Agost—Jivit ani Porgottnni Mittingechea Pustike Pasot Modot
AGOST 6-12
DEVACHEA UTRANTLE THEVE | LUKAS 17-18
“Upkari Zaiat”
(Lukas 17:11-14) Jeruzaleak veta astana, Jezu Samarieche ani Galileiache xime velean cholot vetalo. 12 Eka ganvant bhitor sortana, kodd futtlole dha zann Taka vatter mellʼle; te pois ube ravle. 13 ani, vhoddlean ulo marun, tannim mhollem: “Jezu, Guruji, amchi kaklut kor!” 14 Tannem tankarem polleun mhollem: “Vochat ani iadnikank tumchem ang dakhoiat.” Ani thoi veta astananch te nitoll zale.
nwtsty obheasachi ttipnni Luk. 17:12, 14
kodd futtlole dha zann: Bible-achea tempar, kodd zalʼle munis vangdda mellon ietale vo sangata jietale karonn oxe toren te eka-mekak modot korunk xoktale. (2Raz. 7:3-5) Devache Somurte pormonnem, kodd zalʼlea munxamnim her lokam thaun pois ravonk zai aslem. Te her lokam modem asat zalear tannim herank xittkaunk: “Mhello, mhello!” mhunn bob marchi goroz asli. (Lev. 13:45, 46) Hea versanmnim sanglole kodd zalʼle munis, somurte pormonnem Jezu thaun pois ube ravle.—Mt. 8:2 obheasachi ttipnni polloi ani Utravoll, “Leprosy; Leper.”
iadnikank tumchem ang dakhoiat: Jezu Krist hea prithumer aslo tednam Moizesachea Kaidea khala to aslo dekhun Aaronachea familintlea iadnikanchi manddavoll tannem manun ghetli. Taka lagon, tannem bore kelʼlea koddkarank iadnikam lagim vochonk sanglem. (Mt. 8:4; Mk. 1:44) Moizesachea Kaidea pormonnem, ek koddkar boro zalo vo na tem eka iadnikan pollounk zai aslem. Magir tea borea zalʼlea koddkaran Devmondirant vochon don jivim xudʼdh suknnim, devdar-lankddacho kuddko, tambdo doro, ani hisop-zhaddachi ek talli, bhettounnim vo dennem mhunn diunk zai aslem.—Lev. 14:2-32.
(Lukas 17:15, 16) Tantlo eklo, apunn boro zalo mhonn dekhona fuddem, Devak vhoddlean vakhannit portun ailo, 16 ani Jezuchea paiam-xim omto poddun tannem Tache abhar manle; ani to ek Samariekar aslo.
(Lukas 17:17, 18) Hem polleun Jezun taka oxem mhollem: “Dha-i zann nitoll zale, nhoi? Her nnov khoi pavle tor? 18 Hea porkea monxa bhair porot ieun Devachi tokhnnai kortolo konnuch na zalo!”
w08 8/1 14-15 ¶8-9
Ami Kiteak Upkari Asonk Zai?
Her koddkar Jezuk upkari nasle mhunn Jezun tankam oxech soddun dile kai? Tea ghoddne vixim fuddem oxem sanglam: “Jezun taka oxem mhollem: ‘Dha-i zann nitoll zale, nhoi? Her nnov khoi pavle tor? Hea porkea monxa bhair porot ieun Devachi tokhnnai kortolo konnuch na zalo!’”—Lukas 17:17, 18.
Her nnov koddkar noxtte munis nasle. Karonn, tim Jezucher bhavarth dakhoilo ani Jezuchea utrank pallo diun Jerusalemak vochon iadnikank apli kudd dakhoili. Jezun tankam lagon jem kelem tachea pasot te upkari asle khorem, punn tannim tem utramnim sangonk na. Tanchea hea sobhavak lagon Jezu nirax zalo. Amche vixim kitem? Konnem tori amkam borem kelem zalear, ami rokddech amchem upkariponn dakhounk thank you mhunnttat kai, vo zata tednam ami tankam ek thank you kardd boroun dhaddttat kai?
Bible-ant Motiam Sodhum-ia
(Lukas 17:7-10) “Tumche modem konn-eka monxak ek chakor asa mhonn somzat; xet kosun vo menddram choroun to chakor porot ghora ieta tednam, ‘Chol vegim ani jevnnak bos,’ oxem taka dhoni mhonnttolo kai? Hache bodlek, 8 ‘Mhojem jevonn toiar kor ani hanv kha-piesor, penkttak kas marun mezachem kam kor ani magir tum kha-pie,’ oxem to mhonncho na kai? 9 Apnnem sanglolim kamam chakran kelim dekhun dhoniak chakracho upkar astolo kai? 10 Toxench, tumkam sanglolem titlem-i kelea uprant, tumi-i mhonnatt: ‘Chaltim-bexttim chakram ami; amcho kaido aslo toch ami pallʼlla.’”
nwtsty obheasachi ttipnni Luk. 17:10
Chaltim-bexttim: Vo, “upeog naslolim; kainch faideachim naslolim.” Jezu hea vopare vorvim te chakor mhunnche, aplea xisamnim apunn upeogache nhoi vo faideche nhoi mhunn chintunk zai dekhun toxem sangom naslo. Hea versa poilim aslolim versam vachlear, “chaltim-bexttim” hea utrancho orth, chakramnim apnnank vhoddponn vo vakhannʼnni mellchi mhunn chintchem, oso nhoi, punn mannsugen ravchem mhunn kolltta. Thodde ponddit hea utrancho orth, “ami bexttim chakram, khas dhean mellonk favo nasloli munxam” mhunn sangtat.
(Lukas 18:8) Hoi, Hanv tumkam sangtam, To tankam veginch nivartolo. Toripunn Monxacho Put ietolo tednam, Taka sonvsarant bhavarth melltolo kai?”
nwtsty obheasachi ttipnni Luk. 18:8
bhavarth: Jezu “bhavarth” hem utor uzar korun, aple voparent vidhven dakhoilʼlea bhavartha vixim sangonk sodhtalo. (Luk. 18:1-8) Hantunt magnneak aslolea xoktecher bhavarth asop, ani toxench Dev aplea vinchloleank neai ditolo mhunn bhavarth asop mellon asa. Aplo bhavarth kitlo ghott asa tem xisamnim chintunk zai dekhun apnnem vicharlolea prosnacho zobab Jezun diunk na. Magnnea vixim ani bhavartha vixim uzar kelʼli vopar faideachi asli karonn tachea poilim Jezu, tache xisank tannim fuddarak fuddo korche asa tea trasam vixim sangtalo.—Luk. 17:22-37.
AGOST 13-19
DEVACHEA UTRANTLE THEVE|LUKAS 19-20
“Dha Minanche Vopare Thaun Xikat”
(Lukas 19:12, 13) Mhonnttoch Tannem sanglem: “Konn-ek unch kulliecho monis apnnak raza korun gheun porot ieunche khatir eka poixilea desant gelo. 13 Aplea dha sevokank apoun haddun, tankam tannem dha minam vanttun dilim ani mhollem, ‘Hanv portun iesor, him gheun veapar-dhondo korat!’
jy 232 ¶2-4
Dha Minanchi Vopar
Tannem mhunnttlem: “Konn-ek unch kulliecho monis apnnak raza korun gheun porot ieunche khatir eka poixilea desant gelo.” (Lukas 19:12) Oslo provas korunk vell lagta. Tor hanga sanglolo “unch kulliecho monis” Jezu zaun asa, zo “eka poixilea desant” mhunnche, sorgar voitolo zoim tacho Bapui taka rajeacho odhikar ditolo.
Voparent, “unch kulliecho monis” poixilea desant voichea poilim, aplea dha sevokank apoita ani dor ekleak chandiche mina diun sangta: “Hanv portun iesor, him gheun veapar-dhondo korat!” (Lukas 19:13) Chandichim minam mhunnttlear chodd molache poixe. Ek minachem mol, eka xetkamteak tin mhoine kam korun mellttat title poixe.
Jezuchea voparentle dha sevok apunn mhunn xisank somzolem astolem karonn Jezun tankam adinch lunvnneche vavraddi mhunn sor kelʼle. (Matev 9:35-38) Jezun aplea xisank sanglolo to lunvnnecho vavr xetant vochon konno ektthaim korcho nhoi, punn Devachem Raj favo asloleank xis korcho vavr aslo. Ho vavr korunk xis aplea lagim asa tem soglem uzar korun Devachea Rajache daiji zaunk herank xis kortat.
(Lukas 19:16-19) Poilean ieun mhollem: ‘Dhonia, tujea eka minan dha minam zoddlim.’ 17 Tannem zobab dilo: ‘Xabas, borea sevoka! ile-xe vostunt tum visvaxi zaloi dekhun hanv tuka dha nograncher odhikar ditam.’ 18 Ani dusrean ieun mhollem: ‘Dhonia, tujea eka minan panch minam zoddlim.’ 19 Ani haka-i tannem mhollem: ‘Ani tuka hanv panch nograncher odhikar ditam.’
jy 232 ¶7
Dha Minanchi Vopar
Jezuche xis, tea sevokam bhaxen anik xis korunk apli sompoti bore bhaxen uzar korunk zai mhunn somzotat zalear, Jezu khuxal zatolo mhunn tannim khatri dovrunk zata. Toxench, tanchea hea koxtti kamank to tankam inam ditoloch mhunn tannim khatri dovrunk zata. Jezuchea soglea xisanchi poristhiti ek sarki asona tem khorem. Tankam veg-veglleo tank astat. Punn ‘raz odhikar’ mellcho asa to Jezu, xis korchem tanchem visvaxiponnachem kam polloun tancher besanv ghaltolo.—Matev 28:19, 20.
(Lukas 19:20-24) Magir tisrean ieun mhollem: ‘Dhonia, tujem min hem polle asa; eka rumalak bandun hanvem tem kuxin dovorlolem; 21 kiteak mhaka tuji bhirant asli, tor tum khor monis; tunvem dovrunk nai tem tum uklun vhortai ani tunvem vompunk nai tem tum lunvun ubartai.’ 22 Razan taka zap dili: ‘Are noxttea chakra, tujinch utram dhorun tujer hanv khastichem formonn martam. Hanv khor monis, hanvem dovrunk na tem hanv uklun vhortam, ani hanvem vompunk na tem hanv lunvun ubartam mhonn tum tor zanno asloi. 23 Toxem zalear, mhozo duddu tunvem benkent kiteak ghalo nai? Porot ieun kolantora soit hanv to ghetolom aslom.’ 24 “Ani thoi asloleank tannem sanglem: ‘Hache koddchem tem min kaddun gheiat ani dha minam asat taka tem diat.’
jy 233 ¶1
Dha Minanchi Vopar
Aplea dhoniachea rajeachi girestkai vaddonk to chakor chuklo dekhun taka luksonn zalem. Devachea Rajeant Jezu Raza zatolo mhunn sogle apostl vatt polloun ravleat. Tor, Jezun tea nimannea sevoka vixim sanglem tachea voilean, te koxtti vavr korinant zalear tankam-i Rajeant bhag mellcho na mhunn te somzole astole.
Bible-ant Motiam Sodhum-ia
(Lukas 19:43) Hoi, tuje dusman tuje bhonvtim matiechim durgam ubartole, tuka veddho ghaltole, ani sogllea vattamnim tuka chinrgottʼtole, osle tujer dis ietole.
nwtsty obheasachi ttipnni Luk. 19:43
matiechim durgam ubartole: Hea utrank uzar kelʼlem Grek utor, khaʹrax zaun asa. Zacho orth lankddachea khambeanchim durgam vo pont aslole khambe. Grek Bhaxen Boroilolea Bible-antlea pustokamnim hem utor heach versant melltta. Hea utracho orth, “pont asloli boddi vo khambo” uzar korun eka zagea bhonvtonnim kelʼlim durgam vo khambe zaun asa. Oslea khambeanchem durig veddo ghalunk soinik pasun uzar kortale.” Jezuchim utram 70 K.X-ant khorim zalim. Titus-acho hukum pallun Romi soinikamnim Jerusalema bhonvtonnim veddo ghatlo, vo pont aslolea khambeachem durig bandlem. Titus-an oxem korunk tin karonnam aslim—Judevank Jerusalemantlean pollun vochonk dina zaunk, Judev lokamnim apnnakuch Romi lokanchea hatant ghalunk ani bhuken dovrun aplea khala ieunk tancher dobhav ghalunk. Jerusalemak veddo ghalche pasot Romi soinikamnim durig bandunk bhonvtonnim aslolim soglim zhaddam katorlim astoli.
(Lukas 20:38) dekhun, meloleancho nhoi, bogor jiveancho Dev To; Tache mukhar sogllim jivim.”
nwtsty obheasachi ttipnni Luk. 20:38
Tache mukhar sogllim jivim: Vo “tache nodren soglim jivim asat.” Deva thaun pois sorlole lok, jivim aslear pasun tachea nodre mukhar tim melʼlim asat mhunn Bible sangta. (Ef. 2:1; 1Tim. 5:6) Teach porim, Jehovachi maniotai aslole sevok mortat tednam, tim tachea nodren atam pasun jivim asat, karonn tankam jivont korcho tacho udʼdhex to purnn kortoloch.—Rom. 4:16, 17.
AGOST 20-26
DEVACHEA UTRANTLE THEVE|LUKAS 21-22
“Tumchi Soddvonn Lagim Pavlea”
(Lukas 21:25) “Suriacher, chondrimacher ani noketrancher khunna zatoleo. Somdir gorozta to aikun ani lharam uchamboll zaleant tim polleun, sonvsarar raxttram sarkinch ghabortolim ani tollmolltolim.
kr 226 ¶9
Devachem Raj Aplea Dusmanancho Nas Kortolem
9 Mollbar khunna. “Suriacher kallokh poddtolo, chondrim aplo uzvadd diuncho na, noketram mollba velim sokla poddtolim,” mhunn Jezun bhakit kelʼlem. Hacho orth, uzvaddak lagon lok mukhar anik dhormik fuddaream lagim voichenant. Karonn te uzvadd diupi mhunn lok tankam vollkhoche nant. Ani, hi khunna mollbar khoreamninch ghoddttoli mhunn Jezu sangonk sodhtalo kai? Ghoddie zait. (Iz. 13:9-11; Jo. 2:1, 30, 31) Heo ghoddnneo polloun lok kitem kortole? Te ‘sarke ghabortole ani tollmollttole.’ (Luk. 21:25; Zef. 1:17) Hoi, Devachea Rajeache dusman, ‘patxa zaum vo gulam’ sogle, “ieunchem asa tachea huskean kampun” surokxa mellonk hanga thoim dhanvtole. Punn tankam amchea Razachea raga thaun liponk khoinch zago mellcho na.—Luk. 21:26; 23:30; Prok. 6:15-17.
(Lukas 21:26) Prithumecher ieunchem asa tachea huskean kampun monxancho jiv vetolo virghun, tor ontrallacheo xokti kolkoltoleo.
(Lukas 21:27, 28) Tednam Monxacho Put podven ani vhoddle mhoimen eka kupa modem ietana tim dekhtolim. 28 Hem ghoddonk suru zata tednam ghott ravat ani tumcheo toklio uklun dhorat, kiteak tumchi soddvonn lagim pavlea.”
w16.01 10-11 ¶17
‘Eka-Mekachim Bhav-bhoinn Koxim Mogan jieunk’ Tumi Nichov Korat!
17 “Ami kalljidarponnan mhonnum-ia: ‘Sorvespor mhojea pokxak asa: tor kosli bhirant?’” (Hebrevank 13:6 vachat.) Amkam koslea-i oddchonneancho fuddo korunk poddot, Jehovacher visvas dovorlear ami dhiran fuddem soronk xoktat. Ani hea dhirak lagon soglea poristhitimnim borem chintunk amkam urba mellttoli. Bhav-bhoinnancho mog aslear ani soglea porithitint borem chintlear, bhav-bhoinnank buzvonn diunk amkam modot zatoli. (1 Tes. 5:14, 15) Toxench, vhodd sontapachea vellar amkam koslea-i kotthin poristhitincho fuddo korunk poddlear pasun amchi soddvonn lagim pavlea hem zannam zaun amkam ‘ghott ravonk ani [amcheo] toklio uklun dovrunk’ modot zatoli.—Lukas 21:25-28.
w15 7/15 17-18 ¶13
“Tumchi Soddvonn Lagim Pavlea”!
13 “Sasnnache khastik vetolim” hem zannam zaun bokddeo kitem kortoleo? Tim khontibhorit zaun aplim “hoddʼddim boddoitolim.” (Mt. 24:30) Punn Kristache bhav ani tanche visvaxi sangati tea vellar kitem kortole? Jehova Devacher ani Jezu Kristacher purnn bhavarth dovrun te Jezuchea adneak pallo ditole: “Hem ghoddonk suru zata tednam ghott ravat ani tumcheo toklio uklun dhorat, kiteak tumchi soddvonn lagim pavlea.” (Lukas 21:28) Hoi, amchi soddvonn lagim pavlea mhunn zannam zaun ami tea poristhitint borem chintolim.
Bible-ant Motiam Sodhum-ia
(Lukas 21:33) Ontrall ani prithum sortolim, punn Mhojim utram sorchim nant.
nwtsty obheasachi ttipnni Luk. 21:33
Ontrall ani prithum sortolim: Her versam, sorg ani prithum sasnnak urtoli mhunn dakhoitat. (Ut. 9:16; St. 104:5; Up. 1:4) Tor, Jezu hanga ek vixoi hisba bhair vhodd korun sangta. To mhunnonk sodhtalo, sorg ani prithum soron ghelear pasun, mhunnche jem ghoddonkuch xokona toslim ghoddnim ghoddlear pasun, tachim him utram purnn zatolinch. (Mt. 5:18 sor kor.) Punn, hanga sanglolo ontroll ani prithum sanketik torecho sorg ani prithum suchit korunk xokta zaka Prok. 21:1-ant “poilem mollob ani poili prithum” mhunnttlolem asa.
Mhojim utram sorchim nant: Vo “mhojim utram kednanch sorchim nant” Hea utrank uzar kelʼlim Grek utram vachlear Jezuchim utram sodanch togtat toslim mhunn dakhoun ditat.
(Lukas 22:28-30, NW) “Punn, mhojea upodreamnim visvaxiponnim mhojea sangata ravleat te tumich; 29 dekhun mhojea Bapan mhojea sangata ek korar kela tosoch Hanv tumche sorim ek Rajeacho korar kortam, 30 tumi mhojea Rajeant mhojea mezar khaun-pieun astoleat ani Israelachea 12 kullanchi monsubi korun xinvasonancher bostoleat.
w14 10/15 16-17 ¶15-16
Tumi ‘Iadniki Rajkull’ Zatoleat
15 Somiachem Rat-Jevonn suru kelea uprant, Jezun aplea visvaxi xisam sangata ek korar kelʼlo, zaka choddxe pavtt Rajeacho korar mhunnttat. (Lukas 22:28-30 vachat.) Dusrea koraram bhaxen, Jehova hea koraracho bhag na, karonn ho korar Jezu ani tachea obhixikt pattlavdaram modem kelʼlo. “Mhojea Bapan mhojea sangata ek korar kela,” mhunn Jezun sanglem tednam Jehovan taka “Melkizedeka porim . . . Iadnik” mhunn nemlolo tea korara vixim sangtalo astolo.—Heb. 5:5, 6.
16 Te 11 visvaxi apostl ‘Jezuchea upodreamnim visvaxiponnim tachea sangata ravle.’ Rajeachea korara udexim te Jezu sangata sorgar xinvasonacher boson raza ani iadnik zaun raz choloitole mhunn tankam khatri zali. Punn ho sueog tea 11 zannank soddun dusreankui mellcho aslo. Mhoimebhorit zalʼlo Jezu, apostl Juanvak eka dorxonant dislo tednam tannem sanglem: “Hanv zoitivont zalam ani atam Mhojea Bapache kuxik Tachea xinvasonar boslam, tech porim zoit vhortoleank Mhoje kuxik Mhojea xinvasonar bosunk ditolom.” (Prok. 3:21) Tor ho Rajeacho korar 1,44,000 obhixikt Kristanvam sangata kela. (Prok. 5:9, 10; 7:4) Rajeachea korara udexim Jezu sangata sorgar raz cholounk tankam kaidea pormonnem hokʼk melltta. Zoxi ek unch kullachea familintli hokol eka Raza sangata kazar zalear taka raz cholouncho hokʼk melltta. Bible-ant obhixikt Kristanvank, Krista lagim kazar zaunk utor dilʼli “ek nirmoll ankvar hokol” mhunnttlea.—Prok. 19:7, 8; 21:9; 2 Kor. 11:2.
AGOST 27–SETEMBR 2
DEVACHEA UTRANTLE THEVE|LUKAS 23-24
“Dusreank Udar Kallzan Bhogsat”
(Lukas 23:34) Jezun mhollem: “Bapa, tankam bhogos, apunn kitem kortat tem te nokllot.” Magir tannim sorti ghalun Tachim vostram vanttlim.
cl 297 ¶16
‘Kristacho Mog Vollkhun Gheuncho’
16 Anik ek mhotvache ritin Jezun aplea Bapacho mog poripurnn ritin dakhoilo—‘Udar kallzan bogsun.’ (Izaias 55:7) Jezuk khambear umkallailo tednam pasun tannem ho gunn dakhoilo. Taka lojechem moronn sosunk poddlem, tache hat ani paim khillaile. Tori astana tannem kitem mhunnttlem? Apleak jivexim marloleank khast lai mhunn tannem sanglem kai? Na, tachea bodlek, Jezuchim nimannim utram oxim aslim: “Bapa, tankam bhogos, apunn kitem kortat tem te nokllot.”—Lukas 23:34.
(Lukas 23:43, NW) Ani tannem taka sanglem: “Aiz hanv tuka khorench sangta, tum mhojea sangata sobit bhag zalʼle prithumer astolo.”
g 2/08 11 ¶5-6
Dev Gombir Patkam Bhogxita Kai?
Jehova fokot patok nhoi, punn patkeacho sobhav polloita. (Izaias 1:16-19) Jezuk khambear umkallailʼlo tednam tachea kuxik aslolea don guneanvkaream vixim chintat. Dogaimnim gombhir patkam kelʼlim, ani eklean tem manun ghetlem. Tannem mhunnttlem: “Amkam tori hem nitin favo zalam: amchea kortubam pormannem ami bhogtanv; punn hannem [Jezun] kaich vaitt korunk na.” Tachea hea utram voilean, to Jezu vixim thoddem zannam aslo mhunn kollon ieta. Tea gineanak lagon, taka aplo sobhav bodlunk modot zali. Tannem Jezuk sanglolea fuddlea utramnim hem amkam dison ieta: “Raiponnachi podvi gheun tum ietai tednam, mhozo ugddas kor.” Tea guneanvkarean kallzan thaun kelʼlea hea vinontik Kristan koso zobab dilo? Tannem mhunnttlem, “Aiz hanv tuka khorench sangta, tum mhojea sangata sobit bhag zalʼle prithumer astolo.”—Lukas 23:41-43, NW.
Chintun polloiat: Jezu morcho aslo tednam aplea nimannea utramnim to moronn favo aslolea eka guneavkareak doiechim utram sangta. Kitlem buzvonnechem! Tor konnui apnnem adim kelʼlea patkank lagon poschatap korta zalear Jezu Krist ani tacho Bapui Jehova, tankam doia-maia dakhoitolech mhunn amkam khatri dovrunk zata.—Romkarank 4:7.
(Lukas 24:34) Hannim tea dogank sanglem: “Somi khoroch punorjivont zala ani Simanvak dixtti poddla!”
cl 297-298 ¶17-18
‘Kristacho Mog Vollkhun Gheuncho’
17 Jezu jea toren Apostl Pedru thaim vaglo tantuntlean tannem amkam dusreank bhogsunchea vixim kallzak lagta toslem udharonn dovorlam. Pedru Jezucho khub mog kortalo mhunn kainch dubav na. Jezuchea jivitachea nimanne ratik, Nisan 14 tarker Pedrun taka mhunnttlem: “Somia, Tuje borabor bondkhonnintuch vochunk nhoi, punn morunk-ui hanv toiar.” Punn, thoddeach voram uprant Pedrun Jezuk vollkhoch na mhunn tin pavtti nakarlo! Pedrun tisre pavtti nakarlo tednam kitem ghoddlem tem Bible sangta: “Jezun Pedrucher dixtt ghali.” Patkachea vojean chepon “bhair sorun Pedru dukamnim roddlo.” Tea disa Jezu melea uprant, Pedrun ghoddie chintlem astolem, ‘Mhojea Somian mhaka bhokxilo kai?’—Lukas 22:33, 61, 62.
18 Tacho zobab mellonk Pedruk chodd vell ravonk poddonk na karonn, Nisan 16 tarker sokallim, Jezu punorjivont zalo ani teach disa to Pedruk mellonk gelo astolo. (Lukas 24:34; 1 Korintkarank 15:4-8) Pedrun Jezuk itle pavtti nakarlo tori astana tannem tea apostlacher itlem dhean kiteak dilem? Somi poschatap kelʼlea Pedrucho ozun mog ani valor korta mhunn, Jezu taka khatri diunk sodʼdhtalo. Taka khatri diunk Jezun anik ek vost pasun keli.
Bible-ant Motiam Sodhum-ia
(Lukas 23:31) Olea lankddak oxem kortat zalear, sukea lankddachem kitem zaunchem na?”
nwtsty obheasachi ttipnni Luk. 23:31
Olea lankddak . . . sukea lankddachem: Jezu hanga Judev raxttra vixim sangtalo, jem raxttr eka moronk pavlolea zhadda sarkem aslem. Tednam Jezu ani tacher bhavarth dovorpi thodde Judev tea raxttrant asle dekhun tea zhaddant thoddi olsann urlolea sarkem aslem. Punn, beginuch Jezuk jivexim marche asle, ani visvaxi Judev povitr xokten obhixikt zaun odheatmik Israelache bhag zaunche asle. (Rom. 2:28, 29; Gal. 6:16) Tea vellar, Israel raxttr eka suklolea zhadda sarkem odheatmik ritin melʼlem zatolem.—Mt. 21:43.
(Lukas 23:33, NW) Ani Kottʼtto mhonnttat tea zagear te pavtoch, taka ani tea dogam guneanvkarank-ui thoi khambear khillaile, ekak Tache uzve kuxik ani dusreak dave kuxik.
nwtsty media
Khonttechea Hadda Bhitor Khillo
Ho fotto eka munxachea khonttechea haddam bhitor topoilolea khilleachi nokol dakoita. To lokhnnacho khillo 11.5 cm (4.5 in.) lamb aslo. 1968 hea vorsa, Jerusalemachea utʼtore vatten khonddttana oslich ek nokʼkol mellʼlli ji Romi tempa voili asli. Eka munxak jivexim martana, taka lakhddachea khambear marunk khilleancho vapor kortale mhunn hanga puravo melltta. Jezu Kristak khambear marunk Romi soinikamnim osleach khilleacho vapor kelo astolo. Hi nokʼkol eka fatrachea pettie bhitor mellʼlloli. Toslea pettiek ‘ossuary’ mhunnttat. Melʼlea munxachem mas kuslea uprant tachim sukhlolim haddam tantunt dovortale. Eka munxak khambear jivexim marlea uprant, taka purunk zatalem mhunn hem dakhoita.