Izaias
23 Tira pasot sondex:
Tarshishachea tarvamno, vhoddlean-vhoddlean roddat!
Karonn doriacho dhoko nas zaun gela, tarvam thoim vochonk xokonant.
Hi khobor tankam Kittim desant mellʼlli.
2 Doriachea deger ravtoleamno, vogi ravat.
Doria par korun ailolea Sidonachea veapareamnim tuka girest kelam.
3 Shihoracho* dano* doriachea vatten pavoila,
Tannim Nilachem pik diun
Raxttrank faido korun dila,
Tirak zodd* melloun dili.
4 Are Sidona, doriachea ghott kilʼlea, lojen man sokol ghal.
Karonn dorian oxem mhunnttlam:
“Mhaka ballontiniche vollvolle sosunk poddonk nant, ani hanvem konnankuch zolm diunk na.
Toxench hanvem putank vo dhuvank vaddounk nant.”
5 Lok Ejiptta vixim aikon dukhi zalʼle toxe,
Tira vixim aikonui dukhi zatole.
6 Doria deger ravtoleamno,
Poltoddi Tarshishak pollon vochat ani vhoddlean-vhoddlean roddat!
7 Zaitea tempa thaun, adlea kallar thaun khuxalkaien mouza kortalem tem xar hench kai?
Tache paim taka poisulʼlea desamnim ravonk gheun voitale.
8 Tir xar, zannem dusreank mukutt ghatle,
Zache veapari vhoddle-vhoddle kunvor asle,
Zachea dhondekarank prithumer vhodd man aslo,
Tea xara add hem soglem korunk konnem nirnnoi ghetlo?
9 Fouzancho Dev Jehovan
Tachi sobitkai ani tacho gorv moddun uddounk tharailam.
Ani jea lokank akʼkhea prithumer man ditale tankam lojek ghalunk tharailam.
10 Tarshishache dhuve, Nil Nhoim-e sarkem tujea desant posor.
Karonn atam hanga tarvam pasot zago* na.
11 Devan aplo hat doriacher ubarla,
Tannem rajeank haloun uddoileant,
Jehovan Finisieche ghott kilʼle nas korcho hukum dila.
12 To oxem mhunntta: “Zulum soslolea Sidonachea ankvar dhuve,
Atam tum khuxalkai monounchem na.
Utth, doriachea poltoddi Kittim voch,
Punn thoim pasun tuka suseg mellchona.”
Zannim aple zhuzache gopur ube korun gherav ghatlo,
Zannim tache vhoddle gopur moddun uddoile,
Ani akʼkhea xaracho gobor korun uddoilo.
14 Tarshishachea tarvamno, vhoddlean-vhoddlean roddat.
Karonn tumcho ghott kilʼlo nas korun uddoila.
15 Tea disa, Tirak 70 vorsam poriant visortole. Hoi, ek raza raz choloita titlim vorsam* poriant. 70 vorsam somplea uprant Tir tea xindoll baile sarkem zatolem, jiche vixim hem git gaitat:
16 “Age xindoll baile, tuzo konnankuch ugddas na.
Kinori* ghe ani akʼkhea xarant bhonvddi mar.
Kinori bore toren vazoi ani bhorpur gitam gai,
Jea udexim lokank tuzo porot ugddas ietolo.”
17 70 vorsanchea xevottak, Jehova Tiracher dhean ditolo. Tem porot xindoll baile sarkem zoddunk lagtolem, ani sonvsarantlea soglea rajeam sangata xindollki kortolem. 18 Punn tachi zodd ani faido Jehova pasot povitr zatolo. Ti ektthaim korchenant vo samballun dovorchenant, karonn hi zodd Jehovachea lokam pasot astoli. Hea zoddi udexim te zai titlem khatole ani bore kopdde ghaltole.