 4:8; 5:3, 27) Tisrem, solʼlo ditana ami dusreank dukhoitat toslim vo krur utram uzar korunk zainant. Ugddas dovrat ki Elifazan ani tachea sangateamnim uzar kelʼlim thoddim utram sarkim aslim. Ani apostl Paulun Elifazachea thoddea utrancho ulʼlekh pasun kelo. (Job 5:13 ani 1 Korintkarank 3:19 sor korat.) Torui, tannim fott sangli oxem Jehovan mhunnttlem. Karonn tannim Jehova vixim sanglolim choddxim utram sarkim naslim ani tannim Jobak pasun dukhoilʼlo. (Job 42:7, 8) Tor amchea solʼleam vorvim Jehova nixttur asa vo to tancho mog korina oxem lokank disonk zaina. Atam ami Elihuchea udharonnantlean kitem xikonk zata tem polloum-ia.
Solʼlo ditana, (1) tea munxachi poristhiti bore toren zannam zaun gheiat, (2) Devachem Utor uzar korat, ani (3) doiall toren uloiat (Peregraf 8 polloiat)
ELIHUN KOXE TOREN SOLʼLO DILO?
9. Jobachea sangateanchem ulovop somplea uprant pasun taka modotichi goroz kiteak asli, ani Jehovan taka koxi modot keli?
9 Job ani tachea sangateamnim zaito vell poriant vad-vivad kelo. Te itle uloile ki Bible-antle 28 odheai tanchea utramninch bhorlole asat. Ani tanchea choddxea utrantlean te khub bejar ani ragar asle mhunn kolltta. Tor Jobachem niraxiponn kiteak pois zaunk na tem ami somzonk xoktat. Taka azun poriant bhuzvonnechi ani solʼleachi goroz asli. Jehovan taka koxi modot keli? Tannem Elihuk uzar kelo. Punn Elihun ulounk itlo vell kiteak kelo? Tem amkam tacheach utrantlean kolltta. Tannem mhunnttlem: “Hanv ozunuim bhurgo asam ani tumi mhatare zaleat. Dekhun hanv . . . fattim-fuddem sortalom.” (Job 32:6, 7) Tor zannttim chodd temp jieleant dekhun tanchea lagim tornatteam poros chodd zannvai ani onnbhov asta mhunn Elihuk khobor asli. Tea pasot Job ani tache sangati uloitana tannem pasiensan tanchem aikolem. Punn uprant tachean sosunk zalem na. Tednam tannem mhunnttlem: “Monis zantto zala mhunnon, taka xanneponn mellona vo kitem vaitt vo borem tem taka somzona.” (Job 32:9) Uprant Elihun kitem mhunnttlem, ani koxem?
10. Jobak solʼlo diunchea poilim Elihun kitem kelem? (Job 33:6, 7)
10 Jobak solʼlo diunk Elihu sarkea vella pasot ravlo. Joban xantponnim tachem aikolʼlem taka zai aslem. Tor tannem kitem kelem? Job ani tachea tin ixttanchim utram aikon to khub ragar zalʼlo. (Job 32:2-5) Tor sogleant poilim tannem aplo rag xant kelo. Tannem Jobak dukhoita toxem kainch mhunnonk na. Punn eka ixtta sarko taka bhuzvonn dili. Tannem Jobak sanglem: “Devachea fuddeant ami dogui eksarkhe.” (Job 33:6, 7 vachat.) Uprant Jobachea utrantle thodde mukhel mudʼde Elihun porot sangle. (Job 32:11; 33:8-11) Hea toren tannem dakhoilem ki to Jobachem dhean diun aikotalo ani uprant taka porot solʼlo ditana pasun tannem oxench kelem.—Job 34:5, 6, 9; 35:1-4.
11. Elihun Jobak koxe toren solʼlo dilo? (Job 33:1)
11 Jobak solʼlo ditana Elihun taka man dilo. Koso? Tannem Jobachem nanv ghetlem. Oxem Jobachea tin sangateamnim korunk na. (Job 33:1 vachat.) Toxench, Job ani tache tin sangati vad-vivad kortale tednam Elihuk pasun ulounk distalem. Hem monant dovrun solʼlo ditana tannem Jobakui ulounk sondhi dili. (Job 32:4; 33:32) Toxench, Jobachim thoddim chintnam sarkim nant mhunn tannem taka sanglem. Ani Jehovache gunn, zoxem tachi zannvai, xokti, neai ani visvaxi mog tachea ugddasak haddle. (Job 36:18, 21-26; 37:23, 24) Tor Elihuchea borea solʼleak lagon, Jehovachem aikonk Job aplem mon toiar korunk pavlo. (Job 38:1-3) Elihuchea udharonnantlean Izraelitkarank koso faido zatolo aslo, ani amkam koso faido zaunk xokta?
12. Izraelitkarank modot korunk Jehovan provadeank koxe uzar kele, ani tankam Elihuchea udharonnantlean koso faido zaunk xoktalo?
12 Izraelitkarank koso faido zatolo aslo? Izraelitkarank xikounk ani solʼlo diunk, Jehovan zaite pavtti provadeank uzar kele. Udharonnak, Fuddareanchea kallar tankam margdorxon diunk Jehovan provadin Deborak uzar keli. (Fudd. 4:4-7; 5:7) Toxench tankam nirdexon diunk, Jehovan Samuelak lhan piraie thaun uzar kelo. (1 Sam. 3:19, 20) Uprant razanchea kallar pasun, Jehovan eka-fattlean-ek provadeank uzar korun Izraelitkarank khori bhokti korit ravonk modot keli. Toxench tim Jehovachea add gelim tednam tannem provadeank uzar korun tankam solʼle dile. (2 Sam. 12:1-4; D.I. 3:24) Tor kitem solʼlo diuncho ani to koxe toren diuncho tem Jehovachea visvaxi sevokank Elihuchea udharonnantlean xikonk mellttolem aslem.
13. Aiz Kristanvamnim eka-mekak urba koxi diunk zata?
13 Amkam koso faido zaunk xokta? Kristanv zalʼlean, Devachi khuxi kitem tem sangonk ami Bible uzar kortat. Toxench, bhav-bhoinnank urba ani bhuzvonn melltta toslim utram uzar kortat. (1 Kor. 14:3) Khas korun vhoddil bhav-bhoinnank dhir ditana ‘tanchim utram bhuzvonn ditat’ toslim asat mhunn khatri kortat. Ani konnui bejar zaun ‘khor-khos utramnim vo chintinastana uloita’ tednam pasun te oxench kortat.—1 Tes. 5:14; Job 6:3.
14-15. Dusreank solʼlo ditana vhoddilamnim Elihuchi dekh koxi gheunk zata tem somzonk ek udharonn diat.
14 Hem somzonk hea poristhiti vixim chintat. Sobhentli ek bhoinn niraxi asa mhunn eka vhoddilak kollon ieta. Tor to eka bhavak gheun tea bhoinnik urba diunk tika mellonk voita. Tea vellar, ti bhoinn sangta ki ti mittingek hajir zata ani porgottnnent voita tem khorem, torui ti khuxal na. Tea vellar te bhav kitem kortole?
15 Poilem, te tichi poristhiti bore toren somzonk proitn kortole. Oxem korunk te tika prosn vichartole ani ti zobab ditana dhean diun aikotole. Toxench, Jehova aplo mog korina oxem tika dista kai vo “jivitachea uskeank lagon” ti khuxal na kai, hem zannam zaunk te proitn kortole. (Luk. 21:34) Dusrem, ti niraxi aslear pasun mittingek ani porgottnnek ieta dekhun te tika xabaski ditole. Ani tisrem, tichi poristhiti bore bhaxen somzon ghetlea uprant tika bhuzvonn diunk ani Jehova ticho mog korta mhunn khatri diunk te Bible uzar kortole.—Gal. 2:20.
JOBACHEA PUSTOKANTLEAN FAIDO MELLOUN GHEIT RAVAT
16. Jobachea pustokantlean faido mellot ravonk ami kitem korunk zata?
16 Jobachea pustokacho obheas kelʼlean amkam kitlo faido zaunk xokta nhoi! Zoxem, amcher dukh-tras ietat tednam Dev te kiteak addaina ani trasanchea vellar pasun ami sosnikai koxi dakhounk zata tem ami fattlea lekhant polloilem. Toxench dusreank bore toren solʼlo diunk zai zalear, Jobachea tin sangateanchi dekh apnnaunchea bodlek, ami Elihuchi dekh koxi apnnaunk zata tem ami polloilem. Tor dusreank solʼlo diunchea poilim Jobachea pustokantlim lisanvam ami ugddasak haddunk zatat. Jobachem pustok ami borench poilim vachlolem zalear ami tem porot vachunk zata. Oxem kelʼlean tem boroilʼlem tednam jitlem faideachem aslem, titlench faideachem atam-i asa mhunn amkam kollon ietolem.
GIT 125 Doia Dakhoitat Tim Khuxal!
a Dev khoincheach munxak nitivont mhunn lekhina ani tea pasot konnuch taka khuxal korunk xokona, hem khottem chintop eka noxttea dutan Elifazachea monant ghatlem oxem dista. Elifazan tem sot mhunn manun ghetlem ani to Joba lagim uloilo tea dor ek pavtti tannem taka hea vixim sanglem.—Job 4:17; 15:15, 16; 22:2.