Tumkam Ugddas Asa?

Tumi hea vorsachim Pahrogopur masikam dhean diun vachleant kai? Toxem zalear hea prosnanche zobab tumi diunk xoktat kai tem polloiat:

Ami Jehovak mhoima kiteak ditat?

Ami Jehovak khub resped ditat, tacho khub mog kortat ani dusrim Jehova vixim zannam zalʼlim amkam zai dekhun ami Jehovak mhoima ditat.—w25.01, p. 3.

Konnem-i amkam dukhoilam zalear, tankam bhogsunk ami kitem korchem?

Amkam koxem bhogta tem ami kallzantuch dovorchem nhoi; toxench tancho rag gheun ravonant tednam, jem ghoddlam tea vixim ami chintchimnant ani porot amchem jivit khuxalkaien jieunk suru kortolim.—w25.02, p. 15-16.

Tornattea bhavam pasot Marku ek borem udharonn kiteak zaun asa?

Marku ap-khuxen bhav-bhoinnanchi seva korunk fuddem sorlo. Eka vellar Pauluchea vagnnukek lagon Markuk khub vaitt dislem ani dukh bhogli. Punn tannem aplea bhav-bhoinnanchi seva korop bond korunk na. Tannem Paulu ani onnbhov aslolea her bhav-bhoinnam sangata apli ixttagot ghott keli.—w25.04, p. 27.

“Hanvem tankam tujem nanv kolloilam,” oxem Jezun mhunnttlem tednam to kitem sangonk sodhtalo? (Juanv 17:26)

Devachem nanv Jehova mhunn Jezuchea xisank poilim thaunuch khobor asli. Tor Jehova koslo Dev zaun asa tem Jezun somzailem. Toxench, prithum ani munxam pasot Jehovacho udʼdhex kitem asa, tannem kitem-kitem kelam, to fuddarak kitem kortolo ani taka kosle gunn asat, tem tannem aplea xisank sanglem.—w25.05, p. 20-21.

Ami khaltim asat zalear kitem manun ghetolim?

Amkam thoddeo vostu khobor nant mhunn ami manun ghetolim. Zoxem, xevott kednam ietolo vo tea vellar Jehova amkam koso modot kortolo, amchem jivit faleam koxem astolem vo Jehova amkam kitle bore toren vollkhota hem amkam khobor na mhunn ami manun ghetolim.—w25.06, p. 15-18.

Eka lekha thaun vo jahir bhaxonna thaun tumkam koso faido zaunk xokta?

Ami amkanch vicharunk zata: ‘Hem sot somzaunk kosle purave dileat? Hem sot xikoitana hantunt aslolem khoinchem udharonn hanvem uzar korunk zata? Tantunt aslolem sot hanvem konnank sangonk zata?’—w25.07, p. 19.

Jehovan jea toren Davidak bhogxilo tantuntlean tachea bhogsonnea vixim ami kitem xiktat?

Davidan gombhir patkam kelʼlim. Punn tannem kallzantlean poschatap kelea uprant Jehovan taka bhogxilo. (1 Raz. 9:4, 5) Tor Jehova amchim patkam bhogxita tednam to tim porot voir kaddina vo tea patkank lagon amkam porot kednanch khast laina.—w25.08, p. 17.

Bible-antli umkich xikounn somzonk vidʼdheartheak kotthin zata zalear ami kitem korchem?

Bible-antli umkich xikounn somzonk taka kotthin zata zalear, ami tea vixim bhasabhas korit ravchi nhoi. Punn ami obheas chaluch dovrunk zai ani tea mudʼdea vixim uprant ulounk zai.—w25.09, p. 24.

Bible-ant, patkak ‘fosoupachi xokti’ asa mhunn sanglam. (Heb. 3:13) Hacho orth kitem?

Patok amkam vaitt kamam korche tallnnent ghalta. Toxench Jehova amcho mog korta kai na ho dubhav amchea monant haddit ravta. Khorench, patkak ‘fosoupachi xokti’ asa.—w25.10, p. 16.

Ami Jehovak lagim sortolim tea toren magnnem korunk khoincheo tin vostu korunk zatat?

(1) Ami Jehovachea gunnam vixim chintunk zata. (2) Ami sodʼdheak koslea oddchonneancho fuddo kortat tea vixim chintun, tea pasot magonk zata. Zoxem ami konnankui bhogsunk zai kai? (3) Ami magnneant zaito vell sarunk zata. Chodd vell magnnem kelear amkam kitem dista tea vixim ami Jehovak chodd sangonk pavtolim.—w25.10, p. 19-20.

Ami zannttea bhav-bhoinnank koxi modot korunk zata?

Ami tankam mellonk vo fon korunk zata. Tankam dotorager voichem poddtta tednam ami tanchea sangata vochonk zata. Vo ami tanchea sangata veg-vegllea toren porgottnni korunk zata.—w25.11, p. 6-7.

Kristanvanchem kazar Jehovak man haddtta toxem asonk tannim kitem korop mhotvachem?

Sorkarache kaide pallat. Tumchea kazarak povitr xokteche gunn dison ietole mhunn khatri korat. Nhespa-dispa vixim mannsugen vagat ani Jehovak manvonant tosleo riti-rivazo nakarat. Kazarachi toiari kortana, ukteponnim uloiat ani somjikai dakhoiat.—w25.12, p. 21-24.