Izaias
21 Doriachea ranvott vattara* add sondex:
Dokxinne koddlean ieta tea vadolla sarkem,
Ek vhodd odruxtt oronnʼnneantlean, eka bhirankull desantlean ieta.
2 Mhaka ek bhirankull dorxon dakhoilem:
Visvasghat korpi visvasghat korit asa,
Nas korpi nas korit asa.
O Elam, tacher akromonn kor! O Media, taka gherav ghal!
Taka* lagon zalʼle sogle tras hanv kabar kortolom.
3 Hem dorxon polloun hanv dukhin tollmollttam.*
Eke bailek ballontiniche vollvolle sosche poddttat,
Toso hanv-ui vollvollonk laglom.
Hanv itlom dukhi zalam ki mhaka kainch aikonk iena,
Hanv itlom bhielam ki mhaka kainch disona.
4 Mhojem kalliz dhodd-dhoddtta, hanv bhirantin koddkoddttam,
Jea sanjechea vellak hanv axetalom, tachich atam mhaka bhirant disonk laglea.
5 Mez toiar korat ani bospachi manddavoll korat!
Khaiat ani pieiat!
Kunvramno utthat, ddhalik makhat!*
6 Karonn Jehovan mhaka oxem mhunnttlem:
“Voch, ek rakhonndar ubo kor, ani to jem polloita tem tannem tuka ieun sangchem.”
7 Tednam tannem ek zhuzachem roth polloilem zaka don ghodde voddttale,
Tannem anik ek zhuzachem roth polloilem zaka gaddvam voddttalim,
Toxench, tannem anik ek zhuzachem roth polloilem zaka untt voddttale.
To dhean diun tankam bariksannen polloit ravlo.
8 Tednam tannem xinva bhaxen gorzon mhunnttlem:
“Jehova Deva, hanv dor disa nodor dovrunk gopuracher* ubo ravtam,
Dor rati hanv mhojea rakhonn korpachea zagear ubom asam.
9 Kitem ieta tem polloiat:
Don ghoddeancho ek roth ieta, zacher soinik asat!”
Magir tannem vhoddlea avazan mhunnttlem:
“Tem poddlem! Babilon poddlem!
Tachea devanchea soglea kantoilʼlea murteancho tannem churo korun uddoilo!”
10 Xet mollttat toxem mollʼllolea mhojea lokamno,
Mhojea mollnnechea khollachea* danea,*
Izraelacho Dev, fouzancho Dev Jehova koddlean hanvem jem aikolem tem hanvem tumkam sanglem.
11 Dumachea* add sondex:
Konn tori mhaka Seira thaun ulo marta:
“Rakhonndara, rat kednam somptoli?
Rakhonndara, rat kednam somptoli?”
12 Rakhonndaran zobab dilo:
“Sokall zaunchich asa, ani uprant porot rat zatoli.
Tum anik kitem-i vicharunk sodhta zalear vichar.
Portun ieo!”
13 Oronnʼnnea add sondex:
Poslolim zonvaram gheun bhonvpi* Dedanachea zomea,
Tumi oronnʼnneantlea ranant rat sartole.
14 Temant ravpi lokamno,
Tanelʼlea pasot udok haddat,
Pollon voitolea pasot unddo haddat.
15 Karonn te tolvari thaun, bhair kaddlolea tolvari thaun pollon voitat,
Tannun dhorlolea dhonu thaun ani zoran choltolea zhuza thaun te pollon voitat.
16 Karonn Jehovan mhaka oxem mhunnttlem: “Eka vorsa bhitor,* Kedarachi sogli mhoima nanch zatoli. 17 Tachea zhuzaream modle, dhonu uzar korpi thoddech salvar zatole, karonn Izraelacho Dev Jehovan oxem mhunnttlam.”