Kristanvamnim Zhuzant Bhag Ghevop Sarkem Kai?—Hea Vixim Bible Kitem Sangta?

Ukraine-ant choltolea zhuzantlean amkam kollon ieta ki zaite Kristanv dhormik fuddari lokank zhuzant bhag gheunk urba ditat. Ukraine ani Russia, hea donui desantle dhormik fuddari lokank koxe toren zhuzant bhag gheunk urba ditat tacher dhean diat:

• “Ukraine desantlea zhuzareamno, ami tumche khub upkari asat. Tumkam sogleank man favo . . . Tumkam amcho purnn tenko asa, ani amchim magnnim sodanch tumchea sangata asat.”—Oxim Metropolitan Epiphanius I of Kyiv-achim utram, March 16, 2022-achea, The Jerusalem Post, hantunt boroilʼlim asat.

• “Russian Orthodox Church-achea mukhel odhikarean Russiachea soinikam pasot Aitarak ek khas mis dovorlem, zoim tannem tankam aplea desa pasot zhuzonk urba dili. Ani zoxem Moscow Ukraine desacher akromonn korta, tannim aplea desachi rakhonn korunk zai karonn ‘tanchea xivai Russia pasot zhuzonk anik konnuch’ ieuncho na, oxem tannem sanglem.”—Reuters, April 3, 2022.

Kristanvamnim zhuzant bhag gheunk zata kai? Hea vixim Bible kitem sangta?

Bible Khoreanich Kitem Sangta?

Bible sangta ki jim konn Jezu Kristachi khoreanich adnea pallttat tim zhuzant bhag ghenant.

• “Tuji tolvar tichea zagear dovor, karonn je tolvar hatant ghetat te tolvarin nas zatole.”—Matev 26:52.

  Jim konn zhuz korunk urba ditat vo jim zhuzant bhag ghetat tim Jezuchi adnea pallttat oxem tumkam dista?

• “Hanv tumkam ek novi adnea ditam, tumi eka-mekacho mog korat. Zoso hanvem tumcho mog kela, tosoch tumi-i eka-mekacho mog korat. Tumi eka-mekacho mog kortat zalear tumi mhoje xis mhunn sogleank kollon ietolem.”—Juanv 13:34, 35.

  Jezun aplea xisam modem mog astolo mhunn sanglolem, tor ek munis zhuzant bhag gheta zalear ho mog to dakhoun dita kai?

Anik mahiti pasot, “Is War Compatible With Christianity?” ho lekh vachat.

Kristanvamnim Zhuzant Bhag Ghevop Sarkem Kai?

Aiz Kristanvam zhuzant bhag ghenastana ravlolim Devak zai kai? Hoi. Karonn Bible-ant bhasaunni kelʼli ki “xevottachea kallar” soglea raxttrantlean ailʼlo lok Jezuchea xikounne pormonnem “zhuzachi toiari korcho na” vo zhuz korunk xikcho na.—Izaias 2:2, 4.

• Anik mahiti pasot, “How Does God View War?” hea Pahrogopur-antle lekh vachat.

Beginuch, xanticho Dev, Jehova,a aplem sorginchem sorkar haddttolo ani tea udexim “zulum ani zobordosti sonstoleank soddoitolo.”—Filipkarank 4:9; Stotr 72:14.

• Dev hem koxem kortolo tem zannam zaunk, Devachem Raj Mhunnttlear Kitem? ho video polloiat.