Jehova Bhaxen Khaltim Zaiat

1. Jehova khalto asa hem zannam zalʼlean ami kiteak ojap zatat?

ODHIKAR aslolea munxank polloitana, te khalti asat oxem tumkam dista kai? Na nhoi! Punn Jehova, Sorvpodvedar Dev zaunui khalti asa. (St. 113:5-8) Khorem mhunnttlear, to khaltikaien bhorlolo asa. Tachea bhitor matui gorv na. Tor hea lekhant Jehova khaltikai koso dakhoita tacheo char vatto polloum-ia. Toxench, Jezun Jehovachea khaltikaiechi dekh koxi ghetli tem zannam zaum-ia. Hacher dhean dilolean ami Jehovak anik lagim soronk pavtolim ani tachea khaltikaiechi anik bore toren dekh gheunk pavtolim.

AMI JEHOVA LAGIM SOMPEPONNIM ULOUNK XOKTAT

2. Stotr 62:8-antlean amkam Jehova vixim kitem kolltta? (Chitr pasun polloiat.)

² Gorvixtt lokam lagim ulovop sompem asona. Tim apnnakuch dusream poros borim oxim lekhtat dekhun, dusrim tanchea lagim ulounk fattim-fuddem sortat, vo tanchea thaun poisuch ravtat. Punn Jehova toso nhoi! Amcho sorgincho Bap, khalti asa dekhun to amkam aplea lagim ulounk ani amchea kallza-monant kitem asa tem taka sangonk ieukar dita. (Stotr 62:8 vachat.) Toxench aplea bhurgeank kosle uske asat tem ek mogall bapui zannam zaunk sodhta tea toren, Jehova amchim magnnim aikonk sodhta. Ani tannem zaitea zannanchim magnnim Bible-ant boroun pasun dovorleant. Hea vorvim, ami tachea lagim ukteponnim uloilʼlim taka zai mhunn kolltta. (Josh. 10:12-14; 1 Sam. 1:10-18) Punn thodde pavtti Jehova lagim ulounk ami purtim nant oxem amkam dista zalear kitem?

3. Ami chukonastana tachea lagim magnnem kelolem Jehovak zai mhunn ami kiteak khatri dovrunk zata?

³ Ami Jehova lagim ulounk purtim nant, oxem amkam dislear pasun ami tachea lagim magnnem korunk zai. Kiteak? Sanddlolea putachi vopar ugddas korat. Poschatap kelea uprant, apunn bapai lagim porot vochonk purto na oxem taka distalem. Punn to porot gelo tednam, tachea bapain kitem kelem? Jezun sanglem toxem, to pois thaun ieta tem polloun tachea bapain “dhanvon vochon aplea putak veng marli, ani to mogan tache ume gheunk laglo.” (Luk. 15:17-20) Jehova pasun tea mogall bapai sarko asa. Amchea chukink lagon ami dukhi astat ani tachea lagim magnnem kortat tednam, to rokddoch ani dhean diun amchem aikota. (Vil. 3:19, 20, NW) To khalti asa dekhun to amkam doia-maia dakhoita, tem mhunnttlear, to amcho mog korta ani amkam bhogxileant mhunn amkam khatri dita. (Iz. 57:15) Hea toren eka orthan, to ‘dhanvon amchea lagim ieta.’ Aiz Jehova hem koxem korta? To choddxe pavtti vhoddil, sobhentlim bhav-bhoinnam ani sotant aslolea amchea famili vorvim oxem korta. (Jak. 5:14, 15) Karonn ami tachea lagim sorlolim taka zai.

4. Lokank Jezu lagim ulounk kiteak sompem aslem?

⁴ Jezu aplea Bapachi dekh gheta. Jezu aplea Bapai bhaxen khalti asa. Tea pasot to hea prithumer aslo tednam lok tache lagim sompeponnim ulounk xoktale ani taka prosn vicharunk fattim soronasle. (Mk. 4:10, 11) Toxench, khoinchea-i vixoi-acher Jezu tankam prosn vichartalo tednam, aplim chintnam taka sangonk te fattim soronasle. (Mt. 16:13-16) Tea bhair, te chuktale tednam Jezu tancher ragar zait mhunn te bhieunk nant. Karonn Jezu doiall ani pasiens dakhoupi mhunn tankam khobor asli. (Mt. 17:24-27) Jezun aplea Bapachi itlea bore toren dekh ghetli dekhun tache pattlavdar Jehovak anik bore toren vollkhonk pavle. (Ju. 14:9) Tanchea disamnim aslolea dhormik fuddaream sarko Jehova krur ani gorvixtt nhoi, punn to khalti asa ani te tachea lagim sompeponnim ulounk xoktat mhunn tankam kollon ailem.

5. Ami khaltim aslear dusreank amchea lagim sompeponnim ulounk koxi modot zatoli?

⁵ Ami Jehovachi dekh koxi gheunk zata? Ami khaltim asat zalear dusrim amchea lagim sompeponnim ulounk pavtolim. Jim munxam khaltim asonant tim dusreanchi nattkai kortat, gorvixtt astat ani dusreank bhogxinant. Hea pasot dusrim tanchea thaun poisuch ravtat. Punn khaltim astat tim munxam dusream sangata doiall toren ani pasiensan vagtat ani dusreank bhogxitat. Hea pasot dusrim tanchea lagim sompeponnim ulounk pavtat. (Kol. 3:12-14) Vhoddilamnim khas korun khatri korunk zai ki sobhentlim bhav-bhoinnam tanchea lagim sompeponnim ulounk xoktat. Oxem korunk tannim bhav-bhoinnam sangata vell sarunk zai. Zoxem, tannim video-conference-a udexim mittingek hajir zaunchea bodlek, tanchea lagim ghoddtta zalear, Raj-ghorant mittingek hajir zaunk zai. Toxench ghoddtta zalear, tannim bhav-bhoinnam sangata porgottnni korunk zai. Oxem kelʼlean, tim vhoddilank anik bore toren vollkhonk pavtolim ani goroz asa tednam tanchea lagim sompeponnim ulounk xoktolim.

JEHOVA DUSREANK SOMZON GHETA

6-7. Jehovan aplea sevokanchem aikolem, hachim thoddim udharonnam diat.

⁶ Choddxim gorvixtt munxam dusreank somzon ghenant. Punn Jehova khalto asa dekhun to dusreank somzon gheta. To sogleam poros vorto ani sodanch sarko aslear pasun to dusreanchem aikonk sodanch toiar asta. Zoxem, Moizesachi bhoinn Miriama sangata kitem ghoddlem tacher dhean diat. Ti ani Aaron, Devan nemlolo fuddari Moizesa add gunngunnlim. Oxem korun tinnem khorem mhunnttlear Jehovacho opman kelo. Tednam Jehovak khub rag ailo ani tannem Miriamak koddachi pidda dili. Punn uprant Miriamak modot kor mhunn Aaronan Moizesa lagim vinoti keli. Ani Miriama pasot Moizesan Jehova lagim vinovnni keli. Tednam Jehovan apnnem tharailam toxench zaunk zai oxem chintunk na, punn to khalti asa dekhun tannem Moizesachi vinovnni aikon Miriamak bori keli.—Lok. 12:1-15.

⁷ Jehova kitlo khalto tem amkam Raza Hezekiachea jivitant kitem ghoddlem tachea voilean pasun kolltta. Jehovan aplea provadea vorvim Hezekiak sanglem ki to beginuch mortolo. Tednam apleacher doia kor mhunn Hezekian roddon Jehovak vinoti keli. Tea vellar Jehovan taka doia dakhoili ani to anik 15 vorsam jielo. (2 Raz. 20:1, 5, 6) Tor Jehova khalto asa dekhun to amkam doia-maia dakhoita ani amchem aikonk toiar asta.

8. Jezu dusreank somzon gheta mhunn amkam koxem kolltta? (Marku 3:1-6)

⁸ Jezu aplea Bapachi dekh gheta. Prithumer astana Jezun lokanchi poristhiti somzon ghetli ani tankam borim korunk fatti soronk na. Udharonnak, dhormik fuddaream koddlean virodh aslearui tannem lokank Sabathachea disak borim kelim. (Marku 3:1-6 vachat.) Ani Kristi sobhecho mukheli zalʼlean to aizui amkam somzon gheta. Udharonnak, konnui gombhir patok adarta zalear, Jezu pasiens dakhoita ani tachem jivit bodlunk taka zaiteo sondheo dita.—Prok. 2:2-5.

9. Amchea chintpa ani korneam vorvim ami dusreank somzon ghetat mhunn koxem dakhounk zata? (Chitram pasun polloiat.)

⁹ Ami Jehovachi dekh koxi gheunk zata? Ami Jehova bhaxen khaltim asonk zai ani amchea chintpa ani korneam vorvim dusreank somzon ghetat mhunn dakhounk zai. (Jak. 3:17) Udharonnak, Jehovachi dekh ghetat tim avoi-bapui tanchea bhurgeam lagim jem korunk zaina tem tannim korchem mhunn opekxa korinant. Hea vixim Jakoban borem udharonn dovorlam. Tem amkam Utpoti 33:12-14-nt vachunk melltta. Toxench avoi-bapaimnim aplea bhurgeam modem sor korunk zaina. Kristi vhoddilamnim pasun dusreank somzon gheunk zai. Oxem korunk ek vatt mhunnttlear, vhoddilanche mittingek, choddxea vhoddilanchem chintop ek-sarkem asa ani tem Bible-achea totvam add na zalear, dusreank somzon gheupi vhoddil aplem chintop tanchea poros vegllem aslear pasun tankam tenko ditolo. (1 Tim. 3:2, 3) Tea bhair, amchem chintop dusream poros vegllem aslear pasun tim kitem chintʼtat, ani tankam toxem kiteak dista tem somzonk ami proitn korunk zai. (Rom. 14:1) Tor ‘ami somjikaiechim mhunn sogleank dison ieunk zai.’—Filp. 4:5.

JEHOVA PASIENS DAKHOITA

10. Jehovan pasiens koxem dakhoilem?

¹⁰ Gorvixtt munxam pasiens dakhoinant mhunn tumi polloilam astolem. Punn Jehova itlem pasiens anik konnuch dakhoina. Hem ami kiteak mhunnonk zata? Noah-chea disamnim noxtteancho nas korunk apunn 120 vorsam pasiensan ravtolo mhunn Jehovan sanglem. (Ut. 6:3) Hea vorvim Noah-k aplea bhurgeank vaddounk ani tanchea adaran arkpett bandunk sondhi mellʼlli. Toxench Sodom ani Gomoracho nas zatolo mhunn Abrahamak kollʼllem tednam, tannem Jehovak eka-fattlean-ek prosn vicharle. Punn Jehovan tachem pasiensan aikolem. Tachea zagear ek gorvixtt munis aslo zalear to oxem mhunnttolo aslo, ‘Mhaka vicharunk tum konn?’ Punn Jehova khalto asa dekhun to Abrahama sangata pasiensan vaglo.—Ut. 18:20-33.

11. 2 Pedru 3:9-a pormonnem, Jehova pasiens kiteak dakhoita?

¹¹ Amchea disamnim pasun Jehova pasiens dakhoita. Xevott haddunk tannem ek dis tharaila. Punn tea disachi to pasun pasiensan vatt polloita. “Karonn konnanchoch nas zalʼlo taka naka. Tachea bodlek, sogleank poschatap korunk sondhi mellʼlloli taka zai.” (2 Pedru 3:9 vachat.) Jehovan pasiens dakhoilʼlean koslo-i faido zala kai? Hoi! Lakʼkhamnim lokank Jehovachim ixttam zaunk sondhi mellʼllea. Toxench anikui lakʼkhamnim lok tachim ixttam zatolim mhunn amkam bhorvonso asa. Punn Jehova sodankal pasiens dakhouncho na. To lokancho mog korta tem khorem, punn to vaittponn sodankala pasot sosun gheuncho na.—Hab. 2:3.

12. Jezu Jehova bhaxen pasiens koso dakhoita?

¹² Jezu aplea Bapachi dekh gheta. Hozaramnim vorsam thaun Jezu Jehova bhaxen pasiens dakhoit asa. Jehova ani visvaxi munxam vixim Soitan fotti posrait asa tem Jezun polloilam. (Ut. 3:4, 5; Job 1:11; Prok. 12:10) Toxench munxakullak kitle dukh-tras sosunk poddttat tem to polloita. Tor ‘Soitanachea kamancho nas korun uddounk’ to kitlo axeun ravla tea vixim ami chintunk zata. (1 Ju. 3:8) Torui to pasiens dakhoita. Tor Jehovan taka Soitanachea kamancho purnn toren nas korunk sangom meren, pasiens dakhounk taka koxi modot zata? Ek karonn mhunnttlear, to khalto asa. Xevott haddunk sarko vell khoincho tem fokot Jehova sangonk xokta mhunn Jezu zannam.—D.I. 1:7.

13. Jezu koxe toren ani kiteak aplea apostlam sangata pasiensan vaglo?

¹³ Toxench hea prithumer astana, Jezu aplea apostlam sangata pasiensan vaglo. Zoxem, tanchea modem konn vhodd asa kai mhunn te porot-porot vad-vivad kortale tednam, te kednanch sudhorchenant oxem Jezun chintunk na. (Luk. 9:46; 22:24-27) Punn tannem pasiens dakhoilem, karonn te fuddarak bodoltole mhunn taka visvas aslo. Tumi-i ekuch chuk porot-porot kelea kai? Hoi zalear, amcho Raza khub khalti asa ani pasiens dakhoita mhunn tumi upkari nant kai?

14. Anikui chodd pasiens dakhounk ami kitem korunk zai?

¹⁴ Ami Jehovachi dekh koxi gheunk zata? Ami “Kristachem mon” apnnaitat tednam Jehova bhaxen chintunk ani tachea bhaxen kam korunk amkam modot zatoli. (1 Kor. 2:16) Punn ami Kristachem mon anik bore toren koxem apnnaunk zata? Oxem korunk ami Bore Khobrechim pustokam vachunk zai ani tim vachtana, Jezun kitem kelem ani toxem kiteak kelem tea vixim bariksannen niallunk zai. Tea bhair, Jezu bhaxen khalti zaunk ani pasiens dakhounk amkam modot kor mhunn Jehova lagim magonk zai. Jitlem chodd ami Kristachem mon apnnaitolim, titlim chodd ami Jehova bhaxen chintunk pavtolim ani amchea toxench dusream sangata anikui pasiensan vagonk pavtolim.—Mt. 18:26-30, 35.

JEHOVA KHALTEANCHER DHEAN DITA

15. Jehova khaltea munxancher dhean dita mhunn dakhounk thoddim udharonnam diat. (Stotr 138:6)

¹⁵ Stotr 138:6 vachat. Jehova Dev hea vixvant Sorvpodvedar, torui to khaltea munxancher khas dhean dita! Ami adlea kalla voilea thoddea munxanchim udharonnam polloum-ia. Lok ghoddie tankam valorachim mhunn lekhinaslo. Punn Jehovan tancher dhean dilem. Tantuntlea thoddea zannam vixim ami titlim chintinant astolim. Punn Jehovan tanchea vixim Bible-ant boroun dovorlam. Udharonnak, Izak ani Jakobachea ghorabeant sumar 125 vorsam seva korpi Debora vixim chintat. Hea visvaxi baile vixim Bible-ant titlem kainch diunk na. Punn Jehovan Moizesak tiche vixim osli mahiti borounk prerit kelo, jea vorvim ti Jakob ani tache familik kitli opurbaiechi asli tem kolltta. (Ut. 24:59; 35:8) Xekddeamnim vorsam uprant, Jehovan Davidak Izraelacho raza nemlo. Tea vellar, David tornatto aslo ani to aplea bapaichea hinddachi rakhonn kortalo. (2 Sam. 22:1, 36) Toxench, Jezuchea zolma vixim Jehovan sogleam-von poilim sadea munxank, tem mhunnttlear thoddea gonvlleank kolloilem. Tannem devdutam vorvim Bethlehemant Mesias zolmola mhunn tankam sanglem. (Luk. 2:8-11) Tea bhair, Juze ani Marie, Jezuk devmondirant gheun gelim tednam, Jehovan zannttea Simeonak ani Anak, aplea Putak pollouncho sueog dilo. (Luk. 2:25-30, 36-38) Hantuntlean ‘Sorvespor sogleam-von xrextt, torui to khalteank polloita’ mhunn kolltta!

16. Jezun aplea Bapai bhaxen khaltea lokancher dhean koxem dilem?

¹⁶ Jezu aplea Bapachi dekh gheta. Jehova bhaxen, Jezun khaltea lokancher dhean dilem. Tannem ‘xikop naslolea ani chaltea’ lokank Devachea Rajea vixim xikoilem. (D.I. 4:13; Mt. 11:25) Toxench, tannem duentank oxe toren bore kele ki tea vorvim to tancho mog kortalo ani tankam man ditalo mhunn tannem dakhoilem. (Luk. 5:13) Tea bhair morchea adlea rati tannem aplea apostlanche paim dhuile, jem kam ek chakor kortalo. (Ju. 13:5) Toxench sorgar voichea poilim tannem aplea soglea xisank, tem mhunnttlear, amkam pasun porgott korun lokancho jiv salvar korchem sogleam-von mhotvachem kam diun man dila.—Mt. 28:19, 20.

17. Ami dusreancho mog kortat ani tankam man ditat mhunn koxem dakhounk zata? (Chitr pasun polloiat.)

¹⁷ Ami Jehovachi dekh koxi gheunk zata? Ami sogleancho mog kortat ani tankam man ditat. Eklo khoinchea-i desacho vo zaticho asum, to pollounk koso-i disom, to xiklolo asum vo nasum, ami sogleank Rajeachi bori khobor sangtat. Toxench, ami soglea bhav-bhoinnankui man ditat. Ami tankam amchea poros vortim mhunn lekhtat, zaum amchea lagim tanchea poros chodd zobabdari asum vo umkem kam tanchea poros bore toren kortat asum. (Filp. 2:3) Hea ani her vattamnim ami “poilim fuddem soron” eka-mekak man ditat tednam, Jehova khub khuxal zata.—Rom. 12:10; Zef. 3:12.

18. Tumi kiteak Jehovachea khaltikaiechi dekh gheunk sodhtat?

¹⁸ Ami amchea mogall Devachea khaltikaiechi dekh ghetat tednam lok amchea lagim sompeponnim ulounk pavtolo, ami dusreank anikui somzon ghetolim ani chodd pasiens dakhoitolim. Toxench, ami Jehova bhaxen dusreancho mog kortolim ani tankam man ditolim. Oxem kelʼlean ami Jehovache nodren anik moladik zatolim!—Iz. 43:4.