Abril—Jivit ani Porgottnni Mittingechea Pustike Pasot Modot

Abril—Jivit ani Porgottnni Mittingechea Pustike Pasot Modot

ABRIL 1-7

DEVACHEA UTRANTLE THEVE | 1 KORINTKARANK 7-9

“Ankvarponn—Ek Dennem”

(1 Korintkarank 7:32) Tumi huskeam-vinnem jielʼlim mhaka zai. Logn zaunk naslolea eka dadleak Somiachea vostuncho husko asa; apunn Somiak koso manovtolo, hache vixim taka husko.

w11 1/15 17-18 ¶3

Tujea Ankvarponnacho Boro Faido Melloun Ghe

³ Ek ankvar munxak, eka kazari munxa poros chodd vell ani svotontrotai asta. (1 Kor. 7:32-35) He khas faide aslolean, ankvar asat tim Jehovachi seva chodd korunk pavtat, veg-vegllea torechea lokam sangata ixttagot korunk pavtat ani toxench Jehova lagim apli ixttagot anik ghott korunk tankam modot zata. Zaitea Kristanvank, ankvarponnache faide khobor aslolean, tannim aplea jivitant thoddo temp tori ankvar ravtolim mhunn nichov kela. Thoddeamnim, apunn ankvar ravtolim mhunn poilim tharaunk naslem. Punn tanchi poristhiti bodolʼli tednam tannim tem magnneant ghatlem, ani Jehovachea modotin apunn hem korunk xokta mhunn tankam somzolem. Hea toren, apli poristhiti manun gheun tannim ankvar ravcho nirnnoi ghetlo.—1 Kor. 7:37, 38.

(1 Korintkarank 7:33, 34) Punn logn zalʼlea dadleak hea sonvsarachea vostuncho husko asa; aple bailek koso khoxi kortolo, hache vixim taka husko, ani oxem tachem mon veg-veglle vatten oddon veta, ³⁴ Toxench eke logn zaunk naslole bailek vo eke ankvarik Somiachea vostuncho husko asa, kiteak ti kuddin ani monan povitr zaunk vavurta; punn logn zalʼle bailek hea sonvsaracho husko asa: aplea ghovak koxi manovtoli, hache vixim tika husko.

w08 7/15 27 ¶1

Korintkaranchea Potrantle Mukhel Mudʼde

7:33, 34—Eka kazari dadleak vo bailek asta to “sonvsarachea vostuncho husko” kitem zaun asa? Paulu hanga Kristi zoddpeank astat tea sodanchea jivitachea uskeam vixim sangtalo. Zoxem jevonn, nhesop ani ravonk zago mellon gheuncho husko. Punn, Kristanvamnim pois korchi goroz asa, toslea sonvsarachea vaitt vostu vixim to hanga uloi naslo.—1 Juanv 2:15-17.

(1 Korintkarank 7:37, 38, NW) Punn eklo aplea kallzant apunn ankvaruch ravtolo mhunn ap-khuxen tharav gheta zalear ani hea tharavant to thir asa, karonn taka kazar zaunchi goroz asa oxem disona ani to aple anvdde tambeant dovorunk xokta zalear, to borem korta. ³⁸ Mhonnttoch zo logn zata to borem korta; ani logn zaina to odik borem korta.

w96 10/15 12-13 ¶14

Ankvarponn—Devachea Sevent Dhean Dovrunk Ek Bori Vatt

¹⁴ Ek ankvar Kristanv aplem ankvarponn aplea svarthak lagon uzar korta zalear to eka kazari Kristanvam poros “odik borem” korina. To “Sorginchea Rajeak lagun” nhoi, punn tachea svotachea karonnank lagon ankvar ravta. (Matev 19:12) Eka ankvar dadleak vo bailek “Somiachea vostuncho husko” asonk zai, ‘Somiak manvololim koxim zaunchim’ tea vixim husko asonk zai, ani ‘Somiachi bhokti korit ravche vixim’ tannim aplem dhean dovrunk zai. Hacho orth, tannim Jehovachi ani Jezu Kristachi seva korunk purnn dhean diunk zai. Oxem kelearuch, ankvar Kristanv dadle ani bailo Kristi zoddpeam poros “odik borem” kortat.

Bible-ant Motiam Sodhum-ia

(1 Korintkarank 7:11) Veglli sorli zalear, tinnem anink ekdam logn zaunchem nhoi, bogor aplea ghova lagim sondhan korchem; ani ghov aple baile thaun vegllo sorcho nhoi.

lvs 251

Enddnott

Thodde pavtti, thoddea Kristanvamnim pozoddponn korunk na zalear pasun aplea kazari sangatea thaun vegllo ravcho nirnnoi ghetla. (1 Korintkarank 7:11) Ek kazari bhav vo bhoinn sokol dilolea poristhitimnim aplea kazari sangatea thaun vegllo ravcho nirnnoi gheunk xoktat.

• Mudʼdom aplea kazari sangateak tenko dina: Ek ghov aplea familicheo gorzo purnn korunk nakarta. To itlo meren nakarta, ki tea familik poixe vo jevonn pasun dina.—1 Timotak 5:8.

• Kazari sangateak boroch marta: Aplea sangteak itle meren marta ki taka vo tika aplea jivak sarkoch dhoko asa oxem dista.—Galasiekarank 5:19-21.

• Jehova Deva thaim asloli ixttagot samballunk dina: Ek ghov vo bail aplea sangateak Jehovachi seva koxech toren korunk dina.—Itihas 5:29.

(1 Korintkarank 7:36, NW) Khoinchea-i eka ankvareak apli vagnnuk sarki na oxem dista zalear ani tachi tornni pirai soron gelea zalear, tannem kazar zaunk zata. Oxem korun to patok korina. Tachean kazar zaunchem.

w00 7/15 31 ¶2

Onoitik Kamamnim Bhorlolea Sonvsarant Tumchean Nitoll Ravonk Zata

Tornnatteank loingik vondovnneo ieunk suru zata tednam tannim rokddench kazar zaunchem nhoi. Kazar zatat tim zoddpim sodanch sangata ravtolim mhunn utor ditat. Tor hi zobabdari samballunk tannim poilim toiar zaunchi goroz asa. (Utpoti 2:24) “Tornni pirai soron” vocho porian tannim ravchi goroz asa. Karonn tea vellar loingik vondovnneo itleo vaddloleo astat ki eklo chukicho nirnnoi gheunk xokta. (1 Korintkarank 7:36) Ani ekleak, kazar zaunk favo to sangati mellona mhunn tannem onoitik kamamnim vanntto ghetlo zalear kitlem vhoddlem pixeponn ani patok zatolem nhoi!

ABRIL 8-14

DEVACHEA UTRANTLE THEVE | 1 KORINTKARANK 10-13

“Jehova Ek Visvaxi Dev”

(1 Korintkarank 10:13) Aiz porian tumcher aileat teo tallnnio sogllea monxank ietat tosleoch. Devacher visvas dovrat: tumchean sosunk zata tea-von khor tallnni tumcher ieunk to kednanch nirmicho vo diuncho na; punn kosli-i tallnni aili zalear, ti sosunk to tumkam boll ditolo ani oxem tantlim bhair sorunk to tumkam vatt dakhoitolo.

w17.02 29-30

Vachpeam Thaun Prosn

“Sosunk zata tea-von khor tallnni tumcher ieunk to kednanch nirmicho vo diuncho na” mhunn apostl Paulun boroilem. (1 Kor. 10:13) Hacho orth Jehova ami kitlem sosunk xoktat tem adim fuddench zannam zaun, amcher kosleo tallnneo dhaddcheo tem vinchun kaddtta kai?

▪ Ami toxem mantat zalear kitem zatolem tem chintat. Ek bhav, zachea putan aploch jiv kaddlo tednam tea bhavan oxem vicharlem: ‘Mhojea putachem moronn, hanv ani mhoji bail sosun gheunk xoktat mhunn Jehovan adim fuddench zannam zalo kai? Ami tem sosunk xoktat mhunn Dev zannam aslo taka lagon toxem zalem kai?’ Amchea jivitant ghoddtta te dor eke ghoddnne fattlean Jehovacho hat asa mhunn manun ghevop sarkem kai?

1 Korintkarank 10:13-ant dilolea Pauluchea fuddlea utramnim amkam hem somzota: Ami kitem sosunk xoktat tem Jehova adim fuddench zannam zaun, ami kosleo tallnneo soscheo tem vinchun kaddtta mhunn Bible khoinsoruch sangona. Oxem mhunnonk char karonnam polloum-ia:

Poilem, Jehovan munxank borem-vaitt vinchun kaddchem dennem dilam. Amchea jivitant ami koxim choltolim tem amich vinchun kaddlolem taka zai. (D.S. 30:19, 20; Josh. 24:15) Ami sarki vatt vinchun kaddttat zalear, Jehova amkam modot kortolo mhunn ami khatri dovrunk zata. (Mho. 16:9) Punn, ami chukichi vatt vinchun kaddli zalear, tacho porinnam amkam bhogcho poddttolo. (Gal. 6:7) Amcher kosleo tallnneo ieunk zai tem Jehova vinchun kaddtta zalear, borem-vaitt vinchun kaddchem dennem tannem amkam purnn toren diunk na oxem zaunchem na kai?

Dusrem, ‘vell ani sondhek lagon ghoddtta tea ghoddnneam’ thaun Jehova amkam rakhona. (Up. 9:11) Ami chukichea zagear vo vellar aslim dekhun ek bhirankull opghat ghoddonk xokta, zacho amkam ghoddie ekdom vaitt porinnam bhogunk poddot. Jezun ek pavtti, ek gopur poddon 18 lokancho jiv gelo tea vixim sanglolem. Ani osle opghat vo ghoddnneo ghoddttat tednam tem Devache khuxek lagon ghoddtta oxem nhoi mhunn tannem dakhoun dilem. (Lukas 13:1-5) Tor, okosmat ghoddttat tea ghoddnneank lagon lok morta tednam tanchea mornna vixim Devan adim fuddench tharailolem mhunn chintop pixeponn zaunchem na kai?

Tisrem, munxachea visvaxiponnacher Soitanan ghatlolea prosnank ami sogleamnim zobab diunk zai. Jehovachi seva kortolea dor ekleachea visvaxiponnacher Soitanan prosn ubarla. Tallnneo ietat tednam ami Jehovak visvaxi ravchimnant mhunn to amcher boglantt ghalta. (Job 1:9-11; 2:4; Prok. 12:10) Amchean omkeoch tallnneo sosunk zauncheo na mhunn chintun Jehovan teo tallnneo pois keleo zalear, amchea svarthak lagon ami Jehovachi seva kortat mhunn Soitanan ghatlolem boglantt khorem zaunchem na kai?

Chovtem, amchea jivitant kitem ghoddchem asa tem Jehovan adim fuddench zannam zaunk zai oxem na. Amcher kosleo tallnni ieunk zai tem Dev adim fuddench tharaita mhunn ami chintat zalear, hacho orth amchea fuddara vixim taka soglem khobor asonkuch zai. Punn hem chintop Bible adarit na. Fuddarak kitem ghoddttolem tem Dev zannam zaunk xokta. (Iz. 46:10) Punn Bible dakhoita ki to fokot apnnank zai teach ghoddnnea vixim adim fuddem zannam zaun gheta. (Ut. 18:20, 21; 22:12) Tor, hea toren to fuddar zannam zaunchea vixim asloli apli xokti bore toren uzar korta, ani teach vellar to amkam borem-vaitt vinchun kaddunk dilam tea dennea add vochona. Amchea svotontrtaiek valor diupi, ani apli tank bore toren uzar korpi Devacher ami hi khatri dovrunk zata nhoi?—D.S. 32:4; 2 Kor. 3:17.

‘Sosunk zata tea-von khor tallnni tumcher ieunk Dev kednanch nirmicho vo diuncho na.’ Him Pauluchim utram ami koxim somzonk zatat? Hanga Paulu, tallnni ieunchea poilim nhoi, punn tallnni ieta tednam Jehova kitem korta tem sangta. Amchea jivitant kosli-i tallnni ieta tednam, ami Jehovacher bhorvonso dovorlo zalear to amkam modot kortolo mhunn amkam apostlachea hea utramnim khatri melltta. (St. 55:22) Pauluchim him buzvonnechim utram don mullavea sotancher adarit asat.

Poilem, amkam tondd diunk poddttat teo tallnneo “sogllea monxank ietat tosleoch.” Tor amcheo tallnneo soglea munxank sosunk poddttat tosleoch zaun asat. Ami Devacher patieun ravlim zalear, teo tallnneo amchean sosunk zauncheo na oxem na. (1 Ped. 5:8, 9) 1 Korintkarank 10:13-achea poilinchea versamnim, Paulu, Israelitkarank oronnʼnneant tondd diunk poddlolea porikxe vixim sangta. (1 Kor. 10:6-11) Tankam tondd diunk poddloleo teo tallnneo, khoichea-i munxan onnbhovunkuch nasleo vo visvaxi Israelitkar sosunk xokonaslim tosleo nasleo. Tanchea modlea “thoddeamnim” Devachem aikonk na mhunn Paulu char pavtti sangta. Dukhachem mhunnttlear, Devacher patieunk na dekhun thoddim Israelitkar aplea chukichea vondovnneank sampoddlim.

Dusrem, ‘Dev visvaxi asa.’ Dev aplea lokam thaim jea toren vaglo, tachea voilean, to aplo ‘mog kortoleank ani adnea samballttoleank’ aplo visvaxi mog dakhoita mhunn dison ieta. (D.S. 7:9) Toxench, Dev apleo bhasaunneo sodanch purnn korta mhunn pasun kollon ieta. (Josh. 23:14) Adim thaun, Devan aplem visvaxiponn dakhoilam. Hem ugddas dovrun, tallnneo ietat tednam, Devacho mog kortoleamnim ani tachi adnea pallttoleamnim Devachea hea bhasaunnecher bhorvonso dovrunk zata: (1) Anik sosunk zaina titlea meren to khoinchi-i tallnni vaddonk soddun diuncho na, ani (2) ‘Tantlim bhair soronk to tankam vatt dakhoitolo.’

Tallnneo ietat tednam, Jehova apnnacher bhorvonso dovortat tankam koso vatt dakhoita? Jehovachi khuxi aslear, to ek tallnni kaddun uddounk pasun xokta. Punn Pauluchim utram ugddas korat: “Tallnni aili zalear, ti sosunk to [Jehova] tumkam boll ditolo ani oxem tantlim bhair sorunk to tumkam vatt dakhoitolo.” Tor choddxe pavtt, to amkam tea tallnneancho fuddo korunk adar dita. Hea toren to amkam “tantlim bhair sorunk” ek vatt dakhoita. To amkam khoinchea thoddea ritimnim vatt dakhoita tem polloiat:

▪ “Sogllea amchea koxttam-dukhimnim to amkam dhir dita vo buzvonn dita.” (2 Kor. 1:3, 4) Aplem Utor uzar korun, povitr xokti diun ani visvaxi chakra thaun melltta tea xikounne udexim to amchem mon ani kalliz xant korunk ani sarke toren chintunk amkam modot korunk xokta.—Mt. 24:45; Ju. 14:16, Rom. 15:4.

▪ Povitr xokte udexim to amkam ghoddie vatt dakhoit. (Juanv 14:26) Tallnneo ietat tednam, Bible-antleo ghoddnneo ani totvam amchea ugddasak haddunk ani zannvaien pavl gheunk povitr xokti amkam modot korunk xokta.

▪ Amkam modot korunk to aplea devdutank uzar korunk xokta.—Heb. 1:14.

▪ Amkam ‘adar diupi’ bhav-bhoinnanchea utram vorvim ani kornneam vorvim to amkam modot korunk xokta.—Kol. 4:11.

Tor 1 Korintkarank 10:13-ant sanglolea Pauluchea utrancho orth kitem mhunn ami somzonk zata? Ami khoinchea tallnneank fuddo korunk zai tem Jehova vinchun kaddina. Punn amchea jivitant tallnni ietat tednam, ami hi khatri dovrunk zata: Ami Jehovacher purnn bhorvonso dovorlo zalear, amchi tallnni eka munxachean sosunk zata tachea poros chodd asonk to kednanch diuncho na; to amkam ti sosunk sodanch vatt dakhoitolo. Kitlim buzvonnechim utram nhoi!

Bible-ant Motiam Sodhum-ia

(1 Korintkarank 10:8) Tanche bhitorlea kai zannamnim kelem toxem, ami pozoddponn korchem nhoi: tantlim tevis hozar zanna ekach disa-bhitor morun poddlim.

w04 4/1 29

Vachpeam Thaun Prosn

Lokgonnti 25:9-a pormonnem, eka disak 24,000 Israelitkar pozoddponn kelolem dekhun mele mhunn sangta, punn 1 Korintkarank 10:8-ant 23,000 Israelitkar mhunn kiteak sanglam?

Hea don versamnim, ho ankddo vegllo kiteak asa tachim ghoddie zaitim karonnam asot. Ek karonn mhunnttlear, to ankddo 23,000 ani 24,000-a modem aslo astolo. Tor tannim to somptoch 23,000 vo 24,000 boroilo astolo.

Anik ek karonn pasun asonk xokta. Pozoddponnant bhorlolea, adlea Korintant jietolea Kristanvank xittkaunk apostl Paulun Shittim-ant Israelitkaranchem udharonn uzar kelem. Tannem oxem boroilem: “Tanche bhitorlea kai zannamnim kelem toxem, ami pozoddponn korchem nhoi: tantlim tevis hozar zanna ekach disa-bhitor morun poddlim.” Pozoddponn kelem mhunn Jehovan moronn haddlolea dor eklea vixim sangon, Paulun to ankddo 23,000 mhunn sanglo.—1 Korintkarank 10:8.

Punn, Lokgonnti odheai 25 sangta, “Israelan tanchea Baal devachi puja keli ani bhettoilʼlem khann chaklem. Mhonnttoch, Sorvespor tancher ragar zalo.” Uprant, Jehovan Moizesak “porjechea sogllea mukheleank” marun uddounk adnea dili. Moizesan hi adnea fuddareank dili. Xevottak, Fineisan rokddench fuddem soron, Midianachea bailek tombunt gheun ailolea Israelitkarak jivexi marlo tednam, “Israel porjecher Devachi pidda denvloli ti bond zali.” Ti ghoddnni hea utramnim sompta: “Te pidden chovis hozar lok morun gelo.”—Lokgonnti 25:1-9.

Lokgonnti pustokant dilolea ankddeant, Jehovan jivexim marlole lok ani fuddeareamnim jivexim marlole ‘porjeche sogle mukheli,’ mellon asle mhunn dison ieta. Tea fuddareamnim jivexim marlole mukheli ghoddie sogle mellon ek hozar asle astole, zaka lagon to ankddo 24,000 zalo. Hea mukheleamnim, vo vaitt kam korunk fuddakar ghetloleamnim, ghoddie pozoddponn kelem astolem, festamnim bhag ghetlo astolo, vo bhag ghetloleank apli maniotai dili astoli. Taka lagon tancher ‘Peorachea Baal devachi puja korcho’ guneanv aslo.

Sumar 700 vorsam uprant, Hosea provadea udexim, Jehovan Israelitkaram vixim oxem sanglem: “Baal-Peorak pavlim tedna, tim Lojechi seva korunk laglim, tim mog kortalim tech vostu bhaxen apunnuch kanttalleachi vost zalim.” (Hosea 9:10) Oxem kortolea sogleank Devachi khor zhoddtti favo asli. Teach pasot Moizesan, Israelachea putank oso ugddas kelo: “Peor Dongrar Sorvesporan kitem kelam tem tumcheanch dolleamnim tumi pollelam. Thoim Baalak bhoztale tancho soglleancho bhosm kelo.”—Dusri Somurt 4:3.

(1 Korintkarank 11:5, 6) Urfattim, ji bail aplem mathem dhampinastana prarthon korta vo Devacho sondex dita, ti aplea mostokacho man kaddta, kiteak ti sarki eke kens-taslole baile bhaxen zata. ⁶ Zor ek bail aplem mathem dhampina, tor tinnem aple kens tasche; punn zor kens katrunk vo mathem tasunk ek lojechi vost, tor tinnem aplem mathem dhampchem.

(1 Korintkarank 11:10) Hea pasot, devdutank favo to man dakhounche khatir, tinnem aplem mathem dhampchem.

w15 2/15 30

Vachpeam Thaun Prosn

Ek bhoinn ek bhava mukhar Bible obheas gheta zalear tinnem aplem matem kiteak dhampunk zai?

▪ The Watchtower Julay 15, 2002-ant aslolo bhag, “Vachpeam Thaun Prosn” hacho zobab dita. Ek bhoinn eka bautizm ghetlolea vo gheunk naslolea bhava mukhar Bible obheas gheta zalear tinnem aplem matem dhampunkuch zai mhunn tea masikent sanglolem. Punn hea vixim anik chodd sodh kelo tednam, hea somzonnent thodde bodol korunk zai mhunn dison ailem.

Ek bhav ek bhoinn gheta tea Bible obheasak ieta zalear, ti obheas ghetana, tea bhoinnin aplem matem dhampunk zai. Oxem kelolean Kristi sobhent, Jehovan dovorlolea mostokponnachea manddavollik ti man dita. Karonn, eka bhavan samballunk zai asloli ti zobabdari ti bhoinn purnn korta. (1 Kor. 11:5, 6, 10) Hachea bhair, to bhav to Bible obheas gheunk purto asa zalear, tea disa tinnem to obheas taka gheunk sangonk zata.

Dusre vatten, zor ek bhoinn gheta tea Bible obheasak ek bautizm gheunk naslolo bhav ieta zalear (zo ticho ghov nhoi), Bible-a pormonnem tinnem aplem matem dhampchi goroz na. Punn, thoddea bhoinninchem ontoskornn oslea poristhitint pasun tankam matem dhampunk prerit korunk puro.

ABRIL 22-28

DEVACHEA UTRANTLE THEVE | 1 KORINTKARANK 14-16

“Dev Sogttancher Apli Purnn Podvi Choloitolo”

(1 Korintkarank 15:24, 25) Uprant sompadnni: tednam to sogllea pordhanancho ani sogllea odhikariancho ani podviancho bhosm korun, Raj Devache, Aplea Bapache, adhin kortolo. ²⁵ Kiteak Devan sogllea Tachea dusmanank tachea paiam tolla ghali porian, Krist razvott choloitolo: hi Devachi ievzonn.

w98 7/1 21 ¶10

“Bhosm Zaupacho Dusmanam Modlo Nimanno Dusman Mhollear Moronn”

¹⁰ “Sompadnni” mhunnche Kristachi Ek Hozar Vorsanchi Razvottki sompta to vell. Hea vellar Jezu apli Razvottki khaltikaien ani visvasan aplea Deva ani aplea Bapachea adhin kortolo. (Prokasovnni 20:4) “Kristak Mostok korun, sorgar prithver asa titlem tachech adhin ektthaim korchem,” hi Devachi ievzonn tednam purnn zatoli. (Efezkarank 1:9, 10) Punn hachea poilim, Devachea khuxe add voitat tea “sogllea pordhanancho ani sogllea odhikariancho ani podviancho” Krist bhosm kortolo. Hantunt, Armageddonant bhosm zauncho asa, tachea poros anik-ui mellon asa. (Prokasovnni 16:16; 19:11-21) Paulu sangta: “Devan sogllea tachea dusmanank tachea paiam tolla ghali porian, Krist razvott choloitolo: hi Devachi ievzonn. Bhosm zaupacho dusmanam modlo nimanno dusman mhollear moronn.” (1 Korintkarank 15:25, 26) Adanvak lagon ailolem patok ani moronn na zaun voitolem. Ani magir, Dev meloleank portun jivont korun ‘somadheo’ khali kortolo.—Juanv 5:28.

(1 Korintkarank 15:26) Bhosm zaupacho dusmanam modlo nimanno dusman mhollear moronn.

kr 237 ¶21

Devachem Raj Prithumer Tachi Khuxi Korta

²¹ Patkak lagon aiz amcher duens ieta, ani hea karonnak lagon ami mortat. Tor hea ‘nimannea dusmanachem’ kitem zatolem? Hea dusmanachea hatant poddon munis ek na ek dis hartach. (1 Kor. 15:26) Punn Jehovak hea dusmanacho fuddo korunk bhirant dista kai? Izaias-an kitem bhakit kelem tem polloiat: “To sasnnak Mornnacho bhosm kortolo. Soglleanchea poleancher vhanvtat tim dukam Sorvespor Dev pusun kaddtolo.” (Iz. 25:8) To vell koso astolo tem tumi chintunk xoktat kai? Konnuch moronn korcho na, ximtoreo ascheonant, roddnnem vo dukh aschem na! Tachea bodlek, sontosachim dukham gollttolim, karonn Jehova meleant tankam portun jivont korun apli bhasaunni purnn kortolo! (Izaias 26:19 vachat.) Xevottak, mornnak lagon zalole sogle ghave pektole.

(1 Korintkarank 15:27, 28, Povitr Pustok - Novo Korar) Khorench, Povitr Pustokachea utramnim, Devan “sogott tachea paiam tolla ghalam.” ‘Sogott tachea paiam tolla ghalʼlem asa’ mhonnttana, Povitr Pustok Devak mat bhair dovorta, kiteak tannem ki sogott Kristachea paiam tolla ghalam. ²⁸ Sogott tachea paiam tolla ghalun zalea uprant, toch put aplea paiam tolla sogott ghalam tache adhin, mhonnge aplea Bapache adhin, apnnakuch kortolo. He porim Dev ekloch eklo apunnuch zatolo sogtta-sorvanchi bhorti ani sompadnni.

w12 9/15 12 ¶17

Xanti—Ek Hozar Vorsam Ani Uprant!

¹⁷ Hozar vorsam uprant kitem ghoddttolem tem kitle bore toren sanglam nhoi! Thoim mhunntta, “Dev sogttancher apli purnn podvi choloitolo.” Hacho orth kitem kai? Adim Eden bagent kitem ghoddlolem tem chintat. Tea vellar, poripurnn munxam Adanv ani Eve, xantin ani ekvottan bhorlolea Jehovachea familichim bhag zaun aslim. Vixvacho Sorvpodvedar Jehova, akʼkhe rochnne voir, ainzam voir ani munxam voir raz choloitalo. Tim tanchea lagim ulounk xoktalim, tachi bhokti korunk xoktalim, ani tacho axirvad melloun gheunk xoktalim. Hea toren to ‘sogttancher apli purnn podvi choloitalo.’

Bible-ant Motiam Sodhum-ia

(1 Korintkarank 14:34, 35) toxem tumche-i sobhent bailamnim ogi ravchem, kiteak thaun ulounk tankam rojia dilʼli na: Somurt-ui sangta tea pormannem, fuddariponn tanchea hatant na. ³⁵ Kitem-i teo zanna zaunk sodtat zalear, ghora vochun tannim aplea ghovam kodde nimgun gheunchem. Sobhent ek bail uloit zalear, ti apli ixim hogddaita.

w12 9/1 9, boks

Apostl Paulun, Bailamnim Ulounchench Nhoi Mhunn Sanglolem Kai?

“Sobhent bailamnim ogi ravchem,” mhunn apostl Paulun boroilem. (1 Korintkarank 14:34) To kitem mhunnonk sodhtalo? To tanchea zannvaiecher prosn ubartalo kai? Na. Karonn zaite pavtti, tannem bailanchea xikvonne vixim sanglem. (2 Timotak 1:5; Titak 2:3-5) Korintkarank pasot apnnem boroilolea chittient, Paulun, fokot bailankuch nhoi punn bhasamnim ulounchem ani provadiponnachem dennem aslolea dor ekleak solʼlo dilo. (1 Korintkarank 14:26-30, 33) Ghoddie thoddeo Kristanv bailo, tankam mellʼllolea novea bhavartha vixim itleo urbebhorit zaleo, ki tea zagear chal asli toxem, uloupi uloitana teo modench apunn prosn vicharunk lagtaleo. Tor ho goddbodd zaina zaunk Paulun bailank, “ghora vochun tannim aplea ghovam kodde nimgun gheunche” mhunn sanglem.—1 Korintkarank 14:35.

(1 Korintkarank 15:53) Kiteak vinaxi tem ovinaxi zaunchem mhonn ani morun veta tem omor zaunchem mhonn Devachi khuxi.

it-1 1197-1198

Ovinaxi

Jezu sangata Razvottki choloupeanchem punorjivontponn Jezu bhaxenuch zatolem. Tankam fokot otmean sasnachem jivit nhoi, punn ovinaxi ani omor jivit mellttolem. 1 Korintkarank 15:42-54-ant Paulu sangta toxem, tankam munxachi kudd asli tednam tannim visvaxiponnan seva keli dekhun atam tankam otmik ovinaxi kudd mellttoli. Omor jivit mhunnttlear, moronn naslolem ani nas zaina toslem jivit. Punn ovinaxi mhunnttlear, kusona vo piddʼddear vo nas zaina tosli kudd. Hachea voilean kollon ieta ki Dev tankam osli xokti dita zaka lagon tankam rogta-masachi kudd ani otmik kudd aslolea Devache her rochnne bhaxen bhailea xoktechi goroz poddona. Tor hem amkam Devak tancher kitlo bhorvonso asa tem dakhoun dita. Punn hea toren apnnacheruch ovlombun ravon ani nas zaunk xokona toslem jivit asa mhunn tim Devachea hata khala aschimnant oxem nhoi. Tim tanchem Mostok Jezu Krista bhaxen, Devachi khuxi korit ravtat ani tachea margdorxona khala khaltikaien cholot ravtat.—1Kor. 15:23-28; immortality; soul polloi.

ABRIL 29–MAY 5

DEVACHEA UTRANTLE THEVE | 2 KORINTKARANK 1-3

“Jehova—Buzvonn Diupi Dev”

(2 Korintkarank 1:3) Dev, amchea Somia Jezu Kristacho Bap, sodanch doiall Bapui ani sogllea amchea gorzamnim amkam dhir-diupi: tor Taka vakhannum-ia.

w17.07 13 ¶4

“Dukhest Astoleam Borabor Dukhest Zaiat”

⁴ Amcho doiallaiecho Bapui Jehovan pasun aplea mogachea lokank, zoxem Abraham, Izak, Jakob, Moizes, ani Raza David-ak mornnant sanddlam. Ani tea vellar zata tem dukh tannem onnbhovlam. (Lok. 12:6-8; Mt. 22:31, 32; D.I. 13:22) Oslea visvaxi munxank apunn uttoitolo tea vella pasot Jehova axeun ravta, vo chodd anvddeta mhunn Devachem Utor amkam khatri dita. (Job 14:14, 15) Tednam tim khuxal astolim ani bore bolaiken astolim. Devachea mogachea ani opurbaiechea puta vixim pasun chintat. Taka khub koxttachem moronn sosunk poddlem. (Matev 3:17) Tea vellar, Jehovak kitlem dukh zalem astolem tem amchean chintunk pasun zaunchem na.—Ju. 5:20; 10:17.

(2 Korintkarank 1:4) Sogllea amchea koxttam-dukhimnim to amkam dhir dita; he porim ami-i, Deva koddlo amkam ieta to dhir gheun, soglle torechea trasank sampoddloleank dhir diunk xoktanv.

w17.07 15 ¶14

“Dukhest Astoleam Borabor Dukhest Zaiat”

¹⁴ Sarkoch dukhest aslolea eka munxak kitem sangop tem zannam zavop kotthin zaunk xokta. Punn, Bible sangta, “xanneanchi jib pekovnni haddta.” (Mho. 12:18) Dusreank buzvonn diunk, zaiteank When Someone You Love Dies, hea pustike thaun buzvonnechim utram mellʼlleant. Choddxe pavtt, ‘dukhest astoleam borabor dukhest zavop’ khub faideachem zata. (Rom. 12:15) Gaby-n aplo ghov melo tednam oxem sanglem, “Dukham mhojea kallzachi ek bhas zaun urlea. Teach karonnak lagon, mhojim thoddim ixttam mhojea sangata roddttat tednam mhaka buzvonn melltta. Tim mhojea dukhant mhojea sangata asat oxem mhaka dista.”

Bible-ant Motiam Sodhum-ia

(2 Korintkarank 1:22) ani ami sogllim tachim mhonnun amcher tannem aplo xikʼko marla, ani isaro zalʼle porim tannem amchea kallzamnim atmo ghala.

w16.04 32

Vachpeam Thaun Prosn

Dor eka obhixikt Kristanvak Dev dita to “isaro” ani “xikʼko” kitem zaun asa?—2 Kor. 1:21, 22.

▪ Isaro: Eka pustoka pormonnem, 2 Korintkarank 1:22-ant “isaro” hea utrak uzar kelolem Grek utor, “kaidea sombondit ani vikri korpachea sombondit” uzar kortale. Zacho orth, “poilo hapto divop, zoma korun dovrop, thoddo-thoddo korun farik korop, vo soput divop, ji ek vost vikti ghetana, akʼkhem mol farik korchea poilim tea molacho thoddo bhag farik kortale tem mol. Hea toren, kaidea pormonnem ti vost tea munxachi zatali, vo kaidea pormonnem ek kontrat khoro zatalo.” Obhixikt Kristavam vixim ami polloilem zalear, 2 Korintkarank 5:1-5-ant sanglolea pormonnem, tankam melltta tem akʼkhem mol, vo inam mhunnttlear sorgar tankam melltta ti ovinaxi otmik kudd. Tea inamant omor jivitachem dennem pasun mellon asa.—1 Kor. 15:48-54.

Aichea kalla voilea Grek bhaxen, oslench ek utor, kazar zata mhunn utor ditana ghaltat tea mudiek uzar kelam. Kristachi bail zaunchim asat tankam sor korunk hi ek bori vopar zaun asa.—2 Kor. 11:2; Prok. 21:2, 9.

▪ Xikʼko: Adim ek xikʼko, ek soi koxi uzar kortale. Xikʼko, ek vost konnachi tem dakhounk, ti vost khori mhunn dakhounk vo ek korar stapon korunk uzar kortale. Obhixiktam vixim polloit zalear, tim Devachim mhunn povitr xokte udexim tancher “xikʼko” marla. (Ef. 1:13, 14) Obhixikt Kristanv visvaxi ravon morchea thoddea vella poilim, vo vhodd sontap suru zaunchea thoddea vella poilim Dev tancher sodanch urta toslo xikʼko martolo.—Ef. 4:30; Prok. 7:2-4.

(2 Korintkarank 2:14-16) Punn Devak dhinvastam, kiteak to amkam Kristachea ekvottant dovrun sodam tachea zoitachea porivarant vo pursanvant vantto dita ani amche udexim Kristache vollkhicho domdom soglleak ximpddaita! ¹⁵ khorench mhollear, ami Deva mukhar choddta toslo Kristacho domdomit pormoll: soddvonn zoddtat tanche modem, toxench ibadd zaunche vatter asat tanche modem; ¹⁶ Hea nimanneank mornnak pavoita toslem mornnadik ghannorddhann, ani poileank jivan bhorit veta toslo domdomit sugondh. Oslea kamak khand marunk konn purto zait?

w10 8/1 23

Tumi Zannant?

Apostl Paulu ‘zoitachea porivara vo pursanva’ vixim uloitana kitea vixim sangonk sodhtalo?

▪ Paulun boroilem: “To amkam Kristachea ekvottant dovrun sodam tachea zoitachea porivarant vo pursanvant vantto dita ani amche udexim Kristache vollkhicho domdom soglleak ximpddaita! Khorench mhollear, ami Deva mukhar choddta toslo Kristacho domdomit pormoll: soddvonn zoddtat tanche modem, toxench ibadd zaunche vatter asat tanche modem; Hea nimanneank mornnak pavoita toslem mornnadik ghannorddhann, ani poileank jivan bhorit veta toslo domdomit sugondh.”—2 Korintkarank 2:14-16.

Hanga apostl Romi lokanche eke chali vixim sangtalo zoim ek Romi xotpoti dusmanank haroun porot ieta tednam, taka man diunk Romi lok ek pursanv kaddttale. Oslea pursanvak, zhuza thaun mellʼlloleo vostu ani koidi korun haddleat tankam, soglea lokank dakhoitale ani boilank iodn mhunn bhettounk vhortale, ani zoitivont zalʼlea xotpotik ani tachea soinikank lok vakʼkhannttale. Pursanv somplea uprant, te boilank iodn mhunn bhettoitale ani chodd korun zaitea koideank jivexim martale.

‘Kristacho domdomit sugondh’ thoddeank jivit haddtta ani herank moronn haddtta, hem “ghoddie pursanvachea vellar Romi lok laitale tea dhumpak “sor kelam astolem,” oxem The International Standard Bible Encyclopedia sangta. “Tea dhumpacho vas, eke vatten zoit mellon ghetloleank tanchea zoitacho ani dusre vatten koideank tancher beginuch ieunchem aslem tea mornnacho ugddas korun ditalo.”