ZAGRUT RAVAT!
Refugee Crisis—Lakʼkhamnim Lok Ukraine-antlean Pollon Voita
Febrer 24, 2022, hea disa Russia-n Ukraine-acher zhuz kelem. Hea pasot Ukraine-ant ‘Refugee Crisis’ zale. Hacho orth, zaitea zannank Ukraine soddun dusrea desant vochon asro gheuncho poddlo.a
“Ukraine-achi poristhiti itli bhirankull asli ki hanv utramnim sangonk xokona. Sogle kodden bomb-sfott zatale tem amkam aikonk ietalem. Ukraine soddun vochonk train asat mhunn amkam kollon ailem tednam ami thoinchean bhair soronk tharailem. Amchea lagim aslem tem soglem amkam fatti soddun voichem poddlem. Karonn dor ek munis, fokot ekuch beg gheun vochonk xoktalo ani tea begant ami fokot amche gorjeche dokument, vokhdam, udok ani ilem-xem jevonn, itlench gheun vochonk pavlim. Tor bhonvtonnim bomb poddot astana ami station-a lagim pavlim.”—Ukraine-antlea Kharkiv-ant ravpi Nataliia.
“Ukraine-ant khoreanich zhuz zatolem mhunn ami kednanch chintunk naslem. Xarachea her bhagamnim bomb-sfott zatale tem mhaka aikonk ietalem. Ani tea bomb-sfottank lagon mhojea ghorachim zonelam pasun halonk laglim. Tor hanvem fokot goroz teoch vostu gheun ghor soddun vochpacho nirnnoi ghetlo. Hanv sokallim 8 vorancher bhair sorlem, ani hanvem Lviv vochonk train dhorli. Ani thoinchean hanv Poland voita tea bosint boslem.”—Ukraine-antlea Kharkiv-ant ravpi Nadija.
Hea lekhant amkam hea prosnanche zobab mellttole
Refugee crisis kiteak lagon zatat?
Russia-n Ukraine-acher zhuz kelem dekhun Ukraine-ant refugee crisis zale. Punn osle refugee crisis zaunk anikui zaitim karonnam asat mhunn Bible dakhoun dita:
Munxanche sorkar lokancheo gorzo purnn korunk xokona. Sorkar choddxe pavtti aplo odhikar, lokancher tabo cholounk ani tancher zulum vo otʼteachar korunk uzar korta.—Upodexok 4:1; 8:9.
Hea “sonvsarcho odhikari” Soitan, munxancher itlo vaitt probhav ghalta ki tache vixim Bible-ant oxem sanglam: “Akʼkho sonvsar Noxtteachea tabeant asa.”—Juanv 14:30; 1 Juanv 5:19.
Hozaramnim vorsam thaun munxakullak zaite tras sosunk poddleat ani hache bhair, amchea disam vixim Bible-ant oxem sanglolem asa: “Nimannea disamnim ek bhirankull kall ieuncho asa.” (2 Timotak 3:1) Itlench nhoi, amchea disamnim bhuk poddttoli, pidda posortoli, toxench zhuzam ani odruxttam zatolim mhunn poilinch sanglolem. Ani hea karonnank lagon lokank aplim ghoram soddun voichim poddttat.—Lukas 21:10, 11.
Aplo des soddun dusrea desant pollon vochonk poddtta tankam konn bhorvonso diunk xokta?
Aplo des soddun dusrea desant asro ghetat tea lokank, amcho Rochnnar, Jehovab Dev mog ani moipas dakhoita mhunn Bible sangta. (Dusri Somurt 10:18) Ani Jehova Dev aplo sorgincho sorkar, tem mhunnttlear, aplea Rajea udexim hea lokanche sogle tras kaddun uddoitolo mhunn tannem bhas dilea. Toxench, aplea Rajea udexim Jehova Dev munxanchea soglea sorkarancho nas kortolo. (Daniel 2:44; Matev 6:10) Tea bhair, Devachem Raj Soitanacho pasun nas kortolem. (Romkarank 16:20) Hem Raj akʼkhe prithumecher raj choloitolem. Ani tednam veg-veglle des aschenant. Punn soglim munxam ekvottan, ek famil koxim jietolim. Tea vellar, konnakuch aplem ghor soddun pollon vochonk poddchem na. Karonn Bible-ant Devan oxi bhas dilea: “Zonn-eklo ap-aple dak-veliche savllek ani ap-aplea anjirachea zhadda ponda bostolo, konn konnak tras diuncho na. Oso uloita to Dolbharancho Sorvespor.”—Mika 4:4.
Jea karonnank lagon aiz lokank aplem ghor soddun dusrea desant vochon asro gheunk poddtta, tim soglim karonnam Jehova Dev aplea Rajea udexim kaddun uddoitolo. Fokot Devachench Raj amchea disamnim zavpi he refugee crisis sompounk xokta. Tor, Devachem Raj kitem kaddun uddoitolem?
Zhuzam. “[Jehova] zhuzam sompoita.” (Stotr 46:9) Jehova Dev hem koxem kortolo tem zannam zaunk, “Peace on Earth—How Will It Come?” ho lekh vachat.
Zulum ani hinvsa. “Zulum ani zobordosti sonstoleank [Jehova] soddoitolo.” (Stotr 72:14) Khub tempa thaun aslolo aplo vaitt sobhav ek munis koso bodlunk xokta tem zannam zaunk, “Breaking the Cycle of Hatred” hantunt aslole lekh vachat.
Goribi. “Ulo martolea goribank, adar-naxilʼlea dublleank [Jehova] pavtolo.” (Stotr 72:12) Dev goribi kaddun uddounk kitem kortolo tem zannam zaunk, “Is a Fair Economic System Possible?” ho lekh vachat.
Bhuk. “Subhamponnan desant piktolo dhanno.” (Stotr 72:16) Dev koxe toren sogleank jevonn mello-xem kortolo tem zannam zaunk, “A World Without Hunger?” ho lekh vachat.
Hea lokank Bible-a thaun modot mellonk xokta kai?
Hoi. Hea lokank Bible-antlean, tannim khatri dovrunk zata toslo fuddaracho bhorvonso melltta tem sarkem. Punn tea bhair, tankam sodʼdheak asat tea oddchonneancho fuddo korunk pasun Bible modot korunk xokta.
Bible totv: ‘Pisatt munis apnnak sangtat titlem-i sot manta, punn xittuk munis apunn koso cholta tacher nodor dovorta.’—Mhonnʼnneo 14:15.
Koxem lagu korunk zata: Tumkam koslea dhokeancho fuddo korunk poddot, ani tednam tumi kitem kortolim tea vixim poilinch chintun dovrat. Novea zagear vochon ravtoleancho faido kaddttat vo tancher otʼteachar kortat toslea fottkirea lokam thaun chotur ravat.
Bible totv: “Amkam jevunk-khaunk ani nhesunk-pangrunk aslear, itlean ami dhadoxi zaunchem.”—1 Timotak 6:8.
Koxem lagu korunk zata: Tumche lagim kitem asa ani kitem na hacher dhean divop bond korat. Tumche lagim aslolea gorjechea vostumnim tumi dhadoxi ravlear, tumi khuxal astolim.
Bible totv: “Dusreamnim tumche thai korchem mhonn tumkam zai, toxench tumi-i dusream thai korat.”—Matev 7:12.
Koxem lagu korunk zata: Dusream sangata pasiensan ani doiallaien vagat. Oxem kelear, tumi ravtat tea novea zagea voile lok tumchea sangata bore toren vagtole ani tumkam resped ditole.
Bible totv: “Konnakuch vaitt vaittan farik korum nakat.”—Romkarank 12:17.
Koxem lagu korunk zata: Tumche sangata konnui vaitt toren vagta zalear ragar zaun tancho bodlo gheunk sodhinakat. Karonn oxem kelear tumi anik trasant poddonk xoktat.
Bible totv: “Mhaka boll dita tachea sangata hanv soglem korunk xoktam.”—Filipkarank 4:13, Povitr Pustok – Novo Korar.
Koxem lagu korunk zata: Tumchea jivitant Devak sogleam-von chodd mhotv diat ani tache lagim magnnem korat. Tumchea oddchonneancho fuddo korunk to tumkam ghottai ditolo.
Bible totv: “Koslech huske kaddum nakat; sogllea tumchea magnneamnim tumkam goroz titlem-i Devak kollit korat, punn tumchim magnnim dhinvaxi kallzan kelʼlim zaum-di. Ani amchea gineana poros vorti Devachi xanti tumchim monam ani kallzam Jezu Krista sovem rakhtoli.”—Filipkarank 4:6, 7.
Koxem lagu korunk zata: Tumi kosle-i poristhitint asum, Deva lagim monachi xanti magat. “Philippians 4:6, 7—‘Do Not Be Anxious About Anything,’” ho lekh polloiat.
a Russia-n Ukraine-acher zhuz korun dusreach disa United Nations High Commissioner for Refugees-an (UNHCR) sanglem ki hea Refugee crisis-achem emergency level sogleam-von chodd asa. 12 disam bhitor 20 lakham poros chodd lok, Ukraine-achea bhonvtonnim aslolea desamnim pollon gele ani 10 lakham poros chodd lokank tanchem ghor soddun Ukraine-antlea her vattaramnim pollon vochonk poddlem.
b Jehova, hem Devachem nanv zaun asa. (Stotr 117:1) “Who Is Jehovah?” ho lekh polloiat.