Mars—Jivit ani Porgottnni Mittingechea Pustike Pasot Modot
MARS 4-10
DEVACHEA UTRANTLE THEVE|ROMKARANK 12-14
“Kristi Mog Dakhovop Mhunnche Kitem”
(Romkarank 12:10) Khorim bhav-bhoinn mhonn, moipasan ekamekachi opurbai korun dakhoiat; apnnam poros chodd dusreank man diat.
it-1 55
Moipas
Kristi sobhent dor ekleak bhav-bhoinnam pasot mog (Grek utor, phi·la·del·phiʹa, zacho orth, “eka bhavak moipas”) asonk zai. (Rom. 12:10; Heb. 13:1; 1Ped. 3:8 pasun polloi.) Tor, sobhechea bhav-bhoinnam modem, eka familint asta toslo lagincho, ghott sombond asonk zai. Sobhentlim bhav-bhoinnam sodanch eka-mekak mog dakhoitat tem khorem, punn ho mog tannim odik vaddounk hanga tankam urba dilea.—1Tes. 4:9, 10.
Phi·loʹstor·gos, hea Grek utracho orth ekleak “movall torecho moipas asop.” Ani him utram dog zannam modem aslolo sarko lagincho mog dakhounk uzar keleant. Him utram, sterʹgo, hea utra thaun aileant, jem utor familint aslolea dor eklea modem asta to moipas vornnon korunk uzar kelam. Apostl Paulu Kristanvank ho gunn vaddounk urba dita. (Rom. 12:10) Nimannea disamnim munis “moipas naslolim” (Grek utor, aʹstor·goi) astolim ani tankam moronn favo mhunn Paulun sanglem.—2Tim. 3:3; Rom. 1:31, 32.
(Romkarank 12:17-19) Konnakuch vaitt vaittan farik korum nakat, punn sogllea monxanche nodrek kitem borem tem korunk sodat. 18 Ghoddta zalear, soglleam lagim xantin jieunk tumche kodde zata titlem korat. 19 Mogacheamno, peleacho sudd gheunk sodum nakat, farikponn gheupi Dev asa. Povitr Pustokar oxem boroilolem asa: “‘Farikponn ghetolo to Hanv; diunk zai tem ditolo to Hanv,’ uloita to Sorvespor.”
w09 10/15 8 ¶3
“Soglleam Lagim Xantin Jieiat”
3 Romkarank 12:17 vachat. Lok amchea lagim dusmankai korta zalear ami tanche thaim porot teach ritin vagchem nhoi, mhunn Paulu hanga somzaita. Eka familint, fokot ek ghov vo ek bail Jehovachi bhokti korta zalear toslea ghoramnim ho solʼlo pallop odik gorjechem. Jehovachi bhokti korina to ghov vo bail, aplea kazari sangatea lagim dukhoita toslea utramnim uloita, vo vaitt ritin vagta zalear pasun, ek Kristi ghov vo bail tankam porot toxench korchi tallnni pois korta. ‘Vaitt vaittan farik kelolean’ kainch borem zaina. Portench zalear, toxem kelolean poristhiti anik vaitt zata.
w07 7/1 24-25 ¶12-13
“Konnakuch Vaitt Vaittan Farik Korum Nakat”
12 Bhavarthant asat ani bhavarthant na tanchea sangata ami koxem vagchem tea vixim Paulu ho fuddlo solʼlo dita: “Konnakuch vaitt vaittan farik korum nakat.” Him utram tannem poilim sanglolea utrank mellon asat, zoim tannem mhunnttlolem: ‘Vaittacho dves korat.’ Karonn, ek munis konnakui vaittan porot farik korta zalear, to apunn vaittacho khorench dves korta mhunn koso mhunnonk xokta? Vaittan vaitt farik kelear to “dhong-naslolo” mog dakhoina koxem zata. Magir, Paulu sangta: “Sogllea monxanche nodrek kitem borem tem korunk sodat.” (Romkarank 12:9, 17) Him utram ami koxim apnnaunk zatat?
13 Korintkarank boroilolea poilichea chittint Paulu, apostlank tondd diunk poddlolea dhumallea vixim sangta. To mhunntta: “Akhe rochnnek, mhonnge devdutank ani monxank ek dekhavo zaleanv . . . amcher xirap ghaltat punn ami axirvad ghaltanv; dhumallo amkam ditat punn to ami sostanv; amchi ninda kortat punn ami bholeponnan uloitanv.” (1 Korintkarank 4:9-13, Povitr Pustok - Novo Korar) Heach toren, sonvsarantlea lokanchi nodor khorea Kristanvancher asta. Amcher onʼneai zata tednam pasun ami borem tench kortat tem amchea bhonvtonnim aslole lok polloun, ghoddie amchea Rajeacho sondex aikonk xoktat.—1 Pedru 2:12.
(Romkarank 12:20, 21) “Tuzo dusman bhukela zalear, taka jevunk di; tanela zalear, taka pieunk di; kiteak oxem korun tum taka aplea kornnianchi loz bhogo-xi kortoloi.” 21 Vaittak tujer zoit vhorunk dium naka, punn borem tem korun vaittak haroi.
w12 11/15 29 ¶13
Udar Kallzan Eka-mekak Bhogsat
13 Thodde pavtti amkam ghoddie, Kristanv naslolea eka munxan vaitt kelam astolem. Punn tumi taka Bible kitem xikoita tea vixim zannam zaunk modot korunk xoktat. Apostl Paulun boroilem: “‘Tuzo dusman bhukela zalear, taka jevunk di; tanela zalear, taka pieunk di; kiteak oxem korun tum taka aplea kornnianchi loz bhogo-xi kortoloi.’ Vaittak tujer zoit vhorunk dium naka, punn borem tem korun vaittak haroi.” (Rom. 12:20, 21) Lok tumcher ragar zata tednam pasun tumi tanchea sangata movall ritin vagtat zalear, te aplo sobhav bodlun tumchea sangata doiallaien vagtole. Tumkam vaitt korta taka somzon gheun, tumi taka doia-maia dakhoitat tednam tumi taka Bible xikonk modot korunk xoktolim. To tumchea lagim koso-i vagum, tumchea bore vagnnukek lagon to ghoddie tumi tea toren kiteak vaglim kai, mhunn chintunk puro.—1 Ped. 2:12; 3:16.
Bible-ant Motiam Sodhum-ia
(Romkarank 12:1) Mhonnttoch, bhava-bhoinnimno, Devache vhodd konnvallaiecho ugddas korun, tumche lagim hanv magtam tem hem: povitr ani Devak manta tosli ek jivi boli koxi tumchench Taka somorponn korat tumchi khori bhokti mhollear hich zaunchi.
lvs 76-77 ¶5-6
Ami Amchem Monoronjon Koxem Vinchun Kaddunk Zai
5 Ami amchea jivitant kortat tem soglem, Jehovache bhoktek sombondit asa. Paulun hem oxem somzailem: “Povitr ani Devak manta tosli ek jivi boli koxi tumchench taka somorponn korat.” (Romkarank 12:1) Jezun sanglem: “Sorvespora tujea Devacho sogllea tujea kallzan, sogllea tujea jivachea bollan, sogllea tujea monan, ani soglle tuje xoktin tum mog kortoloi.” (Marku 12:30) Ami Jehovak sodanch boreantlem-borem diunk sodhtat. Adlea kallar, Israelitkar Jehovak ek zonvar bhettounk sodhtalim tednam, tannim bolaiken borem aslolem zonvar bhettounk zai aslem. Tea zonvarak kosli-i khodd asli zalear, Dev ti bhett manun ghenaslo. (Levi-Xastr 22:18-20) Teach toren, amchi bhokti Jehovak manvona tosli zaunk xokta. Koxi?
6 Jehova amkam sangta: “Soglle tumche chalint povitr zaiat, kiteak zannem tumkam apoileant to povitr.” (1 Pedru 1:14-16; 2 Pedru 3:11) Amchi bhokti povitr, vo nitoll aslearuch Jehova ti manun gheta. (Dusri Somurt 15:21) Jehova dves korta tosleo vostu zoxem onoitiktai, hinvsa, vo ami denvchara sombondit kitem-i kortat zalear amchi bhokti nitoll urona. (Romkarank 6:12-14; 8:13) Toxench, ami hea torecheo vostu polloun vo aikon sontos ghetat zalear pasun Jehovak tem manvochem na. Oxem kelolean amchi bhokti mhelli ani manvona tosli zaunk xokta. Toxench Jehova thaim aslolo amcho sombond samkoch piddʼddear zaunk xokta.
(Romkarank 13:1) Sogllim monxam sorkari odhikariank khaltim ravchim, kiteak Devan dilea xivai odhikar na; odhikar choloitoleanchea hatant Devanuch odhikar ghala.
w08 6/15 31 ¶4
Romkarank Potrantle Mukhel Mudʼde
13:1—Odhikar choloitoleanchea hatant “Devanuch odhikar ghala,” hem koxem? Odhikar choloitoleanchea hatant “Devanuch odhikar ghala,” mhunnche, te aplo odhikar Devachi porvangi aslolean cholounk xoktat, ani thodde pavtti Devan adim fuddench te odhikar choloitole mhunn sanglolem. Bible-ant Devan adim fuddem zaitea odhikar choloupeam vixim bhakit kelolem tachea vorvim amkam hem kollon ieta.
MARS 11-17
DEVACHEA UTRANTLE THEVE|ROMKARANK 15-16
“Sosnikai ani Buzvonn Mellonk Jehova Lagim Polloiat”
(Romkarank 15:4) Jem sogllem adim boroun dovorlam, tem amcho bhorvanso upzounk boroilam, kiteak Povitr Pustokar boroilolem asa tem amkam thir ravunk xikoita ani dhir dita.
w17.07 14 ¶11
“Dukhest Astoleam Borabor Dukhest Zaiat”
11 Lazarachea mornna vellar, Jezuk kitlem dukh zalolem tea vixim Devachea Utrant sanglam. Osli buzvonn diupi zaitim versam amkam vachunk mellttat. Hantunt ojapachem kainch na, karonn “sogllem adim boroun dovorlam, tem amcho bhorvanso upzounk boroilam, kiteak Povitr Pustokar boroilolem asa tem amkam thir ravunk xikoita ani dhir dita.” (Rom. 15:4) Tumi dukhest asat zalear, hea versam udexim tumkam pasun buzvonn mellonk xokta:
▪ “Zanchem kalliz dukhovlam khontovlam, tanche sorxem Sorvespor asach! Zanchem mon kollvollta vollvollta, tancher Sorvespor hat oddta.”—St. 34:18, 19.
▪ “Mhojea kallzant huske choddtat tedna Tuji buzvonn mhojea otmeak sukh-sontos dita.”—St. 94:19.
▪ “Khud Jezu Krist amcho Somi ani amcho mog kela ani Aple doiallaien amkam soronaslolo dhir ani thir bhorvanso dila to Dev, amcho Bap, tumchea kallzank dhir dium ani soglle torechea borea kornniamnim ani utramnim tumkam thir ani ghott korum.”—2 Tes. 2:16, 17.
(Romkarank 15:5) Sosnnikaiecho ani ghottaiecho Dev tumkam tumchech modem, Jezu Kristachi dekh gheun, eka monachim korum;
w16.04 14 ¶5
“Thiraiek Aplem Kam Korum-di”
5 Ghottai mellonk Jehova lagim vochat. Jehova “sosnnikaiecho ani ghottaiecho Dev” zaun asa. (Rom. 15:5) Fokot toch amche tras sarke somzonk xokta. Titlench nhoi, amchi poristhiti, bhavnam ani ami koxim vaddleant tem pasun to zannam. Tor amkam kiteachi goroz asa tem zannam zaun to amkam sosunk modot korunk xokta. “Aplea bhoktanchi khuxi To korta, tanchi bob aikota ani tankam nivarta,” mhunn Bible sangta. (St. 145:19) Punn, ami Deva lagim sosunk xokti magtat tednam to amkam koso modot kortolo?
(Romkarank 15:13) Bhorvanso dita to Dev tumchea bhavarthant tumkam anondan ani xantin bhorum; oxem Povitr Atmeachea bollan tumcho bhorvanso odik-odik vaddot vochum.
w14 6/15 14 ¶11
“Sorvespora Tujea Devacho Mog Kor”
11 Jehova ‘amkam anondan ani xantin bhorta toslo bhorvonso dita.’ (Rom. 15:13) Amchea bhavarthachi porikxa zata tednam, ho bhorvonso amkam sosunk modot dita. Obhixikt Kristanvamnim ‘moro porian visvaxi ravlear, tankam sorgar jivitacho mukutt mellttolo.’ (Prok. 2:10) Prithumer jieuncho bhorvonso aslolim promannik munxam, sonvsarbhor zatolea Sobit Bagent sasnanchim besanvam onnbhovtolim. (Luk. 23:43) Hea fuddarachea besanvam vixim amkam koxem bhogta? Ami sontosan ani xantin bhoron, “borem asa titlem, ek-ek sompurnn vordan” Diupea vixim amcho mog vaddona kai?—Jak. 1:17.
Bible-ant Motiam Sodhum-ia
(Romkarank 15:27) Hoi, oxem hannim ap-khuxen tharailam, punn khorem mhollear tim tanchea rinnant asat; kiteak tanchea atmik denneamnim bhavarthi videxiank vantto mellʼlla mhonnttoch, hea sonvsarachea denneamnim tankam bhavponnan modot korun videxi bhavarthi ek rinn farik kortat.
w89 12/1 24 ¶3
“Tumcho Pritimog Kosak Lavun To Kitlo Khoro Asa To Polloiat”
Khorench, tanchi poristhiti polloun tanchea Videxi bhavamnim modot korunk zai asli. Te Jerusalemantlea Kristanvanchea eka khas “rinnant” asle. Jerusalema thaunuch Videxiank bori khobor pavloli nhoi? Taka lagon Paulun chintlem: “Judev Kristanvamnim aple odheatmik theve Videxank vanttle. Tor Videxamnim apleo vostu dan korop tanchi zobabdari zaun asa.”—Romkarank 15:27, The New English Bible.
(Romkarank 16:25) Sasnnak thaun asli ti Devachi ievzonn oxi atam xarti pavli: iugam-kallam thaun Devan lipoun dovorlolem tem Sot provadianchea borovpam vorvim atanchea kallar prokaslem.
it-1 858 ¶5
Adim Fuddem Zannam Zavop, Adim Fuddem Tharavop
Mesias vo Krist, bhakit keloli Sonsot zauncho aslo, zachea vorvim prithume voilea familintlea soglea nitivont lokank axirvad mellcho aslo. (Gal. 3:8, 14) Hea “sonsti” vixim poile pavtt, Eden bhagent Adanv and Eve Deva add gelea uprant, punn Abel zolmochea poilim sanglolem. (Ut. 3:15) Magir, sumar 4,000 vorsam uprant ti sonsot, mhunnche Mesiasacho ‘povitr gutt’ ukto zalo. Taka lagon, haka “iugam-kallam thaun Devan lipoun dovorlolem sot” mhunnonk zata.—Rom. 16:25-27; Ef. 1:8-10; 3:4-11.
MARS 18-24
DEVACHEA UTRANTLE THEVE | 1 KORINTKARANK 1-3
“Tumi Sonvsarik Vostuncho Valor Korpi vo Devachea Vostuncho Valor Korpi Zaun Asat?”
(1 Korintkarank 2:14) Jea monxank Atmo mellunk na, tim Devachea Atmea thaun ieta tem ghenant; hem tankam ek pixeponn, ani tim tem vollkhunk xokonant, kiteak Atmeachech vorvim heo vostu topasun kaddunk zata.
w18.02 19 ¶4-5
Deva Lagim Ghott Ixttagot Asop Mhunnttlear Kitem?
4 Poilim, Deva sangata ghott ixttagot naslolea munxachea sobhavacher dhean dium-ia. Sonvsarachem dhean choddxem patki soimbacher vo kuddicheruch asa. Ho sobhav ‘Devacher kolpotat tanche modem vavurta’ mhunn Paulu sangta. (Ef. 2:2, Povitr Pustok - Novo Korar) Hea sobhavacho probhav choddxea munxancher poddla ani te hem chintop apnnaitat—dusrim kortat mhunn, apunn-ui tench kortat. Tanchem dhean patki soimbacheruch asta. Hea karonnak lagon, choddxe lok apleak kitem borem dista tench kortat ani Devachea dorjeam pormonnem jieunk proitnuch korinant. Deva sangata ghott ixttagot naslolo munis vo patki soimbacher dhean dovorpi munis, podvi ani poixe vo apleak asa te hokʼk soglea-von chodd mhotvache mhunn lekhta.
5 Deva sangata ghott ixttagot naslolea munxak anik koso vollkhonk zata? Osle munis, khoincheai ‘patki soimbachea kamamnim’ bhag ghetat. (Gal. 5:19-21) Patki soimbacho sobhav aslolea lokank kosle gunn astat, tea vixim Korintkaranchea sobhek boroilolea poilea chittint Paulu sangta. Tem mhunnttlear: futt ghalunk fuddem kaddop, ekleachi bazu ghevop, zhogddim lavop, eka-mekak kortt-ant vhorop, mostokak man divop na, ani khaunchea-pieunchea kamant lobdon ravop. Tallnni ieta tednam, patki soimbacher dhean diupi munis ghott ravon fuddo korchea bodlek tantunt sampoddtta. (Mho. 7:21, 22) Thoddim itlim vaitt zatolim, ki tancher Devacho “povitr atmo vo povitr xokti” kam korchi na mhunn Judas sangta.—Jud. 18, 19.
(1 Korintkarank 2:15, 16) Punn jea monxank Atmo mellʼlla, tanchean sogllea vostuncho orth topasun tharaunk zata: punn hea monxancho orth konnacheanuch tharaunk zaina. 16 Kiteak, Povitr Pustokachea utram pormannem, “Sorvesporachem mon konnem tori vollkhun kaddlam? Konnachean Taka budh diunk zait?” Amkam zalear, Kristachem mon mellʼllam.
w18.02 19 ¶6
Deva Lagim Ghott Ixttagot Asop Mhunnttlear Kitem?
6 Deva lagim ghott ixttagot aslolo munis konnank mhunnttat? Deva lagim ixttagot naslolea munxam sarko aschea bodlek, ho munis Deva sangata apli ixttagot samballtta. Deva lagim ghott ixttagot aslolim munxam, Devachi ‘dekh ghetat.’ (Ef. 5:1) Hacho orth, tim eka vixoi-a vixim Jehova kitem chintʼta ani tachea nodre pormonnem kitem sarkem asa tem polloun, tea pormonnem vavurcho proitn kortat. Dev tankam khoro zaun asa. Patki soimbacher dhean diupi munxam bhaxen zaunchea bodlek, tim soglea vatten Jehovachea dorjeam pormonnem cholcho proitn kortat. (St. 119:33; 143:10) Patki soimbachea kamancher dhean dinastana, Deva lagim ghott ixttagot aslolo munis ‘povitr xoktechem foll’ utpon korcho proitn korta.—Gal. 5:22, 23.
w18.02 22 ¶15
Deva Lagim Ghott Ixttagot Asop Mhunnttlear Kitem?
15 Ami Kristachi dekh koxi gheunk zata? Bible-ant, 1 Korintkarank 2:16-ant amkam “Kristachem mon” asonk zai mhunn sangta. Ani Romkarank 15:5-ant, ami “Jezu Kristachi dekh gheun, eka monachi” asonk zai mhunn sangta. Tor Krista bhaxen zaunk, ami to koso chintʼta tem zannam zaunk zai, ani toxench, tacho sobhav bore toren zannam zaunk zai. Tea uprant ami tachea pavlamnim cholonk zai. Jezuchem mon, Deva sangata aslolea tachea sombondacher aslem. Tor jitlim ami Jezu sarkim chintunk lagtat, titlim ami Jehova sarkim chintunk pavtolim. Hea karonnank lagon, ami Jezu sarkem chintop kitlem gorjechem tem sarkem kollon ieta.
Bible-ant Motiam Sodhum-ia
(1 Korintkarank 1:20) Khoim pavle atam tuje vidvan? Khoim gele tuje ponddit? Hea kalla-iugache vivad-korpi xastri khoim anink urle? Hea sonvsarachi zannvai Devan pixi korun soddli nhoi?
it-2 1193 ¶1
Zannvai
Hea sonvsaran apli zannvai uzar korun, Krista udexim Devan keloli manddavoll ek pixemponn mhunn chintun, ti nakarlea. Sonvsarantlea raj choloupeamnim bore toren razvottki choloili astoli vo neai-an vavurle astole, toripunn tannim ‘Somiak khambear marlo.’ (1Kor. 1:18; 2:7, 8) Punn atam Devan, sonvsarachi zannvai pixemponn mhunn dakhoun dilea. Tem koxem? Jea munxank sonvsar xannim mhunn somzota, tim munxam zaka “Devachi pisai” vo zankam ‘pixim, oskot, ani manoitai naslolim’ mhunn somzotat, tosleank Dev uzar korun konnuch vo kitench addaunk zaina toslo aplo udʼdhex purnn korta. (1Kor. 1:19-28) ‘Hea iugachi zannvai, ani iugachea pordhananchi-i zannvai’ nattok zaun vetoli mhunn Paulun Korintachea Kristanvanchea ugddasak haddlem. Tor, osli zannvai Devan prerit kelolea apostlachea sondexachi bhag nasli. (1Kor. 2:6, 13) ‘Monxachea polkea xanneponnan [phi·lo·so·phiʹas, zacho orth, zannvaiecho mog] tumkam fosoun, konnench tumkam aplea tabeant korina zaunk chotur ravat’ mhunn Paulu Kolosantlea Kristanvank xittkailem.”—Kol 2:8; vers 20-23 sor kor.
(1 Korintkarank 2:3-5) Hanv tumche modem aslom tednam, mhoji osoktai vollkhun ani boroch bhieun ani kampun aslom. 4 Monxanche zannvaiechea utramnim tumkam zoddun gheunk nhoi, punn fokot Atmeache xoktin tumkam khatri diunk hanv uloilam ani mhozo nirop hanvem porgottla. 5 Mhonnttoch tumcho bhavarth monxanche zannvaieche buniadir nhoi, punn Devache xokticher bandlolo asa.
w08 7/15 27 ¶6
Korintkarank Potrantle Mukhel Mudʼde
2:3-5. Grek zannvai ani xikounnecho mukhel zago aslolea Korintant porgottʼttana, aple aiknnar apunn sangta tem manun ghetole kai mhunn Paulun ghoddie chintlem astolem. Punn, aplea oskotkaiek vo bhirantek lagon to Devan diloli seva korunk fatti soronk na. Heach toren, Devachea Rajeachi bori khobor porgottʼttat tednam kosli-i addkoll aili zalear pasun ami porgottunk fatti sorchim nhoi. Paulu bhaxen, Jehova amkam modot kortolo mhunn ami bhorvonso dovrunk zata.
MARS 25-31
DEVACHEA UTRANTLE THEVE|1 KORINTKARANK 4-6
“Ilo-so Khomir Sogllem Kaloilʼlem Pitt Ambttaita”
(1 Korintkarank 5:1, 2) Tumche modem pozoddponn vosta mhonn sogllo lok sangta; videxiam modem porian vosona toslem pozoddponn! Kiteak mhollear konn-eklo aplea bapaiche bailek gheun ravta! 2 Ani tori tumi gorvan fullolim asat! Oslem kortub kelam taka tumche modlo bhair ghalun, tumi rudon kelʼlem zalear odik borem zatem.
(1 Korintkarank 5:5-8) tea monxache kuddicho nas zaunche khatir taka Soitanache adhin korunk zai; oxem Somiachea Disa tacho otmo taronn zoddunk pavtolo. 6 Tor tumchi boddai polki! Ilo-so khomir sogllem kaloilʼlem pitt ambttaita mhonn tumkam khobor na? 7 Tor tumchea jivitantlo pornno khomir bhair uddoiat, khomir nastana kaloilʼlem pitt zaiat, kiteak amcho Paskacho Utsov pavlo: Kristak marlolean, amchea Paskanchea Menddreachem bolidan zalem. 8 Mhonnttoch Paskanchea Utsovacho somarombh korum-ia ani khotteponnacho khomir aslole undde gheun nhoi, punn khomir-naslole, mhonnge satvik jinneche ani khoreponnache, undde gheun zaum-di amcho somarombh.
(1 Korintkarank 5:13) Bhair asloleanchi nit kortolo to Dev. Hea noxttea monxak tumche modlo bhair uddoiat, oxem Povitr Pustok sangta.”
it-2 230
Khomir
Paulun Korint sobhek, onoitik kamam korpi munxak sobhentlean bhair kaddunk adnea dili tednam khomirachem udharonn uzar kelem. Tannem mhunttlem: “Ilo-so khomir sogllem kaloilʼlem pitt ambttaita mhonn tumkam khobor na? Tor tumchea jivitantlo pornno khomir bhair uddoiat, khomir nastana kaloilʼlem pitt zaiat, kiteak amcho Paskacho Utsov pavlo: Kristak marlolean, amchea Paskanchea Menddreachem bolidan zalem.” Magir tannem, “khomir,” mhunnche kitem tem sanglem: “Mhonnttoch Paskanchea Utsovacho somarombh korum-ia ani khotteponnacho khomir aslole undde gheun nhoi, punn khomir-naslole, mhonnge satvik jinneche ani khoreponnache, undde gheun zaum-di amcho somarombh.” (1Kor. 5:6-8) Paulu hanga Paskachea Festa uprant aslolea Judevanchea Fug Naslolea Unddeanchea festa vixim sangon somzaitalo. Pittant thoddem khomir ghatlem zalear soglem pitt vo sogle undde ambott zatat, teach toren tea onoitik kamam korpi munxak sobhentlean bhair kaddina zalear akʼkhi sobha Jehovachea nodren mhelli zata. Tor, Festa vellar Israelitkar aplea ghorant khomir dovrich nasle teach toren tannim tanchea modem aslolea tea ‘khomir-a’ sarkea munxak tachea modlo bhair kaddunk zai aslo.
it-2 869-870
Soitan
‘Eka munxache kuddicho nas zaunchea khatir taka Soitanachea adin korop’ mhunnche kitem?
Korintachea sobhentlea eklean aplea famili modem, mhunnche aplea bapaichea baile kodden loingik patok kelʼlem. Oslea noxttea munxa vixim kitem korunk zai tem, tea sobhek margdorxon ditana Paulun oxem sanglem: “Tea monxache kuddicho nas zaunche khatir taka Soitanache adhin korunk zai.” (1Kor. 5:5) He adnea pormonnem, tea munxak sobhentlean bhair kaddunk zai aslo, ani tachea sangata kosloch sombond dovrunk zai naslo. (1Kor. 5:13) Taka Soitanachea adin korop mhunnche taka sobhechea bhair sonvsarant uddovop, zacho Dev ani odhikari Soitan zaun asa. ‘Kaloilolea pittant ilo-so khomir’ akʼkhem pitt ambttaita toxem, sobhe bhitor asloli hi ‘kudd’ vo patki munis akʼkhi sobha piddʼddear korunk xoktalo. Loingik patok kelolea hea munxak sobhentlean kaddlolean, Devachea sangata ghott ixttagot asloli sobha, tanchea bhitorli hi ‘kudd’ vo vaitt probhav nas kortoli. (1Kor. 5:6, 7) Paulun teach toren Himenevak ani Aleksandrak Soitanachea adin kele, karonn tannim aplo bhavarth ani nitoll ontoskornn soddun dilolem, ani tanchea bhavarthachem tarum futton gelolem.—1Tim. 1:20.
(1 Korintkarank 5:9-11) Pozddea jivitachea monxanche songotik poddum nakat mhonn mhojea adlea potracher hanvem tumkam boroilam. 10 Hea sonvsarantlea sogllea pozddeanchi vo svarthianchi vo nagovnneanchi vo kuddea devank bhoztoleanchi hanv khobor korinaslom; oxem zalʼlem tor, tumkam ho sonvsar soddun par kaddchi poddtoli asli. 11 Hanv tumkam sangunk sodtalom tem itlench: amche sobhentlim bhavbhoinn zaun-ui, konn-konn pozddim, svarthi, vo kuddea devank bhozpi, vo dusreanchem vaitt uloitat toslim, vo bebdim, vo nagovnnim zalear, oslea monxanche songotik tumi poddum nakat, tanchea vangdda jevunk porian bosum nakat.
lvs 241, enddnott
Sobhentlean Bhair Kaddop
Ek gombir patok kelʼlo munis poschatap korina zalear, ani Jehovache dorje pallunk nakarta zalear, to sobhecho bhag zaun urona. Taka sobhentlean bhair kaddunk zai. Sobhentlean bhair kaddlolea munxa lagim ami kainch sombond dovornant ani tachea lagim ulounchem pasun bond kortat. (1 Korintkarank 5:11; 2 Juanv 9-11) Sobhentlean bhair kaddpachi manddavoll aslolean, Jehovachem nanv ani sobha nitoll urta. (1 Korintkarank 5:6) Toxench, sobhentlean bhair kaddpachea manddavolle udexim eka munxak xist melltta, jea vorvim to poschatap korun Jehova lagim porot ieunk xokta.—Lukas 15:17.
▸ Odheai 3, peregraf 19
Bible-ant Motiam Sodhum-ia
(1 Korintkarank 4:9, Povitr Pustok – Novo Korar) Amam dhormdutank, Devan nimanno vorg dila so dista; ami mornnachem formonn poddlele xe monis, akhe rochnnek, mhunnge devdutank ani monxank ek dekhavo zaleanv.
w09 5/15 24 ¶16
Devdut—“Chakri Kortat Te Atme”
16 Kristanvancher tallnni ieta tednam, tim ‘devdutank ek dekhavo koxim zatat.’ (1 Kor. 4:9) Devdut amchim visvaxiponnachim kamam polloun khuxal zatat ani ek patki munis poschatap korta tednam sontostat. (Lukas 15:10) Kristanv bailo Devak manvota tea toren vagtat tem Devdut polloitat. “Devdutam khatir aplea potichea odhikara khal asa mhonn dakhouncheak, bailen aplem mathem dhampunk zai” mhunn Bible sangta. (1 Kor. 11:3, 10, Povitr Pustok - Novo Korar) Devacheo adnea ani mostokponnache manddavollek Kristi bailo ani prithumer aslole Devache sevok pallo ditat tem polloun devdut khuxal zatat. Devachem utor pallchea vixim sorgar aslolea Devachea putank hem ek borem udharonn zaun asa.
(1 Korintkarank 6:3) Devan rochlolea dutam modem atam bore ani vaitt konn te nirnnoi gheunk amchea hatant ghallem asa mhonn nokllot tumi? Mhonnttoch hea dispottea tontteanchi nit amchean korunk zaina?
it-2 211
Kaido
Devdutank Kaido. Munxa poros chodd odhikar aslolea Devdutank Devache kaide ani adnea pallchi poddtta. (Heb. 1:7, 14; St. 104:4) Jehovan aplo dusman Soitanak pasun adnea diloli ani taka xim ghatloli. (Job 1:12; 2:6) Mha-devdut Mikaelan, sogle-von vhodd neai korpi Jehovachi podvi vollkhon gheun, Devak man dilo ani Denvchara lagim vad-vivad zalo tednam oxem mhunnttlem: “Sorvespor tujer khastichem formonn marum.” (Jud. 9; Zek. 3:2 sor kor.) Jehova Devan soglea devdutank, mhoimevont zalolea Jezu Kristachea odhikara khala dovorleat. (Heb. 1:6; 1Ped. 3:22; Mt. 13:41; 25:31; Filp. 2:9-11) Taka lagon, Jezuchea adneak pallo diun ek devdut Juanva lagim gelo. (Prok. 1:1) Tori astana, 1 Korintkarank 6:3-ant apostl Paulu, devdutancho neai korcho odhikar Kristachea obhixikt bhavank dila mhunn sangta. Te eke ritin noxttea devdutancho neai korche asat dekhun tannem ghoddie oxem sanglem astolem.