Julay—Jivit ani Porgottnni Mittingechea Pustike Pasot Modot
JULAY 2-8
DEVACHEA UTRANTLE THEVE | LUKAS 6-7
“Udar Kallzan Diat”
(Lukas 6:37) “Konnachich nit korum nakat ani tumchi-i Dev nit korcho na. Konnakuch guneanvkar korinakat ani tumkam-i Dev guneanvkar korcho na. Dusreank bhogsat ani tumkam-i Dev bhogxitolo.
nwtsty obheasachi ttipnni Luk. 6:37
Dusreank bhogsat ani tumkam-i Dev bhogxitolo: Vo “Soddoit ravat ani tumkam soddoitolim.” “Bhogsat” hea utrak uzar kelʼlea Grek utracho orth “dhaddop; soddovop (udharonnak, eka koideak soddoilolea sarkem).” Hea versant nit korchea vixim ani guneavkari korchea vixim sanglam. Tor, hea utrancho urfatto orth, ekleak xikxa favo asa oxem dista tednam pasun taka soddovop vo bhoksovop zaun asa.
w08 5/15 9-10 ¶13-14
Borem Tem Korat
13 Jezuchim utram, Matevachea xubh- vortomanant hea toren dileant: “Tumi nit korum nakat, ani Dev tumchi nit korcho na.” (Mt. 7:1) Lukasan sanglolea pormonnem, Jezun oxem sanglem: “Konnachich nit korum nakat ani tumchi-i Dev nit korcho na. Konnakuch guneanvkar korinakat ani tumkam-i Dev guneanvkar korcho na. Dusreank bhogsat ani tumkam-i Dev bhogxitolo.” (Lukas 6:37) Poilea xekddeantle Farizev, xastrant naslole rivaz pallun dusreanchi chodduch nit kortale. Jezuchea aikopeam modem konnui oxem kortalo zalear tannem dusreanchi ‘nit korchi’ bond korun, tankam soddoupak zai asle vo tancheo chuki bhogsunk zai asleo. Apostl Paulun sudʼdha bhogsonnea vixim osloch solʼlo dilʼlo.
14 Jezuchea xisamnim dusreank bhogxile zalear, dusrim-i tankam bhogsunk toiar astolim. Jezun mhunnttlem, “tumi nit korxat tech toren To tumchi nit kortolo; ani tumi zokxat teach mapan To tumkam porot zoktolo.” (Mt. 7:2) Dusream sangata ami bore toren vagom vo vaitt toren vagom, ami vomptat tench ami lunvtolim.—Gal. 6:7.
(Lukas 6:38) Diat ani tumkam-i Dev ditolo; borem chikar map, damun-chepun, haloun ani oto-sor suien bhorlolem, Dev tumche unttient ghaltolo; kiteak jea mapan tumi dusreank ditat, teach mapan Dev tumkam-i ditolo.”
nwtsty obheasachi ttipnni Luk. 6:38
Diat: Vo “Di-it ravat.” “Diat” hea utrak uzar kelʼlea Grek kriapodacho orth sodanch divop.
(Lukas 6:38) Diat ani tumkam-i Dev ditolo; borem chikar map, damun-chepun, haloun ani oto-sor suien bhorlolem, Dev tumche unttient ghaltolo; kiteak jea mapan tumi dusreank ditat, teach mapan Dev tumkam-i ditolo.”
nwtsty obheasachi ttipnni Luk. 6:38
tumche unttient: Hea utrak uzar kelʼlea Grek utracho orth “tujea gopant (vo horddear).” Punn hea versachea bhonvttonnchim versam vachlear, ghoddie hem pottʼtteachea voir nheslolea angvostrachea unttient mhunn orth dita. ‘Unttient ghalpachi’ rit, thoddea vikri kortoleank asli. Te lokank vostu viktana tanchea unttient bhorun ghaltale.
Bible-ant Motiam Sodhum-ia
(Lukas 6:12, 13) Magir oxem zalem: magnnem korunk Jezu eka dongrar gelo ani Devak magnnem korun Tannem akʼkhi rat sarli. 13 Uzvaddtoch Tannem Aplea xisank apoile, tantlea bara zannank vinchun kaddle ani tankam Dhormdut oxem nanvui dilem:
w07 8/1 6 ¶1
Deva Sangata Khori Ixttagot—Koxi Korunk Zata?
Jezu magnneant zaito vell sartalo. (Juanv 17:1-26) Udharonnak, 12 zannank aple apostl mhunn vinchun kaddchea poilim, “magnnem korunk Jezu eka dongrar gelo ani Devak magnnem korun Tannem akʼkhi rat sarli.” (Lukas 6:12) Jehova sangata ghott ixttagot dovortat tim Jezu bhaxen ghoddie akʼkhi rat magnneant sarinant astolim, punn jivitant vhoddle nirnnoi gheunchea poilim tim Deva lagim zaito vell magnnem kortat ani povitr xoktechem margdorxon magtat.
(Lukas 7:35) Tori Devachi zannvai vollkhun, tichim bhurgim tika sakxi ditat.”
nwtsty obheasachi ttipnni Luk. 7:35
tichim bhurgim: Vo “ticho porinnam.” Hanga zannvaiek munxachem rup diun tika bhurgim aslolea porim dakhoilea. Jezu hanga uloitalo teach vixim Mt. 11:19-antui vachunk melltta. Thoim zannvaiek “kamam” aslolea porim dakhoilea. Zannvaiechim bhurgim vo kamam mhunnche, Juanv Batist ani Jezun dakhoilʼle purave je tancher ghatlolim bogllanttam chukichim mhunn dakhoitat. Dusrea utramnim Jezu oso mhunnonk sodhtalo: ‘Tanchim nitichim kamam ani kornneo polloiat ani te arop chukiche mhunn tumkam kollttolem.’
JULAY 9-15
DEVACHEA UTRANTLE THEVE | LUKAS 8-9
“Jezuche Pattlavdar Zaunk Kiteachi Goroz Asa?”
(Lukas 9:57, 58) Te vatten cholta astana konn-eklean Taka mhollem: “Tum vexi thoisor Tuje pattlean hanv-ui ietolom.” 58 Jezun zap dili: “Koleank dholi ani varea velea suknneank nhidunk zage asat, punn Monxachea Putak Apli tokli tenkounk khoisoruch zago na.”
it-2 494
Ghontter
Eka dhorm xastrian Jezuk, “Guruji, Tum vexi thoim hanv Tuje pattlean ietolom,” mhunn sanglem tednam Jezun mhunnttlem, “Koleank dholi ani varea velea suknneank nhidunk zage asat, punn Monxachea Putak Apli tokli tenkounk khoisoruch zago na.” (Mt. 8:19, 20; Luk. 9:57, 58) Hanga Jezun, tea munxak apleacho pattlav korunk zai zalear tannem apli sukh-suvidha soddun, Jehovacher purnn bhorvonso dovrunk zai mhunn dakhoun dilem. Hench totv Jezun aplea xisank ‘amchea bapa’ magnnem xikoilolem tantunt dison ieta. Tannem mhunnttlem: “Amcho dispotto giras, aiz amkam di.” Toxench Jezuchea hea utram voilean hem totv dison ieta. Tannem mhunnttlem, “Tumche modlim konn-ui apnnam lagim asot titlem-i soddun dina zatit zalear, tankam Mhojea xisam modem zago na.”—Mt. 6:11; Luk. 14:33.
(Lukas 9:59, 60) Dusrea konn-ekleak Tannem mhollem: “Mhoje pattlean ie.” Punn tea monxan oxem mhollem: “Poilo vochun hanvem mhojea bapaik matiek lavunk mhaka rojia di.” 60 Punn Jezun taka zap dili: “Meleant tankam aplea melʼleank matiek lavum-di; punn tum voch ani Devachem Raj porgott kor.”
nwtsty obheasachi ttipnni Luk. 9:59, 60
mhojea bapaik matiek lavunk: Him utram mhunnon, to munis aplo bapui piddʼddear zala ani taka purpachi toiari korunk zai dekhun toxem mhunno naslo. Oxem aslem zalear, to Jezu lagim thoim tea vellar ulouncho naslo. Adlea Israel ani Israelachea bhonvtonnchea desamnim, ek munis melo zalear taka rokddech purtale, chodd korun teach disak. Tor tea munxacho bapui piddʼddear zaunk naslo, to ghoddie duent vo zanntto aslo astolo. Ani, tachea bapaichi kallji gheunk tachea familintlim dusrim-i aslim astolim, na zalear Jezu tea munxak tachea duent vo modot zai aslolea bapaik tosoch soddun aplea pattlean ieo mhunn sangcho naslo. (Mk. 7:9-13) Tor to munis dusrea utramnim oso mhunnonk sodhtalo, ‘Hanv tuzo pattlav kortolom, punn mhozo bapui aso-sor mhojean zaunchem na. Mhozo bapui moron, hanv taka purtam meren rav.’ Jezuchea nodren to munis aplea jivitant Devachea Rajeak polio zago diunk chuklo.—Luk. 9:60, 62.
Meleant tankam aplea melʼleank matiek lavum-di: Luk. 9:59-ache obheasache ttipnnent sanglolea pormonnem, zo munis Jezu lagim uloitalo tacho bapui ghoddie duent vo zanntto aslo astolo, to piddʼddear zaunk naslo. Tor Jezu oxem mhunnonk sodhtalo, ‘Odheatmik ritin meleant tannim aplea meloleank matiek lavum-di,’ mhunnchem tea munxacho bapui moron taka purum porian tannem aplea bapaichi dekhrekh korchi zobabdari aplea soireancher soddun diunk zai asli. Jezucho pattlav kelear tea munxak sasnachem jivit favo zatolem ani Devachea nodren to ek odheatmik ritin melolea munxa sarko ascho na. Tor Jezu hanga, eklean odheatmik ritin jivo uronk Devachem Raj aplea jivitant poilem dovrunk zai ani tea raja vixim soglea zageamnim porgottunk zai mhunn sangonk sodhtalo.
(Lukas 9:61, 62) Anink eklean mhollem: “Saiba, hanv Tuje pattlean ietam, punn poilim mhaka mhojea ghorcheancho nirop gheun ieum-di.” 62 Taka Jezun sanglem: “Konn-ui nangrak hat ghalea uprant pattlean vollon polletit, tim Devachea Rajeak purtim nhoi.”
nwtsty media
Kosop
Kospachem kam chodd korun xorod mhoineanim kortale. Karonn gormechea mhoineamnim votant suklolea koddok zomnicher paus poddlea uprant mati mov zatali. (App. B15-E polloi.) Thoddea lakhddachea zotank dantuchem pont astalem, jem eka lankddachea pottʼttek zhoddlolem aslem ani tem zot ek vo chodd zonvaram voddttalim. Mati koson zalea uprant, bim vomptale. Lok kospachea vavra vixim zannam aslolean, Hebrev Bhaxen Boroilolea Pustokamnim oslea vavra vixim vopareo uzar keleat. (Fudd. 14:18; Iz. 2:4; Jer. 4:3; Mik. 4:3) Jezu xet-kamachea veg-vegllea vavra vixim vopareo uzar korun mukhel xikvonn ditalo. Udharonnak, akʼkhea kallzantlean ek xis zavop kitlem gorjechem tem dakhounk Jezun kospachea kamant aslolea vavrak sor korun dakhoilem. (Luk. 9:62) Ek xetkar kostana hevtten-tevtten polloita zalear to vankddeo-tenkddeo choreo ghaltolo. Toxench, Jezucho ek xis aplem dhean sarkem dovorna zalear vo apli zobabdari samballunk fatti sorta zalear taka Devachem Raj favo na.
w12 4/15 15-16 ¶11-13
Akʼkhea Kallzan Jehovachi Seva Korit Ravat
11 Jezu hea vopare thaun xikounk sodhtalo tem lisanv somzopak ami tea voparent anik thoddi mahiti ghalun polloum-ia. Ek xetkar xetant kosta. Punn kosta tednam to aplea ghora vixim chintunk lagta zoxem, aplea famili vixim, aplea ixttam vixim, thoinchem jevonn-khann, nachop-gaian, thoinchem vatavoronn, hea vostuncher to dhean diunk lagta. Uprant, sukh diupi hea vostuchea chintnamnim to itlo buddtta ki thoddem kosun zalea uprant to porot ‘pattlean vollon soddun ailoleo vostu polleunk’ lagta. Tea xetant bim vompchea poilim zaitem kam urlolem. Punn tea xetkarachem mon kamacher naslolean, xetachem soglem kam addon urta. Xetkaran aplem mon kamacher dovrunk na mhunn dhoni niraxi zata.
12 Hea kallar ghoddtta tosli heach torechi ek poristhiti polloum-ia. To xetkamti mhunnttlear ek Kristanv zachi ixttagot poilim Deva thaim ghott asli punn atam ti dokheant asa. Udharonnak, sevent khub vell vavurpi ek bhava vixim chintum-ia. To mittingek voita ani sevent voita punn sonvsaracheo thoddeo riti taka boreo lagtat. Bhitorlea bhitoruch to kallzant tea vostunk lagon anvddeta. Vell sorta toso, sevent zaitim vorsam vavurlolea uprant to porot ‘pattlean vollon, soddun ailoleo vostu polleunk’ lagta. Sevent zaito vavr urla tori punn, tannem ‘jivitachem Utor’ ghott dhoronk naslolean sevent tacho vavr unno zata. (Filp. 2:16) Hea toren thiraien kam korinant tankam polloun “Pikecho dhoni” Jehova, dukhi zata.—Lukas 10:2.
13 Hea voparantle lisanv sarkem dison ieta. Borea ani dhadoxi korpi kamant bhag ghetat tednam, zoxem ami mittingek hajir zatat ani sevent bhag ghetat tednam kitlem toknnaiechem. Punn Jehovachi seva akʼkhea kallzant kortolim zalear itlench korop puro nhoi, tantunt anik mellon asa. (2 It. 25:1, 2, 27) Ek Kristanv, apunn ‘soddun ailolea vostuncho mog korta,’ mhunnche tachea kallzant sonvsarachea thoddea ritim pormonnem jieuncho mog asa zalear, Deva sangata tacho sombond tuttonk xokta. (Luk. 17:32) Ami “vaittacho dves dhorun borem tench korit” ravlim zalearuch ami “Devachea Rajeak purtim” zatolim. (Rom. 12:9; Luk. 9:62) Akʼkhea kallzant Rajea pasot vavurtana Soitanachea sonvsarantleo vostu amkam addkholl haddunk xoktat. Tor teo vostu kitleo-i faideacheo vo boreo distat zalear pasun, ami tea vostunk amchea sevent addkholl haddunk diunchinant mhunn ami khatri korchi goroz asa.—2 Kor. 11:14; Filipkarank 3:13, 14 vachat.
Bible-ant Motiam Sodhum-ia
(Lukas 8:3) ani Herodichea karbharia Kusachi potinn Juana, ani Suzana, ani sobar dusreo bailo. Teo duddu-addko moddun Tanchi [NW] sevachakri kortaleo.
nwtsty obheasachi ttipnni Luk. 8:3
Tanchi sevachakri kortaleo: Vo “tankam tenko ditaleo (modot kortaleo).” Hea utrank uzar kelʼlem Grek utor di·a·ko·neʹo hacho orth dusream pasot dispottea jivitant goroz poddttat teo vostu korop, zoxem dusrea pasot saman haddop, randop, jevonn vaddop ani her vostu korop. Hea utrak Luk. 10:40-ant (‘ghorachea rattimnim vavrop’), Luk. 12:37-ant (“seva”), Luk. 17:8-ant (‘mezachem kam korop vo jevonn vaddop’), ani D.I. 6:2-ant (“jevonn vaddchi seva”), heach toren uzar kelam. Punn hea utranchea orthant dusre torechi seva sudʼdha mellon asa. Hanga vers 2 ani 3-ant sanglolea bailamnim, Jezu ani tachea xisank Devan dilʼlem kam korunk koso tenko dilo tem amkam pollounk melltta. Oxe toren, hea bailamnim Devak vakhannʼnnim dili. Tannim kelʼlea doiallaie vixim ani udarponna vixim fuddlea soglea pinddken vachum mhunn Devan tanchea vixim aplea utrant boroun dovorlem. (Mho. 19:17; Heb. 6:10) Hench Grek utor Mt. 27:55 ani Mk. 15:41-ant bailam vixim sangtana vapurlam.
(Lukas 9:49, 50) Juanvan tondd ghalun mhollem: “Guruji, amche sangatim Tuzo pattlav korinaslolea konn-ekleak Tujea nanvan devchar kaddta astana ami dekhlo ani taka ami mona kelo.” 50 Ani Jezun taka mhollem: “Taka mona korinakat; kiteak tumcher add nant tim tumchea bhaga asat.”
w08 3/15 31 ¶2
Lukas Pustokantle Mukhel Mudʼde
9:49, 50—Ek munis Jezucho pattlav korinastana devchar kaddttalo. Punn Jezun taka kiteak addavunk na? Jezun tea munxak addavunk naslo karonn Kristi sobha tednam sthapon zaunk nasli. Tor, Jezuchea nanvacher bhavarth ghalunk ani devchar kaddunk to munis Jezu sangata asonkuch zai mhunn naslo.—Marku 9:38-40.
JULAY 16-22
DEVACHEA UTRANTLE THEVE | LUKAS 10-11
“Doiall Samariekarachi Vopar”
(Lukas 10:29-32) Punn aplea vicharak karonn asa mhonn dakhounk tannem Jezuk mhollem: “Tor mhozo pelo konn?” 30 Jezun oso portipall kelo: “Konn-ek monis Jerikeak vochunk Jeruzalea thaun denvun ietalo; vatter to choranchea hatant sampoddlo; tannim tache kodde aslem titlem-i kann gheun, taka ghai poddo-sor mar ghalo, taka ordo-melʼlo korun soddlo ani apunn pollun gele. 31 Tedna oxem ghoddlem: konneklo iadnik tech vatten denvun ietalo; tannem taka dekhlo ani dusre kuxin soron to cholot ravlo. 32 Tosoch ek levit tevxilean pavun sorlo ani taka polleun, to-i dusre kuxin soron cholot fuddem gelo.
nwtsty media
Jerusalea Thaun Jeriko Voita To Rosto
Hea lhan viddeo-nt dakhoila to rosto (1) chodd korun adlea tempar Jerusalea thaun Jeriko voitalo teach vatten asa. To rosto 20 km (12 mi) lamb ani tea rosteak, 1 km (.6 mi)-achi denvti asli. Hea eksurea ani ranantlea vattarant choreo chodd ghoddttaleo. Taka lagon pasar zatoleanche surokxitaiek lagon soinikanchi ek fouz tea rostear ubi astali. Judeiachea oronneantlean bhair sorta tea rostear Romi Jeriko (2) aslem. Adlem Jeriko xar (3) Romi Jeriko thaun 2 km (1 mil poros chodd) pois aslem.
w02 9/1 16-17 ¶14-15
“Vopaream Bogor To Tanche Koddem Uloinaslo”
14 Doiall Samariekarachi vopar ugddas korat. Jezun oxem sanglem: “Konn-ek monis Jerikeak vochunk Jeruzalea thaun denvun ietalo; vatter to choranchea hatant sampoddlo; tannim tache kodde aslem titlem-i kann gheun, taka ghai poddo-sor mar ghalo, taka ordo-melʼlo korun soddlo ani apunn pollun gele.” (Lukas 10:30) Hi vopar somzaunk Jezun, “Jeruzalea thaun Jerikek” voita to rosto uzar kelo. Hi vopar sangtana Jezu Jerusalem-achea lagim, Judeiant aslo; tor to khoinchea rostea vixim uloitalo tem tachea aiknnareank khobor asli. Hea rostear ekttinch provas korop bhirankull aslem. Tea vatter oxeo zaiteo eksureo suvat aslolean chorank liponk boreak poddttalem.
15 “Jerikek vochunk Jerusalea thaun denvun ietalo” tea rostea vixim Jezu sangtana tantunt anik ek mhotvacho vixoi aslo. Te kannie pormonnem, poilo ek iadnik ani uprant ek Levitkar tea rostear cholon ietalo, punn tea Judevak modot korunk te thambonk nant. (Lukas 10:31, 32) Jerusalemachea Devmondir- ant iadnik seva kortale, ani Levitkar tankam modot kortale. Zaite iadnik ani Levitkar Devmondirant kam korinant tednam Jerikent ieun ravtale karonn Jeriko Jerusalema thaun fokot 14 mile [23 km] pois aslem. Toxem zalʼlean te hea rostea voilean pasar zatale. Anik ek vixoi mhunnttlear, to iadnik ani Levitkar ‘Jerusalea thaun denvun Jerikok ietale,’ mhunnche te Devmondira thaun pois voitale. Tor konnem-i oxem mhunnonk zainaslem ki, ‘Tea munxak zaito mar laglolo tem polloun to mela astolo mhunn te tachea lagim vochonk nant. Ani eka melʼlea moddeak hat lailo zalear Devmondirant vochon seva korunk te oxudh zatale.’ (Levi-Xastr 21:1; Lokgonnti 19:11, 16) Hachea voilean Jezun aplea vopareamnim aiknnareank khobor asloleo vostu uzar keleo mhunn disona kai?
(Lukas 10:33-35) Punn ek vattsur Samariekar tevxilean vetana tache sorxem pavlo ani, taka polleun, tea babddeache taka churchure disle. 34 To lagim ailo, tel ani soro lavun tannem tache ghai bandle, taka aplea gaddvacher ghalo ani eke khannavollint taka vhorun tacho poramos kelo. 35 Dusrea disa tannem don dinar kaddun khannavollkarak dile ani mhollem: ‘Tacho samball kor ani kitem-i ogllo khorch tuka zait zalear, hanv porot ietam tednam tuka farik kortolom.’
nwtsty obheasachi ttipnni Luk. 10:33, 34
ek vattsur Samariekar: Judev lok Samariekarank resped dina aslole ani tanchea sangata kosloch sombond dovor nasle. (Ju. 4:9) Thodde Judev, “Samariekar” hem utor uzar korun dusreancho opman vo ninda kortale. (Ju. 8:48) Mishna pustokant ek rabbin mhunnttlolim utram ulekh keleant: “Zo Samariekara sangata jevta, to dukrachem mas khatolea sarko.” (Shebith 8:10) Zaite Judev lok eka Samariekarachi govai manun ghena asle vo tanchea koddlean koslech kam sudʼdha korun ghena asle. Samariekara vixim Judevank aslolea hea sobhava vixim Jezu zannam aslo dekhun tannem hi vopar uzar keli. Hea voparek, zaite pavtt doia dakhoilʼlea Samariekarachi vopar mhunnttat.
tel ani soro lavun tannem tache ghai bandle: Dotor Lukasan Jezuchi vopar bore toren vornnon keli. Tea tempar ghavo pekovpak koslim vokhdam laitalim tem to sangta. Ghavo pekovpak tel ani dakhancho soro ghorantlim vokhdam mhunn uzar kortale. Ghavo mov korunk kednam-kednam tel laitale (Iz. 1:6 sor korat), ani rogache-jontu marun uddounk ani tem kaddun uddounk dakhancho soro ek vokod koxem uzar kortalem. Ghavo ani chodd zaina zaunk koxem bandtalem, tem pasun Lukas boroita.
eke khannavollint: Hea utrak uzar kelʼlea Grek utracho orth “soglleank ievkar kelʼlo vo soglleank bhitor soronk melltta toslo zago.” Provas kortat tea lokank tanchea zonvaram sangata oslea zagear ravonk mellttalem. Khannavollichea rakhonndarak poixe dilear to provas kortat tea lokank jevonn-khann ditalo ani toxench konnachi-i dekh-rekh korunk sanglear to tem pasun kortalo.
(Lukas 10:36, 37) Hea tegam bhitor konnem apunn choranchea hatant sampoddloleacho pelo zaun dakhoilem-xem tuka dista?” 37 Tannem zap dili: “Tachi doia korun dakhoili tannem.” Tednam Jezun taka sanglem: “Voch ani tum-vui toxench kor.”
w98 7/1 31 ¶2
Ek Samariekar Ek Boro Xezari Zaunk Pavlo
Jezuchea hea vopare voilean ek boro munis fokot Devache kaide nhoi punn tache gunn pasun aplea jivitant apnnaita. (Efezkarank 5:1) Udharonnak, “Dev . . . monxam modem ontor korina,” mhunn Bible sangta. (Itihas 10:34) Hea vixim ami Devachi dekh ghetat kai? Amcho xezari mhunnche amcheach desache, sonskrutaieche ani dhormache lok nhoi punn her lok pasun mhunn Jezuchi hi vopar dakhoun dita. Tor, Kristanvank fokot apleach vorgantlea, kullantlea vo desantlea lokank nhoi, punn ‘sogleank borem korunk zai’ mhunn adnea dilea.—Galasiekarank 6:10.
Bible-ant Motiam Sodhum-ia
(Lukas 10:18) Ani Tannem tankam sanglem: “Viz koso sorgar thaun poddlolo Hanvem Soitanak dekhlo.”
nwtsty obheasachi ttipnni Luk. 10:18
Viz koso sorgar thaun poddlolo Hanvem Soitanak dekhlo: Jezu hanga ek bhakit korta. Fuddarak Jezu Soitanak sorgar thaun bhair ghalcho aslo tem, tednanch ghoddlem oxem Jezu hanga uloita. Prok. 12:7-9-ant sorgar zalʼlea eka zhuza vixim vachunk melltta, zoim Soitanak bhair uddounche ani Mesiasachea Rajeacho zolm hanchea modem sombond dakhoila. Fuddarak ghoddchea aslolea zhuzant Soitan ani tachea devchar hartole mhunn Jezun hanga sangtalo. Karonn, Devan tachea 70 oporipurnn xisank devchar kaddunk xokti dilʼli.—Luk. 10:17.
w08 3/15 31 ¶11
Lukas Pustokantle Mukhel Mudʼde
10:18—“Viz koso sorgar thaun poddlolo Hanvem Soitanak dekhlo” mhunn Jezun aplea 70 xisank sanglem tednam to kitem mhunnonk sodhtalo? Soitanak atanch sorga thaun bhair uddoilo mhunn Jezu hea vellar sangonk sodhinaslo. Karonn Jezu Krist 1914-ant sorgar Raza zalʼlea thoddea vella uprantuch hi ghoddnni ghoddchi asli. (Prok. 12:1-10) Fuddarak ghoddchi asloli ghoddni zaun geli oxem mhunnonk zata mhunn ami hanga sangonant. Punn oxem mhunnon Jezu hi ghoddnni fuddarak zatolich mhunn sangonk sodhtalo.
(Lukas 11:5-9) Ani Tannem tankam sanglem: “Tumche modem konn-ekleak ek ixtt asa mhonn somzat; ani ho modianir tache-xim vochun taka oxem mhonntta: ‘Ixtta, mhaka tin undde uxnne di, 6 mhozo ek ixtt vattecho pavun sorla ani taka vaddunk mhoje lagim kaich na.’ 7 Ani tea monxan bhitor thaun oxi zap dili: ‘Mhaka tras dium naka; atam darak khill ghali ani mhojim bhurgim ani hanv nhidunk geleanv; mhojean utthun tuka diunk zaina.’ 8 Ani to darar marituch ravot zalear, Hanv tumkam sangtam, to monis ixttagotik lagun utthun dina zalear-ui, tache korandaiek lagun taka goroz tem kaddun ditolo. 9 Toxench Hanv tumkam sangtam: magat ani Dev tumkam ditolo, sodat ani tumkam melltolem, darar marat ani tem tumkam ugoddtolem.
nwtsty obheasachi ttipnni Luk. 11:5-9
Ixtta, mhaka tin undde uxnne di: Hea voparent dakhoilam toxem, Israel ani Israelachea bhonvtonnchea desanche sonskrutaie pormonnem, lok dusreancho chodd poramos korunk anvddetale mhunn kollon ieta. Tea tempar provas kortana soirim khoinchea-i vellar pavtalim. Tor, soirim okosmot modle ratik pasun ailear, tankam kitem tori khaunk diunkuch zai oxem ghorvaleak distalem. Tea vogtar jevonn na zalem zalear, xezarea lagim vochon vicharunk sudʼdha to fatti soronaslo.
Mhaka tras dium naka: Hea voparent sanglolo xezari modot korunk fatti-fuddem sorlo. Hacho orth taka modot korunk vo poramos korunk naka aslo oxem nhoi, punn to nhidonk gelʼlo. Tea tempar, choddxea goribanchea ghoramnim fokot ekuch vhoddlem kudd astalem. Ghorantlo mukheli uttlo zalear, to familintlea sogleanchi, bhurgeanchi sudʼdha nhid piddʼddear kortalo.
Korandai vo Soddun Diunk Na: Hea utrank uzar kelʼlea Grek utrancho orth “loz nastana” magop. Punn, hea voparent him utram uzar kelʼlim tednam tancho orth dhiran magot ravop vo soddun dinastana magop. Jezun sanglolea voparentlo to munis, vicharunk fatti soronk na vo taka vicharunk loz disonk na. Toxench, magnnem kortat tednam ami soddun dinastana magonk zai mhunn Jezun aplea xisank xikoilem.—Luk. 11:9, 10.
JULAY 23-29
DEVACHEA UTRANTLE THEVE | LUKAS 12-13
“Xerkanchea Bhirea Poros Tumi Odik Unch Molachim”
(Lukas 12:6) Don assarionank panch xerkam viktat nhoi? Tori astana, tantlea ekleachi-i Devak visor poddona.
nwtsty obheasachi ttipnni Luk. 12:6
xerkam: Hea utrak chaltea bhaxen uzar kelʼlem Grek utor strou·thiʹon, zacho orth, khoinchem-i lhan sukhnnem. Punn choddxe pavtt tem xerkank uzar kortale. Xerk hem sukhnnem jevnnak uzar kortat tea sukhnneam modem sogleam poros unnea molachem aslem.
(Lukas 12:7) Tumche tokleche kens porian soglle mezlole asat. Mhonnttoch bhieum nakat. Xerkanchea bhirea poros tumi odik unch molachim.
nwtsty obheasachi ttipnni Luk. 12:7
tokleche kens porian soglle mezlole asat: Munxachea tokler, chodd korun 1,00,000 voir kens astat mhunn sangtat. Jehovak munxam vixim itlea bariksannechi khobor asa zalear to Kristachea dor eka pattlavdarachi kitli kallji gheta tem kollon ieta.
(Lukas 12:7) Tumche tokleche kens porian soglle mezlole asat. Mhonnttoch bhieum nakat. Xerkanchea bhirea poros tumi odik unch molachim.
cl 241 ¶4-5
“Devachea Moga Koddsun Toddun Kaddunk Koxech Bhaxen Zaunchem Na”
4 Poilim, Dev aplea dor eklea sevokacho valor korta mhunn Bible xikoita. Udharonnak, Jezun sanglem: “Eka assarionank don xerkam viktat nhoi? Toripunn, tantlem ek-ui tumchea Bapachea hukuma viret bhuim poddona. Tumche tokleche kens porian soglle mezlole asat. Mhonnttoch tumi bhieum nakat. Xerkanchea bhirea poros tumi odik vortim.” (Matev 10:29-31) Poilea xekddeant Jezun hea vixim sangtana, tachea aiknnareank kitem somzolem tem polloum-ia.
5 Eka xerkak konnui kiteak vikto ghetolo, mhunn tumi ghoddie chintit. Punn, Jezuchea disamnim, jevnnak uzar kortat tea sukhnnea modem xerk sogleam poros unnea molachem sukhnnem aslem. Eklean ek unnea molacho xikʼko dilo zalear taka don xerkam mellttalim. Punn uprant Jezun sanglem ki zor tea munxan don xikʼke dile zalear taka char nhoi punn panch xerkam mellttalim. Tea panchvea xerkak kainch valoruch naslolea bhaxen bexttech ditale. Ghoddie munxachea nodren tea suknneank kainch valor naslo. Punn Rochnnarachea nodren tim koxim aslim? Jezun sanglem: “Tantlea ekleachi-i [bexttench dilʼle xerk sudʼdha] Devak visor poddona.” (Lukas 12:6, 7) Jezu kitem mhunnonk sodhtalo tem amkam atam kollon ieta. Zor Jehova tea eka xerkacho itlo valor korta zalear, ek munxacho to kitlo valor korcho na? Jezun somzailem toxem, Jehova amchea vixim soglem zannam. Amche tokleche kens porian sogle mezlole asat!
Bible-ant Motiam Sodhum-ia
(Lukas 13:24) “Oxir darvontteantlean bhitor sorunk zata toxem vavrat, kiteak, Hanv tumkam sangtam, zaitim zannam bhitor vochunk sodtolim, punn tanchean zaunchem na.
nwtsty obheasachi ttipnni Luk. 13:24
zata toxem vavrat: vo “zhuzot ravat.” Jezu hea utramnim, akʼkhea kallzantlean oxir darvontteantlean bhitor soronk kitlo vavr korcho poddtta tem somzaita. Hea utram vixim veg-vegllea pustokamnim “zata titli xokti uzar korun vavrat; soglo proitn korat” mhunn sanglam. A·go·niʹzo·mai hem Grek kriapod ani a·gonʹ hea Grek nama modem sombond asa jem utor, spordek uzar kortale. Heb. 12:1-ant hem Grek nam Kristanvanchea jivitachea ‘dhanvddek’ uzar kelam. Teach bhaxen ‘zhuzchea’ vixim sangtana pasun hem uzar kelam (Filp. 1:30; Kol. 2:1; 1Tim. 6:12; 2Tim. 4:7). Luk. 13:24-ant uzar kelʼlea Grek kriapodak dusrea utramnim, eka spordent bhag ghevpi ‘pelvan’ (1Kor. 9:25), ‘koxtt korop ani zhuzop’ (1Tim. 4:10), ani “zhuz” (1Tim. 6:12) oxim vapurleant. “Zata toxem vavrat,” hea utrank spordent bhag gheunchea vixim sombond aslolean, Jezu hanga eka spordent bhag gheta to jikonk lagon aplem soglem boll uzar korun koso vavurta tea vavra vixim sangonk sodhtalo mhunn thoddim mhunnttat.
(Lukas 13:33) Toripunn aiz, faleam ani porvam Hanvem cholot ravunk zai, tor Jeruzalea bhair morunk eka provadiak puttovna.
nwtsty obheasachi ttipnni Luk. 13:33
puttovna: Vo “chintunkuch xokona.” Mesias Jerusalemant mortolo mhunn Bible-antlim khoinchim-i bhakitam spoxtt ritin sangonant punn Daniel 9:24-26-a pormonnem oxem asonk xokta mhunn kolltta. Tea bhair, Judevamnim zor eka provadiak, khas korun Mesiasak jivexim martat zalear te taka teach xarant marta asle. 71-sodosianchi neai-sobha, unch neai-ialoi, Jerusalemant mellon ietale ani khotte provadi mhunn arop ghatloleancho thoim neai kortale. Toxench, him utram sangtana, Devak sodanch iodn bhettoitana te Jerusalemant bhettoitale ani Paskachea menddreak thoim martale tem ghoddie Jezuchea monant aslem. Uprant, Jezun sanglolem toxench ghoddlem. Taka Neai-sobhe mukhar haddlo ani guneanvkari mhunn tharailo. To ‘Paskacho menddro’ koso Jerusalemachea xara vontte bhairuch melo.—1Kor. 5:7.
JULAY 30–AGOST 5
DEVACHEA UTRANTLE THEVE | LUKAS 14-16
“Sanddlolea Putachi Vopar”
(Lukas 15:11-16) Anink-ui Tannem sanglem: “Konn-eklea monxak dog put asle. 12 ani tanche modlea dhakttean bapaik oxem mhollem: ‘Bapa, mhaka poddta to daizacho vantto mhaka kaddun di.’ Ani tannem tankam daiz vanttun dilem. 13 Ani thoddea disam bhitor dhakttea putan apnnachem aslem titlem-i ektthai kelem ani ghorantlo bhair sorun to eka poixilea ganvant gelo; ani thoi mostem jivit jieun tannem aple girestkaiechi vatt laili. 14 Ani tannem sogllem hogddaun uddoitoch, tea ganvant ek khor bhuk poddli ani to-i oddchonnik sampoddlo. 15 Tednam vochun to tea ganvantlea konn-ekleager chakrek ravlo; ani tannem taka aplea xetant dukram chorounk dhaddlo. 16 ani dukram khatat teo sango tori khaun aplem pott bhorunk taka khuxi ietali, kiteak konn taka jevnnak kaich dinaslo.
nwtsty obheasachi ttipnni Luk. 15:11-16
eklea monxak dog put asle: Sanddlolea putachea voparent sanglole thodde vixoi dusrea vopaream poros veglle asat. Jezun dilʼlea soglea-von lamb vopaream modli hi ek vopar. Hea voparentlo mukhel vixoi mhunnttlear famili modlo sombond. Dusrea vopareamnim, Jezu jiv naslolea vostu vixim uloitalo. Zoxem, vegllem torechem bim vo veglle torechi zomin, vo eka dhoni ani chakra modem aslolo kama-purto sombond. (Mt. 13:18-30; 25:14-30; Luk. 19:12-27) Punn hea voparent ek bapui ani puta modem aslolea laginchea sombonda vixim Jezu sangta. Hea vopare vixim vachtat tea sogleank ghoddie oslo doiall ani movall kallzacho bapui naslo astolo. Hi vopar, amchea sorginchea Bapak prithumer aslolea tachea bhurgeancher asloli doia-maia ani mog dakhoun dita. Tantunt sodanch taka lagim astat tim ani taka soddun gelʼlea uprant porot tachea lagim ietat tim pasun asat.
dhakttea putan: Moizesachea Somurti pormonnem, malgoddeak daizacho dupott vantto mellttalo. (D.S. 21:17) Tor hea voparent sanglolo vhoddlo put malgoddo aslo zalear, dhakttea putak malgoddea putak mellchea vantteantlo ordo bhag melltta aslo.
hogddaun: Hea utrak uzar kelʼlea Grek utracho orth “(veg-vegllea dixen) ximpddavop.” (Luk. 1:51; D.I. 5:37) Hanga hem utor ibaddop, murkhtaien moddop mhunn uzar kelam.
mostem jivit: Vo “ek ibadd zalʼlem jivit (koxea-koxem jievop; ranvotteam sarkem jivit).” Hea utrank sombond aslolem anik ek Grek utor osloch orth dita. Tem utor Ef. 5:18; Tit. 1:6; 1Ped. 4:4-ant uzar kelam.
dukram chorounk: Somurte pormonnem hem zonvar oxudh aslem, tor Judevank tem kam man dina toslem, kanttallo dista toslem aslem.—Lev. 11:7, 8.
sango: Hantunt aslolea bim-ank ek chok-chokit, datt kottʼttem asta. Tem zambllea ani matiechea rongachem asta. Hea utrak uzar kelʼlem Grek utor (ke·raʹti·on, “lhan xing”), oslea sangam vixim sangta zaka ek xinga sarko akar asta. Aiz pasun heo sango ghoddeank, gorvank ani dukrank jevonn mhunn uzar kortat. To tornatto munis, itlo lojek poddlolo ki dukrank ghaltat tem jevonn pasun to khaunk toiar aslo.—Luk. 15:15-achi obheasachi ttipnni polloi.
(Lukas 15:17-24) “Xekim, soirannar ieun, tannem mhollem: ‘Kitle disvoddeache manai mhojea bapaichea ghorant naka-puro zai-sor jevun-khaun asat, ani hanv hanga bhuken mortam! 18 Tor hanv utthun mhojea bapai-xim vetolom ani taka mhonnttolom: “Bapa, hanvem sorgacher ani tujer add patok kelam. 19 mhaka tuzo put mhonnunk anink mhaka favo na; tujea manaiantlo eklo koso mhaka dhor.”’ 20 Ani utthun to aplea bapai-xim gelo. Poisuch astana tachea bapain taka dekhlo ani tachem kalliz churchurlem; ani dhanvun vochun tannem taka veng marli ani tache ume gheit ravlo. 21 Putan taka mhollem: ‘Bapa, hanvem sorgacher ani tujer add patok kelam; mhaka tuzo put mhonnunk anink mhaka favo na.’ 22 Tednam bapain aplea chakrank sanglem: ‘Boreantlem borem ek vostr veginche-vegim haddun taka nhesoiat; tachea bottak mudi ani paiank vhanno ghalat. 23 gulgulit paddkulo haddun marat; jevonn korum-ia ani borem-borem khaun-pieun khuxal zaum-ia, 24 Kiteak ho mhozo put melʼlo, to novean jivont zala; sanddlolo, to porot mellʼlla.’ Ani tannim jevunk suru kelem.
nwtsty obheasachi ttipnni Luk. 15:17-24
tujer add: Vo “tujem sovem.” E·noʹpi·on, hea Grek utrancho orth “ekleache mukhar; ekleache sonvem.”
disvoddeache manai: Porot ghora gelea uprant, dhakttea putan aplea bapaik apnnak tacho put mhunn nhoi punn ek disvoddeacho manai mhunn apnnaun ghe mhunn sangonk tharoilolem. Ek manai dusrea chakra bhaxen ghorabeacho bhag asona. To chodd korun eka disak ieun aplem kam korun vochpi ek bhailo munis zaun asta.—Mt. 20:1, 2, 8.
tache ume gheit ravlo: Vo “taka mogan umo dilo.” “Tache ume gheit ravlo,” hea utrank uzar kelʼlem Grek utor, phi·leʹo, hea Grek kriapodant aslolea bhavnam poros chodd bhavnam dakhoita, zaka kednam-kednam “umo divop” mhunn uzar kortat. (Mt. 26:48; Mk. 14:44; Luk. 22:47) Punn choddxe pavtt hacho orth “mog asop” (Ju. 5:20; 11:3; 16:27) zaun asa. Aplea poschatap kelʼlea putak hea toren mogan ieukar diun tea voparentlo bapui taka porot gheunk kitlo usketalo tem dakhoita.
tuzo put mhonnunk: Thodde hostolekhamnim hea utram fattlean anik ek voll ghatlea: “Tujea disvoddeache manaia modlo eklo mhunn mhaka kor.” Punn him utram adlea hostolekhamnim ani patievpa sarkea hostolekhamnim mellonant. Thodde ponddit mhunnttat ki him subhes asloli utram Luk. 15:19-a sangata sumell zaunk lagon ghatleant.
Vostr . . . mudi . . . vhanno: Hem vostr ek sado kopddo naslo, punn ek boreantlem borem vostr aslem—Ek manadik soireak ditat toslem khub nettoilolem lugott. Putachea hatant mudi ghalop mhunnche to bapui aplea putak dakhoita to moipas ani mog. Tea bhair, porot mellʼllolea putak to bapai dita to man, ti resped, ani podvi dakhoun dita. Choddxea pavtt eka chakrachea bottant mudi vo paiank vhanno dixtti poddnasleo. Punn tea bapain oxem kelolean to aplea putak aplea familichoch ek bhag koso ieukar dita mhunn tannem dakhoun dilem.
(Lukas 15:25-32) “Tednam tacho vhoddlo put xetant aslo ani ieun ghora lagim pavtam-pavtam tannem songit ani nach zatat tim aikolim. 26 ani, eka chakrak apoun, kitem zalam kai mhonn tannem vicharlem. 27 Chakran zap dili: ‘Tuzo bhav aila, ani to solamoti pavlo mhonn tujea bapain gulgulit paddkulo marla.’ 28 Punn to zobor ragar zalo ani portipallun tannem bapaik oxem mhollem: 29 ‘Polle, itlim vorsam zalim hanv tuji seva-chakri kortam ani tujem utor hanvem kednanch moddunk na, tori mhojea ixttam borabor jevunk-pieunk tunvem mhaka kednanch ek bokddo legun dilo nai 30 punn xindoll bailam borabor aplem daiz khaun-hogddaun ho tuzo put iena fuddem tunvem tache pasot datto-motto paddkulo marloi!’ 31 Punn tannem taka sanglem: ‘Puta mhojea, tum sodanch mhojea sangata asai ani jem kitem mhoje lagim asa tem sogllem tujench. 32 Punn borem jevonn korunk ani khuxal zaunk purtem karonn aslem: tor ho tuzo bhav melʼlo, to novean jivont zala; sanddlolo, to porot mellʼlla.’”
Bible-ant Motiam Sodhum-ia
(Lukas 14:26) “Zor konn-ui Mhoje-xim ietit ani aplea bapaicho, avoicho, bailecho, bhurgeancho, bhavancho ani bhoinnincho, ani aplea jivacho porian dves korina zatit, tankam Mhojea xisam modem zago na.
nwtsty obheasachi ttipnni Luk. 14:26
dves: Bible-ant “dves” hea utrak veg-veglle orth asat. Ek-ek pavtt tacho orth dusreak nuksan korunk uksoita toso orth zaunk xokta. Vo thodde pavtt tacho orth ek vostu vo munxa vixim chodd kanttallo ievop oso ieta. Vo tacho orth ekleacho chodd mog korina oso sudʼdha zaunk xokta. Udharonnak, Jakob Leacho “mog korina” vo tacho “dves” kelo mhunn sangtana, tacho orth, tannem Lea poros Rakelacho chodd mog kelo (Ut. 29:31). Hea utrak ho orth asa mhunn her adlea Judevanchea borounneant-ui vachunk melltta. Tor, Jezu aplea xisank tannim aplea familicho dves korunk zai vo tankam tancho kanttallo ieunk zai mhunn sangonaslo. Jezu toxem sangonk sodhtalo zalear tem Bible-antlea her versam add sanglolea bhaxen zata aslem. (Mk. 12:29-31; Ef. 5:28, 29, 33 sor kor.) Hea versachea bhonvtonnichim versam polloitana, “dves” hacho orth “unno mog” mhunn kollon ieta.
(Lukas 16:10-13) Jim ekdom unnea molachea vostumnim khatrechim, tim unch molachea-i vostumnim khatrechim; ani jim ekdom unnea molachea vostumnim khottim, tim unch molachea-i vostumnim khottim. 11 Mhonnttoch, zor hea sonvsarantle mhelle girestkaiecho favo to upeog korunk tumkam patieunk nozo zalem, tor khori-osol girestkai tumchea hatant ghalunk konn tumkam patietolo? 12 Devan tumkam dilʼlea tumcheo nhoi tea vostumnim tumi zor visvaxi ravunk nant, tor tumcheoch zauncheo asat teo vostu Dev koso ditolo tumkam? 13 Khoicheach chakran dogam dhonianchi borabor chakri korum nozo, kiteak to ekleak zolltolo ani dusreacho mog kortolo, vo ekleak chikttun ravtolo ani dusreachi beporva kortolo. Tumchean Devachim ani borabor Girestkaiechim gulamam zaum nozo.”
w17.07 8-9 ¶7-8
Khori Girestkai Sodhat
7 Lukas 16:10-13 vachat. Jezuchea voparentlea mukdoman apleach faidea pasot dusrea lokam sangata ixttagot keli. Punn, Jezun aplea xisank kosloch svarth nastana sorgar asloleam sangata ixttagot kor mhunn sanglem. He vopare uprant aslolim versam, ‘mhelli girestkai’ ani Deva lagim visvaxiponnan ravop hachea modem sombond dakhoitat. Jezu hanga mhunnonk sodhtalo ki amchea lagim asa ti girestkai ami koxim upeog kortat, tachea voilean ami ‘visvaxi asat’ mhunn dakhonk xoktat. Tem koxem?
8 Ami amchea girestkaiecho upeog visvaxiponnan kortat mhunn dakhounk ek vatt mhunnttlear, Jezun sanglolea sonvsarbhor zaunchea porgottnechea kamank dan diun. (Mt. 24:14) Bharotant ek lhan choddum apleak khellnnim sudʼdha vikti ghenastana lhan poixeanchea boksant nanne ektthaim kortalem. Tem boks bhorlea uprant, tannem tantuntle poixe kaddun porgottnnechea kamank uzar korunk dile. Bharotant eka bhavan aplea battantlea maddache zaite narl kaddun Malayalam remote translation ofisak dan mhunn dile. Tea ofisantlea bhavank narlanchi goroz asli mhunn to zannam aslo, tor narl vikun tankam poixe diunchea poros narluch dilear anik chodd faideachem mhunn tannem chintlem. Tea bhavan aplem xanneponn uzar kelem. Teach bhaxen, Greece-ant aslole bhav khubxea pavtt zoitunachem tel, chiz, ani her jevonn Bethel familik dan mhunn ditat.