Izaias
22 Dorxonachea Falkeak* ek sondex:
Tuka kitem zalem? Tuje sogle lok ghoracher* kiteak geleat?
2 Tujea xarant gondholl choltalo,
Hoi, akʼkhea xarant bovall zatalo, soglim khuxalkai monoitalim.
Tujea jea lokank jivexim marle, te tolvarin moronk nant,
Toxench te zhuzantui moronk nant.
3 Tuje sogle hukum choloupi* sangata pollon gele.
Dhonu uzar korinastana tankam koidi korun vhele.
Ani je pois pollon gele, tankam pasun koidi korun vhele.
4 Taka lagon hanvem mhunnttlem: “Mhaka polloinakat,
Hanv dukamnim roddttolom.
Mhojea lokancho nas zala mhunn
Mhaka bhuzvonn diuncho proitn pasun korinakat.
5 Akʼkhea Vixvacho Dhoni, fouzancho Dev Jehova thaun,
Ho dis Dorxonachea Falkea pasot
Goddboddacho, zoit mellona toslo ani bhirant haddtta toslo dis zaun asa.
Xaracheo vontti koslloun uddoitat
Ani tanchi bob dongra meren aikonk ieta.
6 Elaman bannamnim bhorlolem beg aplea hatant ghetlam,
To rotham ani ghoddesvar* gheun ieta.
Kiran apli ddhal toiar kelea.
7 Tujim borim-borim falkim* zhuzachea rothamnim bhortolim,
Ghoddesvar* darvonttea lagim ap-aplo zago ghetole.
8 Judacho poddʼddo* kaddun uddoitole.
“Tea disa, tum hotʼtearam dovorpachea Ranantlea Ghorak axeun polloitolo. 9 Tumi Davidachea Xarachea vonttink zaitea zagear vero poddleat teo polloitole, ani tumi sokoilea tolleant udok ektthaim korun dovortole. 10 Tumi Jeruzalemachim ghoram meztole ani xaracheo vontteo ghott korunk ghoram koslloun uddoitole. 11 Pornea tolleachem udok ektthaim korunk tumi xarachea donui vonttim modem ek zago toiar kortole. Punn tumi tumcho Vorto Dev, zannem khub poilim thaun hem ghoddoun haddlolem, tacher dhean diunchenant.
12 Tea disa, Akʼkhea Vixvacho Dhoni, fouzancho Dev Jehovan,
Tumkam roddonk ani dukh korunk sanglem,
Tumche tokleche kens tasunk ani sak ghalunk sanglem.
13 Punn tumi mouza marli ani khuxal zale,
Menddram ani gorvam katorlim,
Mas khalem, drakxancho soro piele ani mhunnttlem,
‘Ieiat, ami khaum-ia, pieum-ia, karonn faleam ami mortolech.’”
14 Tednam fouzancho Dev Jehovan mhojea kanant sanglem: “Akʼkhea Vixvacho Dhoni, fouzancho Dev Jehova mhunntta, ‘Tumi jive asat tea meren tumchea hea guneanvachem farikponn zaunchem na.’”
15 Akʼkhea Vixvacho Dhoni, fouzancho Dev Jehova mhunntta: “Voch, razvaddeacho sevok* Shebna koddem voch ani taka sang, 16 ‘Tum hanga kitem korta? Tuzo hanga konn asa, ki tum hanga tujea pasot khoddop katrun purunk ek zago toiar korta?’ To hanga aplea pasot unch zagear ek dhol toiar korta, khoddpamnim visov gheunk zago* toiar korta. 17 ‘Are munxa, polloi! Jehova tuka dhortolo ani nettan sokol uddoitolo. 18 To tuka ghott guttlaitolo ani bola bhaxen uktea mollar pois uddoitolo. Tum thoinch mortolo. Tujim sobit rotham pasun thoinch urtolim. Taka lagon, tujea dhoniachea ghoranneank loz bhogchi poddttoli. 19 Hanv tuje koddlean tuji podvi kaddun ghetolom, ani tuka tujea zobabdarechea zagea voilo sokol uddoitolom.
20 “‘Tea disa hanv Hilkiacho put Eliakim, hea mhojea sevokak apoun haddttolom. 21 Hanv taka tuje kopdde ghaltolom, tujea bhenddacho pottʼtto hanv tachea bhenddak ghott bandtolom. Ani tuzo odhikar tachea hatant ditolom. To Jeruzalemant ravtoleancho ani Judachea ghoranneacho bapui zatolo. 22 Hanv Davidachea ghoranneachi chavi tachea khandar dovortolom. To jem ugoddttolo tem konnuch bond korunk xokchona, ani to jem bond kortolo tem konnuch ugddunk xokchona. 23 Hanv taka lakddachea khillea* bhaxen eka ghott zagear rombun dovortolom. To aplea bapaichea ghorannea pasot mhoimechem xinvason zatolo. 24 Ani tachea bapaichea ghoranneachi sogli mhoima* tacher lamboilʼli astoli. Jea toren soglim dhakttim aidonam, kanxe ani vhoddleo-vhoddleo moddkeo lakddachea khilleancher lamboilʼleo astat, toxinch tachim bhurgim ani sonsot tacher patieun ravtolim.
25 “Fouzancho Dev Jehova mhunntta, ‘Tea disa zo lakddacho khillo ghott zagear rombun dovorlolo, to kaddttole. Taka kaddun sokol uddoitole, ani jeo vostu tacher lamboun dovorloleo, teo sokol poddon kabar zatoleo. Karonn Jehovan svota hem sanglam.’”