Rajkaronnachea Fuddareancher Lokancho Visvas Unno Zait Asa—Hea Vixim Bible Kitem Sangta?

2024 hea vorsa sonvsarbhor zaitea desamnim, kednanch zaunk nant titlim election-am zaunchim asat. Punn rajkaronnachea fuddareancher zaitea lokancho visvas unno zait asa mhunn dison ieta.

• Amerikant survey kelolea pormonnem choddxea lokamnim sanglem, ki “choddxe rajkaronnache fuddari lokanchi seva korunk chintinant, te fokot aplo faido polloitat.”a—Pew Research Center, 19 Setembr  2023.

Zaitim tornnattim rajkaronnachea fuddareancher visvas dovornant.

• “Aichim tornnattim oddchonneo koxeo suttaveo korunk zatat tea vixim chintat. Punn veg-vegllea survey-nt tannim sanglem, ki rajkaronnachea fuddareank oddchonneo koxeo suttaveo korunk zatat tea vixim kainch poddlolem na.”—The New York Times, 29 Janer  2024.

• “Tornnatteank rajkaronnachea fuddareancher nhoi, punn YouTubers-ancher chodd visvas asa mhunn ek survey ghetlolean kollon ailam.”—The Korea Times, 22 Janer  2024.

Amcho fuddar boro zatolo mhunn ami rajkaronnachea fuddareancher visvas dovrunk zata kai? Ami konnacher visvas dovrunk zata?

Chintun visvas dovrat

Lok dolle dhampun konnacherui visvas dovornant tem borem zaun asa. Karonn Bible sangta: “Pisatt monis apnnak sagtat titleim sotmandta, Punn, xittuk monis apunn koso cholta tacher nodor dovorta.”—Mhonnʼnneo 14:15.

• Khoinchi mahiti sarki vo na tem koxem sodhun kaddchem hem zannam zaunk, “Protect Yourself From Misinformation” ho lekh vachat.

Thodde rajkaronnache fuddari promannik asat ani bore korunk sodhtat zalear pasun, te chintat tem soglench tanche lagim korunk zaina. Dekhun Bible sangta:

• “Razkarbhariancher visvas dovrum naka, osokt soimbachea monxacher patieun ravum naka: Tuka soddounk taka tank na!”—Stotr 146:3.

Ek fuddari zacher tumi visvas dovrunk zata!

Bible sangta ki ami visvas dovrunk xoktat ani soglem korunk tank asa toslea fuddareak Devan vinchun kaddla. To mhunnttlear, Jezu Krist. (Lukas 1:32, 33) Devan taka aplea Rajeacho Raza zaunk vinchun kaddla. Ani Devachem Raj ek oslo sorkar zaun asa, jem sorgar thaun prithumer raz choloitolem.—Matev 6:10.

• Ami Jezucher kiteak visvas dovrunk xoktat, ani to amcheo sogleo oddchonneo koxeo suttaveo kortolo tem zannam zaunk, “Devachea Rajeacho Raza Konn?” ani “Dev Aplea Rajea Udexim Kitem Kortolo?” he lekh vachat.