Tumchea Kazara Vorvim Jehovak Man Haddat

1-2. Kazar zaunchim asat tanchea pasot Jehovak kitem zai?

TUMI beginuch kazar zaunchim asat kai? Hoi zalear, tumi ekdom khuxal astolim ani kazarachi toiari korunk ekdom bizi astolim. Jehova pasun tumchea pasot khuxal asa. Ani tumchem kazar,a toxench tumchem kazari jivit pasun khuxal aslolem taka zai.—Mho. 5:18; Git. 3:11.

² Tumchea kazarak tumi Jehovak man diunk zai. Jehovak tea disa man kiteak favo ani to tumi koso diunk zata, tem hea lekhant polloum-ia. Ho lekh khas korun, kazar zaunchim asat tanchea pasot asa. Punn kazarak hajir zatoleank, toxench zanchea lagim konnui kazara vixim solʼlo magta tankam pasun hea lekhant dilʼlea totvam vorvim modot zatoli.

JEHOVAK KITEAK MAN DIUNK ZAI?

3. Aplea kazarachi toiari korta tea Kristanvan kitem monant dovrop gorjechem, ani kiteak?

³ Aplea kazarachi toiari korta tea Kristanvan Bible-antlea totvam adarit nirnnoi gheunk zai. Karonn kazar Jehovan ghoddoun haddlam. Tannem poilem zoddpem Adanv ani Evechea kazarachi manddavoll keli. (Ut. 1:28; 2:24) Tor kazarachi toiari kortat tannim Jehovachem chintop monant dovrop khub mhotvachem.

4. Tumi anik khoinchea karonnak lagon Jehovachem chintop monant dovrunk zai?

⁴ Jehovachem chintop monant dovrunk anik ek mhotvachem karonn mhunnttlear, to tumcho sorgincho Bap ani sogleam-von boro Ixtt. (Heb. 12:9) Tachea sangata tumchem natem sodanch ghott aslolem tumkam zai. Hea pasot tumchea kazara disa vo her khoinchea-i disa tumkam oxem kitench zalʼlem naka, jea vorvim tumcho Ixtt Jehovak dukh zatoli. (St. 25:14, NW) Tor Jehovan tumchea pasot kitem kelam ani fuddarak kitem kortolo tem ugddas dovorlolean, tumchem kazar taka man haddtta toxem korunk tumi vavr kortolim, ani hea toren taka upkari asat mhunn dakhoitolim.—St. 116:12.

JEHOVAK MAN KOSO DIUNK ZATA?

5. Kazara disa pasot toiari kortana tumkam Bible-antlean koxi modot zaunk xokta?

⁵ Kristanvanchim kazaram koxim asonk zai tea vixim Bible-ant kaide dilʼle nant. Tumchi poristhiti, sonskruti ani tumkam kitem avoddtta tea toren tumi kazarachi manddavoll korunk zata. Toxench, kazara vixim aslolea sorkarachea kaideank man diat. (Mt. 22:21) Tumi kazara vixim kosle-i nirnnoi korum, te Bible-achea totvam pormonnem aslear Jehovak man mellttolo ani to khuxal zatolo. Tor tumi Bible-antlim khoinchim totvam monant dovrunk zai?

6. Kazara vixim sorkarache kaide pallop kiteak gorjechem?

⁶ Sorkarache kaide pallat. (Rom. 13:1, 2) Choddxea desamnim sorkaran kazara pasot kaide keleat. Kristanvamnim te pallunk zai. Tor kazara poilim, tumchea desant te kaide kitem asat tem zannam zaiat. Hea vixim tumkam anik mahiti zai zalear vo koslo-i prosn aslear, vhoddilanchi modot gheunk fatti soronakat.b

7. Kazarache manddavollintlean kitem dison ieunk zai, ani hea pasot kitem korunk zai?

⁷ Jehovak mhoima melltta mhunn khatri korun gheiat. (1 Kor. 10:31, 32) Tumchea kazarak sonvsaracho sobhav nhoi, punn povitr xokteche gunn dison ieum-di. (Gal. 5:19-26) Bible-a pormonnem dadlo familicho mukheli mhunnttoch, kazar khuxalkaiechem ani Jehovak mhoima melltta toxem astolem mhunn khatri korun ghevop, novreachi zobabdari zaun asa. Oxem korunk taka koxi modot zaunk xokta? Kazarak, mogan ani respedan dilʼlea Bible adarit bhaxonna vorvim, kazar Jehova thaun ek dennem zaun asa ani kazari jivit samballop kitlem mhotvachem tem sogleank kolltta. Hea pasot choddxim Kristanvam aplem kazarachem bhaxonn Raj-ghorant dovortat. Tumkam-i oxem korunk zai zalear, tumi sobhechea vhoddilank zata titlea begin chitt borounk zata.

8. Tumchea kazarak sonvsaracho sobhav dison iena mhunn tumi koxi khatri korunk zata? (Romkarank 13:13)

⁸ Romkarank 13:13 vachat. Kazarachea bhaxonna uprant pasun sonvsaracho sobhav dison iena mhunn tumi koxi khatri korunk zata? “Hispa bhair mouza-mosti” hea utrak uzar kelʼlem Grik utor, chodd soro pievop ani rat-bhor songit vazovop haka lagu zatalem. (Romkarank 13:13-nt “wild parties” ho study note polloiat.) Tumi soro diunk sodhtat zalear, konnuch chodd piena mhunn khatri korun gheiat.c Toxench, songitacho avaz dusreank ulounk mellttolem toso dovrat. Ani tumi vinchun kaddlolem songit ani tantuntlim utram konnankuch addkholl zainant toxim asat mhunn khatri korun gheiat.

9. Tumchea kazarak tumchim ghorchim vo ixttam ulounk sodhtat zalear vo her koslem-i monoronjon dovorlam zalear tumi kitem ugddas dovrunk zai?

⁹ Tumchea kazarak tumi tumcho video vo fottu dakhounk sodhtat, vo tumchim ghorchim vo ixttam ulounk sodhtat, vo her koslem-i monoronjon dovorlam zalear, tumi kitem ugddas dovrunk zai? Oxem kelʼlean tumcho kazaracho dis anikui khas zatolo to khoro, punn hea vorvim sogleank urba mellttoli mhunn tumi khatri korunk zai. (Filp. 4:8) Hea pasot svotak vicharat: ‘Oxem kelʼlean dusreank man mellttolo kai? Kazarachea disak man mellttolo kai?’ Ani sogleam-von mhotvachem mhunnttlear ‘Jehovak man mellttolo kai?’ Thoddim fokannam korop kaim vaitt na, punn oslim fokannam korop sarkim nhoi, jim Kristanvank sobonant. Zoxem, burxim fokannam korop. (Ef. 5:3) Tumchi famil vo ixttam ulounk sodhtat zalear, tannim koslea torechem ulovop korchem nhoi tem tankam adim fuddench sangon dovrat. Ani tim tumchem aikotolim mhunn khatri korun gheiat.

10. Kazara disa pasot toiari kortana Kristanvamnim mannsugen kiteak vagonk zai? (1 Juanv 2:15-17)

¹⁰ Mannsugen vagat. (1 Juanv 2:15-17 vachat.) Kristanvam dusreanchem dhean apnnacher haddinant ani Jehovak man ditat tednam, Jehova khuxal zata. Tor mannsugen vagtat tim Kristanvam kazarachea disa pasot chodduch poixe moddchimnant ani ‘shov marchimnant.’ Kazar sadem dovorlolean koso faido zaunk xokta? Hea vixim Norway-ntlo bhav Mike sangta: “Ami rinn gheunk na ani hea pasot ami pioneer seva korit ravonk pavlim. Amchem kazar sadem aslem tem khorem, punn tem borem ani ugddas dovorpa sarkem aslem.” Toxench, Bharotantli bhoinn Tabitha sangta: “Kazar sadem dovorlolean amkam chodd toiari korunk poddonk na. Tor amkam ani amchea familik pottonant tosle vixoi khub unne asle, ani hea pasot amkam chodduch usko korunk poddonk na.”

11. Vhokol-novrean tanchem nhesop-disop moriadichem asa mhunn koxi khatri korunk zata? (Chitram pasun polloiat.)

¹¹ Tumi kazara disak kitem nhestolim tem tumi tharailam kai? Tumi ekdom borim dislolim tumkam zai nhoi? Bible kallar pasun vhokol-novro apunn koxim distat tacher dhean ditalim. (Iz. 61:10) Tumchea kazarache kopdde tumi her disak nhestat tachea poros matxe veglle asot, punn te moriadiche asonk zai. (1 Tim. 2:9) Ani tumi hem-ui ugddas dovrunk zai ki tumchem nhesop-disop sogleam-von chodd mhotvachem asonk zaina.—1 Ped. 3:3, 4.

12. Vhokol-novrean Bible totvam add asloleo riti-rivazo kiteak nakarunk zai?

¹² Devak manvonant tosleo riti-rivazo nakarat. (Prok. 18:4) Soitanachea sonvsarant zatat tea kazaramnim osleo riti-rivazo asat jeo ghaddiponn, ondh-visvas ani khottea dhormak zuddloleo asat. Punn oslea mhellea vostum thaun pois ravat mhunn Jehova xittkaita. (2 Kor. 6:14-17) Tumi ravtat tea zagear jeo riti-rivazo zatat teo tumchean pallunk zatat vo na hea vixim tumkam dubhav asa zalear, sodh korat ki teo khoim thaun suru zaleat. Tea bhair, Bible-antlim totvam tea vixim kitem sangtat tem-ui polloiat. Oxem kelʼlean tumkam ek boro nirnnoi gheunk modot zatoli.

13. Tumi gift-am vixim Jehovachem chintop apnnaitat mhunn koxem dakhounk zata?

¹³ Tumi ravtat tea zagear lok vhokol-novreak gift ditat kai? Girest asat tim vhoddlo gift di-it ani gorib asat tim lhan gift di-it. Bible Kristanvank dusreank diunk urba dita ani oxem kelʼlean amkam khuxalkai melltta. (Mho. 11:25, NW; D.I. 20:35) Punn tumi oxem kitench korchem nhoi, jea vorvim dusreamnim tumkam gift diunkuch zai oxem tankam distolem. Toxench, tannim ek lhan gift dilear to unnea molacho mhunn lekhinakat. Dusrim tumkam tanchea tanki pormonnem ani kallzantlean jem kitem ditat tea pasot tumi upkari asonk zai. Oxem kelʼlean tumi Jehovachi dekh ghetat mhunn dakhoitolim.—2 Kor. 9:7.

TUMI ODDCHONNEANCHO FUDDO KOSO KORUNK XOKTAT?

14. Thoddeank koslea oddchonneancho fuddo korunk poddtta?

¹⁴ Jehovak man melltta tea toren kazar dovrunk thoddeo oddchonneo ieit. Zoxem, tumkam tumchem kazar sadem dovrunk kotthin zait. Hea vixim Solomon Islands-antlo bhav Charlie mhunntta: “Kazarak konnank apounchem ani konnank nhoi, tem tharaunk amkam sompem naslem. Karonn amkam zaitim ixttam asat ani amchea sonskrutint dor eklo opekxa korta ki taka apoitolech mhunn.” Tabitha zache vixim ami poilim uloilʼlim, ti sangta: “Hanga kazarak zaitea lokank apoitat. Punn ami fokot sumar 100 lokank apoitolim mhunn tharailʼlem. Ani ho nirnnoi amchea avoi-bapaik manun gheunk thoddo vell laglo.” Toxench Bharotantli bhoinn Sarah sangta: “Amchea hanga thoddo lok, kazarak kitlo khorch kela tem polloitat. Mhojea cousin-amnim tanchea kazarak zaito poiso moddlolo. Tor mhojem kazar tanchea poros anik borem zaunk zai oxem hanv chintunk laglem.” Tor oslea vo her oddchonneancho tumi koso fuddo korunk zata?

15. Kazarachi toiari kortana magnnem korop kiteak chodd mhotvachem?

¹⁵ Kazarachi toiari kortana magnnem korat. Tumkam aslolea koslea-i uskeam vixim ani tumkam kitem dista tea vixim tumi Jehova lagim ukteponnim ulounk zai. (Filp. 4:6, 7 ani “in everything” ho study note polloiat.) Toxench bore nirnnoi korunk, usko zata tednam xant ravonk, ani tumchea famili lagim ulounk dhir di mhunn tumi Jehova lagim modot magonk zata. (1 Ped. 5:7) To tumchem magnnem aikota tem polloun, tacher tumcho visvas anikui ghott zatolo. Ami poilim uloilʼli bhoinn Tabitha sangta: “Ami ani amchi famil kazara vixim uloitana eka-mekachem aikonk toiar astolim kai na mhunn amkam usko aslo. Tea pasot ami kazara vixim ulounk bostalim title-i pavtti, sogleant poilim magnnem kortalim. Tednam Jehovan amkam modot keli ani amchea modem xanti urli tem ami pollounk xoklim.”

16-17. Kazarachi toiari kortana ukteponnim uloilʼlean koso faido zaunk xokta?

¹⁶ Ukteponnim uloiat ani somjikai dakhoiat. (Mho. 15:22) Kazara vixim tumkam dogainkui zaite nirnnoi gheunk poddttole. Zoxem, kazar khoinchea tarker astolem, tumi kitle poixe moddttolim, konnank apoitolim ani her zaiteo vostu. Tor khoincho-i nirnnoi gheunchea poilim tumi kitem korunk sodhtat, ani tea poristhitik khoinchim Bible-antlim totvam lagu zatat tea vixim sangata mellon uloiat. Toxench, onnbhov aslolea bhav-bhoinnam thaun mellʼllolea solʼleam vixim pasun uloiat. Tumi kazara disak umkench kitem korunk sodhtat zalear, tumi eka-meka lagim ani famili lagim uloitat tednam, doiall toren ani somjikaien uloiat. Tumchem kazar tumchea famili pasotui khas zaun asa. Tor tumchea avoi-bapaik tumi umkench kitem kelʼlem zai ani tumi tem korunk xoktat zalear, tanchem aikat. Punn tumi toxem korunk xokonant zalear, tankam tea vixim doiall toren ani mogan somzaiat. (Kol. 4:6) Tumcho kazaracho dis khuxalkaiecho ani Jehovak man haddtta toso ascho, ho tumcho mukhel dhei mhunn tankam spoxttponnim sangat.

¹⁷ Tumchim avoi-bapui sotant nant zalear, tumi kazarak kitem korunk sodhtat tea vixim tanchea lagim ulounk tumkam anikui kotthin zait. Punn tumi doiall toren ani mogan tankam somzaunk zata. Bharotantlo bhav Santhosh, hea vixim sangta: “Amchea familik ami Hindu dhormantleo veg-veglleo riti-rivazo kelʼleo zai asleo. Tor ami toxem korchimnant mhunn tankam somzaunk amkam khub vell laglo. Punn tannim sangloleo thoddeo vostu, jeo Bible-antlea totvam add nasleo teo ami manun ghetleo. Zoxem, kazarachem jevonn ami tankam zai toxem dovorlem. Toxench, ami songit ani dance dovrunk na. Karonn tankam tem avoddnaslem. Hea toren bodlav korunk zatale thoim ami te kele.”

18. Kazarak soglem bore toren zaunk tumi kitem korunk zata? (1 Korintkarank 14:40) (Chitr pasun polloiat.)

¹⁸ Bori toiari korat. Oxem kelʼlean soglem manddavollin zatolem ani kazarachea disak tumkam chodd usko zauncho na. (1 Korintkarank 14:40 vachat.) Hea vixim, Taiwan-ant ravpi bhav Wayne sangta: “Kazarachea thoddea disam poilim, ami tea bhav-bhoinnam sangata mitting dovorli, jim amkam kazara disa modot korchim aslim. Kazarachea manddavolli vixim ami tanchea lagim uloilim ani soglem bore toren zaunk tantuntle thodde bhag practice pasun kele.” Toxench, tumi sogleo vostu tharailʼla vellar keleo zalear, tumi kazarak apoileant tankam man ditat mhunn dakhoitolim.

19. Tumchea kazarak soglem manddavollin zatolem mhunn khatri korunk tumi kitem korunk zata?

¹⁹ Kazarak kosleo oddchonneo ieunk xoktat tea vixim poilinch chintlolean, zaiteo oddchonneo pois korunk tumkam modot zaunk xokta. (Mho. 22:3) Udharonnak tumi ravtat tea zagear, apoinaslolo lok kazarak ieta zalear, toxem zaina zaunk tumi kitem korunk zata tem chintat. Toxench, tumchea kazarak kitem zatolem ani tumi umkeoch riti-rivazo kiteak pallinant tem sotant naslolea tumchea soireank khobor asa mhunn khatri korat. Tumi tankam jw.org-acher, “What Happens at a Wedding of Jehovah’s Witnesses?” ho lekh dakhounk zata. Toxench, soglem manddavollin zatolem mhunn khatri korunk, tumi sotant ghott aslolea eka bhavak dekhrekh korpi mhunn vinchun kaddunk zata. (Ju. 2:8) Kazarache manddavolli vixim taka ukteponnim sanglear, tumchem kazar tumi tharailam toxem ani Jehovak man haddtta toxem zaunk to tumkam modot korunk xokta.

20. Vhokol-novrean aplea kazara vixim kitem ugddas dovrunk zai?

²⁰ Kazarachi toiari kortana khub manddavoll korchi asa mhunn chintun tumkam usko zait. Punn hi sogli toiari fokot ekuch disa pasot asa mhunn ugddas dovrat. Karonn hea uprant tumchea kazari jivitachi survat zatoli, zoim tumi sangata mellon Jehovachi seva kortolim. Tor tumchem kazar sadem ani Jehovak man haddtta toxem dovrunk tumchean zata tem soglem korat. Jehovacher visvas dovrat. Tachem margdorxon apnnailear tumchea kazarachi manddavoll bore toren zatoli. Ani zaitea vorsam uprant pasun, tea disacho ugddas korun tumi khuxal zatolim ani tumkam koslich khont bhogchina.—St. 37:3, 4.