Izaias
24 Polloi! Jehova des* rito* korta, taka oronnʼnnem korun uddoita.
To taka portita ani tantunt ravtolea lokank ximpddaun uddoita.
2 Sogleanchi poristhiti ek-sarki zatoli:
Lokanchi toxench iadnikachi,
Chakrachi toxench dhoniachi,
Chakornichi toxench dhoninichi,
Viktem gheupeachi toxench vikpeachi,
Udar diupeachi toxench udar gheupeachi,
Rinn diupeachi toxench rinn gheupeachi.
3 Des purnn toren rito zatolo,
Tantunt asa tem soglem luttʼttole,
Karonn oxem Jehovan mhunnttlam.
4 Des dukh korta* ani sovkas-sovkas kabar zait voita,
Pik dita ti zomin sovkas-sovkas sukon voita ani kabar zata,
Ani desantlea manadik lokancho ankddo unno zait voita.
5 Thoim ravtoleamnim to oxudʼdh kela,
Te kaidea add geleat,
Tannim nem-kaide bodolʼleat,
Ani sasnak urta toslo* korar moddla.
6 Taka lagon, akʼkhea desak xirap khaun uddoita,
Ani tantunt ravpi guneanvkari zata.
Tea pasot, desant ravpi lok unne zait voitat,
Ani thoddech lok urleat.
7 Novea drakxancho soro dukh korta,* drakxanchi val sukta,
Ani khuxal aslim tim pirgotat.
8 Ddoflicher* khuxalkaiechem songit vazovop bond zalam,
Mouza martoleancho avaz aikonk iena,
Ani kinorecho* khuxalkaiecho avaz bond zala.
9 Drakxancho soro pietat tednam konnuch gitam gaina,
Ani soro pietoleank soro koddu lagta.
10 Soddun dilʼlem xar padd zaun gelam,
Dor ek ghor oxem bond asa ki konnuch bhitor vochonk xokona.
11 Rosteancher lok drakxanchea sorea pasot bob marun roddttat.
Sogli moja nanch zalea,
Akʼkhea desachi khuxalkai kabar zaun gelea.
12 Xar padd zaun gelam,
Tacho darvontto moddun, tachea kuddkeanchi ras kelea.
13 Zoitunachem zhadd haloilea uprant, tacher fokot thoddinch follam urtat,
Ani pikechea vellar drakxam kaddlea uprant, punzaunk thoddinch drakxam urtat,
Toxe veg-vegllea desantlea lokam modem mhoje lok astole.
14 Te vhoddlea avazan ulo kortole,
Khuxalkaien bob martole.
Ostome* thaun Jehovachem vorteponn porgott kortole.
15 Te udentek* Jehovachi mhoima kortole,
Doriantlea zunveancher Izraelacho Dev Jehovachea nanvachi mhoima kortole.
16 Prithumechea konnxea meren hem git aikonk ietolem:
“Nitivont Devachi mhoima zaum!”
Punn hanv mhunnttam: “Hanv oskot zait voitam, Hanv oskot zait voitam!
Mhojer hai! Visvasghatki visvasghat korta.
Visvasghatki ghatacher-ghat korta.”
17 Are desant ravtolea! Akant, fondd ani fas tuji vatt polloitat.
18 Akantacho avaz aikon zo pollon voitolo, to fonddant poddttolo,
Fonddantlean bhair soron ietolo, to fasak sampoddttolo.
Karonn mollbache udkache darvontte ugoddttole,
Ani desacheo buniadi haltoleo.
19 Zomin halʼlea,
Ti futton voita,
Ti samki thorthorta.
20 Zomin bebdea sarki lokta,
Ti hevtten thaun tevtten oxi halta, zoxi vadollant ek khomp halta.
Ti aplea opradachea vojeak lagon sokol poddttoli,
Ani porot kednanch ubi ravonk xokchina.
21 Tea disa, voir mollba voilea fouje add
Ani sokol prithumechea razam add Jehova panvl ghetolo.
22 Koideank fonddant ektthaim kortat toxe,
Tankam ektthaim kortole,
Ani tankam kallkhi kuddant bond korun dovortole,
Ani zaitea disam uprant tanche koddlean hixob ghetole.
23 Chondrimacho uzvadd unno zatolo,
Porzolltta tea suriak pasun loz bhogtoli,
Karonn fouzancho Dev Jehova, Sion Dongrar ani Jeruzalemant Raza zala,
To aplea lokanchea vhoddilam mukhar mhoimen raz kortolo.