Prithum Piddʼddear Kortat—Hea Vixim Bible Kitem Sangta?

“Vatavoronn beginuch anik bigoddchem asa. Vhoddlim-vhoddlim xaram buddon voitolim. Gormi anikui vaddttoli. Bhirankull vadollam zatolim. Prithumechea zaitea zageancher dukoll poddttolo. Ani lakʼkhamnim, veg-veglle torechim zhaddam ani zonvaram kabar zaun voitolim. Hi bexttich ek kanni nhoi. Punn hea toren nisorga thaun melltta tea vostuncho sorkar durupeog korit ravle zalear hem khorench zatolem mhunn vidneanik sangtat.”—Abril 4, 2022 Intergovernmental Panel on Climate Change riporttant, United Nations-acho secretary-general, António Guterres-an dilʼlem bhaxonn.

“Vatavoronnant zatolea bodlavak lagon, khas korun gormi hispa bhair vaddtta dekhun, beginuch United States-ant aslolea soglea 423 national park-ancher khub vaitt probhav poddttolo mhunn vidneanikamnim xittkaunni dilea. Haka lagon zaunk xokta to vaitt porinnam, Bible-ant sangleat toslea odruxttam sarkim zaun asat. Zoxem, ranamnim vo her zagear uzo lagta, zaitea zageancher buddtti ieta, borfache vhodd-vhodd kuddke udok zait voita, dorianchem udok vaddtta ani gormi hispa bhair vaddot voita.”—“Flooding Chaos in Yellowstone, a Sign of Crises to Come,” The New York Times, Jun 15, 2022.

Hea prithumechem vatavoronn itlem bigoddlam tem konnui tori sarkem korunk xokta kai? Hoi zalear, tem konn sarkem kortolo? Bible hea vixim kitem sangta tem polloum-ia.

Hi prithum piddʼddear kortole mhunn adim fuddench sanglolem

‘Sonvsar padd kortat tankanch Dev padd kortolo’ mhunn Bible-ant sanglam. (Prokasovnni 11:18) Hea versantlean amkam tin vostu kollon ietat:

1. 1. Munis kortat tea kamank lagon prithum padd zatoli.

2. 2. Prithum piddʼddear korop bond zatolem.

3. 3. Prithumechem bigoddlolem vatavoronn munxam nhoi, punn Dev sarkem kortolo.

Fuddarak prithumer soglem borem astolem

‘Prithum sodanch toxich urtoli’ mhunn Bible-ant sanglam. (Upodexok 1:4) Tor munxam ani zonvaram prithumer sodankall jietolim.

• “Des zatolo borea monʼxanchem daiz: thoim tim tthikann kortolim sasnnachea sasnnak!”—Stotr 37:29.

Prithumechem vatavoronn fuddarak purnn toren borem zatolem.

• “Oronnem ani suki-korddi zomin khuxal zaum, padd zomin sontosum ani sallkamnim fulon ieum.”—Izaias 35:1.