“Vochat Ani . . . Xis Korat”

1-6. Jehovachim Sakxi veg-veglle poristhitint koxi porgottnni kortat tea vixim ek onubhov sangat.

GHANA desant ravpi Rebecca, iskolant xiktalem. Tem ek Jehovachem Sakxi aslem ani tachem iskol tacho porgottnnecho ek vattar koso aslo. Tem sodanch tachea iskolachea begant Bible-acher adarit prokaxonam dovortalem. Ani taka interval poddttalo tednam apleak melltta ti sondhi uzar korun tachea sangata xiktoleank sakx ditalem. Hea toren tem zaitea bhurgeam sangata Bible obheas suru korunk pavlem.

² Afrikechea udente vatten, Madagascar hea zunvear, ek pioneer zoddpem ravtalem. Eka kheddea ganvant vochon porgottnni korunk, tim votant sumar 25 kilometr pois cholon voitalim ani thoim zaitea zannancho Bible obheas ghetalim.

³ Paraguay-nt ravtolea Sakxeamnim 15 veg-vegllea desantlea bhav-bhoinnam sangata mellon, ek vhoddli boat bandli. Hea boat-int 12 lok ravonk xoktale. Paraguay ani Parana nodichea deger ravtolea lokank sakx diunk tannim hi boat bandli, jea vorvim him urbevont porgottnnaram, provas korunk khub kotthin aslolea zagear porgottnni korunk pavlim.

⁴ Prithumechea sarkea Utʼtorek aslolea, Alaska-ntlim bhav-bhoinnam, gormechea tempar mellʼlloli sondhi uzar korun ekdom bori porgottnni kortat. Hea disamnim zaite tourist, boat gheun thoim ietat. Tor hea boat-im lagim, thoinchim Sakxi jahir porgottnni kortat ani veg-vegllea bhasamnim Bible-acher adarit prokaxonam dovortat. Toxench Aleut, Athabascan, Tsimshian, ani Tlingit somazantle lok ravtat thoim bori khobor porgottunk bhav-bhoinnam plane uzar kortat.

⁵ U.S.A.-chea, Texas-ant ravpi Larry, eka opgatak lagon cholonk-bhonvonk xokona ani wheelchair-ar asta. Tori astana, to ravta tea nursing home-ant taka melltta ti dor ek sondhi uzar korun to lokank Devachea Rajeachi bori khobor sangta. Toxench, Devachea Rajeant apunn poilim bhaxen porot choltolo mhunn apleak aslolea bhorvonxea vixim to dusreank sangta.—Iz. 35:5, 6.

⁶ Utʼtorechea Myanmar-ant aslole eke zomatik hajir zaunk, Sakxeancho ek zomo tin disam pasot Mandalay thaun ferryboat-int provas kortalo. Tankam bori khobor porgottchi itsa asli dekhun tim Bible-acher adarit prokaxonam vhoron tanchea sangata provas kortoleank ditalim. Dor ek pavtt, ferryboat thambtali tednam tim begin-begin tea ganvant vochon, zata titlea lokank prokaxonam ditalim. Tea mhunnosor, ferryboat-int anik dusro lok choddttalo. Tor tim porot ietalim tednam hea lokank porgott korunk tankam sondhi mellttali.

7. Jehovachim Sakxi khoincheo vatto uzar korun Devachea Rajeachi bori khobor porgottʼttat, ani tancho dhei kitem zaun asa?

⁷ Hea bhav-bhoinnam bhaxen, sonvsarbhor aslolim Jehovachim Sakxi, urben ‘Devachea Rajea vixim bore bhaxen sakx ditat.’ (Itihas 28:23) Tim ghoran-ghor porgottnni kortat, vatter mellttat tankam sakx ditat, toxench chitti boroun ani fona udexim porgottnni kortat. Tea bhair, bus-int provas kortana, park-ant pasoiek voitana, vo kamachea zagear break poddtta tednam, tankam melltta ti dor ek sondhi uzar korun tim Devachea Rajea vixim sakx ditat. Tor ami khoinchea-i vattamnim porgottnni korum, sogleank bori khobor porgottop amcho dhei zaun asa.—Mt. 10:11.

8, 9. (a) Aiz ami jem porgottnnechem kam kortat tem ek vizmit oxem ami kiteak mhunnonk zata? (b) Amkam koslo prosn ieunk puro, ani tacho zobab mellonk ami kitem korchi goroz asa?

⁸ Tor, 235-am poros chodd zageamnim porgottnni kortolea Jehovachea Sakxeam modlim, tumi-i asat kai? Hoi zalear, khuxal zaiat! Karonn sonvsarbhor zata tem porgottnnechem kam ek vizmit koxem zaun asa ani hea kamant tumcho hat asa. Punn hem kam ek vizmit oxem ami kiteak mhunnonk zata? Karonn ami zaitea oddchonneancho fuddo kortat. Zoxem, sorkar amchea kamacher bondi ghalta ani amkam dhumallo dita. Tori astana, ami soglea raxttranchea lokank Devachea Rajeachi vixim bore bhaxen sakx ditat.

⁹ Punn tumkam ghoddie ho prosn ieunk xokta: Aiz amkam zaiteo oddchonneo asat ani Soitan porgottnnechem kam bond korunk proitn korta, tori astana hem kam koxem vaddot asa? Hem zannam zaunk, poilea xekddeantlea Kristanvam sovem kitem ghoddlem tem ami zannam zaunchi goroz asa. Karonn tannim jem kam suru kelem tem aiz Jehovachim Sakxi fuddem vhortat.

Ek Ekdom Mhotvachem Kam

10. Jezun khoinchem mhotvachem kam kelem, ani to tea kama vixim kitem zannam aslo?

¹⁰ Kristi sobha suru kelʼlea Jezu Kristak Devachea Rajeachi bori khobor porgottop ekdom mhotvachem aslem. Tannem mhunnttlolem: “Devachea Rajeachi bori khobor hanvem dusrea xaramnim pasun porgottunk zai, karonn heach pasot mhaka dhaddla.” (Lukas 4:43) Ani morchea thoddeach disam poilim Rajeachi bori khobor “soglea raxttrank” porgott zatoli mhunn tannem bhasaunni kelʼli. (Marku 13:10) Punn hem kam tachean ekleanuch korunk zaunchem na mhunn to zannam aslo. Tor hem kam koxem zatolem aslem ani konn kortolo aslo?

11. Jezun aplea xisank koslem mhotvachem kam dilem, ani tem purnn korunk tankam kosli modot asli?

¹¹ Jezu jivont zalea uprant aplea xisank dixtti poddlo ani tannem tankam ek mhotvachem kam dilem. Tannem mhunnttlem: “Heach pasot, vochat ani soglea raxttranchea lokank mhoje xis korat, ani tankam Bapachea ani Putachea ani povitr xoktechea nanvan bautizm diat, ani hanvem tumkam dileat teo sogleo adnea tankam pallunk xikoiat. Ani ugddas dovrat, sonvsarachea xevottachea vella poriant hanv tumchea sangata asa.” (Mt. 28:19, 20) “Hanv tumchea sangata asa,” him utram mhunnon, porgottnni ani xis korchea kamant Jezu aplea xisank tenko ditolo mhunn tannem dakhoun dilem. Ani tankam Jezuchea modotichi goroz asli, karonn ‘soglea raxttranche lok tancho dves kortole’ mhunn Jezun poilinch sanglolem. (Mt. 24:9) Toxench, tankam anik eke toren modot mellttoli mhunn Jezuche xis zannam asle. Tem mhunnttlear, tachea xisancher povitr xokti ietoli ani tankam boll mellttolem tea vellar, “prithumechea sogleant poisulʼlea vattarant pasun” te sakx diunk pavtole mhunn Jezun tankam sanglolem.—Itihas 1:8.

12. Amkam kosle mhotvache prosn ieunk puro, ani tancho zobab zannam zavop kiteak gorjechem?

¹² Atam amkam thodde mhotvache prosn ieunk xoktat: Jezuchea apostlank ani poilea xekddeantlea Kristanvank dilʼlem kam korunk tannim apleachean zata tem soglem kelem kai? Kristi bhav-bhoinnanchea hea lhan zomeak khor dhumallo aslear pasun tim bore bhaxen sakx diunk pavlim kai? Xis korchem kam korunk, tankam Jehova koddlean ani tache povitr xoktechi modot mellʼlli kai? Hea ani osleach prosnanche zobab amkam Bible-antlea Itihas pustokant mellttat. He zobab zannam zavop ekdom gorjechem zaun asa. Karonn porgottnnechem kam “sonvsarachea xevottachea vella poriant” zatolem mhunn Jezun bhas dilʼli. Ani hi bhasaunni amkam pasun lagu zata karonn ami xevottachea kallar jietat. Hea pasot, Itihas pustokant boroilʼlem asa tem ami zannam zaunk axetat.

Itihas Pustokachi Vollokh

13, 14. (a) Itihas pustokacho boroupi konn, ani tannem boroilʼli mahiti taka koxi mellʼlli? (b) Itihas pustokant kitem asa?

¹³ Itihas pustok konnem boroilem? Hea pustokant tachea boroupeachem nanv amkam khoinch mellona, punn Lukasachem Xubhvortoman boroilem teach boroupean Itihasachem pustok boroilem mhunn tachea survatechea utramnim amkam kollon ieta. (Lukas 1:1-4; Itihas 1:1, 2) Heach pasot, Lukasan hem pustok boroilem mhunn adim thaun lok mantale. Te taka ek “mogall bhav dotor” ani ek boro itihaskar mhunn vollkhotale. (Kol. 4:14) Hea pustokant, sumar 28 vorsancho itihas boroilʼlo asa. Zo 33 K.X.-ant Jezu sorgar gelea uprant, tem 61 K.X.-ant Pauluk Romant bondkhonnint ghatlolo tea meren ghoddloleo ghoddnneo asat. Tantuntleo zaiteo ghoddnneo ghoddttana Lukas thoim aslo. Karonn hea pustokant ghoddlolea thoddea ghoddnneam vixim sangtana tannem “ami” hem utor uzar kelem. (Itihas 16:8-10; 20:5; 27:1) Tea bhair, to khatrechi mahiti diunk sodhtalo dekhun tannem Paulu, Barnabas, Filip ani heranchi modot ghetli astoli.

¹⁴ Itihas pustokant kitem asa? Lukasachea Xubhvortomanant Jezun kitem mhunnttlem ani kelem tem boroilam. Punn Itihas pustokant tachea pattlavdaramnim kitem mhunnttlem ani kelem tem boroilam. Munxanchea nodren te “xikop naslole ani chalte munis” asle, punn tanchea ojapachea kamam vixim hea pustokant vachunk melltta. (Itihas 4:13) Povitr xoktechea modotin boroilʼlea hea pustokant, Kristi sobha koxi stapon zali ani tachi vaddavoll koxi zait ravli tea vixim amkam vachunk melltta. Toxench, poilea xekddeantlea Kristanvamnim porgottnni koxe toren keli ani porgottnne vixim tancho sobhav koso aslo tem amkam kollon ieta. (Itihas 4:31; 5:42) Tea bhair, povitr xokte udexim bori khobor porgottunk tankam koxi modot zali tem-ui amkam hea pustokant dakhoilam. (Itihas 8:29, 39, 40; 13:1-3; 16:6; 18:24, 25) Bible-antlea her pustokam bhaxen hem pustok pasun, Devachem Rajea vorvim Devachem nanv koxem povitr zatolem tacher zor dita. Toxench virodh aslear pasun, Devachea Rajea vixim porgottnni koxi zait geli tem-ui sanglam.—Itihas 8:12; 19:8; 28:30, 31.

15. Itihas pustokacher bariksannen obheas kelear amkam koso faido zatolo?

¹⁵ Khorench, Itihas pustokantleo ghoddnneo ojapacheo ani amcho bhavarth ghott kortat tosleo asat! Poilea xekddeantlea Kristanvamnim urben ani dhiran koxi porgottnni keli tem ami vachtat tednam tannim kelʼlea vavracho ami valor korunk pavtat. Toxench, tanchea bhavarthachi dekh gheunk ami fuddem sortat ani ‘vochon xis korat’ mhunn Jezun dilʼli adnea pallunk amkam modot zata. Tor Itihas pustokant boroilʼlem asa tacher bariksannen obheas korunk tumkam modot zaunk, hem prokaxon toiar kelam.

Obheas Korunk Modot Korta Toslem Prokaxon

16. Hem prokaxon kiteak toiar kelam?

¹⁶ Hem prokaxon kiteak toiar kelam? Hachim tin karonnam asat: (1) Jehova aplea povitr xokte udexim porgottnnechem ani xis korchem kam korunk tenko dita mhunn amchi khatri ghott korunk, (2) poilea xekddeantlea Kristanvanchea udharonnancher bariksannen obheas korun porgottnne pasot amchi urba vaddounk, ani (3) Jehovache songottnne pasot ani porgottnnechea kamant, toxench sonvsarbhor aslolea sobhamnim fuddakar ghetoleam pasot amcho resped vaddounk.

17, 18. Hea prokaxonant mahiti koxe toren sanglea, ani hea prokaxonant anikui kitem khas asa?

¹⁷ Hea prokaxonant mahiti koxe toren dilʼli asa? Hea prokaxonant atth bhag asat. Ani dor eka bhagant, Itihas pustokantlea thoddea odheai-am vixim sanglam. Punn Itihas pustokantlea dor eka versachi somzonni tantunt diunk na. Tachea bodlek, Itihas pustokantlea ghoddnnentlean ami kitem xikonk zata ani tem ami amchea jivitant koxem lagu korunk zata, tem hea prokaxonant sanglam. Dor eka odheai-achea survatek, odheai-acho mukhel mudʼdo kitem asa ani tem Itihas pustokachea khoinchea versancher adarit asa tem-ui sanglam.

¹⁸ Hea prokaxonant anikui kitem khas asa? Hantunt sobit chitram asat, jim amkam Itihas pustokantleo ghoddnneo dolleam mukhar haddunk modot kortat. Toxench, zaitea odheai-amnim anik mahiti ditat toslim boksam asat. Thoddea boksamnim oslea lokanchim udharonnam dileant, zanchea bhavarthachi ami dekh gheunk zai. Toxench, Itihas pustokant sanglole zage, thoim ghoddloleo ghoddnneo, tea lokancheo riti-rivazo ani her lokam vixim anikui bariksannen mahiti dilʼli asa. Tor hem pustok uzar korun tumi svotacho Bible obheas kortat tednam tumkam modot zatoli.

19. Ami kosli choukoxi korunk vell kaddunk zai?

¹⁹ Hem prokaxon tumkam svotachi choukoxi korunk modot kortolem. Tumkam ghoddie porgottnnechem kam korunk laglear zaitim vorsam zalim astolim. Tori astana, tumchea jivitant tumi khoinchea vostunk chodd mhotv ditat ani porgottnnechea kama vixim tumkam koxem dista tem chintunk vell kaddat. (2 Kor. 13:5) Tumkanch vicharat: ‘Hanvem bautizm ghetlolo tednam mhaka porgottnnechem kam jitlem mhotvachem aslem, titlem aizui asa kai? (1 Kor. 7:29-31) Hanv porgottʼttam tea vixim mhaka khatri asa ani hanv tem urben sangtam kai? (1 Tes. 1:5, 6) Porgottnnechea ani xis korchea kamant bhag gheunk, hanv mhojean zata tem soglem kortam kai?ʼ—Kol. 3:23.

20, 21. Amkam dilʼlem kam kiteak chodd mhotvachem zaun asa, ani ami kitem korunk nichov korunk zai?

²⁰ Porgottnni korop ani xis korop hem amkam dilʼlem ek ekdom mhotvachem kam mhunn ami sodanch ugddas dovrunk zai. Karonn ami nimannea disamnim ravtat ani dor ek dis ami xevottachea anik lagim pavtat. Tor lokamnim Armageddona vellar salvar zaunk tannim bori khobor aikop gorjechem. Tea pasot poilim poros, atam ami porgottnnechea kamant chodd vavr korunk zai, karonn lokancho jiv dhokeant asa. Sasnachem jivit favo aslolim anik kitlim zannam bore khobrek kan ditolim tem amkam khobor na. (Itihas 13:48) Punn chodd kallav zaunchea poilim osleank modot korop amchi zobabdari zaun asa.—1 Tim. 4:16.

²¹ Hea pasot, urben porgottnni kelʼlea poilea xekddeantlea porgottnnaranchi dekh ghevop ekdom gorjechem zaun asa. Tor hem prokaxon bariksannen obheas kortana, tumi anikui chodd urben ani dhiran koxi porgottnni korunk zata tea vixim chintat. Oxem kelolean, ‘Devachea Rajea vixim bore bhaxen sakx di-itʼ ravonk tumi kelʼlo nichov anikui ghott korunk pavtolim.—Itihas 28:23.